#viking_baby
كرونيك بقلمي انا ❤️
⋆┈┈｡ ﾟ ❃ ུ ۪ ❀ ུ ۪ ❁ ུ ۪ ❃ ུ ۪ ❀ ུ ۪ ﾟ ｡┈┈⋆
ليس دخول الكتاب كالخروج منه
⋆┈┈｡ ﾟ ❃ ུ ۪ ❀ ུ ۪ ❁ ུ ۪ ❃ ུ ۪ ❀ ུ ۪ ﾟ ｡┈┈⋆
إن ألم الغدر اقسى من كل ألم ، حين يغدر بك من هو أقرب إليك من الكل ، هذا كان إحساس الأمير المتوج " رون " يقف على سفح الأراضي المخفضة التي سيحكمها يوما ما ، بساط أخضر على مد النظر جنة الآلة على الارض لكنه مضطر للتعامل مع تمرد جيشه وقائده أولا ... عليه التعامل مع خيانة أخيه .
مررت صوابعها على صورة البطل اللي واقف بظهروا يتفرج في المنظر وتنهدت وهي حاسة بالحزن عليه
فالي ( Vali ) : راني حاسة بيك ، حتى انا عندي اخت عدوة مش اخت ، خانتني ومحبتش تديني معاها للعيد ميلاد بصح لازم ننقتم منها
صوت تدقديق قوي في بابها خلاها طبق كتاب لي تقرا فيه بسرعة وتخبيه تحت مخدتها
ڤالي: شكون ؟
حل الباب ودخل باباها يشوفها
- فالي مزال قاعدة ؟ مش رايحة مع اختك للعيد ميلاد ؟
فالي: محبتش تديني معاها
قلب عينيه بغش و صاح على طول صوتو
- ليڤ ( Liv ) واينك ؟
طلعت تجري كي سمعت صوت باباها يعيط بهذيك الطريقة مخلوعة زربت حلت ربطة تع تريكوها وغطات كرشها لي كانت معريتها ولبست فاست فوق تريكو لي يديه عريانين وراحت عندو لغرفة اختها الصغيرة
ليڤ : وي بابا وش صرا ؟
- علاه مش مديتها معاك ؟ مش قلت مكانش روحة كون متديهاش
ليف : هي محبتش تروح معايا مش هك ؟ قوليلو
حركت راسها لا وهي تشوف فيها بتحدي بينما هي بقات تخزر فيها تاع قولي ايه منروحش
ليف : والله قالت منروحش معاك بابا اي تكذب
- كون متروحش متروحيش خلصت الهدرة
مشا وخلاها تخبط في روحها و تبكي
ليف : وعلاه يعني علاه منين نروح انا نديها معايا كيف ظلي اي صغيرة مدورش معايا
فالي: نوض نلبس بزربة هاااهااااه
قعدت تغزل فيها وهي تلبس و ليف بش تهبل ، هزت صبعها تهدد فيها
ليف: بش تحكمي بلاصة وما تتحركيش منبقاش انا حفلة كلها نجري وراك و زيد مكان لاه تشراك الفم مع صحاباتي وخاصة مع يزن وكون نسمعك تحكيلو عليا وش ندير في دار نرميك من تم فهمتي
فالي : فهمت فهمت ... قولي وش نلبس هذي لاغوب الزرقة ولا نلبس جين
ليف : تلبسي وش تلبسي متجيش مليحة
شافت مع ساعة يدها كانت قريب الربعة تع العشية
ليف : عندك 15 دقيقة في يدك نلقاك تحت ولا نروح ونخليك
هبطت وخلاتها راحت تجري تجبد في شعرها وتعدل فيه وتلبس جبدت فلايكها لي عطاتها امها المتوفية ولبستهم و وقفت تشوف مع روحها في المرايا
فالي: نهبل خموس عليا
بعدها مشات هزت ساكودو تاعها وجرات هزت كتابها من تحت المخدة وخباتو فيه
فالي : انت عمري تروح معايا
هبطت تجري لقات اختها برا في طونوبيل تستنا فيها حلت الباب من قدام وطلعت معاها، خزرت فيها ليف من فوق لتحت ، حاطة بيري على راسها وزيد نواظر وتتصرف كيف الكبار نفخت بقوة
ليف : حطي الحزام يا زبلة يا لصقة
دورت المفتاح ومشاو ، باش يوصلو للمرفأ وين اليخت اللي بش يكون فيه عيد ميلاد صحبتها قبل الخمسة تع العشية
اليخت مشا وبعد على الميناء ، الاولاد كلهم تجمعو فرحانين ويغنيو ويهنيو في صاحبة العيد ميلاد ، بينما فالي قعدت على الحافة تتفرج مع البحر وهزت يدها تلوح
فالي: وداعا ايتها اليابسة ،سنلتقي مجددا حين يعود قاربنا محملا بالذهب و النساء الجميلات
دورت تشوف مع اختها وصحاباتها
فالي : النسا هذو بصح مش جميلات
رجعت دورت تتفرج مع البحر وتتظاهر انها في حكايتها وتحكي
فالي : جدفوا يا رجال ، جدفوا بقوة علينا تجاوز المحيط الشمالي قبل العاصفة
وقفت بعدها فوق الحافة ولا شي يحكمها ولا يمنعها من السقوط
