viking baby

الجزء 4

الصباح فاق على صوت الرجال برا صوت الحديد يضرب في بعض و عياط وقت التدريبات ، قعد في بلاصتو يحك في عينيه ودور يحوس عليهم بعينيه شافهم مخبيين في حضن بعض مغطيين وراقدين وقف يعدل في قشو ويعض في شفتو من داخل ويخمم ، وين لقاهم خوه... وهل جابهم بش يكشف حركاتو ؟ لازم يبقا عينو عليهم
مشا هز يشرب ودور هز الفرو تاعو لبسو وحل الباب خرج ، فاقو على حس الباب ناضو مفجوعين مكان حد موجود عرفو انو خرج
ليف : اقعدي
ناضت طل من ومن البرد يطير حايرة كيفاه ما مرضوش حتى دوك
فالي : ليف جيعانة كرشي توجع من الجوع
ليف : انا راح ندوخ من الشر وهاني ساكتة
بقات تحوس في الحوايج لي تم كشما تلقا يتاكل والو
فالي : هيا نخرجو نشوفو وش ناكلو
دورت ليها وخزرت فيها
ليف : وش حكيت معاك البارح ؟ كلامي ذاب في شمس النهار ؟ اه ؟ من اليوم مزيديش تجبدي اسم ملك هذا و كيما تفاهمنا وش نحكيو
فالي : بصح كون نقولولو الصح رايح يربحو و الملك رون يخسر وقادر يقتلنا
ليف : مش راح نمدولو التفاصيل قدقد دوك نلقا فكرة من راسي نقولهالو اول شي نفهمو برك وش صاير وين وصلنا في الحكاية هذي
هوما في الهدرة هذي والباب دقدق وتحل ودخلو زوج جنود و وراهم وحدة ... شعر أصفر كلو ضفاير
وقفت فالي راحت تجري عند ختها تخبات وراها
ليف : وش تحتاجو
- بعتني القائد برنس لوكي لعندكم
شورت للي معاها دخلو حطو قش
- هذا وش لقيت عندي منعرفش اذا يجيكم ولا لا لكنو احسن من لي لابسينو في الثلج هذا ..البسو
دخل الثاني حط سلة فيها ماكلة وفالي دورت طول تشوف معاها وحست كرشها تقرقر
- بعد ما تلبسو وتاكلو راح نخرجو ندورو شوية و نجيبو وش تحتاجو
خزرت فيهم خلاتهم يخافو وينفذو وش تحكي طول ، خرجو رجال لي جاو معاها و هوما في زوج بدلو ثيابهم
دورت فالي لأختها
فالي : يوو شوفي كيفاه جيت ؟ اووو حاسة روحي بطلة من الكتاب
بدات دير في حركات وتقلد فيهم كيفاه يتقابدو بالسيوف
فالي : يا رجال ، ارض المعركة ليس للجبناء هل انتم جبناء ؟ يااااااع
- نشوف اختك متحمسة للحرب
ليف : هه طار عقلها من الحماس متتصوريش
مشات تشوف وش جابت كانت خضرة و اجبان حيوانية صنع منزلي و حوت مجفف
ليف : هيا تاكلي
راحت هزت بدات تاكل بالواقفة وليف هزت طرف فرماج مع وحدة فلفل وقعدت تاكل من الجوع وتستبن
ليف : وين رايحين
- للبلدة ، للسوق
وساعو عينيها ودورت تشوف مع فالي لي فهمت عليها ... فرصتهم انهم يحوسو على شكون هز كتابهم
فالي : ياااي ، نقدرو نشريو وش نسحقو للتعويذة هكذا
ليف : ايه
- مليح كي راكم متحمسين .. القائد قالي منوثقش فيكم بزاف
ليف : معندك علاه تخافي راح نكونو تحت امرك ومنعذبوكش طول
فالي : ايه مش راح تحسي بوجودنا
هزت ليف حواجبها متعجبة من ختها
ليف : لا صح كاينة
- كملو خلينا نمشيو
ليف : مقلتيلناش وش اسمك ؟ انا ليف وهذي فالي
- اسمي مش مهم
شابحة وجها علخر ولاو في زوج سكتو وياكلو
خرجو معاها وراحو يمشيو ، طريق وعرة وجديدة عليهم هوما بنات المدينة ، بينما اللي معاهم ماشية لاباس بيها لا غلبت لا طاحت لا ضربو الحجر رجليها .. ليف و فالي وراها يمشيو يلهثو ويتماوتو حتى وصلو البلدة
ليف: انا قلت جامي نوصلو
فالي : لي اخترع الطونوبيل وقتاه يزاد ؟ مزال بعيد ؟
ليف : مزال بعيد مزال امشي
لحقوها يجريو و مشاو جنبها
- شكلكم مش متعودين على الطرق تعنا ؟ منين جيتو
ليف : لا مش مش متعودين فقط غلبنا من السفر ومرقدناش مليح
دورت شافت فيها وتخزر من فوق لتحت
- وكاين سبب علاه مرقدتوش ؟
حركت راسها لا وفالي طل عليها
- كشما ...
