viking baby

الجزء 11

ليلة هذيك :
خرج ايفان بدون ما يخبر حد وين ماشي وفي الطريق توقف دور يشوف وراه من ومن ومشا جهة خالية من الناس مفيهاش بزاف و دخل بين الاشجار هذوك وين تلاقا واحد كان يستنا فيه
ايفان: وش كاين ؟ علاه جيت ؟
- جيت مبعوث ، لانو الملك حاب يعرف خطتنا وين رجعت ؟
ايفان : الخطة ماشية لكن كاين شوية تعقيدات فيها
- ايه ، سمعنا بالمجزرة لي عملها رون
ايفان : ايه هذي وكاين حوايج اخرى تاني ، رون دمر جيش خوه تماما ما خلا حد وزيد ...
- واش ؟
ايفان : دوك عندو زوج هنا الظاهر انهم يقدرو يقراو المستقبل و الماضي كيف وخايف خطتنا تدمر بسببهم
- خطتنا لازم تكمل كيما متفق عليها
ايفان : لكن شكون دوك بش يكون العدو المزعوم ؟ جيش خوه سايي مكانش
- لكن خوه حي ، ويلزم ترجع تقنعو انو خوه مزال ناوي ينتقم وانو يحتاج مساعدة الانجليز ضدو دوك قبل اي وقت
ايفان : مش تفهم فيا انت ! انا نقولك خوه معادش موجود
- تلقا حل دبر راسك المهم يطلبهم لهنا ولا عمرنا راح تصح لينا فرصة اخرى نحتلو الاراضي هذي وننشرو الدين
مشا وخلاه و ايفان بقا واقف يلعن بين شفافو ورجع ماشي ويخمم في طريقة كيفاه يرجع رون للمسار تع الخطة الاول ويتخلص من الاختين والكتاب هذا
في هذاك الوقت اولاف رجع عند لوكي وفي يدو زوج رداءات بلون اسود لبسوهم غطاو بيهم أنفسهم ومشاو مع جماعة كبيرة من الصيادين راجعين وقدرو يدخلو من البوابة الكبيرة من غير حد ما يلاحظهم ، لوكي مزال متذكر تماما وين بلاصة يلقا خوه ، شوارع المدينة وكلش فيها واولاف رفيقو تاني
اولاف لي كان واحد من جنرالات خوه لي حارب في الصفوف معاه وانقذ حياتو اكتر من مرة ، ثقتو فيه كبيرة وكان يشوف الظلم لي تعرضلو لوكي وكيفاه تهمش وكان هو اول الموافقين يوم قرر يمشي واللي معاه ويبدا في بلاصة بعيدة من اول وجديد لذلك مكانتو عند لوكي كانت كبيرة
اولاف : بش ندخلو لعندو دوك ؟
لوكي : راح نستناو اللحظة المناسبة تبعني
مشاو وين يقدرو يقعدو ويعسو من بعيد على القاعة الكبيرة وين ديما يقعد رون ويجتمع مع اتباعو... مرو ساعتين اللي داخل ولي خارج حتى شافو فالي يقود فيها جندي بسيف عليها ودخلو الداخل
اولاف : هذي فالي
لوكي ؛ ايه هي راهي عندهم لكن وش جابها عندو دير دوك في الليل
اولاف : و ويني ختها ؟
لوكي : متكونش بعيدة الزوج هذو ميتفارقوش الا اذا حبست وحدة فيهم
أولاف : تحب نشوف وين حبسوها؟.
بقا يخزر مع الباب ويخمم اذا يحب يعرف هي وين محبوسة ولا هذا فقط راح يشتتو على مهمتو
اولاف : يمكن تنفعنا في النهاية علاه جابهم هنا يمكن نعرفو السبب منها
لوكي : مجيتش هنا بش نعرف الاسباب اولاف ولا بش نفهم جيت بش نقتل رون ولا هو يقتلني .. اولاف هذي نهاية الطريق مش بداية اخرى
اولاف : مش النهاية اذا خليتني نعاونك مش لازم تخلص الحكاية بموتك
لوكي : رانا 2 رجال هنا في معسكر كلو تاعهم وش توقعت ؟ قلتلك قبل ما ندخلو انو مكانش مخرج انو هذي هي النهاية
اولاف : وانا معاك فيها
سكت ورجع قعد معاه يراقبو في الباب وقت شافو ايفان خرج وقف في الباب
لوكي : الحقير هذا مزال معاه
اولاف : قتلني الفضول نعرف وش قاعد يصير في الداخل
هز ايفان راسو يشوف باتجاههم وجا ماشي لعندهم يشوف شكون هذو لي من ساعتين قاعدين تم في نفس البلاصة
اولاف : او جاي
لوكي حط يدو على سكين تاعو مستعد و اولاف كيف كي وقفو زوج من الجنود وراهم وحطو السيوف تاعهم على رقابيهم
- متتحركوش
ايفان : مرحبا مرحبا ، هذي مدة مشفناكمش هنا عندنا
بقاو ساكتين والجنود نزلو القبعات من على ريسانهم كشفو وجوهم
ايفان : برنس لوكي ، سير اولاف ليكم وحشة
لوكي : واضح ...
