viking baby

الجزء 10

الليلة هذيك بعد ما تعشاو طلب رون انو يشوف ليف لوحدها ... فالي مكانش عاجبها ولا حتى ليف
- من فضلك متخلينيش نستعمل القوة
فالي : مهاني نروح معاها
ليف : على شكون بش تستعملي القوة ؟
- تطلبي من اختك تقعد ولا نتصرف ؟
ليف : وعلاه يطلب فيا وحدي ؟ وش يدير بيا ؟ نمشيو في زوج ولا رانا قاعدين في زوج
فالي : ايه كيما قالت
تنهدت ومشات حلت الباب غابت دقيقتين ورجعت ومعاها ايفان
ايفان : عفوا منكم... ليف تقدري تجي دقيقة نحكيو ؟
بقات تخزر فيه وهو سألها بضرافة مشات معاه خرجو قدام الباب
ايفان : الملك طلب منك تجي وحدك بش تحكيو براحة ، هو ما ناوي على شي بالإضافة راه يستنا فيك في القاعة الكبيرة وما راح يصير عليك شي
ليف : وش يحتاج
ايفان : يحتاج اجوبة كيما تحتاجي اجوبة نتي تاني
وافقت أخيرا ومشات معاه بعد ما طمنت فالي انها راجعة مطولش
اول ما دخلت لقاتو قاعد هيئتو دل على الرزانة الثقة والهيبة ، صحيح ميخوفهاش شكلو ولا صوتو كيف لوكي كي يصيح ولا يظهر بمظهر المرعب لكن عندو كاريزما وهيبة في هدوء تاعو تبعت على الخوف
رون : اتفضلي ارتاحي
ناض كي وصلت وعاود قعد كي قعدت كيف الجنتل مان
رون : تعشيتو ؟
حركت راسها ايه وهو حط كاس من فضة قدامها وصبلها مشروب
رون : تفضلي ذوقيه
شافت مع الكاس ورفضت
ليف : شكرا نفضل اني منشربش
تنهد وهز يشرب هو من بعد نطق
رون : منين انتم
ليف : من بلاد بعيدة ...
رون : وش جابكم هنا ؟ كيفاه وصلتو
ليف : طحنا من السفينة ، كان يوم عاصفة و طحنا و الامواج رماتنا هنا
بدات تحكيلو في القصة لي تفاهمو عليها هي و اختها
رون : ومنين تعرفوني ؟
ليف : لانو صيتك ذاع والكل يعرف الملك رون لذلك كي لقينا روحنا في ارضك حوسنا عليك لانو نعرفوك بملك العدل
رون : سمعت من الناس انك ساحرة وجيتي و معاك كتاب سحر
ليف : الناس ؟
رون : قالو درتو ضجة كبيرة في السوق تحبو عليا نجي
بقات ساكتة تشوف فيه مش قادرة تحلل نظرتو اضطرت انو توافق وش يقول
ليف : صحيح ، لكن الكتاب مختفي حاليا
رون : وش فيه الكتاب ؟
ليف : فيه أمور شعوذة اغلبها وصفات
رون : وتقدري انتي برك تقرايها ؟
من اسئلتو الكتيرة على الكتاب حست انو يعرف حاجة عليه
ليف : الكتاب عندك ؟
رون : لا ... طبعا لا لكن الفضول ، ما سبقش انو جات وحدة من ارض غريبة تحوس عليا ومعاها كتاب سحر
مرو ثواني تع صمت تشوف فيه ومش قادرة تجزم اذا عندو الكتاب ولا نو من بعد نطق
رون : سمعت تاني انو لوكي خلاكم اسرى عندو وتحت حمايتو الشخصية انكم بقيتو معاه في نفس مكانو ؟ علاه
هزت كتافها
ليف : يمكن خاف تجي تدينا منو لانو في اللحظة لي بعد فيها علينا ... هانا هنا كيما راك تشوف
