طلعت من البيت وشفت سياره سيف صافه عند باب بيتنا . . كنت بركب وراه . .لكن غيرت رايي وركبت ورى عميمه علشان ما يطالعني من الجامه بعد . .
عميمه : من عصبيتج واستعيالج شوفي شو صارلج . .
سيف يصد يطالعني : تعورج؟
قلتله بدون ما اطالعه : لا . .
لاحظت ان عميمه تضحك وتهمس وانقهرت . . وتميت صاده صوب الجامه ومتجاهلتنهم على الاخر . .
سيف كان يحاول يفتح باب حوار وباب رمسه لكن ادريبه متوتر وخايف علي ومش عارف شو يسوي
سيف يصد : بخبر الدكتور يعطيج اجازه علشان ترتاحين من الكليه كم يوم . .
عميمه : باجر اليمعه سيف
سيف يرد يصد يطالعني : بسويلج واسطه برتبها لج
قلتله بنظرة جاده : شوف الدرب بتدعم
سيف يرجع يصد ويبتسم : لو قاعده ورايه جان ما صديت
عميمه : اصطلبو . .
انا : قوليله ينطب ويسكت ومايرمسني
سيف : قوليلها ما بسكت
عميمه : قلتلكم اصطلبو بس عاد . . مخليني طوفه عبيطه . . جب يلا بلا مصاخه
ابتسمت على تعليقها وابتسم سيف بعد . . وحزتها وصلنا المستشفى . .
عميمه : استغفر الله
سيف يطالعها : بلاج . .
عميمه : ييايه بزنوبة . .
ضحكت لا ارادي وسيف ابتسم : لا تفكرين تنزلين ولا بتبرا منج . .
عميمه : مابببببببببنزل . . يالله نزلو خلصو بسرعه
سيف صد : يالله . .
نزلت وكنت متوتره . . اول مره احس بهالتوتر من قربي له . . حسيت بشعور ما ينوصف . . لاحظت ان هو مرتبك من ايدينه . . كان يلعب باصابعه بطريقه تبين التوتر . .
صدلي بنظرة عصبيه خفيفه : دخلي شعرج . .
دخلت شعري من دون ما اصد له . .
مشينا لين قسم العيون . .
سيف : عطيني بطاقتج
طلعت له بطاقتي وعطيته من دون لا المس ايدينه . .
سيف : اقعدي اهني لين ما ارجع . . لاتروحين مكان . .
قلتله : انزين
مشى شوي و رد رجع : ياويلج لو تحركتي من اهني . .
قلتله وانا عاقده حياتي : قلتلك انزين َ!!
سيف : ترى ما تخوفني الا الانزين . . قولي ان شاء الله ولا ماتعرفين؟
صدت حرمه اطالعت سيف بنظرة خلته يقفط . . ابتسمت حزتها ورحت اقعد وهو مشى عني . .
سرحت بافكاري بعيد ونسيت عوقي . . متى يا سيف بمرض وبتيبني المستشفى وانت ماسك ايديني؟ وانت تمسك ويهي وتحط ايدك على عيني وتدعيلي اني اصير زينه . . متى تصير حلالي ؟ ليش كل بنت تحب لازم تنتظر . . مايصير البنت تحب وحبيبها يكون جاهز لها ! ليش قانون الحياه جذي . .
قطع افكاري صوته : في شو تفكرين . .
حطيت عيني ف عينه وانا جد مرتبكه . .
سيف خلا بينا كرسي وقعد فالانتظار معاي . . مع انه انتظار للحريم بس !! لكنه طنش
سيف : قبلج 4 . . انتظري شويه
مارديت عليه . .
سيف : زعلانه مني ؟
اطالعته : شرايك !
سيف : انزين انا شو ذنبي . . شو بايدي شو اقدر اسوي خبريني بسوي
اطالعته : املج علي ع الاقل . .
