لا سلام على طعام اتفضلوا كلوا و بعدها نسلم و نحضن و نبوس و نعمل كل حاجة .
اردف " أيوب" عبارته وهو يلوح بيده للجميع جلس بالقرب من " سميرة" التي لوت فاها ما أن رأته مدت يدها لتأخذ قطعة من الدجاج فـ التقطها منها نظرت له ولم ترد عادت لتأخذ قطعة أخرى لكنه لم يمهلها الفرصة ضاق صدرها نظرت له و قالت بنبرة مغتاظة :
- هو حكايتك إيه يا جدع أنت عاوز أكل
- طب ما أنا كمان عاوز أكل أكليني
- أأكلك بإيه إن شاء الله ؟!
- بإيدك !
- و أنا أكل بإيه ؟!
- بإيدي هو أنا في ديك الساعة لما أأكلك بإيدي يا سمارمر يا عسل أنت
- بلا ديك الساعة بلا فرخة النهار فيك ايدين تأكل بيهم كل و سبني أكل
مال " أيوب" ليهمس بجانب أذن والده متسائلًا بخفوت :
- هي بنت أخوك دي ملهاش في الرومانسبة
- لا اتلم و لم دورك و بردو هتتجوزها
- طب أنت ليك في الرومانسية ؟!
- و أنت مالك و مالي ياواد أنت !
- متخافش أنا بسأل بس
- لا مليش
- ماهو صحيح اللي يشوف سميرة بوتجاز عروسة لابنه يبقى الرومانسية معدتش عليه أصل
رد بهدوء و قال:
- متاخدش في بالك دي فضفضة ملهاش تلاتين لازمة
عاد ببصره لها و قال:
- هو أنتِ لسه بتأكلي ؟!
تركت الطعام من يدها و قالت بضيق:
- و بعدين بقى في اللي مش مخليني اتهنى على اللقمة دا !!
نظرت له و قالت:
- أنت إيه حكايتك يا أيوب قل لي هتسبني أكل ولالا ؟!
- براحة يا سميرة أنا خايف بس تتقلي في الأكل و نوديكي المستشفى و منلحقش و السري الالهي يطلع قولي إن شاء الله قصدي بعد الشر
ردت " سميرة" بخوف
- بعد الشر عليا و على اللي حواليا إن شاء الله يكرهني قول آمين
سكت " أيوب" و لم يرد قبضت على كتفه و وجهت بصره لها قائلة:
- أنت مبتقولش آمين ليه ؟! أنت بتكرهني ؟!
ابتسم لها و قال :
- اكرهك !! دي كلمة تقوليها بردو يا سمارمر بردو ؟!
- متقوليش سمارمر دي بتعصبني و أنا لما بتعصب بأكل زيادة
- لا مش هعصبك خلاص بس أنتِ باين عليكي خسيتي شوية هو أنتِ بتعملي إيه عشان تخسي ؟!
ردت "سميرة" بسعادة و قالت:
- بجد خسيت شايفني خسيت بجد أنا فعلا خسيت بعد ما كنت 160 كيلو بقت 159 و نص
- بس ؟!
- إيه مش عجبك النص كيلو اللي خسيته و لا إيه ؟! فاكرها بتيجي بالساهل كدا و لا إيه ؟! أنت مش عايش على الكوكب معانا و لا إيه ؟!
رد " أيوب" و قال:
- لا
- ليه بقى إن شاء الله ؟!
- أصلك واخدة الكوكب لحسابك اخاف اعيش معاكي على نفس الكوكب تتطيريني للمريخ
تعمد جرحها و احراجها علها تشعر و تقوم بفسخ الخطبة لكنها فاجأته بسؤالها:
- هي خفة دمك دي وارثها عن مين ؟!
- عن أبويا
قالها أيوب و هو يدوي بضحكاته كالابله بينما رد والده بعتذار:
- معلش يا بنتي أهبل بس على نياته زيي كدا
- ما أنا اخدت بالي ياعمي متبقاش تقعد جنب ابنك كتير
- ليه إن شاء الله مش عجبك طيبتي ؟!
- لا مش عجبني خفة دم ابنك يا عمي
- قصدك إيه يا بت أنتِ ؟!
- قصدها تقول عليك دمك تقيل زيي
تابع " أيوب" بجدية مصطنعة:
- خلاص بقى يا سمارمر متضايقش عمك الحج أكتر من كدا
تابع بخفوت قائلًا:
- خفي ايدك على الأكل معدتك بتقول اغثوني منها و أنا صحتي على قدي مش هقدر اشيلك و اجري بيكي في مستشفيات أنا .
باعدت الصحن بعيدًا عنها و قالت:
- الحمد لله نفسي وقفت بسبب كلامك
رد " أيوب" ممازحًا:
- طب انزلي زقيها
دوت ضحكات الجميع عدا هي ابتسمت له بسماجة و قالت:
- الو يا ضحك أنت فين
رد باسما :
- طب خلاص متزعليش قومي البسي الجزمة بتاعتك و تعالي افسحك شوية يلا متزعليش
سميرة بعد ما أيوب ضحك عليها العيلة كلها 😂😂😂👯
الفصل الجاي هيكون نوعا ما حلو هحاول مقدرش اوعدكم بصراحة 😂😂😂
اتفاعلوا ع الفصل اللي نزل هو الفصل ال21 و نزلدع البيدج الجديدة بتاعتي. اسمها ديوان الهدى ابحثوا عنها ع الفيس هتظهر لكم و فيها الفصل ال21 ويارب يعجبكم 🙆🙆😂❤❤❤🔥
