روايه مهلكتي من جزء 19 : النهايه

( الحلقه الثالثه ) ( لا ليا ولا لغيرى ) ❤ ❤

( الحلقه الثالثه  ) (  لا ليا ولا لغيرى   ) ❤ ❤
................
( في الحلقه السابقه )
مصطفى : ( بيوصل لترابيزة احمد وبيوطى تحت الترابيزه )
احمد : مالك يالا ؟
مصطفى : وطى بسرعه
احمد : اوطى ليه يا اهبل انت .. ماتقوم يالا
مصطفى : بقولك وطى .. سلمى هنا
احمد : ( بيوطى وبيدخل تحت الترابيزه ) سلمى مين الله يخربيت امك ؟
...................... (الثالثه ) ❤
غاده : ( بتيجى واحده صاحبتها بتسلم عليها وبتاخدها وبتمشي )
احمد : وسلمى ايه اللى جابها هنا يا وش الفقر انت
مصطفى : وانا ايش عرف امى .. دى جايه هى والبنات كلهم
احمد : البنات كلهم ؟ طب وبعدين .. هنخلع ازاى ياللى يبتليك بمصيبه
مصطفى : ( كاتم الضحكه ) بقولك ايه .. امشي مقرفص كده لغاية الباب اللى قدامنا ده وهنلف من الناحيه التانيه
احمد : والعيال فين . لاحسن يتشافوا
مصطفى : انا خليت مالك يدور عليهم وياخدهم ويمشوا من بره بره ... يلا احنا بس .. يلا يابا
احمد : طب هما أنهى اتجاه
مصطفى : من الناحيادى .. هنخلع احنا من الباب ده ... قوم .. قوم ياخويا ياعينى عليك وع اللى هيجرالك
................
ساره : لا بس الحفله شكلها شيك يا بنات
منه : معاك حق .. بس البنات مزوداها اوى ههههههههههه تخيلى يا لوم لو احمد كان معانا هنا .. كان عمل ايه
سلمى : كان عمل ايه ؟ كان شقطله ييجى تلات اربع بنات ... ابو شكله
فريده : ههههههههههه مش عاتق اقسم بالله ..
منه : مالك سرحانه ف ايه يا سلمى
سلمى : مش عارفه .. حاسه باحساس حلو كده شامه ريحة حاجه حلوه
منه : شغل برفانات بقي
سلمى : مش حكايه برفيوم ....
منه : اومال ؟
سلمى : مش عارفه .. فكك فكك ...
فريده : بت يا سلمى عاوزه اقولك حاجه
سلمى : خير يا ديدا
فريده : انتى زى القمر ... اقسم بالله مغطيه ع البنات كلهم وحاسه ان انظار الناس كلهم علينا بسببك .. بسببك انتى والبت المفعوصه منه دى
منه : انتى العسل والشقرا بتاعتنا يا ديدا ..
سلمى : ماهو ده اللى مخلينى مش مرتاحه .. مابحبش انا جو الحفلات دى .. بقولكوا ايه . احنا هنستنى اهالينا ييجو . ونقعد شويه نسلم على الناس وبعد كده نمشي
منه : ليه بس .. داحنا يدوبك داخلين .. اتبسطى اتبسطى شويه خلينا نغير جو التوتر والقلق اللى عايشين فيه .... كلها اسبوعين وداخلين على امتحانات كمان
............
مالك : ( بيمشى موطى ) ولا يا على
على : ايه ياعم . انت ماشي كده ليه ؟
مالك : فين الواد حسن
على : معرفش كان هنا من شويه ليه ؟
مالك : ليه ايه بس هنروح ف داهيه ... البنات كلهم هنا
على : بنات مين . ؟
مالك : سلمى والبنات ... مصطفى بيدور على احمد وهياخده ويخلعوا من الباب التانى .. فين الزفت اللى اسمه حسن .. خلينا ناخده ونمشي احنا كمان
على : يخربيوتكو ... وده ايه اللى جابهم ..
مالك : مش وقت اسئلة امك دى دلوقتى .. فين حسن ؟
على : كان هنا والله ... تلاقيه راح الحمام
مالك : طب بص عليه ... وخلى بالك م البنات . هما قاعدين الناحيه اللى هناك دى .. بالراحه ماتخليش حد يحس ولا يشوفك ... بسرعه والنبى
.....................
مصطفى : اوووف . الحمد لله
احمد : رن على ولاد الكلب اللى جوه شوفهم ف انهى داهيه .. يانهار اسود
مصطفى : ايه يابا ؟
احمد : ابو سلمى وام سلمى طالعين من ع السلم .. اخلع ... اخلع بسرعه ( بيزق مصطفى ناحية السلم وبيروح هو ناحيه السلم الجهه التانيه وبيطلع بيستخبى ورا شجره )
................