سيف : منو بيوافق على ملجه طويله خبريني وانا مستعد
صديت عنه
سيف : شفتي . . بروحج تعرفين
تمينا ساكتين فتره . .
قلتله : لا تتصل بي . .
سيف يطالعني . .
قلتله : انا مابا اغلللط . . واكبر غلط سويناه ان كلمنا بعض
سيف : وكيف بطمن عليج
اطالعته وشفت نظرة الحزن فيه . . اعرف انه مش بايده بس انا بعد ماقدر اترياه اكثر واتم ساكته بدون لا اعاتبه . .
قلتله : كل جمعه نتشاوف ترانا بتعرف اخباري . . وكل صبح وانا اروح الكليه تشوفني . . كافيه
سيف يصد الصوب الثاني : تمام . . .
انقهرت . .حتى ما قال لي لا . . ماعارضني . .
سيف : انا بعد مابا اغلط علشان ربي يوفقنا . .
ارتحت يوم قال جي . .
سيف : تاكدي . . وحطي ف بالج عدل . . انج انتي مكتوبه لي . . وما راح اسمح لاي حد ياخذج عني ما دامني حي واتنفس . . حتى بعد موتي بكتب لج وصيه انج ماتاخذين حد . . كفايا ساكت انج تحبين غيري
اطالعته بصدمه
سيف : ماتشوفين كيف لاصقه فالصقر كل ما تشوفينه . . عينج بطير من شوفتج له
حاولت اقبض ابتسامتي عسبت ماتخرب برستيجي والزعل . .
سيف ابتسم . .
قلتله : عيني صارت زينه ماحس بألم الحين
سيف : يمكن لانج كحلتي عينج فيني؟
قلتله : سخيف
ابتسم : ماعليه حتى لو صارت زينه انا ما بطمن لين اسمع الدكتور شو بيقول
صديت الصوب الثاني علشان ما يشوف ابتسامتي والفرح ف عيني . .
سيف : ماترومين تصبرين دقيقه بدون لا تصدين . . مافيج جرأه تطالعيني حتى
قلتله : نعم
سيف يبتسم : جبانه
انا : مش لازم اذكرك منو الجبان فيني
سيف : لسانج الطويل يباله قص
انا : يوم بتصرين ولي امري عقب فكر تقصه
سيف : لا ترادديني عشان ما اصفعج جدام الناس
انا : اخر شي تروم تسويه انك تلمسني
سيف اطالعني وسكت . .
وانا بلعت ريجي وانا بموت . . مادري كيف طلعت مني . . كرهت عمري وتمنيت الارض تبلعني حزتها . . انا اعرف سيف على كثر حبه لي وعشقه عمره ما مسك ايدي ولا حاول يمسك ظفري حتى . . حبه طااهر حييل . .
سيف : يوم بتصيرين حرمتي راح احاسبج على هالكلام . .
ماقدرت ارد عليه . . تميت متشلله وساكته
سيف : ع فكره . .
تميت اسمع من دون ما اشوفه
سيف : لو كررتي جمله " يوم بتصير ولي امري " لا تلومين الا نفسج . . لاني ولي غصبن عليج وغصبن على الي خلفوج . .
وقام عني بضيج وانا غمضت عيني على طول . . ردلي العوق حتى . . ندمت اني قلت ماعرف كيف طلعت مني . . فتحت عيني على صوت واحد يرقمني . .
تم هالواحد يبتسم فويهي وانا اطالعه بصدمه وبعدها نزلت عيني تجاهلته . .
تقرب مني الوقح وجابلني : سلامت عيونج . . " نزل على ركبه علشان يساويني بالطول وتم يطالعني " حرام هالعيون تتألم وتحمر . . الي عنده هالعين لازم يحفظهن بمتحف 5 نجوم عسب محد يقدر يطالع حتى من قريب
يا سيف مره ثانيه وشاف هالغبي واطي على ريله ويتكلم وياي وانا صاده الصوب الثاني . .
على طول سيف مرررغه ب بكككككككككس . .
