رواية عمارة مرزوق

عمارة مرزوق(الجزء السادس)

اما عبدالاله الي التفت واستغرب من فيصل رغم انه متعود على قعدته بالجوال وعلى الي عند فيصل بالجوال بس اول مره يشوفه طاااير كذا ومبتسم

جات موضي تقول لهم ان العشاء زاهب وكلهم اتجهوا للمجلس اما عبدالاله وسلطان كانت نظراتهم على ابوهم وشافوه مبسوط وعرفوا ان الناس للحين مارفضوه واتصلوا عليه

الكل تعشى وخلص وكانوا بيتجهون على بيوتهم بس وقفهم هواش جميله على موضي : ولدس ذا صايع الله والتربيه ياموضي انتي يبي لس ضرب

موضي انصدمت : يايمه مايبيها مايبيها

فهد : استهدوا بالله واحمدوا ربكم انها وصلت لكذا مامعه غير ولد واحد مو عشره

نايف : اقول ياموضي ولدك ذا شكله غلط على بنت الناس

جميله هزت عصاها: والله اني شاكه ومتأكده لكن شوفيني احلف ياموضي لو مايرجع حرمته قبل ينتشر صيتها عند الخلايق اني ماعترف فيه انه حفيدي وانتي بيتي يتعذرك

مرزوق طارت عيونه : لا ياجميله وش ذا الحكي بتقعدين كلما واحد طلق وتزوج بدون شورك بتطردينه وتتعذرين ب بيتس

جميله جلست : قوموا عطوني ماء

قام فيصل يجيب المويه ويعطيها جدته اخذت الكاس وهي معصبه : وانت بعد تزوج وطلق بنت موضي

كل البنات انصدموا عدا بنات نايف الي كانو عارفين ان فيصل بياخذ الين

اما حنان والين الي ماكانو مستوعبين الصدمه ابدا ومايدرون جدتهم تقصد مين

وموضي طارت عيونها : يمه فيصل من بيتزوج

جميله : انتي لايكون بعد بتعارضيني قومي انشغلي بمصيبه ولدك وكلميه يجيني الحين اتفاهم معه

فيصل : ياجد..

جميله : ولا كلمه ماعاد ابي صياح على راسي الي اقوله يصير وتسوونه غيره غاضبتن عليكم كلكم

اما عند الحريم الي كانوا معتادين على هذا الموال وساميه وشريفه ساكتين اما رفا الي كانت متوتره من رده فعل حنان و الين ولمى الي كانت عارفه ان الين تحب اخوها فيصل بس ماتبيهم يجتمعون مع بعض ابدا

التفتت حنان على لمى وصرخت : جدتي من تقصد

لمى : الين

الين شهقت والكل كان متوقع انها مصدومه ورافضه لكن بقلبها العكس كانت مصدومه وماهيب قادره تصدق ان فيصل بيتزوجها وماكانت مستوعبه ان احلامها ومستقبلها بيكون مع الشخص الي تحبه

اما لمى الي كان ودها تنهي كل شي وتخرب علاقه الين بفيصل وماكانت تبيهم يستمرون مع بعض ابدا

التفتت ساميه على الين : وشفيك شهقتي والا ماتبين ولدي

الين سكتت وشريفه حاولت تهدي الوضع : ساميه الله يصلحك ويهديك انتي عاد لاتقعدين تناقرين خلونا نجلس الين عمتي جميله تركد شياطينها