( ف الحمامات )
حسن : حد جوه يا شباب . ؟
أحد الضيوف : اه يا ريس .. دقيقه بس وطالع
حسن : براحتك ( بيبص ف المرايه بيظبط وشه وشعره وبيغنى وبيصفر )
.............
( سلمى قاعده بتبص يمين وشمال بنوع من الفضول والقلق )
منه : ماتقومى يا لومه شويه نتمشي ونسلم على البنات اللى قاعدين الناحيه التانيه عمالين يشاورولنا
سلمى : بنات مين .  ؟
منه : ليلى وشهد .. احيه استنى . مش دى هدى بنت دكتور يوسف .؟ بقالنا كتير ماشوفناهاش . ماتيجى نسلم عليها
سلمى : هى فين الواطيه دى . والله وحشانى
منه : قومى قومى نسلم عليها ههههههههه هى مالها محلويه كده ليه
.........
هدى : مش مصدقه نفسي .. اخيرا شوفتكوا تاني يا مفاعيص
سلمى : من ساعة ما اتخرجتى وانتى هربتى
هدى : هههههههههههه يا حبايبى مقدرش اهرب منكو  بس اعمل ايه بقا ف عميد كليتكو ... دكتور يوسف بيه . ابويا ... مديلى اشغال اد كده وبيقولى لازم تخلصيهم عشان امسكك الشغل
منه : لا بس محلويه اوى يا عسل انت
هدى : انتو اللى قمرات يا مزز .. اومال فين باقى الشله .. احمد افندى وباقى الشباب
سلمى : لا احمد ايه اللى هنجيبه معانا ف حفله زى دى . انتى مش عارفاه
هدى : ههههههههههههههه انتى هتقوليلى ؟ كان زمانه شابط مع كم واحده . ده سره باتع
منه : هههههههههه معاك حق . عشان كده ماقولنالوش اننا جايين الحفله دى اصلا
هدى : خير ما عملتوا ... طب ما تيجو تقعدوا معانا
سلمى : ماشي يا حبيبتى . هنلف لفه بس وجايينلك تانى
.......
مالك : ولا يا على . اخلع بسرعه امشي . البنات جايين ناحيتنا
على : طب وحسن ؟
مالك : اخرج بس وهنرن عليه لما نخرج اخرج يابن الفقريه جايين علينا
......................
مالك : ايه ده .. ايه يا مصطفى .. فين الفنان
مصطفى : فنان ايه بس . ده زقنى وراح الناحيه التانيه .. ابو سلمى لسا داخل هو وامها .. كانو هيشوفونا
مالك : يا نهار احوس هههههههههه
مصطفى : اومال فين حسن ؟
مالك : مالحقناهوش .. كنا بندور عليه بس البنات كانت بتتمشي وجايين ناحيتنا خرجنا بسرعه
مصطفى : طب رنوا عليه بسرعه .. دا ممكن يودينا ف داهيه
...........
ساره : لومه انا خارجه بره ثوانى وجايه هرن على ماما بس عشان بترن عليا ومش سامعاها م الدوشه اجى معاك ؟
سلمى : لا لا مش مستاهله .. دى دقيقه وراجعه
..............
على : ولااااااااااااااا اخلع بسرعه البت ساره جايه ناحية بره .. شكلها خارجه
احمد : الله يخربيت ابوكو .... اخلع .. اروح فين انا دلوقتى . ( بيسيبهم وبيجرى ناحيه تانيه غير اللى هما جريوا منها )
..............
ساره : الو ! ايوه يا ماما .. اه يا حبيبتى وصلنا .. الحفله لطيفه وحلوه وانا قاعده مع البنات اهو ... حاضر مش هنتأخر ..
..................
( ف الحمامات )
حسن : ايه يا اخواننا .. لسا كتير . ؟ بقالى اكتر من 10 دقايق مستنى ..
احد الضيوف : ثوانى يا عمنا ثوانى
.................
هشام : ايه كمية المزز دى ياض يا وليد
وليد : إلعب ههههههههه خلى بالك عشان غاده قاعده قدامنا مع اصحابها
هشام : ماهى قاعده لوحدها اهى .. اومال قولتلى انها ممكن تدخل تغيظنى بواحد تانى .. مش قولتلك انها ماتقدرش تستغنى عنى ..
وليد : هتصالحها ؟
هشام : شويه كده .. أما العب بديلى شويه واشوف اى بنت من اللى نعرفهم تعالى بس تعالى .. بقولك ايه  ؟انت تعرف البنتين دول ؟
وليد : لا .. معرفهمش
هشام : لا بس ايه ده ؟ ايه الجمال ده
وليد : البت اللى عنيها زرقا دى قمر اوى
هشام : واللى جنبها ياسطا .. ايه ده  ؟ والله ما شوفت كده قبل كده .. تعالى كده
وليد : على فين . ؟
هشام : تعالى بس
.................
