ضالمه ومضلومه🎭

بارت3

مـو انا اليـدور صيده مطـروحه انا الطير الاصيـده الـصكر ميـلوحه
.
.
.
.
.
.
شفتها صبيحه فتحت الباب وگالت

صبيحه::گومي خاتون ابوچ گال لتسوين شي اليوم خلي شفاء تنضف وتطبخ عنچ لان سعاد هم متجي اليوم يلااا گومييي بسرعه

وراحت وانه جسمي مكسر تكسر بالگوه گمت وچان الدنيه تفتر بيه بس مگعدت بقيت واگفه اجر بالنفس اريد بس الدوخه تروح ماكو بالف يالله راحت الدوخه وشويه استقر نفسي طلعت من المخزن طلع بوجهي باقر(اخويه من ابويه)فز وعكش بوجهه بألم وضل صافن عليه مهتميت اله عفته ورحت لغرفتي شفتها نضيفه والضوا طافي عرفتها خاله سعاد يربي لو شسوي لهل مره مااجازيها كلش زينه ويايه وتساعدني بهواي اشياء...شغلت الضوا وطلعتلي تراك اسود ساده ورحت سبحت والجروح والحروگ گامن يوجعني بس مهتميت كملت سبح وبدلت ملابسي وشديت شعري ذيل حصان ونزلت نضفت البيت وغسلته كله لان بيتنه حيل چبير 3طوابق لان عددهم هواي وكلمن غرفه وحده ف غسلته ونضفت الغرف نوب غسلت مواعين الريوگ وسويت غده تكسرت تكسر رجليه ماتن گد مامشيت واصعد وانزل من الدرج نوب رحت الغرفتي غيرت ملابسي لان صارن مي وطلعت رحت گعدت عله بايات الدرج انتضر ابويه يطلع حته اخذ حقي من صبيحه الچلبه عبالها راح افوتها الها لو تموت مو انه اليضيع حقها
سمعت صوت ابويه راساً صعدت فوگ وگفت بصف المحجر انتضره يطلع اسمع صبيحه تگله

صبيحه::بله نزلت هالمسودنه وسوتلي شي لتروح والله ماامن بيها ابقه وحدي وياها تدري بيها مخبله وكلشي تسوي

عدنان::لچ هيه غير لو تگدر تتحرك مشفتيني شلون جنزتها تجنز

صبيحه::دباع هاذا غير من الصبح رحت علمود اشوفها بيها حيل لا گتلها ابوچ يگول خلي تگوم تنضف شو هاي گامت مثل الحصان فرت البيت فر وحدها هيه ومفلشه تفلش يوميه انه وسعاد ثنين ثنين يله نلحگ عالبيت تريدها هسه متگدر تگوم تسويلي شي

عدنان::اييي شسويلها تريدين اموتها حته ترتاحين وتريحيني شسويي والله اكلتي راسي شو دوخري عايزني وجع راس

دفعها وطلع من البيت وهيه بقت تتلفت وتباوع فوگ وتبلع بريگها لان تدري بيه كلشي اسوي ومااخاف من شي ولا من احد
لان مره...

العوده الى الماضي....

چنت اسبح وسمعت صوت حركه وخطوات رجلين بالغرفه بسرعه لبست وطلعت شفتها صبيحه واگفه وعله ثغرها ابتسامة شر انداريت وراي وچان انصدم صدمة عمري اللعبه الي صارلها10سنوات يمي صايره قطع صغير بالگاع اللعبه الي محتفضه بيها من عمر 5سنوات لحد عمر14سنه چانت مو أي لعبه ابد چنت وين مااروح وياي من انام ومن اكل ومن اقرا ومن اشتغل حييل متعوده عليها چنت دائماً احچيلها الي يصير وياي وكأنها بشر مو لعبه ودائماً بيدي احچي وياها وعبالك صديقتي أو اختي ولا چن لعبه مابيها روح هيه صدگ لعبه بس مو أي لعبه ...من شفتها متكسره بالگاع انتهيت عقل مابقه براسي بقيت اباوع عليها مصدومه فزيت من صفنتي عله صوت ضحك صبيحه

صبيحه::اريد اشوف بعد ويامن تحچين المن تشكين يالمتوحده

تحچي وتضحك وانه گلبي احسه متگطع ومذبوب بسد لعابة عمري چانت چبيره وشعرها طويل چنت كليوم اسوي شعرها شكل وحته ملابس اخيط الها چانت حيل حلوه واحسها ماتشبهه باقي الألعاب ابد گلبي تگطع عليها بچيت من كل گلبي يمكن لو أبويه ميت مچان بچيت عليه گد مابچيت عليها نوب شفتها بالگاع مابيها أي عمل مابيها مجال نهائياً رفعت راسي عله صوت الباب انطبگ شفتها رايحه بقيت گاعده ابچي والملم بيها صايره كل قطه بصفحه بچيت لحد ماانهد حيلي ونمت بنص قطعها المتناثره  بطرافي💔...