#رهائن_الماضي
#الحلقة_1
قبل خمس سنوات 👇
واحد.. أثنين ..ثلاثة.. مئة ..ونقزت مربعين مرة وحدة 😂 ...قبل طحت...طبست وخذيت الحيطة((حجر)) ...تلفتت وعزقتها على اول مربع ورجعت ننقز ..واحد ..أثنين ..ثلاثة ..مئة ...كنت حافظة لعند رقم ثلاثة بس 🤭 ماما قالتلي الروضة قريب تبدأ ..وتوا تتعلمي الارقام والحروف .
وقفت وأنشوف لرسمة على الارض قدامي مرسومة بتباشير ...مربعات ..وفي كل مربع رقم ...أنا مانعرفش نلعب اللعبة هذه ...بس انشوف فيهم هكي يلعبوا ..يعزقوا في الحيطة كل مرة في مربع ويزقوا فيها برجليهم وينقزوا
رجعت عزقت الحيطة ..وننقز على المربعات ...بس رجلي زلقت وطحت على الارض ...ااااه 😫
حسيت بوجع في يدي ..شفت فيها خبش ..مسحت عليها بيدي الثانية ..وصبيت نبي نلعب نقيزة مرة أخرى ..بس صوت خالتي اتنادي من جوا : شهد ..يا شهههههد
شهد : نعم
خالتي : وينك ؟ ...شن اديري برا في عز القايلة ...خشي أمك ادور عليك
شهد : توا أنخش
خالتي : هيا بسرعة
شفت لابستي ..معبية تراب ...نفضتها بسرعة خفت من ماما اتهزبني ...وخشيت بسرعة ...ماما ...مااااما
نجلاء : تعالي يا ماما ..أنا في الدار
شهد خشت لدار : كنت نلعب برا ☺
نجلاء : هههههي ...كنه دبشك هكي ...وشوفي وجهك من الشمس ..خشي أغسلي ومعاش تطلعي برا
شهد : نبي نلعب 🥺
نجلاء : كلمة وحدة ..مش وقت لعب ..خالتك في الطريق ..ونبوا انتغدوا
شهد طرمت فمها ...ومشت خشت للحمام ..غسلت وجهها وأيديها وطولت وهيا تلعب على لامية🤭...وبعدين مشت قمعزت قدام التلفزيون
نجلاء خشت عليها : وين خوك ؟
شهد وأعيونها في الرسوم : مش عارفة
نجلاء طلعت ادور عليه : مروان ....مرواااان
شهد طفلة عمرها خمس سنوات بنت سمحة بكل ..ملفتة للنظر بجمالها ...وخاصة أن جسمها يعطي عمر أكبر من عمرها .....أمها نجلاء ..وبوها مصطفى ..وخوها مروان عمره عشر سنوات حتى هو طفل جميل ....وهذه عائلة صغيرة من ضمن عائلة كبيرة ...عائلة الحاج زيدان العارف
***************(( الكاتبة أم ناصر ))
صهيب يسوق في سيارة بوه ..وأمعاه أمه واخواته ...رن فونه : الو
عامر : هارب يافرخ اه
صهيب : تي قول خير قبل
عامر : لا خير لا شر ...طلعت عيل وتبي اتبلد
صهيب شاف لامه راكبة جنبه ..ورد يحكي : اسمع مش وقت دوة توا ...بعد نوصل انرن عليك
عامر : حذاك حد ؟؟