كانت راح تسقسيهم حاجة من بعد حركت راسها ومشات
- خلينا ندورو ونشوفو وش تحتاجو
مشاو جنبها ويتفرجو في الشي الموجود و يحوسو في نفس الوقت على لي شافوهم في الشط وهزو كتابهم
فالي : وين جهة يبيعو العبيد ؟
- الرق هنا اسمهم و علاه تحوسي عليهم ؟ عندك شكون فيهم ؟
ليف : لا ماعندها شي فقط فضول ، فالي امشي من سكات وش حكينا ؟
فالي : اووووف سماطة
مشات وراهم وتخبط في روحها ، بعدها وقفو قدام واحد يبيع حوايج بزاف قعدو يتفرجو ويشوفو من ومن ، اصنام و دمى و قارورات زجاج مش معروف وش فيها و حشاوش ... مدت فالي يدها لدمية مخدومة بالقش و الحطب
ليف : هذي واش ؟ تع الفودو ؟
خطفتها فالي من يدها
فالي : هذي قربان ههههه يحرقو هذو للآلهة تعهم
ليف : وشنو ؟ هههه وش التخلف هذا
خطفتها لي معاهم من يدهم ورجعتها وهي تشوف من ومن لكان كاين شكون سمعهم
- انتم هبلتو ؟ مش في عقلكم أكيد ؟ حابين يذبحوكم هنا ؟
ليف : علاه ؟
- هنا الكل ماخد الدين والايمان على محمل الجد اي حد يستهزأ بالآلهة يقدر يموت ، عندك تحكي هكذا قدام القائد ولا غيرو
بلعت ريقها وشافت مع الدمية هذيك
ليف : راح ننتبه اكتر مش هك فالي ؟
فالي : ايه
- منعرفش وش الدين لي تبعوه لكن ننصحك طول ما انتي هنا يلزم تبعيهم هوما وش يقولو و واش يأمنو
دورت ومشات لحقتها ليف
ليف : انتي تاني هكذا ؟ واضح متأمنيش بالخرطي هذا
صاحت فيها بغش
- قلتلك مزيديش تحكي هكذا اذا حابتنا نروحو لاباس علينا قطعة وحدة ، اللي كيفنا ميسواوش عندهم حبة شعير
ليف: لي كيفنا ؟ وش قصدك لي كيفنا
فالي : العبيد
- هنا يلزم تعرفي انو المجتمع هذا مقسوم على 4 طبقات ، طبقة الحكام والملوك والامراء ، هوما الآمر الناهي كل مجموعة هنا عندها القائد والحاكم تاعها ... يمكن كاين اكتر من 30 عشيرة ، وتحتهم كاين طبقة المحاربين و قائدين الجيوش هذو لي ندفعولهم الضرائب ولي يحميو ارضنا ولي يوكلونا في الشتا ، الطبقة الثالثة طبقة الفلاحين الناس العادية لي عندها ارضها ومسؤولة على عايلاتها ولي يخدم في الصيد ولي يخدم في السوق وغيرو والطبقة الادنى كل هي العبيد حنا ، المملوكين فهمتي ؟ احنا معندناش حرية أصلا لذلك عسي ديما كلامك ومع شكون تحكيه
