جنة_رائد🤎
الحلقة التالثة عشر (13)🤎
بقلم الكاتبة خديجة رمضان (دوجي رمضان)🤎
أذكرو الله 🍃.
( الرواية بعيدة كل البعد عن الواقع الليبي+من وحي خيالي ✨💗).
50 اعجاب و25 تعليق انزل.
~ قراءة ممتعة ~
.
.
.
.
يوم جديد🌤️.
فِ شقة رائد تحديداً ف غرفة نومه، كان رائد متمدد ع السرير ويشوف للفستان يلي معلق ع الدولاب ، ابتسم أول ماأذكر انه خلاص جنة بدت ليه.
حتى لو مزال بيناتهم شوية خطوات بس مش صعبة عليه اهم شي هيا توا مرته وملكه.
ناض قعمز حك عيونه بكسل وخدي التليفون يلي يرن من جنبه ورد بصوت ناعس ... نعم
جاه صوت منتصر ... راقد؟
رائد ... همم
منتصر ... صحصح شوية معاي
رائد ... نسمع فيك
منتصر ... توا كان يكلم فيا فوزي وقالي محمد يبي يرجع لِ شقته
رائد ... كيف بيرجع؟ مش عارف عيلته قاعدين فيها؟
منتصر ... اهاا وهادي المشكلة مايعرفش علِ قصة حرق الحوش وفوزي ماعنداش علم لهذا ماحد قاله
رائد ... مشكلة ، والاستراحة ماأعتقدش انها مكان مناسب ليه مرات يتعرض لهجوم وهوا بروحه
منتصر ... خليه ف شقتك؟
رائد تنهد ... هوا هذا الحل اصلا كلم فوزي وخليهم يجو هني وخلاص.
منتصر ... تم
رائد نزل التليفون وناض للحمام.
---------------------------------------_
اساور نزلت من الدرج وهيا تسأل فِ حناها ... بابا جي؟
جهينة هزت براسها بمعنى لا ... حشمنا فوق ماانه امس ماحضرش خطوبة ولده وماشي يصرف ف فلوسه ع الفقرية هديكا
اساور ... راسي وراسها اني لما نطفشها
جهينة ... فكينا من المشاكل وخلي الامور تمشي بهدوء
اساور ... لا هدوء لازفت مش مستعدين نخسرو فلوسنا ع الناس المحتاجين حني مش مصدقة انه حتى رائد خدي وحدة شرشوحة حتى حوش ماعندهمش الزح
جهينة ... ردي بالك تقولي الكلام هذا قدام خوك مش ناقصين حني واضح عليه يبيها البنت
اساور ... واضح عليه يبيها؟ قصدك واضح عليه تستغل فيه وهوا ساخف عليها ويبي يساعدها خوي ونعرفه اما يبيها ويحبها مستحيل هياا
خشت عايدة وهيا تقول بإستفزاز ... بالعكس واضح الحب بيناتهم عجبوني لابقين لبعض
اساور شبحتلها ... أنتِ خليك ف حالك الامور العائلية ماتدخليش فيها
عايدة ... عطيت وجهة نظري ووجهة نظر الكل حتى صاحباتي يلي جو للحفلة قالولي واضح عليهم يبو بعض مش زي خطوبته هوا ويقين ههههه كلنا قاعدين نذكرو فِ ملامح وجه رائد اخخخخ قعدة بين عيوني
اساور قربت منها بغضب ... احترمي نفسك وجهة نظرك انتي وصاحباتك الشلافطية نقعيه واشربي اميته.
جهينة بحدة ... تحشمي علِ وجهك انتي وياها وقعمزو من غير عار
اساور شبحت لِ جهينة ... هيا يلي بدت واضح انها تستفز فيا
عايدة رفعت كتافها ونزلتهم ... انتي يلي واضح عليك تحسستي انا زي ماقلتلك قلت وجهة نظري فقط (وغمزتلها وقعمزت ع الطاولة بكل هدوء).
اساور تمالكت اعصابها وقعمزت جنب جهينة ، دقايق بس ونزل رائد هوا وعارف مع بعض والاجواء كانت هادية كملو فطورهم وطلع كل واحد ع شغله.
أنت تقرأ
جنة رائد🤎(روايات ليبية)
Romance- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
