#رهائن_الماضي
#الحلقة_7
عنان ايديها ترجف ..خذت شيتاتها ..وشنطتها ونزلت ...فتحت الباب وركبت وهيا ترجف 😣
نضال طفى السيارة والتفت عليها : ليش خايفة عنان ؟
عنان رفعت اعيونها فيه بسرعة : مش خايفة
نضال قرب منها ويحكي بهدوء : ممكن نسألك سوأل قبل نمشوا ؟؟
عنان اتشوف لعيونه : شنو ؟؟
نضال : شن يعني عِنان ؟؟
عنان : كيف ؟!!
نضال : قصدي أسمك غريب ...ماتفهميش خطأ ...هوا حلو ...بس نادر ...شن يعني ؟
عنان ابتسمت : لا عادي ..فاهمة عليك ...متعودة على السؤال هدا من وأنا صغيرة ☺
نضال ايشوف لعيونها : وشن كان جوابك ؟؟
عنان : والله هو يعني أكثر من شي ...السحاب ..وحدود السماء ..وحاجات واجد ...بس أنا الصراحة اللي سمأني هيا جارتنا أبلة عربي عراقية ..كانت صحبة قوية مع ماما ..قالتلي ماما من اول ماجيت على الدنيا وأنا انعيط
ضحكت😂 وردت تحكي : المهم طبعي كان واعر وماعرفوش شن ايديروا امعايا وأنا مازال عمري يومين بس ..ماما كانت تبي اتسمي أسم ثاني ...بس جارتنا قالت سموها عنان....طبعا أهلي استغربوا الاسم ..والابلة العراقية قالت يعني العنيدة ..لان أهلي حاولوا ايسيطروا عليا ..بس أنا اللي كنت امسيطرة عليهم ...وغيرت نظام النوم والاكل عندهم 😂
عنان يعني اللجام ..زي للجام الخيل أكيد تعرفه...هو اللي يقود بيها الخيل ويتحكم بيها ..وجارتنا قالت البنت هذه بتكون قيادية وعنيدة في المستقبل
نضال كان أمركز معاها وأعيونه اتشوف لعيونها واللمعة اللي فيهم ...وفمها لما تضحك ..وكيف اتحاول اتبان طبيعية وقوية ...بس لون خدودها ...مبين كيف كانت منحرجة وهيا تحكي ...وكيف اتشد في اصابعها ويديها يرجفوا ...مفضوحة يا عنان 🤦♀️
نضال : حلو ..عجبني
عنان : شنو 😳
نضال أبتسم : أسمك
عنان : اها ...😣
ولع السيارة ...وطلع بيها : شن اخبار الدارسة ؟
عنان : تمام ..مازال فيها اشويا لاخبطه ..بداية العام ديما هكي
نضال : أخر سنة هذه والا لا؟
عنان : إن شالله
نضال : بالتوفيق
عنان : يارب
****************(( الكاتبة أم ناصر ))
صهيب يقرأ وايديه يرجفوا ...اللي كاتبته هبة ...كسر قلبه ..وحطم أخر أمل عنده ..في برأته من الحادث 💔
هبة وبالتاريخ واليوم ...كاتبة شن صار يوم الحادث ...التاريخ اللي مستحيل صهيب يقدر ينساه ...من قبل خمس سنوات وشن صار فيه يومها
كيف ينسى والحادث وهوا بين اعيونه ...وزي الكابوس ..كل ما يغمض اعيونه ايشوفه وكأنه اليوم 💔
