روايه مهلكتي من جزء 19 : النهايه

الجزء التاسع عشر ( الحلقه الأولى )

( الحلقه الأولى  ) (  حصل خير   ) ❤ ❤
................
( في الحلقه السابقه )
سلمى : استنى بس استنى  .. ايه ده .؟
احمد : ايه ؟
سلمى : لا بجد ايه ده ؟
احمد : متشفلط صح ؟
سلمى : ماتتشفلط ولا تتنيل على عينك . انا بقولك ايه ده  ؟
احمد : ايه يا سلمى انتى اتجننتى ؟ ايه ؟
سلمى : ايه اللى انت لابسه تحت الجاكيت المتقطع ده
احمد : ايه اللى انا لابسه مش فاهم
سلمى : هو مش ده القميص الاخضر يا فنان ؟
يعنى انت اللى روحت المطعم وقابلت البت .. وحد بلغك وقومت مغيره مع كلب من الكلاب اصحابك ع القهوه صح .؟
دنا هطلع عين امك دلوقتى ياعم صلاح الدين انت
( ساره بتموت من الضحك وبتقوم تحوش سلمى عن احمد اللى مصممه تضربه وهو مش قادر حتى يقوم يهرب )
احمد : ساره ! ناولينى السم ناولينى
............................ ( الأولى ) ❤
( بعد اسبوعين ع القهوه )
مالك : انا كل ما افتكر اللى حصل معاك ببقي هتقهر .. وكل ده وانت مش راضي تبلغ بالورق اللى معاك
احمد : ابلغ ايه بس ده كويس انها ماشيه حلو لغاية دلوقتى .. اهو باب وسديته عن البنت وابوها ..
مصطفى : الحمد لله .. بس انت كلت علقه حلوه ياسطا
احمد : علقة ايه دى العيال كانت بتضرب بغل ..
مصطفى : هههههههههه لا مش قصدى على العلقه دى . على العلقه اللى سلمى اديتهالك بعد ما روحتلها
احمد : دى دماغها مهويه
نايم ع الارض ومتشفلط وهموت قدامها وهى كل اللى شاغلها القميص النيله ويبقي انا اللى كنت معرفش ايه ..
على : ههههههههههههه انت شكلك اصلا وانت بتحكى كان يهلك
احمد : ( بيبتسم ) يهلك فعلا ... هالكانى بنت الجزمه
حسن : بقولك ايه ؟
احمد : حد يسكت ابن الجزمه ده كمان .. جاتك داهيه فيك وف احلام امك .. ماعدتش تحلم ياض
حسن : ههههههههههه اصبر بس .. انت مجيتش عليك لحظه حتى لو ثانيه قولت لنفسك فيها انا ايه اللى جابرنى على كده .. ايه اللى يجبرك تواجه التعابين دى كلها علشانها .. البنات فيه منهم حلوين كتير وفيه منهم اللى لو جاتلها فرصه تحبك زى سلمى كده هتحبك زيها ويمكن تحبك اكتر ما سلمى تحبك
احمد : انا واخد عهد على نفسي يا حسن انى يوم ما تجيلى اللحظه دى واقول لنفسي كان عليا من ده بإيه .. واعيش ف هدوء انا وامى واخواتى بعيد عن القلق والتوتر ده .. يوم ما تجيلى اللحظه دى ساعتها بجد هبعد عنها .. لانى مش هقدر اواجه اى حاجه تطولها وانا شاكك ف حبى ليها
بس يمكن ماتصدقنيش لو اقولك ان كل يوم بتتكعبل الحكايه وبتتعقد العقده اكتر واكتر
مالك : عقده ايه ؟
احمد : العقده اللى مربطه قلبى بقلبها .. كل يوم بتتعقد ومابيبقاش ليها حل .. ف انا سارح وراها ف ملكوتها .. عايش معاها ووراها .. اهو الدنيا تخبط فيا شويه اخبط فيها شويه .. لكن مش هسيبها
مصطفى : هو انت ليه . ؟ حبيتها بالشكل ده ؟
احمد : كل حاجه حواليا بتخلينى احبها
سيبك من انها احلى واحده ف البنات
وسيبك من انها ارق مخلوق خلقه ربنا .. بس فيها حاجه كده بنت جنيه مشعبطانى فيها عمرى ما هلاقيها ف غيرها
حسن : حاجه ايه ؟
احمد : بصيتها ليا .. بتبصيلى كأنى ابنها هههههههه وبتخاف عليا رغم انها بطحتنى اكتر من مره بس حقيقى بتخاف عليا
مصطفى : بتخاف عليك ايه .. دى فتحتلك دماغك اكتر من مره
احمد : الحُب يا صديقى يعمل اكتر من كده ... دى لو مكنتش تفتحلى دماغى وقت غيرتها .. يبقي الحب مغشوش ..
