#جنة_رائد🤎
الحلقة الخامسة(5)🤎
بقلم الكاتبة خديجة رمضان (دوجي رمضان)🤎
أذكرو الله 🍃.
( الرواية بعيدة كل البعد عن الواقع الليبي+من وحي خيالي ✨💗).
~ قراءة ممتعة ~
.
.
.
.
بعد مرور اسبوعين....
فوزي واقف ع الاستعلامات ويتكلم بالتلفون ... الدكتور شوية ويوصل
رائد واقف فِ غرفته قدام المرايا يساوي ف زي الشرطة الرسمي يلي لابسه ويتكلم بالتلفون ... امم احجزلي أني الأول معاه وحتى لو تأخرت شوية ممنوع يخش حد قبلي
فوزي ... تم برو
رائد فصل الخط وشبح للباب يلي يطق بهدوء ... ادخل
اساور خشت بأبتسامة ... فاضي
رائد عقد حواجبه بهدوء ... كيف طالع تبي حاجة ؟
اساور قربت منه وقفت قدامه وعيونها علِ طول دمعو ... استحشتك
رائد تغيرو ملامحه وجبدها طول لحضنه ... اسف الفترة هادي كلها مشغول معاش فضيت لحد بكل
اساور مسحت دموعها وبعدت عليه شوية وابتسمت ... علاش تتأسف أنا مش زعلانة منك عارفة أنك مشغول علِ محمد وحتى ءني مشغولة عليه هلبا محمد يعتبر من العيلة مش رح نلومك
رائد ابتسم ع جنب ومسح ع شعرها بحنيه ... اها شاغلني هلبا موضوع محمد ضروري نسفره لألمانيا وبأذن الله يخضع لعلاج كويس وإن شاء الله يتحسن
اساور بصدمة ... بتسافر أنت معاه؟
رائد هز برأسه بمعنى إيه.
اساور ... كك كم رح تقعدو غادي؟
رائد ... علِ حسب لكن الأكيد مش رح نعطلو كلها فترة صغيرة بس وتعدي
اساور هزت براسها بمعنى تمام وقالت بتردد ... مافيها شي لو بلغت يقين وخبرتها اكيد رح تنشغل عليك هلبا
رائد باسها ع راسها واتجه للباب وهوا يقول ... مش مهم كان بتقوليلها انتي قولي المهم أني مشغول توا بعدين نجي ونتكلمو (وطلع.)
اساور قعدت تشوف للفراغ وهيا تفكر فِ ردة فعل يقين لما تعرف.
------------
جوري طلعت من الحوش ماشية للمدرسة زي كل يوم ، طلعت تليفونها وبعتت رسالة لصاحبتها هند عشان يتلاقو ف تقاطع الشارع ويمشو مع بعض🤍
وهيا تمشي وصلت لنهاية الشارع لفت انتباهَ شي غريب فِ الرجالة الاتنين يلي واقفين فِ التقاطع وقفت تشوفلهم بأستغراب ونقزت بخلعة أول ماحست بحد حضنها وعيط ف وذنها ... حبوبييي صبااااحوو
جوري دفتها بخلعة ... خلعتيني يابنتت صبح
هند بحزن ... استحشتك به معقولة هكِ تستقبليني لينا اسبوع ماشفناش بعض
جوري حضنتها ... من غير جو ع أساس أني ما أسحشتكش توا🥹.
هند بادلتها بحب وبعدت عليها بهدوء ومسكت يدها وتمشي بحماس ... اليوم بعد مانكملو مدرسة عندي ليك فيلمم يجننن عارضينه اليومم
جوري بأستغراب ... وين؟
هند ... بلا غباء حبيبي اكيد فِ السينما اليوم حافلل بأذن الله رح نغيرلك جوك
جوري ضحكت بصدمة ... عجبني الاقتراح لكن مستحيل جنات تخليني نطلع
هند ... لو ماوافقتش نتفرجو عليه فِ حوشك بسيطة
جوري ضحكت بهدوء ع تصرفات صاحبتها المجنونة وكملو مشي بضحك وجو غافلين ع الراجل يلي يلحق فيهم ويتكلم بالتلفون!.
أنت تقرأ
جنة رائد🤎(روايات ليبية)
Romance- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
