جنة_رائد🤎
الحلقة الثامنة(8)🤎
بقلم الكاتبة خديجة رمضان (دوجي رمضان)🤎
أذكرو الله 🍃.
( الرواية بعيدة كل البعد عن الواقع الليبي+من وحي خيالي ✨💗).
20 اعجاب و10 تعليقات انزل.
~ قراءة ممتعة ~
.
.
.
.
رائد خش للمركز تلاقى هوا ومنتصر اشرله يلحقه وخش للمكتب.
قعمز ع الكرسي ورا المكتب ومنتصر قعمز مقابله.
رائد مسك الاوراق وهوا يرتب فيهم قدامه ... شن الاوضاع كلمك فوزي
منتصر ... اي كلمني لووز وموضوعك انت شن صار فيه؟
رائد ... وافقت البنت
منتصر ... مليح
رائد لبس نظراته الطبية وشبحله بتركيز ... شن قصتك مع البنت الصغيرة ؟
منتصر توتر ... اي بنت؟
رائد رجع عيونه للأوراق ... تستغبى؟
منتصر ... اوووف مافيش قصة البنت في فترة مراهقة والباين انها تمشي في طريق غلط هذا كل شي بس
رائد ... الحراسة هادي كلها ع خاطر ماشية في طريق غلط ؟ وبعدين انت من امتى تهتم بشخص لهدرجة
منتصر بتوتر ... زي ما أنت مهتم بأختها ماتنساش انهم عيلة محمد
رائد هز برأسه وهوا مركز في الاوراق ... اممم خلي عينك عليها امالا وخليني أني لاهي فِ أختها الكبيرة
منتصر غير الموضوع ... قدرت توصل فيهم؟
رائد شبحله برفعة حاجب مستغرب بعدين فهم عليه ... اهااا لا
منتصر ... زعما طلعو برا ليبيا؟
رائد هز برأسه بمعنى لا ... مستحيل اكيد عندهم يد كبيرة في الدولة متسترة عليهم لكن سيورهم يطيحو
--------------------------------_
جنات رجعت للبيت وهيا ماسكة فِ يديها كياس خضرا ،
فتحت الباب وخشت لقت امها مقعمزة قدام التلفزيون ويدها ع خدها تنهدت بألم وحاولت تغير الجو الكئيب يلي صاير فِ الحوش قربت من امها وحطت الكياس قدامها وتكلمت بمرح ... ياسرك من التلفزيون ونوضي ديريلنا الغدي اليوم
سناء ابتسمت وخدت الكياس تشوف فيهم ... شن تبيني ندير ؟
جنات ... أنتِ ديري المحاشي واني ندير الفاصوليا والبيتزا شن رايك؟
سناء ناضت وقفت ... اي عادي
جنات ... خل نوض ميقو ونجي
سناء هزت براسها بمعنى تمام وقامت الكياس وخشت بيهم للمطبخ.
وجنات خشت للغرفة وهيا تنوض فِ مؤيد وصلتها رسالة علِ تليفونها فتحاته وشافت الرسالة من رائد فتحتها علِ طول :- صباح الخير يناسبك اليوم نتلاقو؟
جنات قعدت تشوف قدامها بتفكير وبعدين ردت :- صباح النور تعالى للحوش وبالمرة تغدا معانا.
رائد رد عليها بسرعة :- تم الساعة 2 نتلاقو.
جنات ابتسمت وباست مؤيد يلي لقاته نايض ويشوفلها بكسل ... حبيبي هيا نوض وراك مدرسة
مؤيد حضنها وتكلم بصوت ناعس ... خليني نرقد شوية تاني
جنات ضحكت وبعداته ... لالا الساعة 11:30 امتى بتفطر وتبدل ملابسك معاش في وقت را.
مؤيد حك عيونه وهز براسه ... حاضر تو نوض
جنات ... هي صحصح واطلع للحمام.
طلعت من الغرفة للمطبخ ... ماما جاينا ضيف ع الغدي
سناء شبحتلها بإستغراب ... من؟
جنات خدت تفاحة من الكيسة وقربت تغسل فيها ... رائد صاحب المرحوم
سناء عقدت حواجبها بأستغراب ... رئيس مركز الشرطة ؟
جنات كلت من التفاحة وهزت براسها بمعنى ايه.
سناء بتعجب ... من امتى تتكلمي معاه؟
جنات مركزة ع التفاحة ... من وفاة المرحوم قعد مرة مرة يكلم فيا ويسأل عَ الحال وهكِ
سناء ابتسمت ع جنب وهيا مركزة في تقطيع المعدنوس ... اممم بارك الله فيه
سكتت شوية بعدين قالت ... قداش مايعجب فيا جمال وهيبة واخلاق كامل مكمل.
جنات ضحكت ورقصت حاجبها بخبث ... ونسيتي فلوس
سناء ضحكت بقوة ... هههههههههههه قريتي افكاري
جنات ابتسمت بفرح لما شافت ضحكة امها.
أنت تقرأ
جنة رائد🤎(روايات ليبية)
Romansa- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