شرب من كاسو وتبسم وحط يديه على صدرو
رون : راني نشوف انو لوكي عزيز عليك بزاف مش هكذا ؟ لذلك خايفة تحكيلي ؟
استغربت استنتاجو
ليف : عزيز عليا ؟ يا دوب عرفتو
رون : متأكدة ؟
ليف : صدقني معندي حتى ذرة احساس بالنسبة ليه و حرت كيفاه خممت هكذا
رون : قالولي كيفاه معاملتو معاكم ، كيفاه بقيتو معاه تحت سقف واحد ... يمكن صرا تقارب هك بيناتكم و تاني كيفاه مدلك حلي قدام الكل وفي ليلة عيد وطلبك لعندو  ، واضح انك مميزة بزاف ليه
ليف : وش المميز في انو يعطيني حلي انت وانا نعرفو وش معناها
رون : منعرفش عندكم كيفاه تم الامور لكن هنا انو يمدلك حلي كيما هك وسط الكل عندنا بمثابة اعلان حب خاصة انو هو جامي عملها مع غيرك ولا قبلك حتى انا تفاجأت
حست بقلبها خفق كي قال هكذا لكنها بدلت الحديث
ليف : شكلك متبع كلش ؟ وكأنك موجود معانا
رون : لازم ديما نخلي عيني على خويا الصغير ، انتي كيفي وراح تفهميني صح ؟ انتي تاني راكي تهتمي بأختك الصغيرة وتعرفي وش معنى انو عينك لازم ديما عليهم
ليف : لوكي مش محتاج عينك عليه محتاج ثقتك فيه
حط الكاس من يدو وعدل قعدتو وخزر فيها
رون : لوكي شجاع و قوي صحيح لكنو متسرع واحكامو مبنية على المشاعر و فورة الغضب ، لوكي سبب مشاكل كبيرة مع القبائل المجاورة
بقات ساكتة تشوف معاه
ليف : وشفت انو الحل دير مذبحة تقتل فيها النسا والاولاد وخوك معاهم
رون : في قانون تاعنا اذا كنت ناوي تقتل الرجل لازم تقتل ذريتو لانو كي يكبرو راح يكبرو ودمهم يغلي على الانتقام ... ولوكي حي ما ماتش لكنو دا درسو دوك هددتو وما سمعش وقرر يتحداني ويجمع جيش ضدي لكي الجيش والقوة وحدها متنفعش يلزم الذكاء
ليف : قول المكر.. ليلة عيد ورجال سكارى
رون : نتأسف انك ماتقدريش تشوفي الصورة من جهتي ، نظن مشاعرك قاعدة تأثر في حكمك
ليف : كيما قلت معندي حتى مشاعر ولا دخل في اللي صاير هذي فقط وجهة نظر
رون : متأكدة ؟
تغششت منو وقفت وقف معاها
ليف : نحب نرجع طولت على اختي
رون : أكيد اتفضلي ونعتذر منك
مشات تخبط في روحها ورافقوها حتى للدار كي دخلت جات فالي تجري ليها وتسقسي
فالي: وش صرا ؟ وش دارلك راكي مليحة ؟
ليف : راني مليحة مدارلي شي حكينا شوية برك
مشات قعدت وفالي لحقتها قعدت معاها
فالي : على واش حكيتو ؟ كشما قال عليا ؟
خزرت فيها ليف بطرف عينيها
ليف : قالي عجبتني بزاف فالي وعجبني شعرها المنتف في سما
دزتها وهي تصيح فرحانة
فالي : تع صح ؟ ياااااي
ليف : بركاي بلا هبال بقا يسقسي فيا واكتر شي على الكتاب ونظن راو عندو
فالي : صح ؟ مالا قراه ؟
ليف : مفهمتش كون قراه يكون فهم واش كاين فيه لكنو سألني اذا كنت انا وحدي نقدر نقراه
