مأمنتش جازت سمانة ملي راني في دارنا و من المخدة مشفيتش نحيت راسي هههه هذاك النهار طلت عليا الشمس ونسمع الحس فوق راسي نحيت الغطا على راسي لقيت نعمة و زينب شوي وتعطيني بالكاس هذاك تاع الماء كون مبعدتش من بلاصتي
اسيل"علاه هاك عرس باه تتلمو فوق راسي فيزوج تقول ملك الموت جا يدي روحي"
زينب"بعثنالك الخدامة من قبيل تونضك قلتليها ضك جي راهي فاتت قريب ساعة منضتيش جينا نوضوك ايا نشربو قهوة "
نعمة"ايا تشو اغسلي وجهك وبدلي وهبطي هيا الشاطرة"
نضت بالسيف انا طبيعتي رقادي خفيف بصح في المنواض ثقيل كون تصرا زنزلة ولا يسرقوني منوضش على سعدي بدلت البيجاما لبست جلابة تاع دار مستورة ولحت الخمار الاسطوري لكحل هبطت لقيتهم كامل متلمين على الطابلة صبحت عليهم وقعدت
زهور"هذا وين بان القمر كيفاه يابنتي كاش متحكيلنا "
اسيل"هههه واش نحكيلك يالعزيزة مكاين والو بصح عمبالكم تشفاو لهذيك اسيل حبة بيض متعرف تقليها ضك ولات شاف كويزين"
عزالدين"راكي سور اسيل راني شاك في هذي تاع شاف واسيل وكوزينة في جملة وحدة"
ادم"جبتها بابا انا من جيهتي مأمنتكش ومن وقتاش برانسس تعرف تطيب مكاش منها"
اسيل"بابا علاه دير هاك فتحت العين لوليدك ضك يضل يعاير جدي انطق عليهم"
محمد"ايا متقلقوليش بنتي حتى وكون متعرفش للكوزينة تعرف صوالح وخداخرين"
اسيل"جديييي مرانيش نتمسخر صح واش راني نقول علاه محبيتوش تأمنو خلو نهار ندخل نخلعكم بالماكلة تاعي"
وليد"معليش اسيل ديري واش راكي حابة بصح نهار تنوي طيبي قوليلي باه نكموندي من برا خير ملي نلقا روحي متعشي بإندومي"
اسيل"تتمسخرو عليا سما معليش شوفو اذا درتلكم ماكلة بنينة تلحسو صباعتيكم موراها نتا جدي وبابا وادم ووليد غاع تحطولي ميتين ميتين حق التمسخير هذا "
عبدالله" واش بيكم الرجال كي وصتو للهدرة الصحيحة كامل سكتو خفتو"
عزالدين"شكون قال خفنا ايه قابلين نحطولك كامل ميتين هذي اذا صح درتي ماكلة بنينة"
طليت على ادم وسفيان لقيتهم يخزرو في بعضاهم امبعد قالو ايه حتى جدي يا ربي على الزهر راح نترفه كملنا شربنا و الرجال راحو للخدمة ....مور مغسلنا انا وزينب الماعن قلنا نخرجو نبدلو جو منها نشوف البلاد مليح ونحي هذا التفنيين لبست حجاب فاغ مع خمار باج وقلعت لقيت زينب تستنا فيا مام هيا تحجبت ياعمري مدرتش في بالي تتحجب حنا زايدين في دار عندنا يسموه تفتح بصح في الصح تخلف برك زعما الطفلة نورمال مديرش الحجاب وتقعد سيفيليزي ومنعرف سما زينب كي دارتو شحال فرحتلها
