مش مسامحة اي شخص يقرا ومايتفاعلش🥰💔.
-
#جنة_رائد🤎
الحلقة التالثة (3).
بقلم الكاتبة خديجة رمضان (دوجي رمضان)🤎
أذكرو الله🍃
( الرواية بعيدة كل البعد عن الواقع الليبي+من وحي خيالي ✨💗).
~ قراءة ممتعة ~
.
.
.
.
درست السيارة قدام عمارة كبيرة.
محمد نحى حزام الأمان وفتح الباب وهوا يقول ... انزلي
جوري فتحت الباب ونزلت من غير ماتقول حتى كلمة وهوا سكر السيارة وخش للعمارة وخشت هيا وراه بخطوات خايفة ودموعها ينزلو.
محمد فتح باب الشقة وتلفتلها ... خشي
جوري قدمت خشت بسرعة من غير ماتشوف في وجه.
محمد خش وراها وسكر الباب قرب منها واشر ع الصالون ... قعمزي مانبيش نسمع منك ولاكلمة حالياً دقايق وجايك نلقاك ماسحة دموعك وتتكلمي من غير مانسألك فاهمة
جوري هزت برأسها بمعنى تمام وهياتمسح في دموعها ومتجهة للصالون.
محمد عيط بقوة ... فااااهمة؟
جوري شهقت ونقزت بخوف ... ءءي اي فاهمة
محمد فنص فيها وخش من الممر.
جوري قعمزت وهيا تعصر في يديها بخوف.
----------------------
عايدة شبحت لِ عارف ببرود ... بنمشي لحوش امي اليوم
عارف وهوا يسكر في جاكيته ... امورك بري حتى للمريخ كان تبي
عايدة شبحتله بهزوة ورجعت تحط في مكياج ع المراية.
عارف وقف ع حيله وشبحلها ... اليوم كلمتني حناي
عايدة منتبها مع الروج يلي تحط فيه كأنه مايكلمش فيها.
عارف ... قالتلي امتى بتجيبو صغار؟
عايدة ضحكت بهزوة وهوا كمل يقول ... وقالتلي شوفو دكتور كويس ولو الخلل منها تزوج من جديد.
عايدة شبحتله وهيا مبتسمة ببرود ... لما تبدأ راجل قد المسؤولية وقتها فكر فيه الكلام هذا
عارف قرب منها بغضب ... شن قصدك ياقليلة الترباية
عايدة بنفس الأبتسامة وبنفس البرود ... انت عارف كويس اني شن قصدي وكان تبي تتزوج برا اتزوج من شادك على الأقل احسن من كل يوم راقد مع وحدة مش معروف ملة اصلها من وين
عارف مسكها من فكها بقوة وقرب منها ... نرقد مع من نبي وندير شن نبي انتي ماليكش ولا دخل فياا.
عايدة دفاته وهيا بنفس البرود ... امورك خليني في حالي بس.
وتوجهت للسرير خدت شنطتها وطلعت من الغرفة.
-------------
محمد طلع من الحمام وقعمز مقابلها.
جوري شبحتله بتوتر وتكلمت بخوف وبسرعة ... اسمه رمزي تعرفت عليه من شهرين بس
محمد شبك يديه في بعض وقدم ... شنو كان بينكم
جوري خدت نفس وهيا تحاول ماتبكيش ... هدرزة ع النت بس
محمد ... قداش مرة تلاقيتو؟
جوري ... هادي المرة الأولى....ركبت معاه في السيارة وهدرزنا هدرزة عادية ونزلت بس
محمد ... يعني ماطلعتوش؟
جوري هزت برأسها بمعنى لا.
محمد ... شوفيلي جاي
جوري شبحتله بعيونها المليانات دموع.
محمد ... اني صدقتك تمام لكن وقسماً بعزة الله لو تطلعي تكدبي ياجوري لما تشوفي شي مني مستحيلل تتخيليه
جوري هزت برأسها بمعنى لا ودموعها بدو ينزلو ... والله والله مانكدب والله
محمد ناض وقف ودعك جبتهته بتعب ... نوضي اغسلي وجهك.
جوري وقفت بسرعة وتوجهت للحمام.
محمد تنهد بتعب وطلع تلفونه من جيبه اول مافتحه نصدم من كمية المكالمات يلي جاية من رائد؟
عاودله بسرعة..
أنت تقرأ
جنة رائد🤎(روايات ليبية)
Storie d'amore- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