اطالعني بعصبيه : عايبنج ؟ عايبنج علشان جيه ساكته وماتتحركين . .
اطالعته بصدمه : حاسب ع كلامك
سيف يرص ع شفاته بقوه : امشي اركبي السياره بسرعه . .
قلتله وانا الغيض بيطلع من عيني : ليش ترمسني بهالنبره وجني انا الغلطانه
سيف بغيض اكثر ويحاول يكتم اعصابه : قلتلج اركبي السياره وتجدميني . .
طنشته ومشيت بسرعه . . اخر شي سمعته " وانت يا حيوان " شكله سيف ما بيودر الريال في حاله . .
ركبت السياره بسرعه وانا متجنبه الدمعه تنزل من عيني . .
عميمه : شو صار . .بلاج . .
تميت ساكته وقابضه عمري مستحيل اصيح جدام حد . .
ركب السياره عقبها بشوي
عميمه : بلااااها شووووه مستوي . .
حرك سيف السياره بعصبيه بدون ما يرمس . . تم يسوق باستهتار . .
سيف يصارخ : عيبج يالحيوانه ؟ دش مزاجج ؟ اعرف انج مستعيله على الزواج لكن خلاص ما صار عندج ادددددددددددددددددددددب ؟؟؟
وهو يسوق بطلت باب السياره بكل غيض وعلى طول سيف ضرب برييييك بالقوو وانخبطت السياره الي ورى فينا . .
كنت بنزل لكن من صارت الدعمه خفت . . تميت اطالع سيف والخوف مازر عيني وعميمه منصدمه ماشفت رده فعلها بس سمعت شهقتها . . تم سيف يطالعني بنظرات تخوف . . كل الي سويته بلعت ريجي وسكرت باب السياره . . وقطع ها كله صاحب السياره الي ورانا وهو يدق الجامه على سيف ويصارخ ومعصب . . نزل سيف وقعدت اشوفهم يتفاهمون . .
عميمه : حركاتج طفوليه وايد . . ماتوقعتج ياهل
اتضايجت وبلعتها ما قلت شي . . ابقى غلطانه على الحركه الي سويتها . . كرهت سيف وكرهت عميمه وكرهت كل شي . . وبعدني قابضه دموعي مابصيح الا جدام امي واختي عنود ويدي . . هم الوحيدين الي حلال يشوفون دموعي . . ركب سيف السياره وانا صاده صوب الجامه متجاهله نظراته
عميمه : شو قالك
سيف : ما تعورت سيارته بس تم يتفلسف " صد ورا يطالعني "
عميمه : يالله سيف اليهال عند امي وابوي بيخبلون فيهم . . رد البيت . .
سيف : ان شاء الله . .
وحرك السياره والجو مكهررب حيل . . رن تلفوني وكانت اميه المتصله وما بغيت ارد علشان ما يسمع صوتي ويلاحظ ان فيني غبنه . .
سيف : ليش ماتردين . . منو يتصل بج
مارديت عليه
سيف : اكلمج انا . .
قلتله : مابي ارد . .
سيف عاقد حياته : منو الي يتصل؟
عميمه : خلاص سيف دخيلك ريحنا من الصدعه
سكت سيف ووصل عميمه البيت . . انا كنت يايه انزل عقبها لكن . .
سيف : انتي تمي . .
عرفت انه يبا يوصلني لين باب البيت . . سكرت باب السياره . .
حرك سيف لكن ما سار صوب طريج البيت .! غير المسار . .
قلتله : ردني البيت وين مودني . .
سيف : المستشفى . . عينج بعدها حمرا وورمت . .
تم الجو هادي بينا . . هو ساكت وانا ساكته . . وقف صوب الشيشه عبى بترول وعقبها نزل المحطه . .
اول ما خلص ياني وبطل لي الباب الوراني . .
سيف : انزلي
تميت اطالعه . .
سيف : اركبي جدام . .