فالي : زعما مايعرفوش يقراو ؟
ليف : فال رانا في العصور الوسطى مناش في العصر الحجري
فالي : صح همممم
ليف : شوفي راح يسقسيك نتي تاني باين حاولي متفضحيناش ا فال المرة هذي منسامحكش طول وكي نرجعو انساي تروحي معايا اي بلاصة
فالي: مش حنفضح والو وشبيك تبقاي تعاودي بزاف كي البيروكي
ليف : لأنك تفهمي قليل كي البغل
فالي : خرجت ليك
وخرجت ليها لسانها ومشات حكمت بلاصتها رقدت وليف بقات تخزر لبعيد وتخمم في واش قالها رون ، بعدها جات لبالها كي قالها انو بالنسبة ليهم كيف اعتراف بالحب ابتسامة شفت طريقها لوجها لكنها مسحتها وفاقت مع روحها
ليف : وش همك انتي اعتراف ما اعتراف فيقي لعمرك اهم شي دوك تخرجي وتخرجي اختك من هنا وخلي تاكل بعضاها
مشات رقدت جنب اختها حتى هي ، اما رون فكمل الليلة ساهر مع ايفان
رون : صعيب تحكي
ايفان : واضح منجذبة لطرف خوك
رون : الارجح هيه ، يلزم نحكي مع الصغيرة
ايفان : الصغيرة تظهر انو متخبيش في سرها وتحكي بزاف
رون : بالضبط وعندها تعلق غريب بيا تاني
ضحك صاحبو
ايفان : بصح كيفاه راح تفصلهم
رون : انت ارواح معايا غدوة بش تشتت انتباه الكبيرة وانا نتصرف
ايفان : تفاهمنا
في جهة اخرى في الغابة الباردة في الثلوج لوكي قاعد ينصب بش يخيم ويبات الليلة وقت سمع حس جبد سكينو ودور يشوف منين جاي
باقي يمشي بخطوات صغيرة يتبع في الحس حتى خرج في وجهو واحد هز سكينو يضربو وهذاك يصيح
اولاف : ااااع ، لوكي هذا انا
وقف قبل ما يدير فيه حاجة وشاف فيه مستغرب
لوكي : وش دير
اولاف : لحقتك ... تحسب نخليك تجي وحدك وتدي الشرف تع الانتقام كل ؟ موحال حتى انا هذوك اهلي واصحابي
بقا يشوف فيه
لوكي : تعرف انو منيش راجع حي منها ؟
اولاف : نعرف وانا تاني مش ناوي نرجع و... زيد لانو بسبب اني مصدقتش كي قلت انك حاب تبع خطة الساحرة وشككت بحكمك
لوكي : كلنا كان عندنا شكوكنا .. هيا
مشاو لزوج شعلو النار وباتو الليلة هذيك في الغابة في طريقهم للمدينة
الغد كانو يمشيو ، رون حارص بزاف انو يخليهم يتجولو معاه في المدينة والشي هذا خلاها تخمم علاه يدير هكذا ؟ واحد بمكانتو دار حرب قد السخط عندو وقت ليهم ؟
خلاهم يدورو معاه ويتأكد من انهم يشوفو حب الشعب ليه و الرجال تاعو حتى النسا والاولاد وفالي كانت طايحة فيه طول .. يمكن مهوش شرير والحرب هذي هي ! تعرف انو تاريخ الفايكينغ كان تاريخ دموي وقرات الشي هذا في مدارسهم لكن صعيب عليها هي من العام 2022 تتقبل وش صرا قبل ألف عام واكتر
تنهدت ومشات
ايفان : وش رايك في المنتجات عندنا ؟ احكيلي شوية على وش يصنع بلدك ؟
شافت فيه كيفاه من صباح حاب يجبدها بالحديث يمكن لانو رون مقدرش بعتو هو
ليف : حتى لو نقولك متعرفش
