طريق كل مربوطين وعينيهم مغمضين ورايحين لمصيرهم المجهول ... فالي في حالة صدمة قوية و ليف مكانتش أقل منها لكن مكانش عندها الرفاهية انها تعيش صدمتها ولا تعيش حزنها ولا تعيش أي لحظة من يوم خلقت فالي ورجعت هي المسؤولة عليها ليف رمات كل حزن داخلها وكل صدمة بش تحتوي اختها وقت حد ما كاين يحتويها
لوكي لي وقف بعيد يتفرج على الدمار لي جابو على شعبو وفي حالة من الصدمة مخلاتوش حتى ينتبه لجروحو ولا الجرح العميق في وجهو من تحت عينو حتى ذقنو تحت .
بعد يومين :
ماشي في البلدة هو و شوية الرجال لي بقاو معاه يشوف من ومن مع الديار لي تحرقت ولي دمرت ، الجثث لي السكان الحيين مزال قاعدين يجمعو فيها الصغار لي بلا اهل قعدو و النسا لي يبكيو على رجالهم و ولادهم ، العيون تبع فيهم لي يشوف فيه بشفقة ولي يعزيه بحركة راس بسيطة ولي عينيه مليانين لوم كيفاه مقدرتش تحمينا
وصلو بعدها للمعسكر وين كانت المجزرة اكبر والمنظر تع الجثث اللي كلهم تقريبا نسا واطفال كان موجع للقلب وجثة ليف واختها ما تلقاوش ، لا حيين ولا ا ميتين كان كاين تفسيرين واحد انو داوهم معاهم والتاني انو قدرو يهربو ويمنعو من المجزرة هذي لكن اول احتمال هو المرجح اكتر
دخل الخيمة لي عاودو نصبوها رجال لي بقاو حيين يضمدو فيها جراح اللي تصاوبو ولي نجاو بانفسهم
بقا يشوف من عين ل عين وحس قداه معندوش حيلة مشا قعد على كرسيه لي كان نصو محروق ، و وراه اولاف لي حتى هو مالقا وش يقول
لوكي : انا خذلتهم ... خذلتهم كلهم
اولاف : انت ما خذلت حد ، الكل هنا تبعك وجا معاك لهذي الارض الجديدة .. انت فتحتلهم ارض جديدة يعيشو منها ويسترزقو منها هوما ولادهم
لوكي : انا فقط قدتهم للهلاك تاعهم ، رون حذرني لكني مسمعتش
اولاف : رون حبك تقعد تحت جناحو متقبلش فكرة انك تنفصل وانو الناس تبعك والجنود يلحقوك رون خاف على حكمو وعلى بلاصتو لذلك سماك الخاين والمنشق والمتمرد وانك حاب دير انقلاب
لوكي : لكن هو حذرني ، انا السبب انهم كل ماتو انا ببساطة جبت اهلنا واصحابنا هنا بش يلقاو حتفهم
اولاف : جاو معاك وهوما يعرفو وش راح يلقاو
حرك راسو بحزن كبير وقرب منهم القائد الوحيد لي بقا حي
- فقدنا جيشنا ، رجال لي بقاو يتعدو على صوابع اليد ... الوضع كارثة و المحاصيل حرقوها حتى لي حصدناه وفي المخازن
اولاف : راح نرجعو نبداو من جديد
- بعد اللي صرا القبائل كلها راح تسمع و كلهم راح يخافو
لوكي : مش راح نبدا من جديد ، اللي تاخذ بالقوة والغدر بش يرجع بالقوة والغدر ، هو حرق أرضي وانا بش ندي ارضو ، الموضوع دوك بات شخصي بيني وبين خويا
وقف وجا ماشي
اولاف : وين رايح ؟
لوكي : حد ما يتبعني
خرج وقف برا جبد نفس طويل وقعد يخمم في خوه ، زعما هذا هو الانتصار لي بش يخليه يفرح ؟ هكذا راح يحس روحو تحسن ؟
