حكمت يد ختها ومشات ، تشوف من ومن مش عارفة حتى هوما وين ولا وين طيشهم البحر لكن مش راح يكون بعيد أكيد وراح تلقا شي ناس ولا حتى طريقة تتصل بيها
فالي : ليف شوفي ... شوفي هنا
شافت فيها لقاتها تشور بيدها لبعيد لقارب بعيد عليهم بزاف عندو اشرعة لونها احمر وابيض و المقدمة تاعو طالعة
فالي : هذا قارب تاع القراصنة الفايكينغ
ليف : قراصنة ناناك امشي واسكتي
فالي : والله شوفي هاه
خرجت الكتاب تاعها من تحت حوايجها مبلول وسحبت يدها من يد اختها
ليف : فالي يزي وش ديري ؟
فالي : شوفي هنا هاهي صورة هذي
شافت مع صورة في الكتاب نفس الصورة نفس المنظر لي مقابلهم جبل اسود والما و قارب فايكينغ ، احساس غريب حستو كيفاه مصادفة تكون بالدقة هذي لكن كالعادة الصور أكيد موجودة في الحقيقة بش تكون موجودة في الكتب
ليف: طبقي عليا هذا وهيا تحركي قبل ما نجمدو بالبرد
حكمت يدها بإحكام المرة هذي وشدت عليها وهي تحاول تتملص ومش حابة تمشي
فالي : رانا هنا في داخل الكتاب ليف
ليف : راني تاعبة وبردانة ومش قادرة امشي لا نخليك هنا ونروح
تجاوزو الشط الخالي وين فاقو و قابلهم مينا كبير من بعيد مليان ناس وقوراب ، قوارب قديمة ميناء بالحطب و اشكال غريبة خلاتها تيبس في بلاصتها زادت دورت تشوف على يمينها سهول على مد النظر وقرية صغيرة ومنازل صغيرة مبنية قريبة ل بعضها
ليف : وين رانا ؟ وش هذا
جبدت فالي يدها بغزرة وصاحت في اختها
فالي : راني قلتلك رانا في الكتاب دخلنا رانا في عالم الفايكينغ
ليف : بلعي عليا فمك
فالي : علاه متسمعيش ليا ، شوفي هنا شوفي
تنعتلها في صفحة الكتاب وين نفس المشهد مذكور وموصوف بالذات والصفات ، خطفت الكتاب من يدها
ليف : الكتاب هذا هو سبب تعنا انو رانا هنا في البقعة هذي ومزال برك هازتو ؟ حابة تفهميني انو حنا دخلنا في نص كتاب ؟ تشوفي فيا مهبولة كيفك ؟ اه
فالي : صدقيني اقراي برك
ليف : منقراش
وهزت عاودت رمات الكتاب بعيد طاح قريب للماء والامواج بقات تلامس في اوراقو، جات رايحة تجري تهزو حكمتها اختها
فالي: مطيشيش الكتاب ااااااا ، نسحقوه لازم نعرفو وش فيه كل بش نخرجو من هنا ليف سيبي يدي لااااااااااا
ليف : امشي قدامي انتي هبلتي رسمي وبش نحكي مع بابا ينحيلك الكتابات هذو لي مالي تلقطي فيهم
تمشي وتكركر فيها ورايحة تشوف الميناء وشكون فيهم يقدر يمدلها تكلم باباها
فجأة تسمع في كلام قريب دورت تشوف في جماعة جايين جيهتهم يحكيو ويمشيو في يديهم الحوت صيدوه لابسين لبسة غريبة ولا الاحسن القول لبسة قديمة تع عصور ولت وفات عليها الزمان ، جلود حيوانات و فرو و وجوهم موشمة و شعورهم طويلة
فالي : شوفي قلتلك رانا عند الفايكينغ ، يااااي
جات فرحانة رايحة تجري ليهم وتحكمها اختها غطاتلها فمها وجبدتها قبل ما يشوفوهم تخباو
ليف : هبلتي اسسس اسكتي
هزت راسها طل عليهم تتأكد من وش شافت صح ومش تحلم ورجعت قعدت وتضرب في خدودها
ليف : وين جبتيناذذ وين رانا
فالي : قلتلك دخلنا الكتاب
ليف : وكيفاه نخرجو من هذا الكتاب
هزت كتافها متعرفش
فالي : كون ما رميتيش الكتاب كان عرفنا دوك ...
عاودت هزت كتافها
ليف : امشي نرجعذو نهزوه امشي
جبدتها من كول الفاست تاعها تركركر فيها وراها واول ما وصلو وين رمات الكتاب شافو واحد من الفايكينغ هازو ويقلب في صفحاتو حبسو في بلاصتهم 1
ليف : موحال أكيد راني نحلم
فالي : لا مش تحلمي اختي موحال انا ونتي نجتامعو في حلم مليح
ليف : مليح ؟ هذا راو كابوس
أنت تقرأ
viking baby
Adventureحين تنتقل فالي و أختها الى كتاب خيالي عن ال viking كيف ستكون رحلتهم قصة مليئة بالتشويق ، الحب ، المغامرة و عالم جديد يكتشفانه معا ( الكرونيك باللهجة الجزائرية كاملة )
