viking baby

الجزء 6

دارو بيهم الاحصنة منعوها تهرب طاحت في الارض وتبكي و فالي باقي غير تشوف مع الجثة قدامها ، الاحصنة يدورو عليهم ونطق لوكي
لوكي: سحارتنا و ختها هاربين ؟ وين رايحين ؟
هزت عينيها تشوف فيه مدمعين و يحللو فيه يخليهم يروحو
- قالو..ق..قالو رايحين ...عند الملك رون
دور لوكي جيهة لي يحكي وشور للي واقف وراه هز سيف تاعو وبضربة طار راسو جا يتكركب تحت رجلين الاحصنة
فالي : ااااااااا
ناضت تجري وتبكي بهستيرية هاربة ضمتها ليف ليف ليها كانت ترجف كيف الطير وتعيط
فالي : ليف خلينا نخرجوووو حابة نخرج هيااا نخرجو
ليف : اسسسس خلاص خلاص
كانت حتى هي تبكي كيفها وتمنات تقدر تهستر دوك لكن على جالها راهي متماسكة
لوكي : رايحين عند رون قلتي ؟
ليف : لا مش رايحين عندو
نزل من حصانو وجبد السيف تاعو وهذاك الثالث لي بقا كان يرجف بالخوف
لوكي : بصح هذا هنا قال راكم رايحين عندو ؟
شورلها على الراس الملطخ كلو دم في الارض من بعد طابس هزو من شعرو ويحكي
لوكي : صح ؟ مش قلت رايحين عندو ؟... ايه برنس لوكي رايحين عندو
عوج صوتو كأنو الراس لي يحكي ويجاوب فيه بعدها ضحك ورماه بعيد وهي مشوكية فيه ، مستحيل يكون طبيعي ، هز بعدها السيف تاعو ودخلو في وسط الثالث لي واقف بلا حراك
لوكي : هكذا مكانش شهود ومكانش لي شافكم وعرف انكم رايحين ليه ... دوك نرجعو ليكم
ليف : سامحني ...سامحنا
لوكي : لااااا ...
حكم فالي وسحبها من حضنها حاولت تمنعو وحكمتها تجبد فيها من يديه ضربها برجلو طاحت وسحب فالي بعيد
فالي : نحي يدك عليا نحي يدك خاطيني انا هي لي قالتلي نهربو
ليف : انا ... انا لي قلت ايه انا لي نخلص مش هي
حكمها ظهرها لصدرو وحط السيف على رقبتها
لوكي : علاه هربتو ؟ هل يمكن لانكم مديتولي الخطة غالطة ؟ ولا متفاهمين مع خويا بش تجيو تحكيولي الحكاية هذي كل
ليف : مناش متفاهمين معاه صدقني
تبكي وتلوم في روحها وتشوف غير في وجه اختها لي رايحة تموت بسببها
ليف : خليها .. انا الغالطة انا هي لي حرضتها
وقفت وترجف بكلها وتقرب منو بشوية وتهدي فيه وفالي غير تبكي
ليف : ماعندها حتى دخل ، نعرف انك مغشش وحاس بالخيانة عندك حق .. عندك كل الحق صدقني
حطت يدها على يدو تهدي فيه وتحاول تجبد اختها وتبعد السيف عقد حواجبو
ليف : راح ندير وش حبيت ، تفاهمنا ؟ وعد مني مش حنزيدو نهربو ولا ندير اي مشاكل
نزلت السيف بهدوء
ليف : نعطيك كلمتي .. خليها تروح
لوكي : كلمتك ؟
ليف : ايه كلمتي
ضحك عليها بعدها هز يدو وضربها بيد السيف تاعو للوجه طاحت مغاشية
فالي : ااااااااا ليف
دزت يدو عليها وطابست على ختها تنوض فيها من بعد دورت ليه وتلاحت عليه تضرب فيه دبز وكوتبيات دزها عليه طاحت