حركت راسها ايه و فالي سكتت ومش فاهمة شي عقلها الصغير الطايش ما يستوعبش طبقات المجتمع هذي وخاصة انو ما كبرتش في بيئة هكذا وحتى انو الكتب لي قراتها مكانش فيها تفاصيل لي يقدر عقلها يحللها ويستوعبها
- خلينا دوك نشريو وش جينا نشريو ، وش تحتاجو
ليف : ريش جاجة اسود
قالت هكذا وتستنا تقولها مكانش وفاجأتها وهي تقولها كاين وهيا تبعيني
مشاو دخلو محل فيه خردة كبيرة
- نحتاج ربش دجاج اسود
- موجود
دورت ل ليف
- قداه تحتاجي ؟
ليف : خمسة
عطاهم خمس ريشات و بقات تسمي بالزهر حوايج من خيالها المحض وكل مرة يلقاوهم لدرجة مش مصدقة يا هي صح تقدر تڨزن حوايج مش موجودة ولا صاحب المحل راه يحشيلهم ويكذب عليهم ويمدلهم في حوايج يقولهم هذو هوما
- وش مزال تحتاجو
ليف : نظن هكذا مليح خلينا نمشيو
مشاو خرجو وفي طريقهم يحوسو ملقاو حتى أثر للبحارة هذوك
فالي : ليف علاه ما نشريوش قربان اه
شافت فيهم هذيك مش فاهمة على وش يتغامزو وليف فهمت على اختها يلزم يلقاو كيفاه يزيدو يدورو مليح
ليف : تصدقي فكرة مليحة
فالي : لوكي متعلق بزاف بالآلهة راح تعجبو
- الاحسن ما تناديهش بأسمو هكذا برك و زيد منين تعرفي
فالي : قريتها في الكتاب تع السحر العظيم تع اختي
شافت فيهم ما فاهمة والو وليف ضربت اختها لي بدات تخرط كي العادة على راسها
ليف : اي تخرط ، القائد برنس لوكي قال هذا الشي قدامنا لذلك مزال تتذكرو
- ايه خلينا نمشيو نشريو قربان
بعد ما شراو قربان وشبعو دورة ومكانش أثر كامل للبحارة ، قررو يمشيو يرجعو ، رجليهم طابو والبرد جمدهم ... وهوما في الطريق شافو احصنة جاية من وراهم وعليها رجال
اولاف: وقفو ...
وقفو الجنود قدامهم باحصنتهم شافو اولاف لي تفكروه من البارح
اولاف: راجعين من البلدة ؟
- ايه .. خرجنا نشريو حاجات يحتاجوهم
خزر فيهم من بعد شورلهم
اولاف : خلي نوصلوهم
نزلو 2 من رجالو من الاحصنة تعهم مشات لي معاهم طلعت في حصان وهو بقا يشوف معاهم يستنا فيهم يطلعو
فالي : هيا ليف ..
