#جنة_رائد🤎
الحلقة السادسة(6)🤎
بقلم الكاتبة خديجة رمضان (دوجي رمضان)🤎
أذكرو الله 🍃.
( الرواية بعيدة كل البعد عن الواقع الليبي+من وحي خيالي ✨💗).
~ قراءة ممتعة ~
.
.
.
.
نفتح بابا غرفة العناية وطلعو الممرضين وهما يجُرُو ف سرير مغطي بالأبيض.....طاحت سناء ع ركابها ودموعها خط واحد ، وجوري حضنت مؤيد وبدو يبكو مع بعض.
اما جنات قربت تجري ادف في الممرضين وهيا تعيط وتبكي ... وين رافعينه بعدو من عليه بعدو خلو خوي وين رافعينه
الممرضة مسكتها من كتافها ... لو سمحتي غلط يلي اديري فيه
جنات دفتها لين طاحت وقربت تجري بعدت من عليه الغطاء وقعدت تشوفله بصدمة ودموعها ينزلو كيف قربت يدها بتلمس وجه فِ شخص مسكها من خصرها من الخلف والممرضين غطوه بسرعة ورفعوه.
جنات تحاول تخلص روحها وهيا تبكي ... سيبنيي بعددد نبي خوي وين رافعينه حراام عليكم أني مانقدرش نعيش من غيره
رائد لفها ليه وحضنها بكل قوة ... خلاص اهدي اهدي
جنات دفنت راسها ف حضنه وهيا تبكي بالعبرة.
رائد قال بصوت خافت ... اششش اهدي
قعدت فِ حضنه دقايق لين هدت بعدها من عليه بهدوء وخداها من يدها قعمزها ع الكرسي وهوا يأشر للمرضة ... ميه لو سمحتي
الممرضة هزت براسها بمعنى تمام ورائد مد الشيشة يلي ف يده لِ جنات خدتها منه فتحتها بيدين ترجف وشربت منها شوية وهوا مشي ورا الممرضين.
سناء قعمزت ع الكرسي وسندت راسها ع الحيط وهيا تبكي ... غير وين كانت مخبية هالأيام السودة بس.
جوري قربت حضنت أمها وهيا تبكي. ، ومؤيد امشي لِ جنات وقف جنبها وحضن راسها بحنية ... معاش تبكي أني مانحبش نشوفك تبكي
جنات قعمزاته ف حجرها وبساته ع خده بحب ،
قعدو دقايق عل هالحالة لين ناضت جنات وهيا تشهق مسحت دموع مؤيد بإبهامها وحضناته ... خديت دواك؟
مؤيد ... خديته الصبح ماما عطتني قبل مانجو
جنات هزت براسها ومسكت مؤيد من يده وقربت من جوري وامها ... هيا نروحو مافيش فايدة من قعدتنا هني
جوري شبحت لِ جنات وقالت بصوت باكي ... كيف بنروحو ونخلو محمد بروحه
جنات مسحت دمعتها يلي نزلت ... إنا لله وانا اليه راجعون ، هيا ماما حبيبتي شدي حيلك ونوضي.
سناء ناضت بتعب مسكت فِ جوري ومشو قدام مع بعض.
فوزي كان واقف برا واول ماشافهم قرب منهم يجري ... عظم الله اجركم
ردت عليه جنات ... شكر الله سعيك شكرا
فوزي بتوتر ... هيا نوصلكم
جنات ... لا ماتعب..
قاطعها فوزي ... والله مايصير تفضلو معاي لِ سيارة.
جنات ماكانش عندها حيل توصف الطريق لتاكسي ولاعندها حيل للنقاش فَ هزت براسها بمعنى تمام واتجهو للسيارة.
ركبو كلهم وجوري قبل ماتركب جت عينها ف عين منتصر ، ركبت وقعدت تشوفله من الروشن لين تحركت السيارة واختفى من علِ انظارها.
------------------------------_
عايدة طلعت من المطبخ وهيا ماسكة كوب قهوة تلاقت هيا ويقين مروحة ابتسمتلها بإستفزاز وقربت منها ... وين يقونة مزال بكري خيرك؟
يقين قربت منها اكتر وتكلمت بحدة ... بطلي نفاق احسنلك حني الزوز مانطيقوش بعض والزوز عارفين الشي هذا ف لما تشوفيني تجاهليني زي مانتجاهل فيك.
عايدة ضحكت بأستهزاء ... لاصراحةً انا نحب شوفتك باش نستفزك لأنه مانرتاحش إلا لما نستفزك ونعكرلك مزاجك
يقين ربعت يديها فوق صدرها ... شن تبي ؟
عايدة ... ولا شي سلامتك حبيبي
يقين لفت وطلعت من الباب وهيا تغلي.
عايدة مشت خطواتها لين وصلت ف الصالة لقت مروة مقعمزة وتتفرج عل التلفزيون ،قعمزت ع الصالون المقابل ... شكلك من محبين الدراما التركية؟
مروة ابتسمت وهزت براسها بمعنى إيه ... متعودة نتفرج ع المسلسلات كل مانكسد
عايدة حطت رجل ع رجل ... اممم حلو
مروة ... وءنتِ تتفرجي؟
عايدة ... مرة مرة مش ديما
مروة هزت براسها وكملت تتفرج ع المسلسل.
عايدة قلبت عيونها بضجر وهيا تقول بهمس ... مش عارفة شن هالمرا العبيطة ، غير شن خلطني أني علِ هالعيلة بس.
أنت تقرأ
جنة رائد🤎(روايات ليبية)
Romance- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