ابقان : جربيني ؟
ليف : صناعات دقيقة لي تدخل في صناعة الالات
بقا يشوف معاها متعجب من هذا
ايفان : الات ؟
ليف : قلتلك مش راح تعرف
باقية تبع في رون و اختها تعود كشما تخرط عليه و رون ما قدرش خلاص يجبد فالي بالحديث واختها لاصقة فيهم
رون : سمعت كنتي تتعملي في المبارزة ؟
فالي : ايه تعلمت كان يعلمني لوكي
شاف فيها وضحك
رون : لوكي ؟ تسميه هكذا مليح
فالي : ايه أصلا يضحك عليا كي نسميه باسمو برك قالي انتي دخاسة
رون : مالا تحبيه ؟
فالي : عق لا منحبوش ، بصح ليف تحبو ههههه اس متقولهاش قلتلك
ليف : وش تحكيو
ايفان : ههههه أكيد موضوع مشوق
فالي : نحكيو على المبارزة
دور رون يشوف في ليف كيفاه تخزر فيهم وتبسم ورجع شاف في فالي
رون : تحبي نتبارزو انا ونتي ؟
فالي : ايه ايه هيا حكمت يدو في يدها وتجبد فيه
ليف : فالي خليه
فالي : رايحين نتبارزو
رون : هههه تحبو تجيو معانا ؟
ليف : أكيد
مشات تبعتهم لاصقة فيهم لصيق وايفان يحاول يجبدها بأي طريقة بعدها قعدو في بلاصة منعزلة وين ما يعديوش بزاف ناس وفالي هزت سيف الخشب لي يدربو بيهم صغار الفايكينغ
رون : هيا نعتيلي وش تعلمتي
بداو يتقاتلو وهو يمدح فيها بعدها ليف غلبت من الوقوف جبدت عليهم وقعدت تتفرج وايفان قعد معاها يتفرج
ايفان : فالي طفلة نشيطة بزاف وشجاعة
ليف : هي عكسي تماما مع اني انا ربيتها
شاف فيها مليح وحرك راسو لا
ايفان : نظن انها تشبهك تماما
سكتو بعدها في زوج يشوفو معاهم وهي تحارب زعما وخلاها تربح
رون: برافو قدرتي تربحيني هههه
فالي : حبيتك انت اكتر
مشات حضنتو
فالي : لوكي مكانش يخليني نربح حتى كي نقولو أسرار كيما نقولك ميخلينيش نربح
رون : وش الأسرار لي قلتيلو
فالي : قلتلو كيفاه ليف تراقبو كي ميكونش يشوف ويعجبها
رون : وهو وش دار كي عرف ؟
فالي : شي ... تغشش برك
رون : وش تاني أسرار حكيتيلو
فالي : منعرفش
رون : اتفكري مثلا حكيتيلو على الكتاب ؟
فالي : ايه يعرف انو كاين كتاب بصح ميعرفش وش فيه حنا قلنالو فيه وصفات سحر
رون : علاه وش لي فيه
فالي : متقدرش تعرف لازم حتى تشوفو
رون : وكيفاه تقدرو تقراوه ؟
فالي : عادي تقراه انا قريتو كامل تقريبا بقالي شوية برك ونخلصو
رون : وش قريتي فيه ؟
قربت منو وهو مطبس هكذاك عليها ومدت يدها للندبة فوق عينو
فالي : قريت فيه كيفاه جرحك لوكي الجرح هذا في وجهك كي كنتو صغار وتدربو مع بعض وكيفاه كنت تقول لأصحابكم انو دب كبير قتلتو هو جرحك هك
بعد عليها مشوكي و وساعو عينيه من الدهشة ومس جرحو ... الشي هذا حد ما يعرفو ولا مرة حكا عليه لواحد ولا حتى اقرب جنرالاتو ... الكتاب طلع اخطر من ما يتصور
رون : وش قريتي تاني
ليف : فال ؟ فالي ...