مالك : مغشوش . ؟ ده على كده هتحجزلك اوضه ف مستشفى تبقي ليك مخصوص ...
احمد : يلا ربنا بيسلط ابدان على ابدان .
عمر : مسالفل يا شباب
مصطفى : اهلااااا .. عاش من شافك ياعم عمر
احمد : انت كنت غطسان فين يالا
عمر : اهو كان ورانا كام سبوبه حلوه كده ... وداخل على تجهيز حفله بنت جزمه ...
احمد : حفلة ايه . ؟
عمر : حفله عاملها راجل اعمال كبير وعازم فيها وزرا وسفرا وكبار علية القوم والعبد الله واحد من ضمن الناس اللى هتجهز للحفله دى .. بنجهز فيها بقالنا شهر
مالك : فيها مزز الحفله دى . ؟
عمر : مزز ؟ دى هتبقي درمغه ههههههههههههه دى هتبقي حاجه كده ماشوفتوهاش ولا هتشوفوها طول عمركو
على : طيب ما تشوفنا ف الحكايه دى . دخلنا فيها انشالله سفرجيه حتى
احمد : سفرجيه ايه يا روح امك ... احنا هندخل الحفله دى وهنقعد ف احلاها مطرح وسط الوزرا والناس الهاى دى . هو انت شايف نفسك قليل ليه . ؟ ولا ايه يالا يا عمر
عمر : عيونى يا كبير بس ..... اصل ...ماهو ..
احمد : ماهو ايه .. هتدخلنا ولا لا
عمر : ( بيبصلهم ) هدخلكوا بس طبعا عارفين ان الدخول رسمى . يعنى بدل وكرفتات .. حفله عليوى بقولك
احمد : وانت يعنى شايفنا هندخل بشورت وجلابيه ؟ ماحنا هنطقم
مالك : ايوه والنبى ياحاج ليفه ظبطنا الهى يسترك ... شوفلنا بس ترابيزه كلها بنات ملعلطه كده قعدنا جنبهم ومالكش دعوه
احمد : اتنيل يا بغل .. احنا لو روحنا ف هنروح نغير جو مش اكتر .. لا لينا ف بنات ولا غير بنات
مصطفى : هههههههههههههه عليا انا .؟ اقسم بالله انت هتدخل تشقط
احمد : اشقط ايه ياعم كان زمان .. بقولك بطحت دماغى وانا متشفلط تقولى اشقط ..
