#رهائن_الماضي
#الحلقة_19
أمال طول الطريق مع محمد ...وعقلها ايشيل وايجيب ...واتلوم في روحها لانها اتفكر في نرجس ومحمد وانه في شي بينهم
وكل مرة اتشوف لمحمد من الجنب ...وفي سؤال واحد على بالها ...معقولة في شي بينك وبين مرات خوك ....لا لا لا مستحيل ...اعوذ بالله من الشيطان .شنو لافكار هذين 😣
.
.
.
.
وصلوا للحوش مع باقي العيلة . .والبنات والصبايا ردن دارنا جو لعب وتصفيق من جديد في الحوش ...وهدرزة وضحك ...وبعدين كل عيلة روحت للحوشهم
.
.
.
.
أمال غيرت لاعيالها الصغار ...ولاكبار غيروا ابروحهم ...غسلوا وخشوا رقدوا ...وأمال خشت لدار النوم ...فتحت فستانها ...حولاته ...ولابست روب حوش قصير ...وقمعزت على لمراية اتفك في تسريحتها ...مع خشت محمد ...علق بدلته في الدولاب ...وجاء قرب منها ..حط ايديه على اكتافها ...وطبس ايبوس في خدها ...وأمال مش عارفة ليش كل مايقرب منها محمد اتشم ريحة العطر ...واليوم لما شمتها على نرجس حست بقرف ...وصبت بسرعة 😣
محمد : كنك ؟؟
امال : نبي نغسل وجهي
محمد رجع قرب منها : خليك هكي ...من زمان ماشفتك بمكياج زي هذا
أمال : لا مانبيش ...انحس بيه ثقيل ومضايقني
محمد شدها من خصرها : والله حلو ...أنا عاجبني
أمال فكت ايديه وخذت منشفة : محمد ماعنديش نية ..راسي مصدع ...بنعدي نغسل 😒
محمد نفخ معصب : اهوا الكلام اللي انقولك عليه ...شنو حرم فيا انا تقعدي امعايا بشكل هذا ...وبعدين اتجي اتقولك اتخون فيا 😤
.
.
.
أمال خشت الحمام وصكرت الباب تغسل في وجهها ...وتبكي 😭 ...الشك من قبل خلا العلاقة بينها وبين محمد اتخش مرحلة الخمول والبرود ...وشك اليوم ...وصلها للمرحلة التقزز منه .. مع انه عقلها مش مستوعب ولا مصدق ...بس الشك غلب على قلبها💔.
.
.
.
.
.
أسيل بعد غسلت وكل شي ...لابست بدلة الصلاة وطلعت لاقت سيف امقمعز في الصالة ...واحذاه سفرة مشكلة فواكهة وعصائر ....وغيرهم وسيف ياكل ويكتب على فونه
أسيل : واتية حبيبي ☺
سيف : واتية لشنو ؟؟
أسيل : مش قتلك خليني نمشي نتوضى وانصلوا قبل ؟؟
سيف بدون اهتمام ويأكل : صلي أنتي ...أنا صليت قبلك
أسيل : كيف .؟؟؟ 😳😳
سيف حط فونه وشافلها : عادي ..أنتي طولتي ..وأنا سبقتك
أسيل : اااها ...باهي تمام نمشي انصلي أنا
سيف : مش ضروري ...تعالي ..تلحقي على الصلاة
أسيل : بصراحة أنا زعلانة منك ... المفروض خليتنا صلينا مع بعضنا اول مرة 😒
