الحلقة🎬😶🌫️
جيتكم ببارت هبال البارح غير كملتو حطيتهولكم نشالله يعجبكم 😏
جيت رايحة ياخوتي وليت ماشاريار منعرف اغوش ادروات متأمنوش عقلكم واش سمعو وذنيا حسبتلي طرشت ولا انا مرانيش نسمع احمد لي كان يهدر مع الراجل قالو
"اخدملي الباب مليح المرا قريب راحتلي "
عمبالكم انا الدنيا دارت بيا راه يهدر عليا انا سما لالا زعما صح واش راني نخمم ايماجيني برك احمد يكون يخمم فيا ولا جاوه المشاعر لي حسيتهم من جيهتو قلبي قاعد يدق بوحد الطريقة حسبتلي راح يحبس ونموت قبل منتزوجو هههههه ديجا وصلت للزواج بعقلي رحت مديت الريح لرجليا نكركر فيهم بلا منعرف وين رايحة كلمة المرا و راحتلي دارو فيا حالة خبطت في صحوة وبدات تعيط في وجهي منشوفش ومنعرف عميا بصح انا مكنتش دايتها فيها ورحت ديركت عنقتها حسيتها يبست امبعد عنقتني وانا حسيت عينيا بداو يدمعو هي منعرف حسبتها نبكي ولا كاش مصرالي بصح كون تعرف واش سمعت ضك وعرفته احمد يحبني ولا منعرف المهم راه حاط عينه عليا مرانيش مأمنة قعدت معنقة صحوة وانا في داخلي شابعة ضحك كون تعرف برك واش قال احمد عليا قال المرا تاعو انا هي عمبالكم تذبحني وفي بلاصت متعنقني تكسرلي عضامي امبعد بعدت تشوف فيا
صحوة "واش بيك لاباس غير الخير رجليك راهم يوجعو واش صرالك"
منكذبش البنات غاضتني شوي مكنتش نكرها صح كانت ديرلي الهردات بصح هكاك تبقى بنت عمتي
اسيل"والو تفكرت عفسة برك اسمحيلي مشفتكش "
كملت طريقي انا طايرة بالفرحة منعرف علاه وقيل كي مشاعري متبادلة وصلت لشومبرتي وانا نخمم بصح ملازمش نبين والو قال انا مرا تاعو بصح لالا يجي يخطب منأمنش واش سمعو وذنيا حتى نشوفو جا يطلبني من عند بابا هكاك حتى هجوم القوات البرية البحرية دخل عندي كانت زينب و نعمة ثمثم غلقو الباب وقعدو مقابيلي يشوفو فيا بنص عين
اسيل"ايي اي كيفاه هاذي تدخلو شومبرة بلا متدقدقو مليحة هذي حليتلكم العين "
زينب"ششش متسييش تلفيهالنا جينا على جال عفسة ياك نعمة"
نعمة"ايه الحب ومراناش خارجين حتا نفروها معاك"
اسيل"وي انطقو غير الخير "
زينب"نتي وخويا واش كاين بيناتكم ومتسييش دوري بالهدرة تاع خوك نونو متحشيهاليش "
اسيل"الله يهديكم متقولوليش هذي السينيمة على جال هاذ الجياحة تحبو تسمعو وقيل الهدرة تتعاود مرانيش بيروكي "
نعمة"تعيشي ختي بركاي فرحينا بواش رانا نستناو والله غير تتوالمو مكاش لي يفرحلك قدنا"
اسيل"عمبالي حتى وين تقوليلي بصح منقدر نقوللكم والو ضك"
زينب"ااه سما كاين تعيشي اسيل هذا مراهش عدل نتي عرفتي من نهار اللول فيه بحكاية ادم وانا لي حسبتلي رانا قراب لبعضانا متقوليليش عفسة كيما هذي "
اسيل"مشي هكا زينو متزعفيش مني تعيشي بصح مبان والو وصح مرانيش نكذب انا وخوك ضك مبيناتناش والو وحتى وكون كانت كاينة حاجة باينة في الحلال راكي تعرفي عقليتي كيفاه دايرة كيما يقولو حب التاقة عمرو ميتلاقا وقيل حسبتلكم حب هذا يتلاقا "
نعمة"ياو قيو متحشيهالناش وبركاي متتفلسفي على جدنا شفناك انا وزينب كي جيتي من الكولوار لي كان فيه احمد جيتي مدوخة كامل وباينة في عالم اخر وهذيك الابتسامة في وجهك كنتي كي البهلولة "