دورت تشوف مع ختها ورجعت خزرت فيه
فالي : منعرفش لازم الكتاب بش نقرا اكتر
رمات السيف في الارض وراحت تجري عند اختها وهو بقا واقف هكذاك مسمر بعدها شور لصاحبو يديهم يرجعهم وليف وقفت وحكمت يد اختها
ليف : هيا او قالو رجعهم للحبس تاعهم
فالي : علاه ؟ نرجعو مزال الحال
ايفان : هيا خلينا نمشيو
رجعو وين حابسهم كي العادة دخلو قعدو واول ما خرجو الجنود دورت ليف تخزر فيها
ليف : هيه ا لالة فالي وش درتي فيها ؟
فالي : منقولش حتى توعديني سع مفيكش لامان
ليف : فالي مطلعيليش زبل لراسي نوض من الشعر هذاك نتفو كتر ماهو منتف
فالي : مالا منحكيش
قلبت عينيها منها مستسلمة
ليف : وعد
هزت يدها فالي تفت على كفها ومدتها ليها ، دارت ليف كيفها وتفت على كف يدها وحكمتو متقززة
فالي : وعد تعطيني شومبرتك وتدي انتي شومبرتي كي نرجعو
ليف : وعد بصح ل 3 اشهر برك
فالي : اوك
نحات يدها منها مسحتها بسرعة عايفتها وفالي تضحك
ليف : هيا احكي
فالي : بقا يسقسي فيا حوايج ماعندهم حتى معنى من بعد جبدلي الحكاية على الكتاب
ليف : وش قال عليه
فالي : سقساني كيما قلتي انو اذا حنا برك نقدرو نقراوه وقلتلو لازم نشوفو
ليف : و حكيتيلو كيما تفاهمنا
فالي : قلتلو على الندبة تع وجهو وكلش واكدتلو انو لازم نشوفو حنا الكتاب بش نقدر نفهمو
ليف : صحيتي ... خرج منك حاجة تنفع أخيرا
فالي : كي يمدلنا الكتاب نشوفو النهاية تاعو و نعرفو منو كيفاه نخرجو يخي هكذا ؟
ليف : ايه هكذا ، نتمنى يكون هكذا
جبدتها ليها ضمتها
فالي : منعرف وش يكون دار بابا بلا بينا
ليف : أكيد راهو يحوس علينا في كل بلاصة يكون جن جنونو هو أكثر واحد راني نخمم عليه
تنهدت وقعدت هكذاك ضامة اختها ليها وتستنا واش يدير رون دوك
في هذاك الوقت لوكي و اولاف كانو على مقربة من المدينة وابوابها لكن مكانش كيفاه يقدرو يدخلو بلا ما يتعرفو عليهم
لوكي: مش راح نقدرو ندخلو هكذا
اولاف : نظن كون نركبو فكاش عربة تع تاجر ولا وندخلو معاه
لوكي : راح يعرفو وجوهنا
اولاف : خليها عليا ، استناني هنا
جا رايح حكمو لوكي من ذراعو
لوكي : أولاف تعرف كي نفوتو من الابواب هذي مش راح يكون عندك حل تتراجع ؟
اولاف : نعرف ، متشغلش بالك انت أنا راني معاك بش تاخد انتقامك
جبدو ضمو لحضنو وهو طبطب عليه
اولاف : ابقا بعيد على العينين حتى نرجع
رجع تخبا وقعد يستنا ويخمم في كيفاه كانت المدينة هذي كيفاه بناها مع خوه بعد باباهم و كيفاه كان ديما مستبعد من الصورة ورون جامي سمعو كيفاه حتى الانتصارات لي هو حققها بدمو خوه رون دا التصفيق عليها ، عمرو كان ضد خوه ويوم وصلو لطريق مسدود اختار انو يمشي وخلي كلش وراه و جنودو لي قاتلو في الصفوف معاه تبعوه ، مكانش ناوي يكون ضد ولا حتى ند لخوه فقط قرر يمشي في طريق آخر لكن رون اطماعو اكبر من انو يخلي واحد يقدر يكون ندو في اي وقت ولولا تهديداتو مكانش راح ينظم جيش كبير هكذاك ولا يصرا هذا كل لكن هنا وخلاص الفرص لي داهم رون بزاف صار وقت انو ينهيه
رون كان واقف مع ايفان وفي يدو الكتاب يقلب فيه من ومن بعدها خزر فيه
رون : بش نجيبو الصغيرة اليوم ... هي لي تقرالنا الكتاب
ايفان : وكيفاه نديرو لأختها مش بش تسكت ولا تخليها تفارفها
رون : خليها محبوسة تعيط وتكسر اخرتها وش راح دير زعما
ايفان : حاضر