#رهائن_الماضي
#الحلقة_14
#ملاحظة ياريت ماحد ينقل الحلقة برا لقروب الا بعد ربع ساعة من نزلتها ...لعند انعدل الاخطاء الاملائية
نضال فتح باب الحوش وخش ...تلاقى مع هديل : خير
هديل جاءته بشويا : تعالى نبيك
خذاته من يده وخشت للمربوعة
نضال لاحقاها : كنك شن في ياخرا ؟؟
هديل : عارف بابا شن يبي فيك ؟؟
نضال : شن يبي ؟!!
هديل : على قصتك أنتا وعنان
نضال : شنو ؟؟ 😰😰
هديل : كله من أسيل الهم الاسود
نضال : شن صار النم ؟؟
هديل : هذا لما روحنا من .....👇
.
.
.
.
نضال وقف سيارته على الحوش ..نزل هو وعنان ..والبنات اسيل وهديل ...خشوا للحوش ...نضال وعنان خشوا لحوش جدهم ...وهديل واسيل مشوا لحوشهم
أسيل اتفنص في عنان ونضال يمشوا : وربي طايح لوجهه خوك 😒
هديل : خلاص أسيل ساد خليه في حاله
أسيل ادق على الباب : أنتي عارفة وضع خوك ...وكان بابا يسمع الخبر هذا شن ايدير
هديل : مالكش دخل ... القصة بين نضال وبابا
نورية فتحت الباب والبنات خشن : كنكن اتناقرن ؟؟
هديل : مافي شي ياماما
أسيل خشت اتخبط : لا في ..ليش الكذب بس ؟؟
هديل بتفنصية : اااااسيل 😡
أسيل التفتت عليهن : شنو نكذب أنا ...اليوم والا بكرا مصيرهم يعرفوا 😑
نورية : الخبر ايسما ..كنكن بسم الله الكريم ؟؟
هديل : مافي شي ياماما ..غير اسيل اتحب اتكبر المواضيع
أسيل : الموضوع كبير اصلا ..مايبيش حد يكبره ...غير أنتي على خاطر عنان انسيتي كل شي
هديل : خلاااص أسكتي 😡
أسيل : مانيش ساكتة 😡
نورية : صكرن افواهكن .. هذا شنو ؟؟
أسيل خاشة وبصوت عالي : مانيش ساكتة ..ولدك ايحب ويتمعشق وناسي روحه شن داير ؟
هديل : خزيه ننقانك تافهة 😤
نورية تمشي وراءها : شن تحكي ...خوك كنه ؟؟
هديل : تكذب عليك ياماما ..مافي شي
أسيل وقفت وشافتلهن : لا ماندكبش ...نضال مرتبط بعنان بنت عمتي مريم ...ومش غريبة بعد فترة ايقوللكم نبيها وعدوا اخطبوها ليا
بدر : من وين جبتي الكلام هذا 😑
أسيل ارتعدت لما سمعت صوت بوها وراءها 😰 والتفتت بسرعة عليه 😣