انا طلقت نفس طويل ماعندي مندير غير نحكي ولا ميطلقونيش حتى يعرفو والدار كامل تسمع وانا مرانيش متأكدة اذا كاينة حكاية صح
اسيل"شوفو نحكيلكم وبعدولنا على حكاية الاميرات و عالم باربي الغوز نسحق حاجة لوجيك "
زينب"اطلقي برك وحنا من وقتاه مشي لوجيك "
اسيل"احمد سمعتو قال للخدام هذاك .... قالو خدملي الباب مليح قريب راحتلي المرا"
وحد السكات شفتهم يتخازرو حتى خلعوني وهوما يسوطيو يضربو في يدين بعض
زينب"ياعمري عندنا عرس مور عرسي نعمة راكي تسمعي "
نعمة"ايييه شحال يتوالمو اسيل واحمد تخيلي ختي وخوك يجو كيوت مالغري اسيل قصيرة بصح معليش نشوفو طالو يجي "
زينب"اسمعي نتي مور عرسي نشوف كيفاه نخرجو نبداو نجهزو باينة مور متتخطبو احمد ميطولش ويدير العرس ومتعرفي يديك معاه للفرنسا بصح نسيي نهدر معاه يخليك معايا متخافيش"
انا عمبالكم معرفتش وين راني كنت كي البهيمة وسطهم هوما مأمنين الحالة و ديجا وصلو لاسموات ولادي انا واحمد ديركت جبدت بليغتي اعطيتلهم لراس
اسيل"اي جماعة وقيل حكايات الف ليلة وليلة هنا ايا تهدنو ضك نخرجكم من الشومبرة حرف منزيدهولكم قالك وليدي مالك حشا هذاك سميه لوليدك نتي "
زينب"نكارة الخير راكي لقيتي اسم مالك وتتكبري عليه "
نعمة"ايه شباب الاسم اسيل راني نتخيل تبداي تعيطي مالك ارواح لهنا تشوف هههه"
اسيل"اواه وقيل راكم تشوفوني في الشهر التاسع كرشي لفمي ياو الزواج ومزال نتوما قاللكم ولادي .... بصح سيريو مزال مبان والو نستناه يدير خطوة مرانيش باغية نبني احلام في الباطل ونفرح روحي هاك امبعد نسمعو خطب وخداخرة "
زينب"اسيل خويا ميقولش هدرة لناس غير هاك باينة راه ناوي .... اذا عرفتو دار نجيبو من وذنيه يتسحب"
اسيل"ههههه ...... عمبالكم البنات كثرت معاه بزاف الهدرة مشي برك اليوم مام الخطرة لي فاتت"
نعمة"ربي يستر واش قلتيليو نسيبي خاطيه الهدرة العيانة ونعرفو مسكين عاقل ميقول والو مشي كيما نتي وحش"
شفت فيها بنص عين وجيت نايضة عاودو جبدوني وانا بديت نحكي من نهار قبل ميولي لفرانسا لضك نعمة خبطت راسها بيدها و زينب اعطالتلي ضربة لرجلي
اسيل"ايو زينو وجعتيني بالعقل"
زينب"علاه نتي بقالك العقل وقيل الضربة ديتيها في مخك مشي في رجلك من نيتك باه زعما تنسايه تسيي تخسري معاه الهدرة باه يولي ميهدرش معاك واو عبقرية بزاف "
نعمة"مليح مدارش عليك كون وخداخر عمبالك يشنف عليك وصوتو متعاوديش تسمعيه "
زينب"مسكين خويا طاح مع وحدة جادورة "
اسيل"خلاص راكم تزيدو الندامة تاكلني هي ديجا قلبي قتلني بصح اليوم صح حسيتو تنيرفا مني هذي الخطرة"
زينب"مالا واش حبيتي يسمع ويسكت يسموك ضك تروحي تهدري معاه سيي تهدني الحالة معاه وقوليلو على الهدرة تاع الخطرة لي فاتت ينساها كامل "
اسيل"كيفاه نجبلو الخطرة لي فاتت هبلتي لا علاقة حبيتي يفيقلي وقيل "
نعمة"ارواحي انا نوريلك صلاحك "
بدات نعمة تهدر وانا نسمع امبعد ناضو شدوني رمانو على الباب وعاودو غلقوها شديت هذيك البومادة وديت طريق لعندو لقيتو مزالو ثما بصح الراجل مكاش شفت فيه هو شوي شافني كنت جاية لعندو بصح معبرنيش كامل كمل يلمد دوزان وجا رايح
اسيل"احمد دقيقة معليش"