هشام : ازيك يا عوص
عصام : اهلاااااااا ازيك يا اتش .. عامل ايه ؟ عامل ايه يا وليد
وليد : بخير ياسطا
هشام : ايه جاى لوحدك ولا ايه
عصام : لا معايا العيال بس بلفلف شويه .. اخبار غاده ايه
هشام : اهو . جايز نفركش
عصام : تانى ؟ ههههههههههه انت يابنى بتفركش معاها اكتر ما بترتبط بيها
هشام : اه والله .. علاقه توكسيك اوى هههههههه المهم بقولك ايه
عصام : هاااااااااا . حاطط عينك على واحده ف الحفله وعاوزنى اكريلك عليها صح
هشام : حبيبى اللى فاهمنى ههههههههههههه
عصام : قول يا كبير .. انهى واحده
هشام : ام فستان اخضر دى
عصام : فين دى  ؟ اه ... يعنى اخترت اجمل واحده ف الحفله يابن المحظوظه
هشام : انت تعرفها . ؟
عصام : معرفهاش شخصيا .. بس لينا شغل مع ابوها ..
هشام : متريشه يعنى ؟
عصام : يابا معديين .. ابوها ملياردير
هشام : ( بيطلع سيجاره وبيبص ل سلمى من بعيد ) وايه تانى .. شكلها صغيره لسا
عصام : ف الجامعه تقريبا لسا ... بس بقولك ايه .. ماتقربلهاش بقا عشان هى وحيده ابوها وامها .. وابوها مابيهزرش
هشام : ماهو ده عز الطلب ... بص انا هعمل محاوله وياصابت يا خابت
عصام : ربنا معاك
..................
وليد : بقولك ايه يا اتش .. شوفلى كده صاحبتها ام عيون زرقا دى . شوف الدنيا وبلغنى . ولو ظبطت اظبطنى معاك الله يكرمك
هشام : تعالى بس تعالى .. شكلى حلو ؟
وليد : قمر
.........
هشام : مساء الخير
سلمى : ( بتبصله من فوق لتحت )
منه : ( بدون اهتمام ) اهلا . خير ؟
هشام : بتدوروا على حد ؟
منه : حاجه تخصك يعنى ؟
هشام : ( بيبص على سلمى وبيدقق ف ملامحها )
سلمى : انت بتبص على ايه ؟ ماتروح يا بابا تشوف انت رايح فين ولا جاى منين .. دى بلاوى ايه دى ؟ ( بتمسك ايد منه وبتمشي )
.................
حسن : يا جماعه خلصونا . ايه ؟ انتوا بتنامو  ؟
...................
احمد : الو ! البت دخلت ولا لسا
مصطفى : لسا واقفه بره .. انت فين ؟
احمد : انا فوق السلم الله يحرقكو ورا الشجره .. والله ما اعرف انا نطيت وطلعت ازاى
مصطفى : ( بيكتم الضحكه ومش قادر ) طب خلاص هانت ..هنخلع اهو
احمد : الواد حسن ف أنهى داهيه ربنا ينتقم منكو
مصطفى : برن على أهله مابيجمعش التلفون ولا شكله مقفول
احمد : رنو عليه تانى . خلصونى من الليله دى ياولاد المفضوحه
.....................
حسن : يا جماعه ما تخلصونا . اروح اعملها يعنى ف حمام البنات ؟
...............
وليد : ايه الدنيا ؟
هشام : كرباج .. البت كرباج يخربيت كده ..
وليد : كرباج ايه دى شطفتك
هشام : ماهو ده اللى مبهدلنى .. بقولك ايه انا مش طالع الليلادى من هنا غير وانا معايا رقمها .. تعالى بس نشوف اى حد يعرفها يوصلنا بيهم
.............
شيرين : بقولك ايه يا دودو ؟ الواد هشام شكله بيلاغى واحده
غاده : سيبك منه . خلاص رميت طوبته . انا ف الواد اللى عماله ادور عليه ده مش لاقياه
شيرين : راح فين ؟ يمكن بره بيشربله سيجاره ولا حاجه
غاده : تصدقى ممكن ؟ خليك هنا . هخرج اشوفه
..................
غاده : مسالخير يا قمرايه
ساره : اهلا مساء النور ..
غاده : بقولك ايه سؤال سخيف معلش .. بس مالمحتيش ولد كده واقف هنا لابس بدله من غير كرافته .. ع القميص بس
ساره : هههههههههه معلش مش واخده بالى . الحفله كلها بنفس المواصفات اللى بتقوليها دى
غاده : ههههههههههه معاكى حق . هو حليوه كده وحاجبه زى ما يكون مفتوح
ساره : حاجبه مفتوح ؟ مفتوح ازاى  مقشوط مثلا ؟
غاده : ايوووووه . بالظبط .. ماشيفتهوش اصله خطيبى ؟
ساره : ( بتبتسم وبتفتكر احمد ) لا والله للاسف مأخدتش بالى
غاده : انا بشبه عليكى على فكره
ساره : وانا بردو
غاده : انتى جايه مع مين
ساره : يعنى لو تعرفى سلمى . او منه
غاده : سلمى ومنه ؟ دول معارف هههههههههههههه انتى صاحبتهم ؟
ساره : اه صاحبتهم ..