لوكي : واحد يحكم عليا الجرو هذا
نزل اولاف حكمها وخزر فيه
اولاف : وش راح نديرو
لوكي : من بعد خلينا نتحركو قبل الظلام
حلت عينيها ، ثواني تستوعب هي وين ناضت حست راسها يدور مست الجرح دم يبس فيه دورت تشوف من ومن كانت في بلاصة اخرى في غرفة صغيرة غير الضو تع النار من برا داخلة من الشباك ناضت ديراكت تخبط في الباب وتعيط
ليف : حلووو ويني فالي ويني اختي حلو الباب هذا لا نكسرو
تحل الباب كان في وجها جندي خافت وبعدت وراها
ليف : شكون انت ؟
- نضتي أخيرا ... امشي قدامي
دخل جبدها من يدها ويمشي فيها وهي دور في راسها من ومن تحوس على ختها
ليف : ختي ويني ؟
محاوبهاش طول خزرت فيه ، شعرو طويل اشقر فيه ضفاير وعلى الجناب محفف ، تقريبا كلهم دايرين نفس ستيل الشعر
ليف : قولي برك وين ديتوها
وصلها لدار تع لوكي تحل الباب وشافت المرافقة تاعهم خارجة منو ، هزت راسها شافت فيهم وكملت مشات طريقها والجندي مشا دقدق وحل الباب ودزها لداخل
اول ما دخلت تشوف فيه في نور الشمعات والنار تع الموقد يلبس في ثيابو ، عينيها حامت على الدار كل تحوس على ختها
لوكي : اقعدي
جا ماشي بهدوء ومشا قعد جنب النار وشورلها على الكرسي ... مشات بشوية خايفة
ليف : ويني اختي
خزر فيها بطريقة تخوف وهز حواجبو
لوكي : متخلينيش نعاود كلامي
ليف : جاوبني برك راهي مليحة ؟
ضرب الكاس لي كان فوق الموقد برجلو طاح ورجع خزر فيها قعدت بزربة ، نفخ بنفاذ صبر ومد يدو هز كاس تاني وصب فيه من الماء اللي كان يغلي فالقدرة فوق النار رجفو شفافها من الخوف وش راح يدير فيها ؟ بعدها قربو لشفافو وينفخ عليه بشوية يبرد فيه وهي غير تراقب في شفافو كيفاه يتحركو وكل ما ينفخ .. يديه الكبار وعظام صوابعو والعروق على ظهر يدو بعدها مررت عينيها على طول يدو لوجهو دور ليها بدلت عينيها منو ، مدلها الكاس
لوكي : الكاس مزال سخون
حكمتو وبقات غير تشوف فيه
لوكي : ينحيلك دوخة والارتجاج تع الضربة
طبست تشم فيه عايفتو ومن بعد ذاقت منو
لوكي : دوك احكيلي... علاه بعثكم ؟
بلعت التيزانة هذيك بسيف وشافت فيه
ليف : واحد ما بعثنا و رون مبعتناش
لوكي : رون ! تسميه بأسمو؟ و واحد ما بعثكم وهو ما بعثكمش ، بصح راكم رايحين ليه هاربين عندو
ليف : منين جيت انا ماعندناش القاب
لوكي : و وين هذي منين جيتي نتي
بقات ساكتة ، كيفاه تشرح لواحد انو هو شخصية في كتاب انو مش حقيقي وهي جات من العالم الحقيقي ... مستحيل يصدق
ليف : بلاصة بعيدة ارض بعيدة
لوكي : وعلاه هاربين عندو ؟ مديتولنا معلومات غالطة وهاربين تحتميو عندو ؟
حركت راسها لا وهو نفخ بقوة
لوكي : شوفي ... ليف ...
