قصة : ( قدري انت ) ل سهيلة سعيد المنجي ، فكرة : نور عمر

الحلقة ٥ و ٦

قصة : { #قدري_انت } 🔐🤎

الحلقة الخامسة { ٥ } 🦋

درة : ههههههه
( يعدي الوقت ، ف الكلية ، واقف عبدالرحمن مع صحابه ، يلمح ماس ماشية ، يقرب عليها )
عبدالرحمن : ايه مروحة ؟
ماس : اة
عبدالرحمن وهو بيمشي جنبها : معاكي العربية ولا اوصلك ؟
ماس : لا معايا ، تسلملي
( تشوفهم دالا ، تفضل بصالهم )
عبدالرحمن : م تيجي تتغدي معانا انهاردة
ماس : ي بني م انا لسة سيباكم من كام ساعة ، مزهقتش مني !
عبدالرحمن : بتهزري ، انا ازهق منك ، اكيد لأ طبعاً ، لو عليا عاوزك عندنا كل يوم
ماس ب احراج : بكاش اوي انت !
عبدالرحمن : والله بجد مش كلام
( يطلعه من بوابة الكلية وناس داخلة ، يحط عبدالرحمن ايده ف ضهر ماس يبعدها عن الناس ، تتحرج ماس من لمسته وتمد شوية ف يشيل ايده ، تقرب ع عربيتها )
ماس وهي بتقف جنب عربيتها : عاوز حاجة ؟
عبدالرحمن : سلامتك ، مش جاية يعني ؟
ماس : لا معلش مش هقدر
عبدالرحمن : امممم
ماس وهي بتفتح باب العربية : باي
عبدالرحمن : باي
( تركب ماس وتشغل العربية )
عبدالرحمن وهو بيقرب ع شباكها : خلي بالك من نفسك 
ماس : اوك
( تمشي ماس ، يلف عبدالرحمن يلاقي دالا ف وشه )
دالا وهي بتربع ايدها : كرفتلك !
عبدالرحمن : نعم !
( تبتسم بسخرية وتمشي ، يبصلها ب استغراب )
عبدالرحمن : ايه بنت الهبلة دي !
( عند رغد ، ف مكتبها )
درة : عيد الحب قرب ، قرب قرب قرب
رغد : م خلاص ي اليسا ، قصدك عيد المحن !
درة : اة عيد المحن ، مش ناوية تفرحينا بيكي ؟
رغد : هبهرك قريب
درة بحماس : وربنا لو حصل ل اشرب الشركة كلها شرباااات
رغد : ينهار ابيض ، للدرجة دي فاقدة فيا الأمل !
درة : نفسي اسمعلك عن قصة حب ، بقالي هنا زيادة عن اربع سنين مشفتكيش بتتشاتي مع مندوب شحن حتى !
رغد : ههههههه
درة : انتي ومستر عمر برضو !
رغد : بس متفتحيش عيون الواد ، انا هتجوزه
درة : ههههههه
رغد : بتضحكي !
درة : طبعاً ، دة انتي لو اخر بنت ف الدنيا مش هيقربلك ، انسي
رغد : ليه إن شاء الله ؟!
درة : ليه ايه ، دة انتي هتجلطيه قريب ، انا معرفش مستحملك ازاي !
رغد : مهو عشان بيحبني وهيتجوزني
درة : ههههههه برضو !
رغد : ايوة ، ازاي اعيش حياتي وهو امه مش حماتي ؟
درة : هههههه 
( تعدي الأيام )

*( ف نص شهر 1 ، سنة 2024 )*

( ف الشركة ، عمر ف مكتبه شغال ، يخبط باب المكتب وتدخل رغد وف ايدها كيسين )
رغد : صباحوووو
عمر : صباحو ايه احنا داخلين ع العصر !
رغد : جبتلك اكل معايا
عمر : امممم رشوة يعني عشان متكلمش ع التأخير !
رغد : بالظبط
عمر وهو بيقوم : جايبة ايه ؟
رغد : شاورمااااا
عمر بزهق : ي بنتي ارحمي امي بقا ، اقسم بالله قربت اتكلم سوري من كتر الشاورما الي بتطفحهالي !
رغد : هههههه ، اي خدمة
( يقعده ياكله ويخلصوا )
رغد وهي بتقوم : هجيب بيبسي واجي
عمر : قلنا اييييه !
رغد : مسبيرو بطاطس
عمر : هههههه
( تطلع رغد م المكتب وتقفله وراها ، تلف ولسة هتمشي تتجمد مكانها ، بالصورة البطيئة تقرب عليها بنت ، تتنحلها رغد من جمالها ، لابسة فستان بيچ سادة فوق الركبة بنص كم وهيلز بيچ وشعرها القصير مفرود عند كتافها والميكب المظبوط بالملي والوش المنحوت ، تبلع رغد ريقها بالعافية ، تقرب عليها البنت )
شمس : دة مكتب مستر عمر ، صح ؟