قعدت نستنا في الصالو مع النساء حتى وين دخلو الرجال كل وحدة راحت عند راجلها قعدنا غير حنا العازبات نشوفو ما بعضانا وانا عينين غير على أحمد كان شباب بالقميص خرج عليه يهبل جات ماما قعدت قدامي تقرص فيا شفت فيها بنص عين
أسيل " ماما وجعتيني "
مليكة " وقتاه تنوضي تهدري معاه ولا تعرفي غير تشوفي "
أسيل " مامااا مشي هكاك "
مليكة " واش ماما راني غير قدامك ... الزواج مراهش لعب اذا راكي حابة تاع صح تجري على عمرك جاك الراجل على طبسي من ذهب ونتي تلعبي "
أسيل " مرانيش نلعب كيفاه حبيتيني نوض قدامهم نقولو أحمد أرواح نهدرو وحدنا "
حطت ماما يدها على راسها
نعمة " اممم أسيل اسمعي لماما عندها الحق "
أسيل " نتي اسكتي عندك الفم تهدري "
نعمة " صح انا لي قلتلك جرجريه ... بصح نتي مفهمتيش واش كنت نمعنيلك"
رحت نحل فمي نطقت مرت عمي
حورية " واش مليكة الحالة عندكم راهي تشعل بصح كلمة مسمعناهاش في واش راكم تهدرو "
مليكة " والو يا حورية البنات تعرفيهم "
حورية " اممم كيما حبيتي مالغري انا بناتك منعرفهمش كلش يديروه بالتخبية "
أسيل " عمتو يقولك لي دا حذرو سلم "
زهور " خلاص اسكتو ... محمد انا رحت نقولك راهي اسيل وصلت لسن الزواج خممت في وليد صفية هذي ديجا هدرتلي عليها وانا قلت علاه لالا"
انا عينيا فتحتهم واشنو هاذي من نيتها ياك قلتلها رايي خزرت في ماما و نعمة لقيتهم يشوفو معاها امبعد طاحت عيني على أحمد لي مسح وجهو وناض
أحمد " جدي راني طالع نقيل راسي راه يوجهم امبعد نشوفك "
طلع وخلا النار بدات تشعل
محمد " انا يا زهور معندي منقول راهي الطفلة هنا وباباها لي يعرف صلاحها "
حورية " دقيقة متقوليليش يما هذيك لي متسواش السراقة "
زهور " سوء تفاهم برك حورية متكبريش الحكاية "
حورية " مكان لا سوء تفاهم لا والو مشفتيش شري نتفتهولي وخلصت عليه دراهم كبار مخلات فيا والو حبيتي جيبي عدوتي للدار "
زهور " الله يهديك وليدها لي نسحقو مشي هيا"
أسيل " وانا منسحقوش "
شافو فيا انا خزرت في بابا
أسيل " مرانيش حابة بابا متخليهاش ماني ياك هدرتي معايا و قلتلك مرانيش قابلة "
عز الدين " بنتي مكاش لي يخليك ديري عفسة بسيف "
نضت دموعي يهبطو