كان هذي اول مرة ينطق اسمها هكذا بكل هدوء وعينيه في عينيها لدرجة حست بخدودها قاعدين يحمارو
لوكي : راني نحكي معاك بهدوء مش حاب نستعمل التهديد أكيد متحبيش يصير شي على ختك
وهنا راح كل لي كانت تحس فيه
ليف : راهي صغيرة اي حاجة عندك خليها بيناتنا
لوكي : عمرها 13 سنة نظن تفهم كيفي وكيفك
ليف : 13 سنة تفهم ؟
لوكي : ايه تفهم ... شفتي هذي غلطتكم انتم الكبار زعما ، تنغامسو بزاف في لعب دور الأخ والاخت الكبيرة تنساو انو يفهمو تنساو انهم عندهم عقل وعندهم تفكير مستقل عليكم تعامولهم طول بنظرة دونية انهم راح يحرجوكم راح يفسدو عليكم جامي مديتولهم فرصة يقدمو وش عندهم ويحكيو ويشاركو ... هذي مشكلتكم
بقات ساكتة تشوف معاه كيفاه يحكي وتتخيل في تصرفاتها كيفاه مع فالي
ليف : فالي بصح صغيرة حتى تصرفاتها
لوكي : لي شفتو انها تجاكر فيك وتعمل في عكس وش تطلبي لانو غروركم انتم الكبار اكبر من انو تشوفو
يحكي بغش و شخصن الموضوع خلاص
ليف : هكذا دار خوك معاك تاني ؟ معطاكش فرصتك ؟
دور خزر فيها وهو يلز على سنيه ووقف بسرعة غطات وجها تحسب فيه راح يضربها
لوكي : متبدليش كلامنا ... قوليلي وش جيتو ديرو هنا
ليف : كنا في قارب ، كبير و طحنا منو ولقينا روحنا هنا هذا كل لي نعرفو وفقط الكتاب لي كان معانا يقدر يشرحلك اكتر من هكذا صدقني منعرف والو
لوكي : والخطة لي قلتي راح يستعملوها
ليف : صحيحة
هز السكين تاعو ودور راجع ليها وقفت خايفة
ليف : صدقني صحيحة راح يجيو من جهة النهر
حطو على كف يدو وجرح روحو ومشا جهتها وحكم يدها اللي هازة الكاس نحاهولها
لوكي : حلي يدك
حلت يدها كيما طلب وهو جرحها
ليف : اااااع ... حط يدو المجروحة في يدها
لوكي : هكذا نمدو كلمتنا حنا ... وانتي مديتيلي كلمتك في الغابة
حركت راسها ايه
لوكي : واذا خلفتيها راح تكلفك الغالي والرخيص
سيبها ومشا يمسح في يدو
ليف : راح تعاوني نلقاو الكتاب
لوكي : راح نلقاه وراح تحكيلي وقتها وش فيه في
ليف : وفال ؟ ويني
لوكي : متبالغيش بزاف في حمايتها ، ماتقدريش تحميها من كلش
دقدق الباب وقتها وتحل دخلت فالي تجري وتعيط وتلاحت على ختها تحضن فيها
فالي : راكي مليحة ؟ وش صرا ؟ جبهتك ؟ تجرحت يدك وش بيك وش درت فيها
وقفت في وجهو دافع عليها
فالي : بعد عليها مزيدش تقرب منها ولا حسابك راح يكون معايا
شاف فيها وضحك
لوكي : متفاهمين
هز مونتو الفورير تاعو لبسو وخرج وخلاهم ، ومشا وين الخيمة تاع معسكرهم وين كانو مجتامعين
كي ناضت دورت طول تحوس على ختها مكانش قدامها ، دورت تشوف من ومن مكاين حد
ليف : فالي ؟
نقزت تجري من بلاصتها مخلوعة تحوس عليها مكانش ديراكت راحت تضرب في الباب وتخبط وتعيط ساع تحل وحدو ... بقات تشوف معاه محلول عادي مشات خرجت بشوية وطل من ومن
ليف : خلاه هك ؟ مكانش حراس ؟
خرجت وتشوف معاهم ولا واحد لاتي بيها بدات نجري وتحوس على ختها وتسقسي في لي تلقاه حتى لقاتهم ... تشوف فيهم من بعيد هو واقف وختها تجري ورا الجاج وتطايح وتتمرمد قطبت حواجبها وراحت عندهم مغششة ، يعني من الناس كل يستغل اختها بش تصيدلو وش ياكل
ليف : فالي... فالي
دزت باب السايج ودخلت دور ليها خزر فيها بعينيه الزروقة راحتلها الهدرة وبقات تمهمه
لوكي : وش كاين ؟
شافت فيها ورجعت شافت فيه تحاول تتذكر وش كانت رايحة تحكي بصح باقي يتبسم بطريقة مش متعودة تشوفو عليها و عينيه كيف تع الجرو محلولين ، جبدت نفس طويل وركزت
ليف : علاه دير فيها هكذا ؟ مش تفاهمنا ليلة البارح على كلش
لوكي : وش تشوفي فيا ندير ؟ راهي تصيد وفرحانة
دورت نشوف فيها مطلعة سروالها وتشوف مع الجرح في رجلها لي ينزف من الطيحة
ليف : فال...