ليف : انتي اللولة
فالي : هه اوك
مشات قربت من الحصان لي بدا يتحرك وتشوف منين تبداه
فالي : ليف عاونيني
مدلها الجندي يدو يعاونها
فالي : لا هزوني احسن منلحقش
هزها وهي تعافر بش تعدل روحها فوق الحصان وكبشت في شعرو وهو ينفض في دفارو مش عاجبو ورقدت عليه حاكمة بيديها ورجليها
أولاف : فالي ... تعرفي تركبي حصان
دورت ليه وهي هكذاك مكبشة
فالي : حاجة باينة وش تحسب ا لاخر
عاود همس كلمة ا لاخر بين شفافو جاتو بيزار و ليف قربت وتشوف من ومن منين تطلع وتحاول تحط رجلها والو مقدرتش حتى نطقت لي معاهم
-كون نستناوهم للصباح مش راح يتعلمو خلينا نمشيو احسن
اولاف : ليف ارواحي هنا
قرب منها بحصانو ومدلها يدو وبكل سهولة هزها طلعها قدامو
اولاف : ظهرك حطيه عليا ... وانت اطلع معاها
طلع الجندي الاخر ورا فالي والجندي لي بقا طلع مع صاحبو و مشاو كل .. كانت العشية والجو ضباب ومبقاش بزاف على الظلام ، وصلو لوين ناصبين خيام الجيش ، لمحهم لوكي من بعيد وشافهم كي نزلو من على الاحصنة
ليف : شكرا
فالي : ليف ... ليف
جات تجري ليها فرحانة
فالي : روعة الركبة في الحصان مسي وجهي
حكمت يدها وحطتها على وجهها
فالي : تجمد ههههه
ليف : ايه غطي هك لا تمرضي
جبدت الفرو على كتافها و رقبتها تغطي فيها دورو ل اولاف لي كان يتفرج فيهم بعدها نطقت لي معاهم
- هيا امشي معايا في زوج
دارتلو فالي باي باي ومشات وراها وليف وراهم ، وقت وصل عندو لوكي
اولاف : برنس لوكي
نزل من على حصانو وسلم عليه
لوكي : وين كنتو ؟
اولاف : درت دورة كي العادة على الميناء شفت كشما لحقو قوارب جدد وفي الطريق راجع شفتهم جبناهم معانا
لوكي : اممم ايه
اولاف : كاين حاجة مش طبيعية فيهم ...
لوكي : وش تقصد
اولاف : منعرفش ، لكن الاكيد انهم مش من هنا ، حتى انهم مايعرفوش يركبو حصان
لوكي : ولا يهزو سيف
اولاف : زعما صدقت قصتهم ؟
حرك راسو لا ومشاو كيف كيف
لوكي : مصدقتهاش لكنهم هنا حتى نعرف خويا منين يعرفهم و واش جاو يديرو عندنا
اما البنات فا لقاو روحهم وسط نساويين ولولاد يجاراو حواليهم وهوما يطيبو في الماكلة ولي تغسل ولي تقطع في اللحم ولي تجري ورا ولادها وهوما يشوفو من ومن تقول عليه عرس في الدار ناس كل تجري و المناولية تعيط على البصل شكون يرحيه ، نفس الشي
- اقعدو هنا وعاونو كيما الكل ، الاكل هذا ل 800 جندي والنسا والاولاد
فالي : ليف
جبدت ليف من يدها دورت ليها
فالي : نقدر نقعد نلعب مع هذو ؟
شورت لوحد الاولاد يلعبو
ليف : لا ابقاي قريبة ليا
فالي : منبعدش نوعدك
ليف: فال وش تفاهمنا ؟ هيا معايا
جاو ماشيين خرجت فيهم وحدة دزت لحضنها شكارة كبيرة فيها بلوط
- وصلو هذي
وراحت تجري وهي تعيط على طفل صغير
ليف : استناي وين ؟
تسمع في صياح من بعيد
- وينو البلوط وين راح ؟
فالي : هنا
راحو يجريو دواه عندهم
- انتي علاه واقفة هكذاك لا خدمة لا عملة حركي هذا
عطاوها تحرك القدور و فالي لقات زوج ولاد يجريو تم ويدخلو تحت طوابل ويخرجو ويلحقو بعض راحت تجري معاهم وليف تعس فيها
من بعيد لمحت البرنس مع سير اولاف يمشيو ويحكيو ... بقات باهتة وتحرك ونخمم كيفاه راح يخرجو من هنا سالمين
كانو يقربو جيهتهم بالشوية وهي عينيها مناحتهمش منو تايهة تماما
- شكلك عشقتي حتى انتي فيه
فيقها صوت وحدة تحكي معاها
ليف : نعم ؟ وش قلتي