مالك : هههههههههههه خلاص نغير جو نغير جو ... بدل قعده القهوه اللى الواحد حفظها دى . دنا حفظت الكوبايات يا اخى
احمد : الحفله دى امتى يا عمر ؟
عمر : الخميس الجاى ... كل حاجه خلصانه .. ناقص بس الموافقه الامنيه عشان كل حاجه تخلص
احمد : طيب خلاص يعنى نعمل حسابنا ف البدل والترابيزه ولا ايه ؟
عمر : منا قولتلك خلاص بقا . هظبطلكو ترابيزه رايقه وف مكان كله ... كله مزز على راي الاخ مالك
احمد : المهم بقولكوا ايه يا عجل انت وهو ... مش عاوز لت وعجن مع البنات .. عاوزها سهره كده خفيفه نروح ونرجع من غير ما حد يعرف .. وانا يومها هبقي اقول ل سلمى انى خارج مع الشباب نلعب كوره ... تمام .؟
مصطفى : خلاص تمام . اشطا
مالك : اشطا
احمد : اتوكلنا على الله .. استرها من عندك يا رب
..................
منه : تصدقى انك واطيه يا بت يا سلمى .. بقا تجرى ورا الواد وهو متشفلط ومدغدغ بسبب القميص
سلمى : ده عيل سافل .... دى لولا ساره كان زمانى موته
منه : بس بردو محدش عارف هو كان فين ولا عمل ايه ولا كان متخرشم بالشكل ده
سلمى : ( بتبصلها وبتسكت ) المهم انه بخير .. المهم ماقولتليش هتلبسي فستان ايه ف الحفله
منه : الفستان وصل امبارح اللى طلبته يا حلوه
سلمى : اه يا واطيه يا زباله ؟ وماقولتليش ليه
منه : هههههههههههه لا دى مفاجاه بقي تبقي تشوفينى بيه هناك وانتى جهزتى ولا لسا
سلمى : اه فستانى وصل بردو من كم يوم
منه : بس هو !! احنا هنقول لاحمد والشله ولا مش هنقولهم
سلمى : والله يا منه انا مش عارفه اصلا هنعمل ايه هنقوله ولا لا .. وبابا محرج عليا انى لازم اجى لان لينا ترابيزه باسمنا انا وهو ومامى زى ترابيزتكوا بردو والشكل الاجتماعى ...... بس خايفه احمد يزعل او يحس اننا بنفرض عليه وجودنا ف الاماكن دى
منه : معاكى حق ههههههههههههههههه دى البنات هناك بتبقي ملعلطه اخر لعلطه .. ده لو جه هيخربها
سلمى : وهو ايه هيوديه حفله زى دى بس .. وبعدين هو مابيحبش الحفلات اللى بتبقي بالشكل ده ولا بالرسميات دى
منه : ههههههههههههههه عليا انا . ؟ انتى خايفه تقوليله تعالى معانا لاحسن يشبط مع واحده هناك ولا واحده تشبط فيه هههههههههههه
سلمى : انتى بتقولى فيها . ؟ ده مش عاتق ابن الجزمه .... هنلاحق عليه فين ولا فين بس ..بقولك ايه انا مش هقوله ... ولا انتى كمان هتقوليله وهخلى ساره وفريده محدش يقوله .. وهستنى .. لو لقيته يومها وراه مشوار ولا خارج مع صحابه هقوله اننا هننام وساره بايته معانا ومنه كمان وفريده .. اما لو سال وحب ان كلنا نخرج ونسهر كلنا كشله يعنى هقوله انى ورايا مشوار مهم مع بابا وماما رايحين نزور حد من قرايبنا وهاخد ساره معايا .. اشطا
منه : اشطا .. وبعدين ماتقلقيش .. على رأيك احمد مابيحبش الحفلات اللى بالشكل ده
سلمى : معاك حق ... هو يبان باد بوى اه شويه لكن لا يمكن يروح حفلات سفله بالشكل ده .. لا يمكن .. لا يمكن ابدا
...................
احمد : بقولك ايه يا عمده .. عاوزك تايفلى البدله دى تأييفه حلوه عاوزها مظبوطه عليا .. قدامك يومين اهو .
عماد : ( ترزى شاطر ) هخليك برنس الحفله ماتقلقش ..