بلعت ريجي ومارديت عليه
سيف : يالله . .
نزلت من السياره وبطل لي الباب الجدامي وركبت وسكر لي الباب . . عقبها ركب ومدالي كوفي . .
سيف : كابتشينو الي تحبينه . . مافيه سكر وايد
شليت عنه من دون لا اقوله حتى شكرا !
اول ماشربت سحب تلفوني على طول . .
سيف : منو الي كان يتصل بج ..
انصصصصصصب الدم كله بويهي . . وهو بالمثل .!!!
انا حاطه صورتي خلفيه كنت لابسه فستان ساحر اسود مع كريستال على الخصر وفاله شعري الطويل على طرف مع مكياج خفيف وروج احمر . . الصوره صورتني اياها عنود في عرس وحده من ربعنا . . احس اني اتشللت مارمت انطق بولا حرف . ! اول مره سيف يجوفني ب هالششكل . . كنت اشوف ملامحه لكن ماقدرت افهم شي . . ماعرفت انطق ولا عرفت اقول اي شي غير اني سحبت تلفوني منه بكل قوه وتلامس ظفري على صبعه مما خلاه على طول يبطل باب السياره وينزل المحطه مره ثانية
اانا : ليش ليش جااااااااااااااااااافني جيه .. واااااااااااااااااااي مسسسسسسسسسسسسسسسسسسسسسسسس سسسسستحيل مستحيل . . " حطيت ايدي ع ويهي " شو بيقول عني الحين . . شو بيحط في باله . . شو بيفكر . . كيف كانت نظرته لي شو دار بينه وبين نفسسسسسسسسه . . ليش نزل من السياره بهالموقف المحرررررررررررررج . . يوم بيرد شو بيقول انا شو بقول . .شو بسوي شو بتصرف . . انا ليش رضيت عميمه تنزل ليش مانزلت وراها على طول . . يارب سامحننننننننننني والله ماقصدت انه يشوف صورتي . . ماتوقعت يسويها وتيه الجراه يشل فوني بدون اذني . .
فتحت عيني وشفته عاطني الظهر وواقف ف مكان الاجباس ! مادري كيف نظرته حتى . . تمينا على هالحال 5 دقايق وعقبها رجع لي مره ثانيه وهو شال دبه ماي بارده في ايده . .
ركب السياره وحرك من غير ما اسمع منه حرف . . !!!
خفف السرعه وخذا شارع اليمين . . وصدلي ..
سيف بنبرة هاديه تعذبني : ليش تتصورين فالفون .؟ ما قايلج لا تتصورين فيه
بلعت ريجي ماعرفت ارد عليه . .
سيف : جاوبي . .
كان يطالع الشارع شوي وشوي يركز فييني . .
قعدت العب بالبي بي علشان اتجاهل هالارتباك ورد سحب فوني وحطاه ف حظنه من غيير ما يشوفه . .
سيف : ودريه عنج . . ردي عليَه
تميت ساكته
سيف : مش ذاك اليوم تحنين علي تبين كام . . خذيتلج الكام بس عشان ماتتصورين فالفون . . لو ضاع عنج ؟ لو انسرق ؟
قلتله : فيه باسورد
سيف : الميموري كارد ينشل حتى لو شي باسورد . .
قلتله : منو بيسرقه . . دومه فايدي
سيف : لو حد سوا نفس الحركه الي انا سويتها . .
بلعت ريجي ما رديت
سيف : لو لا سمح الله بعيد الشر عنج سويتي حادث وطاح تلفونج وشلاه ولد حرام؟
انا : . .
سيف : تمسحين الصور اول ماتردين البيت ولا انقليهم اي مكان آمن فالبيت . .
انا : ان شاء الله . .
ابتسم سيف . .
بعد هدوء بسيط . .
سيف يطالعني : ذبحتني الصوره . .
ذبت مكاني . .