خزر فيه ايفان وكشر
ايفان : الجرح في وجهك راح يخلي ندبة تتفكرها عمرك كل وتفكرك في ال 800 جندي لي قتلتهم
لز على سنيه وجا يوقف ويجبد سكينو ضغط عليه الجندي وراه رجع قعد
ايفان : خليك راكح لا حبيت تعيش بش تدي انتقامك
لوكي : معندك حتى دخل في هذا انت ، بيني بين خويا
ايفان : خوك هذا يكون قائد تاعي
اولاف : قائدك كان خوه قبل ما يكون قائدك
ايفان : زعما مش مهتمين تعرفو ويني الساحرة تاعك ؟
سكتو في زوج وشافو في بعض
لوكي : مش مهتمين
ايفان : حتى وكان عرفتو انو الكتاب تاعها تاني هنا
بقا يشوف فيه برك وساكت ومش فاهم علاه راه يدير هكذا
ايفان : عموما اذا مهتمين... راهي في منزلكم القديم لوكي ... أكيد تتذكرو
هز يدو صرف الجنود وراهم
ايفان : بالتوفيق منقدرش ندير اكتر من هكذا
مشا وخلاهم واولاف جا ينوض حكمو لوكي
لوكي : وقف ... هذي أكيد خدعة منهم
اولاف : انا نمشي نشوف وين هي وانت استناني
لوكي : لا نمشيو كيف كيف
ليف: يا كلاب حلو ... حلو يلعن راستكم كلكم على بعضكم
تضرب في الباب وتصيح على طول صوتها ودور من ومن تحوس على اي مخرج بعد ما داو فالي بعيد عليها ، ملقاتش كيفاه تخرج قعدت وحكمت في راسها
ليف : يا فالي متخربيهاش على راسنا متفضحيهش دنيا
اما فالي فكانت تاكل وترهج وتعاود من ومن ومن ماخلات والو
فالي : العنب هذا بنين مش نورمال منين جبتوه
رون : التجار جابوه من بلاد اخرى
فالي : ميتشبعش ممكن ندي منو ل ليف تاني
رون : أكيد
هزت منو وتحشي في ثيابها و رون شور لواحد مشا خرج ورجع ليهم بحاجة مغلفة في قماش وحطها في يد رون
رون : فالي شوفي وش عندي هنا
دورت ليه تشوف مع يدو وهو يحل في القماش شافت الكتاب تاعها عندو وساعو عينيها وتلاحت عليه تحكمو بعدو عليها
رون : لاااا اا اا مش بالسرعة هذي
فالي : اعطيني نشوفو دقيقة برك
رون : قوليلي علاه مهم بزاف ليكم
فالي : كيفاش علاه مهم ؟ انا نقولك في امور كثيرة تهم الكل مش حنا برك
رون : بصح لازم تقوليلي السر كيفاه نقراه اول شي
فالي : عادي حلو واقراه
حلو ويدور في صفحاتو الفارغة لي ما فيها شي
رون : لكنو فارغ
تشوف معاه وهو يقلب في صفحات مليانة ويقولها انو فارغ تماما
فالي : فارغ ؟ يعني ابيض ولا الكتيبة مش مفهومة
رون : ابيض ... بصح انتي تقدري تشوفيه ؟
سكتت ثواني من بعد حركت راسها لا
فالي : لا فارغ خلاص منشوف في شي
رون : قلتيلي انك قريتيه حتى انك تقريبا خلصتيه
فالي : نقدر نقراه فقط بوجود ليف لانها هي الساحرة مش انا