غاده : طب هما فين .؟
ساره : هما جوه بس انا خرجت بعمل كم اتصال بس عشان مش سامعه جوه
..................
مالك : ياسطا ؟ البت ساره واقفه مع البت اللى كانت بتلاغى احمد . انت فاهم حاجه ؟
مصطفى : اهو قرف ... قرف وبيحصل ومش صعبان عليا غير الواد غلبان اللى هيتفشخ ده
مالك : ههههههههههههههه
مصطفى : ماترد ياعم الزفت انت كمان
مالك : حسن لسا مابيردش ؟
مصطفى : ياعم تليفونه اصلا مقفول ولا مافيش شبكه ..
احمد : الو ! يا على ... ياعلى ايه اللى بيحصل ابوس ايد اللى خلفوكو انا مزنوق ورا الشجره والناموس هرى قفا اللى خلفونى والبدله اتقطعت
على : اتقل يا كبير ... ساره شكلها داخله اهى .. ثوانى بس
............
حسن : تصدقوا بالله .. لو ماحد فيكو طلع دلوقتى لا مبلغ عنكو .. ايه يا عم انت وهو فيه ايه ؟
..............
منه : ايه قلة الذوق دى ؟
سلمى : عيل سمج ومقرف ... جاته ستين داهيه
منه : يوووه .. غاده جايه علينا
سلمى : اضحكى ف وشها اضحكى .. اهلاااااااا ازيك يا دودو
غاده : ازيكو يا اندال .. فينكو . اكتر من 3 سنين ماشوفكيش ..
سلمى : نعمل ايه بقا ماحنا كنا ف اولى ثانوى وانتى ف تالته . وسيبتينا ومشيتى
غاده : وحشتونى يا مزز والله ... اخباركو ايه . واخبار عمو وطنط ايه
سلمى : كويسين يا حبيبتى ...
غاده : ماتيجو تقعدوا معانا
سلمى : حاضر .. خمسه بس بناخد لفه وهنجيلك
غاده : ماشي مستنياكو ... عن اذنكو
..
سلمى : انتى ايه اللى وقفك مع البت دى يا بت ؟
ساره : لا كنت بكلم ماما بره وخرجت بتدور على خطيبها
سلمى : خطيبها ايه هى لحقت ؟ دى تقريبا لسا مفركشه من كم يوم ..
ساره : بتوصفلى خطيبها وبتقولى حاجبه مقشوط فضلت اضحك اد كده
سلمى : هههههههههههه روحه بتهفهف علينا ف المكان
منه : هههههههههههه بقولكو ايه .. ماتيجو نروح الحمام نظبط الميكب شويه عشان حاسه ان وشي متبهدل
سلمى : تعالى
..........
حسن : ( بصوت عالى ) تصدقوا ان مافيش حد عنده دم خالص .. ايه يا جدعان ده والله على اخرى ... خلو فيه دم  ..
...............
( سلمى ومنه وساره بيمشوا من جنب حمامات الرجال وف طريقهم لحمام السيدات )
سلمى : انا كأنى سامعه صوت الواد حسن اقسم بالله
منه : ههههههههههههههههه تهيؤات تهيؤات يا حبيبتى ..
سلمى : ههههههههههه
......................
سلمى : معلش يا بنات هرد على مامى .. الو ! الووو ! مش سامعاكى يا مامى . احنا ف الحمام . الو . .... ثوانى يا بنات هطلع اكلم ماما بس بره لان الشبكه هنا وحشه اوى
..............
حسن : ( بيبص على تليفونه بيلاقيه بيرن ) الو!
احمد : انت فين يا حيوان ؟
حسن : انا ف الحمام اهو .. محدش عاوز يخرج
احمد : سيب اللى ف ايدك واتسحب على بره من الباب اللى جنب الترابيزه اللى قاعدين عليها
حسن : ( بيطلع وبيكمل كلامه قدام الحمام ) ليه ياعم ؟ طب خمسه طيب على اخرى والله
احمد : بقولك اتسحب واخرج يا كلب السكك .. سلمى والبنات ف الحفله
حسن : بتقول مين . ؟ سلمى والبنات ؟ ودول جم ازاى دول ؟
احمد : مش وقت اسألة امك دى دلوقتى .. اخلص .. دقيقتين والاقيك قدامى . عاوزين نمشي الله يحرقك
حسن : جاى جاى ...
( بيقفل السكه وبيبص يمين مابيلاقيش حد .. بيبص شمال بيلاقى سلمى واقفه قدام حمام السيدات والتليفون على ودنها وباصاله ومستغربه ومابتتحركش )
.........
