#جنة_رائد🤎
الحلقة السابعة(7)🤎
بقلم الكاتبة خديجة رمضان (دوجي رمضان)🤎
أذكرو الله 🍃.
( الرواية بعيدة كل البعد عن الواقع الليبي+من وحي خيالي ✨💗).
~ قراءة ممتعة ~
.
.
.
.
رائد درس سيارته ونزل تلاثة مع اساور تستنى فيه قدام الباب قربت منه ... كملت شغل؟
رائد تخطاها وتكلم ... حالياً اي
اساور لحقاته ف الدروج ... راكب لشقتك؟
رائد وقف وتلفتلها ... اي تبي حاجة ؟
اساور هزت براسها بمعنى لا.
رائد ... املا خيرك لاحقتيني؟
اساور حكت راسها بتوتر ... من الأخير يقين هني وتبي تتكلم معاك
رائد هز برأسه وكمل ركوب الدروج وهوا يقول ... قوليلها تجي فوق
اساور ابتسمت وقالت بصوت عالي ... تمم
رائد خش لشقته وخله الباب مفتوح دقايق بس وسمع صوت كعب يقين ، ولع التلفزيون وشبحلها بتفحص كانت لابسة سروال جينز ازرق واسع وتيشرت وردي نص كم ، قعمزت ع الصالون وهيا تمروح علِ روحها بيديها ... شقتك سخونة علاش مش مولع المكيف
رائد قلب عيونه بملل بسبب غرورها يلي مستحيل يتغير خش للكوجينة يلي عبارة عن بار.
رائد فتح الثلاجة ... شغلت المكيف تو يتعدل الجو
يقين ناضت وقفت ووقفت ع البار ... لأمتى بتقعد متجاهلني هك؟
رائد صب المشروب ف كاستين ومدلها وحدة ... مش متعمد نتجاهلك عارفة طبيعة شغلي كيف
يقين خدت الكاسة وشربت منها شوية ... حتى رسايلي ماتقدرش ترد عليهم ؟
رائد طلع واشرلها ع الصالون ... قعمزي خل نتكلمو!
يقين قعمزت وهوا قعمز ع الصالون المقابل.
يقين شبحت للخاتم ف يدها وعيونها دمعو ... كنت نحسابك راضي بالزواج مني ومعجب بيا حتى
رائد ... شوفي قصة الزواج إنتي عارفة أنه بابا يلي وراها وأني مش من النوع يلي يدور راحته مقابل راحة الناس!
يقين ضحكة بصدمة ... يلي نفهمه منك انه انت مش مرتاح معاي؟
رائد ... صدقيني المشكلة كلها مش انتي بكلل
يقين تنفست بعمق ... ملا من؟ فهمني تقدر تقولها ف وجهي عادي قولي انك ماتبيش تكمل احسن من الالغاز يلي تحكي بيهم
رائد شرب المشروب دفعة وحدة وتكلم بثقة ... بنتزوج من اخت صاحبي لتوفى!
يقين طاحت الكاسة من يدها وهيا تشوفله بصدمة!
--------------------------_
منتصر شد جوري من يدها ودفها ف الحمام وخش معاها وسكر الباب وهوا قعد مصدوم!.
يشوفلها من فوق للوطا بصدمة ... شن ديري هني؟
جوري رمشت بتوتر ... جيت مع صاحبتي مش زي...
منتصر ... الحفلة للبالغين ؟ صغار من الثانوية كيف خشيتو حتى
جوري تشوفله بخوف وساكتة.
منتصر ضحك بهزوة وهوا يشبحلها بتفحص ... واضح السبب يلي خلاكم تخشو
جوري تكلمت بتوتر ... بعد نبي نطلع
منتصر دفها وحاصرها ع الخام ... عيلتك عندها علم بالحفلة ؟
جوري اهتزو عيونها بخوف وقعدت ساكتة.
منتصر قرب اكتر من وجها اكتر لين جبهتها قريب تلامس جبهته ... تكلمي! ولا نكلمهم أني ونتأكد
جوري نزلت راسها وهزت براسها بمعنى لا.
منتصر ... هممم يعني مدايرة مافي راسك وماحد داري عليك
جوري قعدت منزلة راسها وتبكي بصمت.
منتصر قام راسها بسبابته وتلاقو عيونها الخايفة المدمعة مع عيونه الحادة✨.
جوري تكلمت بخوف ... مش رح تقول لحد؟
منتصر سارح يشوف لملامحها بهدوء.
أنت تقرأ
جنة رائد🤎(روايات ليبية)
Romance- الأمر لا يتعلق كله بالحب بل بالأمان و الثقة. - أحبكِ بقدر كل شيء لا نهايه له. ... رواية #جنة_رائد باللهجة الليبية الطرابلسية 🤎 بوليسية+رومآنسيه 🤎 ... تم النشر يُـوم 29 ديسمبر 2023. لا أسمح بسرقة احداث رواياتي ولا اسمائهم!.🚫