جات رايحة تجري ليها حكمها
ليف : نحي يدك
لوكي : خليها ... يزي من الحماية الزايدة
نطرت يدها منو ومشات لعندها
فالي : ليف مقدرتش نحكم الجاجة
ليف : هيا خلينا منها امشي معايا
حكمت يدها وفالي تعيط وتجبد فيها
فالي : خليني حابة نحكمها علاه تجبدي فيا
ليف : شوفي كيفاه جرحتي روحك هيا معايا
تكركر فيها وفالي تعيط نطرت يدها منها
فالي : خليني
ليف : فالي متخلينيش نحكي بزاف شوفي وين حطيتينا بخشونية راسك ومزلتي برك
دزتها فالي بكل قوتها وتعيط عليها
فالي : نكرهك نكرهك
قرب منهم لوكي وفرقهم على بعض وخزر في ليف في عينيها
لوكي : خليها
ليف : ايه خليها دبر راسها منزيدش ندخل روحي فيك طيحي ولا موتي هاني قاعدة نتفرج ديري لي تحبي
مشات تخبط في روحها وقعدت بعيد ضامة يديها لصدرها تخزر فيهم ولوكي دور ل فالي
لوكي : وشبيك حبستي ؟ بطلتي مش حابة تتعلمي
فالي : لا نتعلم بصح كي نتعلم نذبحها
دورت ورجعت تجري وهو مشا بهدوء لعند ليف و وقف جنبها
لوكي : مش قلتلك خليها تعتمد على روحها ؟ خليها تثبت روحها ليك ولنفسها ؟
مجاوبتوش وباقية تتفرج فيها حتى شافوها نقزت على جاجة وبركت عليها وتعيط
فالي.: حكمتهااااا
ضمتها بزوج يدين وفرحانة وهو خرج سكينو وراح لعندها قبل ما تهرب منها
لوكي: انا قلت جامي تحكميها
حكم الجاجة وقطع راسها بضربة وحدة وهي تنقز
فالي : مالا تعلمني ؟
لوكي : ايه
راحت تجري عند ختها فرحانة
فالي : ليف .. ليف شفتيني كيفاه حكمتها
باقية قالبة وجها مغششة
ليف : شفت
لوكي وراها جاي هاز الجاجة
فالي : قالي كون تحكميها نعلمك المبارزة
دز الجاجة في حضن ليف وتبسم
لوكي : خليهم يطيبولنا هذي
ليف : ااااع
عافتها وطيحتها في الارض طبست فالي هزتها
فالي : اني قلتلك اي تعاف كلش
ليف : منعافش هاتي هنا
خطفت الجاجة من يدها وشافت معاه وهو باقي يتبسم
لوكي : كي عاد متعافيش ديريها نتي
ليف : ايه نديرها
خزرت فيه بتحدي وهو ضحكلها ومشا ، خدودها طلعو حمر وتاهت .. بعدها فاقت مع روحها ورمات الجاجة وتمسح في يديها على القش تاعها لقات فالي تخزر فيها وتضحك بتسيتيت
ليف : خير ؟
فالي : يعجبك ؟ هاهاهاهاها
ليف : وش يعجبني تع ناناك منك صح
فالي : يعجبك شوفي خدودك كيفاه هههههه
ليف : بركاي متقولي هك مايعجبنيش
راحت تجري هاربة وتغني
فالي : ليف يعجبها البرنس لوكي ... ليف يعجبها البرنس لوكي هاهاهاها
وهي تجري وراها وتعيط عليها والجاجة هذيك تدلدل من ومن

في هذاك الوقت رون كان قاعد ومستشارو
رون : يعني حسب ما فهمت هي سحارة كبيرة و لوكي مخبيهم عندو
ايفان : من عادتو مايخلي حتى وحدة من نساه معاه في نفس البلاصة
رون : الا اذا كان خايف كشما يحكيو ولا كشما يتسرب كلام
ايفان : صحيح
وقف رون وعدل الخواتم لي على صوابعو
رون : هدفنا الجاي انو نجيبوهم مهما كلف الامر
ايفان : يلزم نعرفو حكايتهم و حكاية الكتاب الفارغ
رون : بالضبط