فالي: ارفعوا الاشرعة ، ايها الملاح... ثبت موقعك على السارية... جدفوا بقوة
... ليف شوفي اختك وين واقفة
في نص الغنا قاطعتها صاحبتها وهي تصيح مفجوعة وتقولها شوفي اختك ، دورت تلقاها واقفة على الحافة و تعيط وتشور بيديها كي العادة أكيد تمثل في كش قصة جديدة من قصصها
ليف : فالي... فالي انزلي هبلتي ؟ فالي
مكانتش تسمع فيها هبطت تجري عندها وتحكمها بغزرة من يدها نزلتها لسطح اليخت وهي تصيح عليها
ليف : حابة تموتي ؟ علاه طالعة هنا
فالي : راني نلعب برك .. خلعتيني
ليف : كيفاه تلعبي هنا ؟ انتي مهبولة طفلة صغيرة انتي متعرفيش صلاحك هاه علاه قلت البابا متجيش معايا هاه
قرب منها البوي فرند تاعها يهدي فيها ويتبسم مع اختها الصغيرة
- هدي روحك خلاص مصرا والو اي مليحة
ليف : وكون طاحت ؟ اه كون طاحت نخليها تموت
دورت لختها
ليف : كون غير طحتي الا ما نخليك تم تغرفي وياكلك الحوت ونتهنى منك طول
مشات تغزل وخلاتها و فالي قعدت تشوف بعينين دامعة بعد ما بهدلتها قدام اصحابها كل ضمت يديها لصدرها بغش وقعدت
- خلاص متبكيش هيا دوك نشطحو و ناكلو ڨاطو هيا معانا
فالي: منجيش خليني
دزت يدو بعيد وهو بقا يشوف ساكت من بعد خلاها براحتها ورجع للحفلة
قعدت مغشة بعدها جبدت كتابها وتقرا فيه وغاصت في عالمو لدرجة ما حستش كيفاه طاح الليل فجأة بدات الالعاب النارية هزت راسها لقات الكل يصفق والالعاب النارية في السما حطت كتابها على الحافة و خرجت تيليفون تاعها
فالي : وقت الڨاطو تبانلي ههه
طلعت لعندهم تحتفل معاهم وقت جات الطارط تاع العيد ميلاد و غناو كلهم مع بعض
دورت ليف لقاتها اول وحدة قدمت للطارط رايحة تقسم زمت شفافها ومشات بهدوء سرسبت بينهم حتى وصلت ليها وحكمتها قرصتها من يدها صاحت
فالي: ااااه
حكات ليف بين شفافها
ليف : بركاي واش مجاعة يقولو مقدرتيش تصبري حبسي ما بهدلتي بيا
فالي : بصح وش درت ياك بش ناكلوها ولا نتفرجو فيها
ليف : مترديش الهدرة وبعدي قلتلك
فالي : منبعدش وهاه
هزت طرف كبير حشاتو في فمها وكل يشوفو فيها ويضحكو ليف حشمت عاللخر مالقات وش ديري فجأة ناضو كل يعاندو عليها يحشيو في الڨاطو في فمهم وهي دورت تشوف فيها وتغزل فيها بحواجبها زادت هبلت
ليف : كي تروحي نتفاهمو
خرجت ليها لسانها بعدها رمات عليها طرف ڨاطو
فالي : حرب الڨاطو ياااااااي
رجعو اصحاب ليف كل يرميو في الڨاطو عليها ويضحكو وهي غاضتها روحها لدرجة هزت يدها وضربت اختها بكف خلاتهم مصدومين كل
ليف : انتي متحشميش صح
حكمت فالي خدها ودموعها ينزلو وكلهم سكتو مرة وحدة
- ليف بلعقل اي صغيرة كنا نلعبو برك
ليف : صغيرة لازم تتربا
حكمتها من يدها ونزلتها تحت وين كانت قاعدة وهي تصيح
ليف : تقعدي هنا وكون زيدي تتحركي من بلاصتك متفراش ، تقعدي هنا حتى نرجعو للدار
بقات غير تبكي وتسب فيها
ليف : راح نمشي نغسل الندبة هذي وحسابك كبير كي نرجعو ، حمارة
هزت كتابها وضربتو بيها وهي تصيح
فالي : انتي لي حمارة وكي نروحو للدار نقول لبابا كلش
خبطها الكتاب في نص ظهرها وجعها دورت هزتو من الارض وبقوة رماتو لوسط البحر
ليف : قوليلو حتى انا نقولو
ناضت تجري وهي تعيط
فالي : كتابي ... كتابي
طلت عليه تشوف فيه فوق الما يغرق بشوية
ليف : تستاهلي
دورت وجات ماشية فرحانة كي رمات حاجة اختها تعرفها قداه تحبو الكتاب هذا ، لكن صوت ارتطام في الما خلاها تجمد في بلاصتها و صوت اصحابها من فوق وهوما يصيحو بأسم اختها خلا دم يجمد في عروقها ... موحال ... موحال يكون وش راهي تخمم
دورت بشوية مكانش اختها ، مكانش ... كلهم نزلو يجريو يطلو على الما وهي مشات برجلين يرجفو وتنادي بصوت مش مسموع حتى ليها
ليف : فالي !