سيف : ماقادر اشيلها من بالي . . كل شي فيها انرسم في مخي رسم . . " ابتسم " عذبتيني تراج
ماقدرت ارد عليه ولاقدرت اقول اي شي . . تميت اكح بفشله على قفطه على ماعرف شو . .
سيف : مهور . .
انا : هاه . .
سيف : ياويلج لو فكرتي تاخذين غيري . .
قلتله بعناد : باااخذ
سيف : بذبحج قسم بالله بذبحج بايديني . . والله ماخليه يلمسج الا وهم يدفنونج
قلتله بصدمه : بل عليييييك
سيف : عيل تاخذين غيري ؟ قسم بالله بايدي انهي حياتج
قلتله : ماتروم
سيف : انتي تعرفين اني اروم
انا : ماتسويها
سيف : وتعرفين اني اسويها
انا : ما بهون
سيف : يوم بتاخذين غيري بتهونين ونص
انا : قلبك ما بيطاوعك
سيف : بيطاوعني ونص يوم انج بتخونين حبي لج وما بتصونين الي بينا وبتكونين خاينه عشره
انا : انا قلتلك اسبوع بس بترياك
سيف : جربي وشوفي شو بيصير . . انتي تعرفين انه تهديداتي مش كلام
انا : وانت تعرف انه عنادي بيخليني اسوي اي شي حتى لو نهايته جحيم . .
سيف : وانا ما قلتلج شي . . قلتلج جربي . .
انا : مابترومين تذبحني
سيف : مقتنعه ؟
سكت
سيف : لانج تعرفين اني متهور واسويها ماخاف
انا : حتى انا تروم تذبحني . .
سيف : رديت عليج . .
انا : سخيف
سيف : وانتي سخيفه يوم تقولين الي تقولينه
انا : بعدني ع كلامي . .
سيف : وانا كلامي مثل ما هو . .
انا : بخبر عليك كل حد ما بتروم تسويلي شي
سيف عاقد حياته : منو فراسج ؟ منو تترييين؟
اانا : انت تعرف شكثر طولت علي وشكثر عيال عمي كانو يوني . .
سيف : وانتي حاطه عينج على حد ؟ منو فيهم دش مزاجج ؟
انا بغيض : كلهم شيوخ والزين عندهم . . والف من يتمناهم . .
سيف يصارخ : انتي وحده خرررررررررررررررررررررررر ررررررررررررررررررررررررا . . قلييييييييله ادب ومروه وذوق . .
سكت عقبها لاني ماحبه يوم يزاعق علي بهالطريقه وصديت الصوب الثاني . .
سيف بغيض يطالعني : ليش تبيني اعصب عليج ؟ ترتاحين يوم اصارخ عليج . . ترتاااحين يعني انتي ؟ يعيبج . . يعيبج توصليني لهالحاله . . كلميني طالعيني يوم ارمسسسج . .
انا : خلاص مافي شي
سيف : منو الي لازم يزعل الحين . . يرضيج اروح اقولج بنات عمي كل وحده احلى عن الثانية وهاي ذبحني طولها وهاي نظرة عينها تموت . . هاي اتمناها والف واحد يتمناها
اطالعته بكل غيض . . .اشتعلت الغيره فيني وحسيت اني بصفعه طراق لولا اني مسكت ايدي بقوه . .
سيف : هاا شو الي تحسينه ؟ شعور حلوو ؟؟؟
ماقلت شي وسكت عنه وتميت اطالع الشارع . .
سيف : غبيه والله
سكت عنه ومارديت . .
صدلي بحنان وبنبره حنونه : عينج تعورج . .
انا : لا
سيف : عيل ليش محمره ووارمه . .
انا : مادرري
سيف : صدق ماتعورج ولا ماتبين تقوليلي . .
انا : ماتعورني . .
تم الهدوء عام بينا . . ماوداني المستشفى هالمره . . وداني عياده خاصه وماكانت العياده مزحومه على طول دخلوني . .