مالك : ايوه والنبى وانا كمان ... عاوز البنات تقطع نفسها علينا هههههههههه الدنيا ناشفه ع الاخر
احمد : اهى نيتك السودا اللى هتودينا ف داهيه منك لله
مالك : ياعم داهيه ايه بس .. مانت خلاص قولت هتظبط الحجه وتقول للبنات اننا هنسهر مع بعض ..
احمد : ياعم انا مش قلقان من البنات .. وهى البنات ايه هيوديها ف اماكن وحفلات زى دى ... بس جو الحفله نفسه قالقنى
مالك : قالقك ايه بس .. ياعم انسي نفسك يوم وانبسط .. هيجرى ايه يعنى انت مش شايف الغرز اللى ف كتفك وف ضهرك .. ده غير الضرب اللى انت واكله .. ياعم فرفشلك يومين .. وبعدين ابقي غمض عينك ياعم وماتبصش على بنات .. وسيبنا احنا نبص .. البنات احلوت اوى يا صاحبي ههههههه
احمد : طيب ياخويا .. خلاص يا عمده . ؟ هستلمها منك بكره اخر النهار
عماد : عيونى يا ابو حميد ؟؟؟ وبتاعة الاستاذ مالك بردو ف نفس الميعاد
مالك : جاى ع القهوه ولا مروح
احمد : اححم . لا انا شويه وجاى ع القهوه تانى
مالك : ايوه يابا الله يسهلك ... سلملى عليها
احمد : امشي يا عجل
................
احمد : الو !
سلمى : فينك يا استاذ مش سائل يعنى
احمد : انا تحت اهو .. ماتيجى تقعدى معايا شويه
سلمى : ماشي .. نازلالك
.................
ام احمد : الو ! فينك يا ابا
احمد : ع البحر يا ست الكل .. ساعه كده وجاى
ام احمد : طيب وهات عيش وانت جاى عشان تتعشوا
احمد : حاضر
................
سلمى : وحشتنى يا مولانا
احمد : وانت كمان يا عيون مولانا ..
سلمى : شكلك رايق النهارده
احمد : لما بشوفك بروق
سلمى : ايش ايش . شكلنا هنسمع كلمتين حلوين النهارده ولا ايه
احمد : ههههههههه وانا قبل كده كان كلامى وحش ؟
سلمى : لا بس فيه ايام كده بتبقي ملعلط فيها والسكينه سارقاك وبتقول كلام يسيح الواحد
احمد : ههههههههههههه مش انا حلمت بيك الليلادى
سلمى : خير يا رب .. اخيرا .. احكى
احمد : خير اللهم اجعله خير انا وانتى قاعدين ف مكان واحد وانتى واقفه بتعمليلى بيتزا بايدك
سلمى : يا سيدى .. وبعدين
احمد : قومتى رازعانى بيها ف وشي
سلمى : ( بتنفجر م الضحك بصوت عالى )
احمد : هششششش ايه الضحكه دى .. ماتوطى حسك لاديك ف وشك
سلمى : يا اخى والله العظيم انت مسخره .. وجودك ف حياة اى حد بيحسن موده ونفسيته مهما كان شايل ومعبي
احمد : ايوه منا لغاية دلوقتى معرفش انتى ليه كنتى بتعمليلى بيتزا وليه رزعتيها ف وشي
سلمى : مش عارفه .. ادخل على جوجل كده شوف تفسير الحلم ايه ...