طلت مكانت تشوف في والو ، اختها مكانش صاحت بأعلى صوت عندها
ليف : فااااااالي
وقبل ما يقولو اي شي صحابها رمات روحها وراها تجيبها
الما كان بارد و الموج يجبد فيها ورا وهي تعافر بش تلقا اختها مرة تغطس مرة تنادي ودور من ومن واضواء اليخت عليهم يحوسو عليهم
ليف : فاااالي
كل ما حلت فمها تنادي تبلع الما المالح ، وتحارب في الامواج لي تدي فيها عكس التيار والقش تاعها زاد ثقلها لدرجة متقدرش تحرك يديها بحرية ، والخوف انو ختها غرقت سايي معادش تشوفها وهي السبب في هذا ، كيفاه تقول لباباها انو ختها غرقت ؟ كيفاه ترجع بلا بيها
ليف : فا...ل..لي
الما لي تبلع فيه زاد خنقها والخوف خلاها متعرفش تتصرف ، امواج سريعة تسحب فيها ماعرفتش تخرج من التيار تاعها والكل في اليخت شافو الدوامة في البحر لي تجبد فيها وشافو فالي أخيرا لي حتى هيا جبدها التيار
- ليف ... فالي
هذي الاصوات لي كانو في زوج يسمعو فيها وهوما يحاربو في الامواج لي سحبتهم لوسط الداومة وابتلعتهم في زوج ...
حلت عينيا على الموج يلامس فيها رايح جاي وقشعريرة تع برد سرات في كل بدنها ، ناضت بهدوء كلش فيها يوجع مدت يدها لوجها تنفض في الرمل والحصى لي لصق في خدها وشافت حولها من ومن ، كانت على شط فارغ البحر هايج ودنيا مسحبة وبرد لدرجة انها قاعدة ترجف في بلاصتها بثيابها المبلولة لي زادت عليها
وقفت بسيف وحاولت تعيط على اختها صوتها خرج مبحاح وحلقها يحرق من الما المالح لي بلعتو ، كحت مرتين ورا بعض وصاحت
ليف : فالي .... فاااااال
مكانش رد ، دموع سخان نزلو على وجها ولامسو شفافها لي رجعو زرق من البرد ويرجفو
ليف : فالي... وينك ... وينك وين رحتي
ماشية على طول الشط وتبكي تحوس على اختها لكن واضح انو مكانش قعدت على ركايبها وتبكي وتعدد بالصوت عليها
ليف : انا وش درت ااااااا ... انا السبب انا السبب في غرقها
تبكي وتلوم في روحها وفالي واقفة بعيد متخبية وتتفرج فيها كيفاه مغطية وجها وتبكي قعدت تضحك عليها بعدها راحت تجري عندها ودزتها وصاحت بكل قوة
فالي : بوووووو
تخطفت من بلاصتها مخلوعة ودورت لاختها لي تضحك وفاسخة
فالي : خلعتك ههههههه
بهستيرية حكمتها وتخض فيها وتحكي وتبكي
ليف : وين كنتي ؟ وين ؟ اه ؟ حسبتك غرقتي حسبتك متي وين رحتي ؟
جبدتها لعندها ضمتها بكل قواها وتبكي
ليف : حسبت منزيدش نشوفك
بقات دز فيها وتبعد فيها
فالي : ااااي بعدي وجعتيني اه
بعدت عليها وتشوف فيها وتمس فيها من ومن
ليف : راكي مليحة مصرالك والو ؟
فالي : مليحة
وقفت شافت حولها مكاين والو وكأنو جزيرة تع حجر مهجورة كل لي تشوف فيه هو شاطىء مليان حجر وجبال مقابلتو لونها اسود مغطيها الثلج كلها وسحاب رمادي مكان كئيب اكتر من هكذا مكانش
ليف : هاتي يدك خلينا نمشيو نشوفو وين حنا ونشوفو منين نعيطو لبابا يجي يدينا نروحو هيا
أنت تقرأ
viking baby
Adventureحين تنتقل فالي و أختها الى كتاب خيالي عن ال viking كيف ستكون رحلتهم قصة مليئة بالتشويق ، الحب ، المغامرة و عالم جديد يكتشفانه معا ( الكرونيك باللهجة الجزائرية كاملة )