الدكتور : لا مافيش حاقه الحمدلله
سيف : عيل ليش شكلها جيه دكتور
الدكتور يبتسم : دي عينيها حساسه اوي . . " يطالعني " حـ ديلك أطرات . . حوطيها 3 مرات فاليوم . . لمده يومين وان شاء الله حـ تبئى عينيك زي الفل . .
سيف يطالع الدكتور بجديه لانه شاق الحلج ومبتسم يطالعني . . اطالعني بنظرة علشان اقوم . . وقمت وسرت صوبه . .
من بعدها مد ايده الدكتور علشان يعطيني الوصفه لكن سيف خذها . .
سيف : مشكور ما قصرت ..
الدكتور يبتسملي : ماعملناش حاقه . .
سيف بصوت واطي : ولد اللذين . .
طلعنا : بلاااك . .
سيف : ماتشوفينه كيف يطالعحج يعل عيينه
قاطعته : لااا تدعي تنجلب عليك الدعوه . .
سيف يطالعني بعصبيه : ليش كاشخه . .
فجيت عيني ع وسعهن : انا كاشخه ؟ انا حتى جحال مش حاطه فعيني . .
سيف : امشي امشي يالله . .
وطلعنا . . نزل بعدها الصيدليه خذالي القطرات ورررد . .
سيف : لاتتسين تاخذينه 3 مرات لمده يومين . .
انا : انزين . .
تلفوني يرن . .
سيف صدلي : منو . .
قلتله : اميه . . الوو . .
امايا : انتي وييينج هالكثر
قلتلها : استوت لنا سالفه امايا بخبرج يوم برجع . . الحين راجعه انا . .
امايا : شو قالولج عن عينج
قلتلها : مافيها شي الحمدلله . . امايا تلفوني مافيه جرج بيبند فويهج . . انا الحين برجع لا تحاتيني
اامايا : يالل يالله زين اترياج مع السلامه
قلتلها : مع السلامه . .
وبند تلفوني . .
تميت اشوف سيف يسوق 40 !!!
قلتله : متى بتردني على هالسواقه
صدلي بنظرة جاده : ماتبين اتمين معايه حتى . .
ابتسمت باستهزاء : انا تقولي هالرمسه . . مادري منو الي يتهرب دوم . .
سكت سيف . .
عقب هدوء . .
سيف : قررتي انج ماترمسني . . فـ اليوم ما بسمع صوتج وباجر اكيد بتلتهين ويالبنات ومابشوفج . . مادري متى بحصل فرصه مثل هاي . .
قلتله : بخلي صقور يجرح عيني الثانيه
ابتسملي بحنان . . ورديت له الابتسامه وسرحنا بافكارنا وكل واحد فينا عايش جو وساكت . .
سيف : ماودي اردج البيت . .
كان ودي اقوله واصارخ لا تردني لاني مابا ارد . . ابا اتم معاك . . لكن في شي منعني وخلاني اسكت . . اكتفيت بالسكوت . .
يوم وصلنا قريب البيت . .
سيف : ماكنت ادري انه شعرج طويل . .
بلعت ريجي وانا ميته حيا . .
سيف يبتسم ويصدلي : ياويلج لو فكرتي تصبغينه او تقصينه . .
ما قلت شي . . تميت ساكته قافطه !!!
وصلنا البيت . .
سيف يصدلي : عينج تعورج . .
قلتله بدون ما اطالعه : لا . .
سيف : اكيد
قلتله : هيه
سيف : تحملي ع روحج . .
صديت له : انت بعد . .
سيف يبتسم . .
قبل لا انزل زقرني . .
سيف : مهور
اطالعته بدون ما اقول شي . .
سيف : ممم ماشي . . نتلاقى باجر . .
ابتسمت ونزلت من السياره ونزل الجامه على طول . .
سيف : يالله دشي داخل . .
مشيت عنه وقلبي معاه . . غمضت عيني خانقتني العبره . . خاطري اسمعها منك . . خاطري اقولها لك . . خااطري اودعك بطريقه ثانيه غير هاي . . لكن .! الله كريم
دخلت الصاله وشفت امايا فويههي . .