احمد : جوجل ايه بس وكلام فاضي ايه دانتى كنتى لابسه حتة فستان وانتى بتعملى البيتزا دى .. انا مشاعرى كلها اتحركت
سلمى : اووووف .. وايه تانى
احمد : كنتى قمر اوى ف الفستان ده وكنت بقرب منك كل شويه .. او انتى اللى كنتى بتقربي منى مش فاكر ... وانتى كل ما تقربي انا اعصابي تتعب تقربي واعصابي تتعب
سلمى : احححم .. وايه تانى .. محصلش حاجه  ؟
احمد : حاجه ايه ؟
سلمى : اى حاجه اى حاجه ؟ غمزه نظره بوسه
احمد : والله .هو ........ هو حصل بس مش هينفع احكى
سلمى : عشان خاطرى
احمد : مش هينفع بجد ده حلم .. وانتى عارفه ان الواحد ف الاحلام بيبقي واخد راحته
سلمى : ياسيدى احكى بقا ماتبقاش رخم . احكى بجد حصل ايه
احمد : فضلنا نقرب من بعض وغرائزنا اتحركت هههههههههههه وبصيت لعينك واتسحبت سحبه بنت لذينه ولفيتى ايدك على رقبتى وقربنا من بعض جداااااا و.....
سلمى : هاااا ( بتمسك ايده )
احمد : و ....
سلمى : هااااا بقا
احمد : طلعتى البيتزا من ورا ضهرك ورزعتينى بيها ف وشي
سلمى : ( المرادى بتنفجر من الضحك بشكل هيستيرى وبصوت عالى جداااااا لدرجه ان ساره بتسمعه وهى واقفه ف الشباك فوق )
احمد : تصدقى انا غلطان .. مش حاكيلك حاجه تانى
سلمى : ههههههههههه ههههههههه يا قلبي .. طب والله حلم عسل .. طب تعالى نمثل الحلم ده وانا مش هرزعك بحاجه والله .. وهكمل معاك الحلم
احمد : بس يا مهزأه ... قومى يلا اطلعى انا هروح اتعشي وهبقي انزل اقعد ع القهوه تانى
سلمى : مش رايح ف حته تانى
احمد : لا انا مأنتخ النهارده .... احححم . العيال بيقولوا عاوزين يلعبوا كوره يوم الخميس وجايبين فرقه من بره نلاعبهم وبتاع
سلمى : احممممم .. الخميس أنهى .. الخميس ده ؟
احمد : اه ... ف احتمال اروح ألعب معاهم بقا ...
سلمى : احححم . مااشي يا بابا المهم تتبسط
احمد : هتعملى حاجه يوم الخميس يعنى ولا ايه ؟
سلمى : لا اعمل ايه . انا هقعد ف البيت بقا ونسهر وممكن اخلى منه وفريده ييجو يسهروا معانا
احمد : ياريت . احسن حاجه عشان اتطمن والنبى
سلمى : تتطمن على ايه ؟
احمد : ايه ؟ لا اقصد يعنى انكوا قاعدين مع بعض وكده يعنى
سلمى : وانا بردو هتطمن انك رايح تلعب الماتش ده
احمد : هتتطمنى ليه ؟
سلمى : ايه ؟ لا اصل عشان هبقي عارفه انك مع صحابك يعنى مش بتلعب بديلك
احمد : الحمد لله .. ربنا يطمن قلوبنا يارب .. يارب ويسترها
سلمى : امين يارب .. ربنا يسترها فعلا
احمد : يلا قومى بقا
سلمى : مافيش بوسه علينا طيب
...............
مالك : ايه يا صاحبي آمان . ؟
احمد : آمان الامانات كلها ... الهانم هتسهر مع العيال ف البيت عندها
مصطفى : يعنى الدنيا سالكه
احمد : الحمد لله
..........
ساره : هاا قالك ايه .امان   ؟؟
سلمى : لا اتطمنى .. امان الامان
ساره : هيكون فين
سلمى : هيروح يلعب كوره مع العيال مع عيال من بره ومش هيخلصوا قبل الفجر .. يكون احنا روحنا ورجعنا كمان ...
ساره : هووووف .. طمتينى ... يعنى سالكه . ؟
سلمى : سالكه اتطمنى .. تعالى بقا نقيس ونشوف الفساتين بتاعتنا
...........
يتبع
ماتخافوش يا جماعه ان شاء الله تكون حفله غير الحفله