احمد"عندي خدمة ختي خلي امبعد نهدرو"
عمبالكم هذي الخطرة كلمة ختي انا لي قتلتني المواس جازو فيا وانا لي كنت مشبعتهالو ضك دالتي
اسيل"دقيقة برك منعطلكش جيت نطلب سماح منك"
شفت طلع حواجبو زعما كلاه الاستغراب قالي من واش
اسيل"من كلش عمبالي اليامات لي فاتو كنت نكثر معاك الهدرة بصح والله مقصدي كانت عندي لابريسيو وخرجت كلش فيك بصح نتا كتر خيرك كنت تسكت ومديرش عليا بصح اليوم زدت عليها بزااف سمحلي احمد "
احمد"اسيل مرانيش زعفان منك كامل منعرف اليوم كي راني مشارجي بنتلك مقلق وقيل منك بصح صح منكذبش الجاست تاع صبح قلقتيني بيه بصح نسيتو "
اسيل"مليح ياك ضك مبيناتناش"
احمد"هه مبيناتناش من وقتاه ندي عليك منزعفش منك ضك راني رايح خير ثان ميشوفونا وتحصلي في فمهم"
اسيل"نورمال مبورطاليش فيهم تحسابلهم كيما راهم باغيين"
شفت فيه لقيت زعما شبه ابتسامة مع استغراب
احمد"غير الخير راكي مريضة مشي نتي لي قلتليلي هذيك الهدرة تحبي نفكرك "
اسيل"ايه عمبالي كنت حمارة خممت في هدرتهم و كسرولي راسي بيها وكيما قلتلك خرجت كلش فيك بصح ضك خممت قلت خليني منهم قد مندير الموسوس يقعد موسوس هدرتي انساها كيما نسيت واش صرا صبح ولا منسيتش ؟"
احمد"ههه والله غير نسيتها سما ضك نفهم معندكش بروبلام نسحق نهدر معاك قدامهم نورمال مشي ثان تعاودي دوري عليا راكي تعرفي"
اسيل"هممم لالا اذا درت ابزق في وجهي"
احمد"ياققق واش هاذ الهدرة مع ضك وقت الفطور ضك نتقيا مع ريحة الطعام راهي تشهي راني جيعان غير ضك اخطيني "
اسيل"ههههه خلاص راني سكتت وهايليك البومادة تاعك صحيت "
شدها عليا
احمد"بلا مزية كون برك خليتيها عندك حتى تبراي و يحاسبك ربي اذا عاودتي سحقيتيها و حشمتي تعاودي جي راهي باب الشومبرة تعرفيه اجبدي وحدك"
اسيل"امممم صحيت احمد يامات وتيوح الزروقية"
احمد"ان شاء الله و الوجع ان شاء الله يكون راح "
اسيل"خير من صبح المهم نقدر نحركها نورمال "
احمد"مليح اذا خصك تروحي لطبيب قوليلي متتهاونيش مع روحك صحتك اولا من كلش عمبالك"
اسيل"ايه احمد تقول راك مع بنتك الصغيرة"
احمد"ههه علاه لالا و نتي هي بنتي الصغيرة لي متتهلاش في روحها تحوس باباها يتهلا فيها "
انا بديت نضحك وحشمانة للطرف هدرة لي سمعتها قبيل مزالها طن في راسي كون لقيت كيفاه نديرها صونات تاع تيليفون نديرها بصح الله غالب مكاش كيفاه شوي ويدخل ادم يعيط على احمد
ادم"اييي احمد ياخويا عندي ساعة نستنا فيك ونتا هنا مقسر مع البرانساس تاعي "
احمد"عمبالك نسيتك كامل "
ادم"ايه صحا فرحتني الاخ كي نسيتني ونتا واش راك دير مع هذي الفصعونة"
جا ادم حط يدو على راسي وعبز عليا
اسيل"بعد عليا وجعتني ياخي حالة هاك دير لختك "
احمد"هههه ادم تكفيها الباب لي طاحت عليها صبح ونتا زدتلها التنقريش تاعك "
ادم"ايو نتا هنا منسمحلكش شحال من خطرة نقوللكم التنقريش لنسا مشي لينا الرجال بصح نتا تحب تزكر فيا "
احمد"انا مدخلنيش منبدلش هدرتي على جالك ومسكينة ختي طاحت راجلها نقراشة "
ادم طلقني وراح يجري مور احمد وهو ثان يجري انا قاعدة نشوف فيهم متفسخة بالضحك ذراري صغار زعما هذا خويا لي راح يتزوج