امايا : طولتي . .
قلتلها وانا حاطه اييدي ع راسي : صداع . .
امايا : شو قالولج . .
قلتلها : ماشي امايا لا تحاتين قالولي مافيها شي . .
امايا : سيف وينه بتشكره تعنى وداج . .
قلتلها : راح
امايا : وعمتج . .
قلتلها وانا بالعه ريجي : في بيت يدي . .
امايا : ذكريتي باجر اتششكرها . .
قلتلها : ان شاء الله . . يت عنود ؟ شلت الولد ؟
امايا : لا انا طرشته ما يت . .
قلتلها : انزين امايا انا بسير احط راسي برقد . .
امايا : تعالي تعشي . .
قلتلها : ما اشتهي اكل . .
امايا : وانا كل يوم بتعشى روووحي . .
قلتلها : دلوعه بعد ام مهره . . " ابتسمت بتعب " يالله خل تحطي العشا لين ما ابدل واصلي بنزل باكل معاج . .
امايا تبتسم : يالله اترياج . .
وصعدت فوق تنهدت بضيج وخذتلي بندول احس راسي صدع بالقو فجاه . . صليت بعدها وبدلت ونزلت اتعشيت ويا امايا وتميت قاعده معاها لحد ما سطلت وراحت عني . . قفلت البيبان ورحت غرفتي وطيت راسي وعلى طول من غمضت نمت . .
بـ صباح يوم الجمعه . . نشيت على صوت القرآن . . امايا مطوله على اذاعه القرآن وقاعده تهزب البشاكير . . شفت الساعه تشير للـ 12 انصدمت ! بسرعه قمت ورحت سبحت وقريت لي سوره الكهف وبعدها صليت الفرض والسنه وقعدت اصلي على النبي واستغفر . . بعدها نشيت طلعت لي لبس فخم . . بما انه يوم الجمعه ف هو يوم الاستعراض عند البنات . . كل جمعه البنات يتفشخرن باللبس والتعديل . . طلعت لي اللبس الي شرته لي عنود واتفقنا نلبسه هالجمعه . . عباره عن قطعتين من فوق سوده حرير وعلى الرقبه ربطه فيونكه والكم طويل ومن الخصر حزام وبعدها قطعه بيج يايه على البني الفااتح شيفون منفوش بطريقه خفيفه وراقيه . . تمكيجت مكياج سمممبل وكثرت من المسكرا ونزلت الجحال تحت عيني وحطيت قلوس بني وبلاشر . . اكتفيت بنعال مسطح يلمع وتعطرت وحطيت الدهن العود ورحت صوب امايا عسب اشل عنها المبخر واتبخر . . ودشت فويهي على طول بنت عمي . .
ميره : مهووووووووووور يالسوده تعرفين من متى نترياج " تطالعني من فوق لين تحت " اوب اوب مرررت اخيييي خفي علينا . .
ابتسمت على مرت اخي . . احب ميروه لانها دوم اتقولي مرت اخي . .
انا : الواحد ما يتكشخ يعني . .
ميره تمد لي المبخر : اندوج امج طرشتني . .
ردينا دخلنا الغرفه وحطيت لي من العود الزين وتبخرنا انا وهيه . .
انا : لا تتعبثين . . شو تسسسسوين باغراضي
ميروه تلعب بالمكياج وبفرشاه البلاشر : اتتعدل بعد . .
تصدلي . . : بخبرج سالفه . .
ابتسمت : خبريني . .
ميره : امسس . .
دشت عنود : السلام عليكم . .
ابتسمت : وعليكم السلام " حطيت ايدي ع خصري " وين الي قالت بتطقم وياي . .
عنود تطالعني واحس عينها تلف يمين ويسار . .
قلتلها : عنود بلاج . .
طاحت علينا عنود غشيانه . .