- برنس لوكي! يعني منلومكش الكل يعشق فيه هنا مش هكذا يا بنات
ناضو كلهم يضحكو وهي تزلي
ليف : لا منيش نعشق فيه كنت تايهة برك
دورت تشوف لقاتو واقف مش بعيد بزاف وعينيها جاو في عينيه الزرق خلاها تهرب بعينيها بسرعة منو والبنات يضحكو
- راهو جاي هههه
بداو يتهامسو وهي حست خدودها حمارو وحشمت علخر بلا أي سبب
لوكي : ريحت العشا لحقت حتى خيمتنا فوق .. وش درتولنا
قرب ويطل على وش كاين حتى وصل وين هي واقف من وراها ويطل على القدر لي تحرك فيه
لوكي : ريحتو تشهي
بعدت من قدامو ودورت ليه و لسانها بلعتو مرة أخرى وهو يحكي بهدوء هكذاك
لوكي : شريتو وش لازمك
حركت راسها ايه بتوتر وتسمع في قهقهة تعهم زادو وتروها اكتر باقية غير تهرب بعينيها
لوكي : مالا نستنا الخطة في اقرب وقت
دور ومشا وهوما كل يضحكو
- راهي غارقة
- حبك درباني ههههههه
ليف : يزي
تغششت ودزت المغرف ومشات وخلاتهم
الوقت ظلام هزوهم الرجال للدار مرة أخرى ، دخلت فالي وهي تتذمر
فالي : وعلاه كل برا مزال وحنا يرجعونا هنا وش نقعد ندير
اما ليف مشات قعدت في بلاصة رجلها ترجف من التوتر وتتفكر في ليلة البارح ... سلكت روحها وختها لكن هل راح تقدر تسلك اليوم تاني ؟ وغدوة واللي بعدو ؟
تاكل في ضفارها وختها راحت طل على الماكلة لي جابو و الخبز وهزت تاكل منو
فالي : متتعشايش ؟
هزت عينيها شافت فيها و تتقلب وتنوض ليها
ليف : انا فهميني برك كيفاه راكي قاعدة هكذا مهنية راسك ما تخمي في والو ؟
فالي : فاش نخمم مثلا
ليف : قادرة تاكلي و قادرة تلعبي و تجري وفرحانة تقول ما رانا حاصلين في اعفن بلاصة في الارض ما رانا نروحو نقضيو حاجتنا في الشجر ولا رانا ناكلو في معرف واش ولا احسن من هذا كل راهم يسميو فينا عبيد ، انا ونتي هنا رانا عبيد كيشغل جواري ولالة عايشة حياتها عادي
فالي : أصلا انا مش قلقانة علابالي دوك يجي رون ينقذني
زاد جن جنونها اكتر وشعلت فيها
ليف : رون ؟ مزلتي برك ؟ نتي عايشة في الاحلام ولا واش ؟ راو ميعرفش أصلا اذا انتي موجودة بركاي ما ديري هكذا يا تعقلي تحطي عقلك في راسك يا نقسم نخيلك و نهج وحدي
فالي : روحي وحدك أصلا تموتي متعرفي والو وش في الكتاب روحي وش دخلني فيك انا
ليف : وش دخلك ؟ اه
دزتها بكل قوتها طاحت
فالي : يا كلبااااا دوك نقول لبابا
ليف : قوليلو وينو ؟ وش راح يدير
عضت شفافها وناضت كي المجنونة تلاحت على ختها وتضرب فيها وليف تبعد فيها وصواتهم طالعة حتى تحل الباب بقوة بش سيبو بعض يلهثو و القائد واقف يتفرج
لوكي: واضح جيت في نص حوار مهم بينكم
سيبو بعض وبعدو يعدلو في روحهم وهو بكل هدوء عاود قفل الباب
لوكي : شكون غلب ؟
وحدة فيهم ما جاوبتو وقعدو يخزرو فيه
لوكي : من شكلكم واضح انو فالي ربحت
ليف : هه
فالي : تضحكي بيهم طايحين
خزرت فيها ليف بغش كبير لوكي نحا المونتو تع الجلود والفرو لي فوق كتافو حطو على جنب ومشا يهز في الحطب ويحط فيه في النار
لوكي : انتابهو للنار ، الحطب لازم يتحط فيها بش تبقا شاعلة... كان مليح تاني كان حطيتو العشا فوقها يبقا سخون ، ونفضل كي ندخل نلقا العشا يستنا فيا مش نلقاكم تقطعو في شعر بعض هكذا ؟
بقاو يشوفو فيه ليف رجعت تغلي من داخل بسبب الطريقة لي يحكي بيها معاهم كأنو خدم عندو اما فالي مخلاتهاش في قلبها
فالي : واش تحسب فينا خدام ؟ انت بالاك تحسب رانا هنا بش نطيبولك ونشعلو نار يا...