رون : قاعدة تكذبي عليا فالي ؟ مالا معدتيش تحبيني
فالي : لا نحبك مش نكذب
رون : الكتاب ... فارغ ؟
بقات تشوف معاه متوترة
رون : جاوبيني
فالي : فارغ ايه
اختفت كل التعابير من وجهو وحط الكتاب على جنب
رون : وعلاه حاس انك تكذبي فالي ... قالولك من قبل انك متعرفيش تكذبي ؟
هز سيفو وقرب منها يخوف فيها بش تحكي
رون : إذا ما قريتيهش دوك ، راح تكون اخر حاجة شفتيها في حياتك هو سيفي في وسط قلبك
فالي : قاعد تخوف في طفلة صغيرة تع 9 سنين لي متعرفش حتى تقرا بلا اختها ؟ مش هكذا يديرو الملوك
رون : قلتي عمرك 13 سنة
فالي : وش الفرق بين 13 و 9 انا أصلا منعرفش نقرا ومنعرفش نحسب
رون : فالي نحسب انا ونتي رجعنا اصحاب ؟
فالي : وانا تاني وراني نصارح فيك بكلش حتى لوكي وما قلتلوش وش فيه الكتاب و هاني نفهم فيك لا انت لا انا نقدرو نقراو الكتاب بلا ليف
رون : دوك نجيبها ونشوفو
طلب من واحد يمشي يجيبها ورجع قعد مشنف ويخزر فيها وقت دخل ايفان
ايفان : تحتاج اي مساعدة ؟
رون : كلش مليح ، فالي راهي متعاونة بزاف مش هكذا ؟
هزت كتافها تع حبيت تصدق صدق محبيتش منكسرش راسي معاك و ايفان بقا يشوف معاها ومع الكتاب وحتى هو قاتلو الفضول يعرف وش فيه
لوكي و صاحبو كانو يراقبو في دار وين ليف كانت وقت جا واحد من الجنود داها
اولاف : داوها .. وش معنى يبعتنا هنا من بعد يجيو يديوها
لوكي : منعرفش ... مش فاهم وش صاير
تبعوهم مرة أخرى وين القاعة لي فيها فالي تاني و بقاو برا وقت دخلت ليف رون طلب من الكل يخرجو بقاو هوما برك في 4
رون : ليف مرحبا ... شرفينا
بقات واقفة تخزر فيه
ليف : نشرفكم دوك ؟ مش كنت محتجزة علاه دوك نشرفكم
رون : فالي اصرت انك تكوني معانا تفضلي
خزرت في ايفان ومشات تقعد ولمحت الكتاب محطوط و فالي تخزر فيها وتمعنيلها انهم ما يشوفوش الكتاب انو فارغ بصح معرفتش توصل ليها المعلومة
رون : فالي تقول انو متعرفش تقرا الكتاب هذا من غيرك و انو فقط انتي تقدري تخليها تشوفو
ليف : تشوفو ؟
فالي : نشوف الكتابة على صفحاتو البيضاء
ليف : بيضاء ؟
تشوكات وخرجو عينيها
فالي : ايه ... نسيتي ؟
بقات تشوف من عين لعين ومن بعد فهمت
ليف : ااااه قصدك الكتاب الصفات تاعو فقط بمساعدتي تقدرو تشوفوهم ؟ ههههه وي وي لازم طقوس طويلة ومملة وكلش وش رايك تمدلي انا نقرالك وش حاب تقرا
جات تمد يدها تهزو ضرب بيدو على الطاولة
رون : أيا كانت الطقوس ديريها
ليف : لكن ...
