اسود بقلب ابيض

البارت التاسع عشر

بسم الله

…………

كعدت ثاني يوم جسمي متكسر ويوجعني باوعت للمكان وبسرعه فزيت تذكرت اني وين باوعت بصفي مالكيت يوسف فزيت بسرعه مفزوعه ركضت بلا شال طلعت للحديقه شفت يوسف بيد الرجل الملثم يلعب ويا باوعلي ودنك عرفت لان مالابسه حجاب دخلت غسلت وجهي ولبست حجاب ورجعت اخذت يوسف منه

ميار. هل مره سويتها مره لاتعيدها لا تشيله من يمي وجعت كلبي ترا

ملهم. شفتج نايمه وتعبانه وهوه كعد من وكت وماردت ازعجج طلعته اهنا

ميار. لا عوفه هوه يكعد جوعان ومتعوده عليه

ملهم. لا اني رضعته وشبع وطلعته لان شفته ضايج

ميار باستغراب. منين تعرف ترضعه

ملهم. اعرف المهم هسه تعالي تريكي تركت الج بالمطبخ اكل

هزيت براسي ودخلت للمطبخ لكيت مسوي بيض عيون ويمه صمون وقوري جاي كعدت اكل ونطيت نهاية صمونه ليوسف ياكل بيها

خلصت كمت شلت المواعين خليتهن بالمغسله المطبخ وصخ ويرادله تنضيف واشتهيت انضفه رحت جبت فراش وخليت يوسف بالفراش وبعدها لفيت الشال عدل وغسلت المواعين بالاول نظفت الطباخ ومسحت الكاونتر والكاع بعدها رحت فتحت المجمده لكيتها وصخه هم نضفتها خلصت تنضيف شلت يوسف دخلت للهول خليته وركضت سبحت بسرعه وطلعت لكيت ملهم بالهول يباوع ليوسف

رحت كعدت يم يوسف وحجه ملهم

ملهم. ليش نضفتي المطبخ انتي خطار ومالازم تشتغلين

ميار. لا عادي ماتعبت اصلا

ملهم. اهنا تمام هسه يا ....

يريد يعرف اسمي

ميار. اسمي ميار

ملهم. اي ميار سولفي شطلعج بنص ليل وبيدج هل طفل وابن منو هل طفل لايكون خاطفته وضيق عيونه

ميار. هذا ابني وزوجي يريد ياخذه طلكني وطردني من بيت واني خطفته وشردت بي هذا حقي وماكدر اعوفه

ملهم. متاكده ابنج واذا طلع خاطفتي من احد ترا يصير غير حجي وترحين بيها

ميار بنفي. لا لا هذا ابني شلون اخطفه انت مو شفته وياي يم دكتور

ملهم.  تمام وشراح اسوين هسه روحي للقانون ياخذه منه وينطي الج لان طفل الرضيع حق امه

ميار. لا هوه خلاني اوقع اوراق تنازل وضحك عليه.  فدوه دبرلي بيت ايجار بس هل شهر وراها بلكي تصفئ

ملهم. وحدج انتي وابنج ببيت ايجار شنو ماتخافين

ميار. عشت بين وحوش ماخاف بعد الله عليك ساعدني فدوه اني خليت املي بيك

ملهم هز راسه.  ابقئ هل الايام وانا راح اشوفلج بيت ولا تخافين راح اساعدج لحد مأمن عليج وهاا كومي شيلي غراضكم وتعالي بالغرفه الثانيه احسن