حسن : يامه ( بيدخل بسرعه جوه الحمام )
سلمى : ( بتجرى ناحية الحمام الرجالى وبتنادى بصوت عالى ) حسسن حسسسسسن !
حسن : ( بيسمع صوتها بيفتح اول حمام وبيدخل ع الراجل اللى جوه )
الرجل : انت بتعمل ايه يا حيوان
حسن : استنى بس ابوس ايد امك معلش هنضرب
الرجل : ماتغور ف داهيه تاخدك . ( بيزق حسن بره الحمام )
سلمى : ( واقفه بره الحمام وباصه لحسن ) تعالى .. تعالى
...
حسن : اهلا ! ازيك يا سلمى بتعملى ايه هنا
سلمى : ( مابتتكلمش وباصاله وبتشاور بايديها ف استغراب كأنها بتقوله انت ايه جابك هنا )
حسن : أنا ؟ لا انا كنت بلعب كوره مع العيال وحبيت ادخل الحمام مالقيتش الا المكان ده ف دخلت
سلمى : وانت ياروح امك جاى الحمام بالبدله
حسن : منا لقيت المكان فخم روحت البيت غيرت هدومى وجيت
سلمى : اه . ( بتمسكه من جيب البدله ) انت جاى هنا ازاى ؟ ومع مين . ؟قول كل حاجه لاحسن يمين بالله اقلع الهيلز اللى لابساه واديلك على دماغك
حسن : انا جاى مع العيال كلهم وأولهم احمد افندى ولما شافوك خلعوا وجريوا على بره .. ولسا احمد قافل معايا حالا وقالى اطلع بره عشان سلمى ماتقفشناش
سلمى : طب تعالى .. تعالى
...........
احمد : عاجبك كده يا عم مصطفى .. عاجبك ؟ انا عارف ان الجحش ده هو اللى هيودينا ف داهيه
مصطفى : ياعم ماتقلقش ماهو قالك كان ف الحمام يعنى محدش شافه
مالك : اتطمن اتطمن ... محدش هيحس بحاجه . انا قلبى متطمن وحاسس انها هتعدى على خير
احمد : اه مانت كل واحد بيهوى على .. بيهوى على قلبه بمراوح مش عاوز اغلط واقول بيهوى على ايه تانى
على : ياعم ماتوترناش بقا .. هتلاقيه خارج يجرى دلوقتى
احمد : يارب ... رنلى عليه تانى
مصطفى : استنى ! ... بيرن اهو
سلمى : ( بتمسك تليفون حسن وهى ماسكاه ) رد عليهم قولهم انتوا فين انا جايلكو
حسن : طب سيبى طيب البدله ... الو
مصطفى : يابنى ماتخلص
حسن : ياعم متنيل خارج اهو .. متنيل هاا انتوا فين  ؟
مصطفى : ( بيحس بحاجه غلط ) احنا بره .. انت جاى لوحدك ؟ بقولك ايه لو اتقفشت قول اه جاى لوحدى ولو امان قول حاضر يا سيدى
حسن : اه لوحدى ... لوحدى خالص
مصطفى : طيب سلام بسرعه
احمد : هااا
مصطفى : بقولك ايه يا احمد .. اجرى
احمد : ايه ؟
مصطفى : اجرى هتروح ف داهيه .. الواد شكله مقفوش وجاى مع سلمى
احمد : ربنا ينتقم منكو ... ( بيجرى بيطلع ع السلم وبيتعلق ع الشجره )
مالك : طب واحنا هنعمل ايه ؟
مصطفى : اثبت .. احمد مش معانا احنا سيبناه بيلعب كوره وجينا احنا .. ماشي ؟
مالك : هو حسن ...
مصطفى : اه اتقفش ... اجمد بقا انت وهو
..........
سلمى : ( بتخرج بتلاقى مصطفى ومالك وعلى واقفين مع بعض .. ) انتوا هنا بتعملوا ايه ؟ وفين الافندى
مصطفى : ايه ده سلمى ؟ ايه الصدف الحلوه دى
سلمى : اخلص انت وهو وحد يرد عليا .. هو فين . ؟
مصطفى : احنا .... احنا سيبناه وجينا الحفله دى . واحد معرفه قالنا تعالوا ف روحنا غيرنا هدومنا وجينا .. احمد بيلعب كوره مع ناس اصحابنا
سلمى : وحياة امك ؟ ( بتبص ل حسن ) اومال حسن قالى انه معاكو وهو اللى جابكو
مصطفى : ازاى ده ؟ هو احمد جه معانا يابنى
حسن : لا ! انا من التوتر قولت كده بس هو لا ماجاش معانا
سلمى : انا هعرف ( بتطلع تليفونها وبترن علي احمد )
احمد : ( احمد بياخد باله وبيعمل التليفون صامت بسرعه )
سلمى : مابيردش ليه ؟
مصطفى : هتلاقيه بيلعب ومش سامع التليفون بس ولا حاجه
ساره : ايه ده ؟ انتوا هنا بتعملوا ايه
سلمى : ساره ! امسكيلى العيال دى .. محدش يتحرك من هنا . انا هعرف هو فين .؟ ( بتبدا تمشي وبتدور ف المكان اللى هما واقفين فيه على امل انها تلاقيه مستخبى ف اى مكان )
( بتقف بالظبط تحت السلم اللى واقف فوقه احمد فوق الشجره وباصص عليها من تحت )
احمد : ( ف سره ) وجعلنا من بين ايديهم سدا ومن خلفهم سدا فأغشيناهم فهم لا يبصرون
......