.... الأيام اللي جات بعدها فاتت سمنة على عسل لا ليف تعرض ليها لوكي ولا فالي دارت كارثة جديدة ، الهدوء اللي يعرف عندنا في العالم الواقعي بالهدوء قبل العاصفة و أبطالنا كانو يوجدو للحرب على ساق و قدم
فالي : ااااااع
جات تجري وحاولت تضربو بالسيف الخشبي لي يدرب فيها بيه لكنو صدها
فالي : اااا انت سامط صح خليني نربح
لوكي : مش راح تقوليلهم في وسط المعركة نتوما سامطين خليني نلعب ونربح
فالي : بصح مناش في معركة
لوكي : كيف كيف هيا
رجعت تهاجم فيه وتجري ودور عليه
فالي : حاول تابع سرعتي هاه هاه
تنقز ودور حولو من بعد جات تهاجم فيه زاد صدها طاحت وبدات تتمرغ في الارض
فالي : يييي بركا علاه هك
فسخ ضحك عليها ومشا نوضها
فالي: خليني نربح ونقولك سر
حرك راسو لا
لوكي : قولي سر ونخليك تربحي
عوجت فمها تخمم من بعد قربت منو وتهمس وتشوف من ومن
فالي: ليف تعجبها
بقا ساكت يشوف معاها
فالي : تبقا تشوف معاك كي تكون متشوفش فيها وخدودها يرجعو طمطومات كي تحكي معاها
لوكي : همممم
حاول يحكم الابتسامة لكن فشل
لوكي : وشكون قالك انتي ؟
فالي : هكذا كانت دير كي تشوف يزن
لوكي : يزن ؟ شكون هذا
فالي : حبيبها
اختفات الابتسامة من فمو ووقف
لوكي : هذا مش سر هيا بارزي
جات تحاول تلمسو لكنو صدها وطير السيف الخشبي من يدها خلاص
فالي : وعلاااه قلتلك خليني نربح
لوكي : كي تولي تعرفي تبارزي تولي تربحي بلا أسرار
رما السيف على الحشيش ومشا وخلاها تلعب وحدها ... مر جنب النسا وين قاعدين مجتامعين ولمحها قاعدة من بعيد و وحدة تضفرلها في شعرها وتزين فيه بدل عينيه منها وكمل مشا وين الخيمة تاعو
ليف : و الشواء تاني ؟
- ايه
ليف : سخفت على شواء بنين بصح اففف
- شواء و اكلات اخرى بزاف و شراب وغنا ورقص وسهرة لساعات الصباح الباكر ، نقدمو فيها الاضحيات لأودين شفيع المحاربين
ليف : اودين ؟
- اودين هو اللي يشفع للمحاربين اللي يموتو في ساحة المعركة وكلهم يروحو للجنة معاه ويجتامعو في الجنة فالهالا
ليف : همممم ايه
حركت راسها متعجبة من معتقداتهم وقعدت تسمع ليها تحكيلها على العيد تع الصيف ، وكيفاه يحتافلو بدخول الصيف وانو عندهم فصلين برك الصيف والشتاء و واش يديرو
الليلة هذيك:
- برنس لوكي استدعيتني !
دور يشوف معاها قربت منو وهزت يدها تمس في وجهو وقربت رايحة تبوسو دور وجهو
لوكي : ما استدعيتكش لهذا
مشا قعد في كرسيه وهي بقات مستغربة مش موالف يعيطلها غير اذا توحشها وعندو ايام معيطلهاش
لوكي : شوفيلي احسن فستان موجود و اديه ل فالي تلبسو في احتفال الليلة
وساعو عينيها
- متأكد
لوكي : وش فيه بش نتأكد
هبطت راسها موافقة ومشات خرجت ، وكيما طلب منها لقات اجمل غوب تم وداتها ليها وقت كانت مزال مع النسا يحضرو ، شافت شعرها المزين غزلت اكتر
- ليف ممكن ترافقيني ؟
ليف : علاه وش صرا ؟
- برنس لوكي بعتلك هذا تلبسيه للإحتفالات
قربت حكمتو منها والنسا تم يضحكو وتهامسو نطقت لي كانت تمشطلها
- روحي البسيلو خليه يمتع عينيه بزينك
ليف : وش نلبسلو بركاو مش هكذا
هبطت راسها حاشمة علخر ومشات تلبس وتحضر روحها لعيد 21 افريل