قاطعتها فالي
فالي : لكن الطقوس لازم تكون بالكتاب يلزم تمدلها الكتاب وقف وجبد السيف تاعو
رون : اذا حاولتو اي شي بش تندمو فهمتو ؟
ليف : ما راح نحاولو حتى شي دير ثقة فينا
رون مكانش داير ثقة فيهم و ليف وفالي باقيين يحكيو بالإشارات يمعنيو لبعض
ايفان : ملك رون اسألهم وش راح نكسبو من الكتاب هذا الاول نظن تعرف الأول على واش راك ناوي
رون : وش فيه بالضبط
ليف : الكتاب فيه كل خبايا موجودة اي واحد شي يوم عمل عملة ولا كذب كذبة ولا حاجة قعدت مخبية في هذا الكتاب راهي مكتوبة وكي تقدر تقراه راح تعرف كلش
فالي : حتى اعمق الأسرار ، كيف سر الدب لي قتلتو
ايفان : بصح شي أسرار لازم تبقا أسرار
رون : لازم نقراه
شافت ليف وفالي في بعض بمكر و يتفكرو وقت فالي حكاتلها انو ايفان كان عندو يد في قرار لوكي بش يمشي ويبعد وهو جامي عرف بالسر هذا .. ايفان خايف من اشياء دارها بالتخبية لا تتكشف ورون مصر انو يقرا الكتاب
ليف : خلينا مالا نطبقو الطقوس ، نحتاجو شموع و خمر و قماش يربط بيه عينيه
ايفان : مش راح يربط عينيه
فالي : مالا مش راح يقدر يقرا هيهيهيي
لز على سنيه ورون أمرو انو يمشي يجيب وش طلبو خرج وهو يغزل
ليف : خلينا نقعدو في بلاصة مريحة اكتر
جبدوه بعيد على الطاولة خلاوه يقعد في الارض وقعدو يجيبو في الشمع ويدورو فيهم عليهم
ليف : اعطيني الكتاب دوك
رون : لا مش حتى نقراه
ليف : نحتاجو من أجل الطقوس وزيد وين راح نروح بيه بقا يشوف فيهم ومدلها الكتاب ليدها وقعدو يستناو في ايفان يرجع
ايفان خرج من القاعة شاف حولو صرف الحراس لي واقفين برا بحجة يجيبو الحوايج لي طلبو البنات وهو بقا يحوس بعينيه من ومن
اولاف : وش قاعد يدير هذا ؟
لوكي : كأنو صرف الكل وبقا رون وحدو في الداخل مع لبنات
اولاف : ايه بصح وش يديرو ؟
كبس يدو قبضة والسيناريوهات دور في راسو تع وش يدير رون مع ليف لداخل وكشر دور اولاف يشوف فيه
اولاف : وش كاين ؟
لوكي : رايح ندخل
وقف جا ماشي ليهم حكمو اولاف بسرعة وهنا لمحهم ايفان مشا لعندهم
ايفان : واش تستناو طبول الحرب بش تفيقو انو وقت ؟
وقف لوكي وهو يخزر فيه بطريقة مش مليحة
ايفان : ادخلو وهزو البنات وكتابكم وامشيو
لوكي : منيش هنا على جال لا كتاب ولا بنات
ايفان ؛ صح ؟ يعني مش هامك المرا تاعك لداخل وحدها مع خوك
لوكي ؛ ما عندي حتى حد لداخل يهمني من غير دم رون مقابل دم شعبي
اولاف : تعرف انو حنا هنا مش على جالهم علاه تعاون فينا
لوكي : حاب نعرف وش غرضك انت من كل هذا ؟
ايفان : رون الملك وبش يبقى الملك وبمساعدة الكتاب و الساحرة لي تخصك راح يحكم كل القبائل هنا .. وش احسن شي في رايك ؟ تهز ساحرتك والكتاب وتمشي تخطط لانتقامك وترجع ولا تدخل وتموت قبل ما يصحلك حتى تمس شعرة منو
لوكي : راح نقتلو وانت راح تبعد من طريقي
ايفان ؛ مش راح تقدر ... راح تموت قبل وراح تبقا ساحرتك عندو
عض شفافو وخزر فيه
ايفان ؛ و واش من ساحرة تاني ... راهي هبرة تتاكل
دزو وهو يكشر وحكمو من رقبتو يخنق فيه حكم ذراعو واولاف دخل في النص يحمي فيه
ايفان : اولاف بما انك اعقل واحد بينكم حط عقلو في راسو و قنعو يهز وش يخصو ويمشي
اولاف : مزال مش فاهمين غرضك انت من هذا كل
ايفان : اذا راح تبداو تسألو اسئلة نقولكم بلي ما بقاش وقت
شور جيهة الحراس لي راجعين ومشا وخلاهم ... يلزم لوكي يرجع ويلزم يدي منو الساحرة والكتاب بش ترجع النار تع الحرب تتأجج واذا ما تحركش بش يضطر يخلص بنفسو على البنات ويلقا كيفاه يرجع الحرب لمسارها
لوكي و اولاف قعدو يتناقشو في الاخير قررو يهزو البنات والكتاب لانو ايفان خرج بخرجة متوقعوهاش واذا مات دوك مش راح يعرف وش كاين
ايفان : ملك رون تفضل واش طلبتو
عطاهم الشراب والقماش
فالي : دوك لازم تغطي عينيك
ناضت تجري لعندو تربط القماش على عينيه منعها
رون : بعدي ... مش راح نربط عينيا
ليف : لازم
ايفان : راني هنا للحماية