ساره : انتوا بتعملوا ايه يالا انت وهو هنا !
مصطفى : بقولك ايه ! طلعينا م الورطه دى ابوس ايدك
ساره : ورطة ايه بس دانتوا ليلتكو كلكو هباب .. اوعى تقولى ان احمد هنا هو كمان
مصطفى : اه متنيل هنا متعلق فوق الشجره اللى فوق سلمى
ساره : احيييييييييييه دا لو لمحته هتولع فيه
مالك : طب ايه ؟ مش هنلحق الراجل بقا هيروح فيها
ساره : نلحق ايه بس .. محدش يفتح بؤه
.......
ساره : ايه يا سلمى واقفه هنا ليه
سلمى : حاسه انه هنا ... حاسه انه قريب منى .. وحياة امه لو طلع هنا بجد وجاى الحفله دى من ورايا لنا رامياه ف حمام السباحه ده
ساره : ماهما .( بتبص فوق بتلاقى احمد باصصلها .. بتكتم ضحكتها ) ماهما قالوا انهم جم هما وسابوه بيلعب كوره زى ماهو قالك
سلمى : بيكدبوا .... الزفت اللى اسمه حسن قالى انه معاهم
ساره : طيب ماهو رجع وقال انهم جايين لوحدهم من غير احمد
سلمى : لا دا بيداروا عليه .. انا هلاقيه
غاده : ايه يا مزز اللى موقفكوا هنا
سلمى : بندور على حد
غاده : انا كمان عماله ادور على خطيبى مش لاقياه فص ملح وداب
سلمى : ( بتبصلها ) خطيبك ده شكله ايه ؟
غاده : مش فاكره هههههههههه بس عسل كده
سلمى : مش فاكره ازاى ؟ اومال ايه خطيبك ده ؟
غاده : لا دا موضوع يطول شرحه هبقي احكيهولك جوه واحنا قاعدين انا لسا متعرفه عليه من شويه .. وبعمل بيه نمره على حد كده ..
احمد : ( بيكلم نفسه ) الهى ربنا يبتليكو بمصيبه تاخدكوا
سلمى : ( بتاخدها من ايديها ) طب تعالى .. انتى تعرفى العيال دول
غاده : ااااااه والله ده كان قاعد معاهم ... هروح اسألهم
سلمى : لا ودى تيجى ؟ تعالى هسألهم معاك مش هسيبك النهارده انتى بتاعتى
......
مالك : قابل يا معلم .. ده راحت جابت البت اللى كانت بتلاغى الفنان
مصطفى : على فكره احنا بنروح ف داهيه اهو .. بقولكوا ايه انكروا اننا نعرفها
حسن : ننكر ايه بس داحنا هنت
مصطفى : اخرس يا بأف .. حسابك معايا انا بعدين
غاده : اهلا ازيكوا يا شباب
مصطفى : اهلا بحضرتك
غاده : اومال فين صاحبكوا . بدور عليه من اول ما سيبته مش لاقياه
مصطفى : صاحبنا مين ؟ اسمه زياد صح اللى كان قاعد معانا
غاده : لا زياد ايه . زياد انا عارفاه
مصطفى : اه يبقي صاحبه اللى كان قاعد معانا بردو
غاده : ولا ده بردو .. صاحبكوا التانى ... اللى حاجبه زى ما يكون مقشوط كده
مالك : ماتضربينا بالنار احسن .. والله ياعم احسن من الذل اللى احنا فيه ده
سلمى : ردوا عليها .. هو فين ؟
مصطفى : الصراحه انا مش عارف هى بتتكلم عن مين ؟
سلمى : هو كان اسمه ايه يا غاده ؟
غاده : أحمد .. اسمه احمد
مالك : لا بقا .. دى مؤامره . مؤامره ومسبكينها علينا ... احنا اساسا مانعرفش حد اسمه احمد ف الحفله دى ..
سلمى : ( بتقلع الهيلز من رجليها وبتمسكه بايديها )
غاده : هههههههههه مش عارفه انتوا ليه تايهين كده .  ع العموم انا هبص عليه الناحيه التانيه . عن اذنكو
.......
