#رهائن_الماضي
#الحقلة_5
عنان صبت وادور في وشاحها ..وحطاته على شعرها : نعم شن تبي ؟؟
نضال يحكي بهدوء : ماعليش خشيت عليك هنا ...بس لانك ماتبيش تطلعي انفهمك شن صار
عنان : مافيش شي صار ..وياريت تتطلع قبل ايشوفك اي حد
نضال صكر الباب وأتكى عليه : مانيش طالع لعند انقول الكلمتين اللي عندي
عنان خافت أكثر : باهي أفتح الباب ..ليش صكرته 😰
نضال شافلها وابتسم : ماتخافيش ..توا نفتحه
ورد فتح الباب : بس لازم تسمعيني عنان
عنان : قول شن تبي 😒
نضال : والله كنت طالع والع من حوش عمي مصطفى ..ولما ناديتني ..كنت نحسابك وحدة من البنات اخواتي ...وربي ماكان قصدي نغلط فيك
عنان طبست من غير اي كلمة
نضال : شوفي أنتي بنت عمتي ومش برانية علينا ...مروان ولد عمي مصطفى ماشي جاي مع شباب اكبر منه ..ومش معروف في شنو ايديروا ...ونجلاء مرات عمي ماتبيش حد يكلم حد من اعيالها ...وهذا ليش تعاركت معها ..وانتي جيتي قدامي بالصدفة
عنان : وخالي مصطفى شن قال ؟
نضال تنهد : ايييييه ..عمي مصطفى خليني ساكت خير ..الكلمة الاولى والاخيرة عند نجلاء
عنان تسمع في صوت البنات خافت : باهي لو كملت كلامك ياريت تتطلع ..خايفة حد ايشوفك هنا ويفهم غلط
نضال ابتسم ورفع حاجبه : شن اللي يفهمه غلط ؟؟
عنان شافتله زين بصدمة ..وجهها قعد احمر ..وطبست
نضال ضحك ضحكة اتجنن : المهم مانبيكش تزعلي مني ..تمام
عنان ساكتة
نضال قرب منها خطوة : تمام ؟؟
عنان شافت لعيونه : تمام
نضال بحت فيها قبل يطلع ...وبعدين طلع وصكر الباب
عنان مازلت واقفة وايديها يرجفوا من الخوف والاحراج
***************(( الكاتبة أم ناصر ))
نورا اترن على عامر ..بس هوا ..مايردش عليها ..وبعدين قفل فونه بكل 💔
روحت العائلة كلها من الصالة ..والبنات دارن جوا في حوش جدهم ...وقعدوا ايصفقوا ويرقصوا من جديد
عمهم أيمن امروح هوا وعروسته من الصالة ..شد يدها وبأسها : الف مبروك
نرجس ضحكت بصوت : يبارك فيك ياروووحي
أيمن مبتسم : هوا اليوم من حقك تضحكي ..عروسة وعايشة يومها ...بس أنتي ديما تضحكي ماشالله .
نرجس رفعت الكاب عن وجهها : وليش مانضحك ...الحياة شن واخذين منها ...ليش الواحد يكملها نكد ...أنا ديما نضحك وضاربة الدنيا زيرو ...ياروووحي 😂