حكمت ليف فمها سكتتها وهو بقا يخزر ومد يدو للسيف تاعو نحاه  ..
ليف : راهي صغيرة
لوكي : وكي عاد صغيرة ؟
حط السيف تاعو وزاد نحا السكين وحطو جنبو
لوكي : على هدرتها زايدة توجد هي العشا
مشا جهة طاولة جبد الكرسي وطلق لاطاي
لوكي : هيا
فالي : منوجدش
ليف : دوك نحط انا
خزر فيها خزرة تخوف خاصة مع الضو تع شموع هذاك تخوف اكتر
لوكي : اقعدي ، منعاودش كلامي مرتين
دز الكرسي مقابلو ليها تقعد ، بلعت ريقها ومشات بشوية وكل مرة دور تشوف مع ختها وقعدت خايفة ومتوترة
لوكي : هيا
دورت لختها تشوف فيها من بعد تنهدت فالي ومشات هزت الخبز حطتو فوق الطاولة والصحون و مغارف تع حطب و حطت العشا
دور لوكي يخزر في ليف لي قاعدة مكمشة وبعيد مد يدو للكرسي سحبها قريب خلاص
لوكي : هكذا خير
قلبها يضرب في الألف و فالي حطتلهم وقعدت مقابلتها في الجهة الاخرى
لوكي : خلينا ناكلو
بدا ياكل و فالي تاني وهي تخزر في اختها لي تشوف مع لماكلة وتقلب فيها
فالي : ليف اي تعاف متاكلش كلش
دور شاف معاها كيفاه مش تاكل ورجع كمل ياكل من سكات و ليف تهدد فيها تذبحها كون زيد تحكي حاجة
فالي : ليف مرة حكمتها تخرب في نيفها من بعد شمت صبعها
الماكلة خرجت نيفو من الضحكة لي حاول يكتمها وليف صاحت على طول صوتها
ليف : فالي متخلينيش نوض
خرجتلها لسانها تغزل فيها اكتر
فالي : ليف مرة كنا مدايرين تخييم وخرجلنا حنش بالت في روحها
ناضت ليف من بلاصتها راح تتلاح ليها وفالي تخرج في لسانها وتعوج عليها وهو ضرب يديه في زوج على الطاولة بكل قوتو وصاح
لوكي : يكفي
قعدو في زوج مبكمين خايفين وسكتو طول
لوكي : منزيدش نسمعكم
سكتو وهبطو راسهم وهو رجع قعد وياكل في هدوء ، بعدها نطق
لوكي : قالولي لقيتو كل وش تحتاجو في السوق اليوم ، وقتاه ديري التعويذة
نطقت وهي تمهمه
ليف : صورة مز...
وقبل ما تكمل تحكي تشوف فيه خرج ورقة من  نص ثيابو وحلها وحطها قدامها
لوكي: هاهي
شافو في زوج مع الصورة اللي مصورة قدامهم وفالي نطقت
فالي: رون مشي هكذا خلاص هذا ميشبهش رسم مش مليح خلاص
ليف : الصورة متشبهش
لز على سنيه وعوج راسو يخزر فيها
لوكي : هذي الصورة لي طلبتي وراح تخدمي بيها ، فهمتي!
فالي : بصح اي متشبهش
دور ضربها بظهر يدو لوجها ديراكت طاحت في الارض
لوكي : قلت هذي لي تخدمو بيها
جات ليف تنوض ليها حكمها ورجعها تقعد
لوكي : راكي تفهمي عليا ؟
حركت راسها ايه وعينيها تجمعو فيهم دموع و فالي بقات في الارض وتبكي