سلمى : ( بتعمل انها خلاص استكفت بكده ) ع العموم مش ده الوقت اللى هنتكلم فيه .. بكره ربنا يفرجها .. عاوزين انتوا تمشوا امشوا .. تعالى يا ساره ( بتمسك ساره من ايديها وبتدخل جوه الفندق )
...................
مالك :  انزل يا رياض باشا يا بنطلونى من فوق الشجره بسرعه .. بسرعه واخلع
احمد : أمان ؟
مالك : امان ايه دانت هتاكل علقه
احمد : المهم ماتكونش عرفت ولا شافتنى . هتحجج انا باى حجه .. ( بيفط على الارض وبيمشى بسرعه على بره )
..........
( على اول الممر اللى بيطلع على بره امام الفندق من تحت )
غاده : ايه ده انت هنا ؟
احمد : لا مش هنا .. معلش مستعجل .. اسبقونى انتوا وشغلوا العربيه . انا جاى بسرعه
غاده : استنى بس .. كنت محتاجاك ضرورى دلوقتى تبقي معايا جوه الحفله .. خمس دقايق وامشي
احمد : يا اخت غاده انا لو دخلت جوه دلوقتى مش همشي طول عمرى
غاده : وحياتى عندك بس
احمد : حياة مين يا حاجه انتى انا لسا عارفك من ربع ساعه .. بكره بكره
غاده : ( بتمسك ايده ) عشان خاطرى بس .. تعالى خمس دقايق وامشي . هوصلك انا بنفسي بعربيتى ... وبالمره اخد نمرة تليفونك
احمد : والله العظيم مستعجل .. مسألة حياة او موت
غاده : ( مكلبشه ف دراعه ) معلش .. ماهى مسألة حياة او موت بالنسبالى بجد .. طب حتى اكتبلى رقم تليفونك هنا على تليفونى
احمد : ( بيمسك تليفونها .. وف نيته يكتب اى رقم غلط علشان يخلع منها وتسيبه ..... بيبص وراه بيلاقى سلمى واقفه وراه وباصاله وعنيها بتطلع بلاوى زرقا على دماغه )
غاده : اهو يا لومه خطيبى اللى قولتلك عليه ... ههههههههههههه
احمد : ( بيتريق على ضحكتها ) هيهيهيهيهيهي ؟ خطيب مين يا اخت يا فاضله انتى .. مش وقت هزار
غاده : هههههههههههه مش وقت هزار يا حماده بقا ..
سلمى :  ( بتهز ف راسها وبترفع حاجبها كأنها بتسلك للحوار ومستمتعه بالكلام )
احمد : على فكره ولا كلمه من اللى اتقالت دى صح .. انا اساسا كنت جاى الحفله انده على صحابي علشان سابونى بلعب كوره لوحدى وجم هنا . انا اساسا جاى غلط هنا
سلمى : ( بتهز ف راسها وبتبص على تليفونها اللى ف ايد احمد )
احمد : اتفضلى تليفونك .. صلحتهولك اهو .. الشاشه كانت مهنجه بس
غاده : ههههههههههههههههه ( متشبكه ف دراعه وبتحاول توصل ل سلمى انها فعلا خطيبته وبيحبوا بعض ) ايه رايك ف نقاوتى يا لوم ..
سلمى : ( بتهز ف راسها وبتعمل حركه بايديها معناه ان نقاوتها حلوه وان خطيبها قمر )
( ويتر من الحفله بيعدى من وراهم وبيجر عربيه عليها تورته كبيره ... سلمى بتشيل التورته من تحت وبتهبدها ف وش أحمد وبتسيبه وبتمشي )
احمد : طيب الحلم كان بيتزا طيب ولا تورته انا نسيت
..................
( ف العربيه .. احمد قاعد ورا جنب حسن )
احمد : قولى بقي اموتك ازاى .. وحياة امك منا سايبك النهارده
حسن : ياعم سيبنى .. هو انا الحيطه المايله بتاعتكو .. دى سلمى كمان كانت قافشانى قفشه سوده
احمد : انا مش ف سلمى دلوقتى .. كده كده هتموتنى ... ف لازم اخدك معايا ... اطلع ع القهوه يا مالك .. وحياة امك لاعلقك ف نص القهوه
حسن : ماتهزرش
احمد : ورحمة ابويا ما بهزر .. وهتتعلق وهتتساب متعلق حبه حلوين
مالك : ( كاتم الضحكه بالعافيه لان فعلا احمد وشه احمر )
......................
ام سلمى : ايه يا لوم بتعملى ايه ؟
سلمى : مامى انا دوخت .. هاخد ساره وهروح
ابو سلمى : مالك يا حبيبتى
سلمى : مافيش يا حبايبى والله . بس جو الحفله ده كده عاملى وش ف ودانى ... هاخد ساره وهنروح ع البيت
ام سلمى : ماشي يا ماما واحنا ساعه بالكتير وهنيجى وراك
....
منه : ايه ده ؟ انتى رايحه فين يا سلمى
سلمى : مروحه
منه : ليه بس .. ما الحفله حلوه .. انتى زعلتى من حاجه ؟
سلمى : لا .. دايخه بس شويه ... عن اذذنكو ..
.......................
( ف العربيه )
ساره : ( مابتحاولش تتكلم لانها حاسه ب سلمى وانها على اخرها )
سلمى : ماتخافيش يا ساره مش هعمل بيك حادثه ولا حاجه .. انا كويسه
ساره : طيب ... بالراحه طيب احمد هتلاقيه كان جاى لما عرف انك جايه ... او كان جاى بالصدفه ومارضيش يقولك وجاى يسهر مع اصحابه
سلمى : قفلى ع السيره دى ... مش عاوزه اسمع اسمه تانى
ساره : اقفل ليه طيب ماحنا بنتكلم
سلمى : قولتلك قفلى يا ساره
....................
( ف اوضة سلمى )
سلمى : ( بتدخل تقعد على السرير بفستانها ف حالة ذهول )
ساره : سمسوم ؟ فكى بقا بكره نعرف منه راحو هناك ليه ؟ وهتلاقيها زى ما بقولك والله انه جاى يسهر سهره حلوه مع اصحابه وخلاص
سلمى : ( بتقوم مره واحده بتكسر ف اوضتها وبتحدف المرايه بانتيكا موجوده على الكومدينو اللى جنبها ) السافل الحيوان
ساره : ( بتخاف منها وعليها ) سلمى ... اهدى .. وكتاب الله زى ما بقولك وهتلاقيه اصلا بكره ولا بعده كان ناوى يقولك .. مانتى عارفه انه مابيخبيش عنك حاجه
سلمى : ( بتقعد على سريها بعد ما فضت شحنة غضبها ) كان ناوى اه .. دا كان بيكتبلها رقم تليفونه .. وبتقول عليه خطيبى .. لا ومشبكه ايديها ف دراعه بنت الجزمه
ساره : بكره نفهم منه
سلمى : لا بكره ولا بعده ولا عاوزه افهم منه حاجه ولا اساسا هعرفه تانى .. يروح يشبع بيهم .. خلاص كده هو دوره انتهى معايا ... على ايه يعنى ؟
شايف نفسه على ايه ؟
بتاع ايه ده اصلا اللى ابصله ولا اتنيل احبه اصلا ( بتبدا تعيط )
دنا كنت عاميه ...
ساره : حبيبتى اهدى واسمعى منه طيب
سلمى : قولتلك ماتجيبيليش سيرته تانى ... بقولك ايه .. فين تليفونى
................
( ع القهوه )
احمد : ( حاطط ايده على خده وباصص على الطريق والعربيات )
مالك : ايه ! هتعمل ايه ؟
احمد : عملكوا اسود ومنيل كلكو واحد واحد ...
مصطفى : لا بجد هتعمل ايه .. ماضربتكش طيب ولا قلعلتلك عينك ؟
احمد : ماهى لو كانت زعقت ولا شتمت ولا حتى رمتنى قدام العربيات كنت ارتحت .. بس اول مره اشوفها كده . عماله تهزلى ف راسها وواقفه مبسوطه ومستمتعه  والجحشه دى عماله تحلو عليا وتشبك ايديها ف دراعى .. يدوب رزعتنى بالتورته ف وشي
انا ؟ دنا منى لله ...
لو كانت زعقت كنت ارتحت .. لكن دى سكتت ..
حسن : ( متعلق ف نص القهوه ) ايه يا جدعان .. مش هتنزلونى ؟
احمد : ( بيبصله بقرف ) هشششش .. اخرس ( تليفونه بيرن بيبص على الاسم بيلاقيه سلمى .. التليفون بيقع منه )
خد رد يا مالك
مالك : مالك مين يابا .. مع نفسك .. ماليش دعوه
احمد : خد يا مصطفى رد قولها اى حاجه
مصطفى : لا انا داخل الحمام
احمد : خد رد انت يا على
على : صوتى رايح والله
احمد : اه يابن الكلب انت وهو ...
طب اخرسوا ....
احححم ! الو
سلمى : بكره تقابلنى الساعه 7 المغرب ف الكافيه إياه اللى بنقعد عليه
احمد : احححم .. حاضر . حاجه تانى ؟
سلمى : ( بتقفل ف وشه السكه )
احمد : ( بيبصلهم وبيبص ل حسن ) وكتاب الله اولعلكوا ف نفسي دلوقتى
........
ساره : ناويه على ايه ؟
سلمى : وحياة ابويا وامى .. لاخليه يكره صنف النسوان كله .. هخليه لا ينفع ليا .. ولا لغيرى
..............
يتبع