في هذاك الوقت ليف و فالي وصلو لحصن رون للمدينة تاعو ، تفتحت الابواب الكبيرة اللي دخلت منها عربتهم .. يسمعو غير في الحس و الكلام و روائح جديدة بدل ريحة التراب والشجر على طول الطريق
وقفو قدام القاعة الكبيرة لي فيها يجاتمعو عينيهم مغمضين حالتهم حليلة ، جوع وتعب دزهم للداخل
- تحركو
دخلو ويديهم حاكمين بعض بعدها حست على شكون حل عينيها هي واختها
ايفان : مرحبا بيكم عندنا
ليف بقات واقفة وتشوف معاه ، طويل بملامح مش حادة يبان عليه الذكاء اكثر من القوة ضفاير في شعرو لكن كان أقصر من لي تعودت تشوف ، وزين .. هذا هو رون اللي الكل يحكي عليه ؟
فالي حكمت في اختها وتخبات وراها وتبكي عرفت طول انو مش هو
ايفان : كيفاه كانت الطريق لهنا ؟
ليف ،: في رايك ؟
ضحك بشوية ومن بعد شاف فيهم مليح
ايفان : نعتاذرو انا جبناكم بالطريقة هذي .. انتم اديوهم يغسلو ويرتاحو وياكلو عيب راهم ضيوفنا
جاو زوج نسا لعندهم لابسين ثياب قتال وسيوف على وسطهم
- تفضلو معانا
حكموهم وخرجوهم من تم .. المدينة اكبر من البلدة الصغيرة لي كانو فيها قبل ، ناس اكتر وحس اكتر حتى المنازل اكبر داوهم لدار اخرى اهتمو بيهم وكلوهم و خلاوهم يغسلو ويبدلو عطاوهم ثياب نضيفة دافية وبعدها خرجو وقفلو عليهم وحدهم تم
قعدت في الفراش جبدت فالي في حضنها وتمشط في شعرها المبلول و فالي تبكي من سكات غير دموعها يهبطو... طبعت بوسة على راسها وضمتها
فالي : ليف حابة نروح لدار هيا نروحو
ليف : نلقاو الكتاب تاعنا برك ونروحو
فالي : وكون منلقاوهش ؟ راح يذبحونا كيفهم ؟
دورت وعنيها تنفخو من البكا حكمت وجها الصغير بين كفوف يديها مسحتلها دموعها و بقات تمسح على وجها بحنانة
ليف : اختي الزينة القوية ، وين راحت فالي الشجاعة اللي ما تخاف من حد ؟ حتى بابا ومتخافش منو ؟ اه
فالي : وش راح يصرالنا كون منرجعوش خلاص خلاص ونبقاو هنا
ليف : مش قلتي انو رون ملك العدل ؟ يخي انتي عندك ثقة فيه دوك يلقانا ورايح يرجعنا لدارنا ... متبكيش انتي هيا ارقدي معايا
رقدت وضمتها نامت على صدرها وهي تمسح على خصلات شعرها وتفكيرها هزها لعند لوكي ، اذا حسب القصة لي حكاتها فالي معناه هو عايش ومزال كاين معركة اخرى ، لكن هي مش حابة تبقا حتى المعركة هذيك بعد كل لي شافتو مش مهتمة تزيد تشوفو قد ما مهتمة انو تلقا الكتاب وتنجو بحياتها هي واختها ... غمضت عينيها ورقدت من تعب الطريق الطويل
في الليلة هذيك رون كان محضر عشا ليهم على شرفهم ... رافقوهم الجنود وين القاعة الكبيرة لي كانو فيها صباح دخلو لقاو الشموع النار شاعلة دفي الدنيا كل والماكلة من كل نوع فوق طاولة وكراسا محوطة
ايفان : مرحبا بضيوفنا تفضلو
ضغطت فالي على يدها وهي دورت طمن فيها
ايفان : سامحونا على الاستقبال تاع الصباح كنا مشغولين أمور كتيرة ومعرفتكمش عليا
مد يدو ليهم يسلم بعدو في زوج
ايفان : ايفان اليد اليمنى الملك المتوج رون
فالي : الملك رون هنا ؟
ايفان : أكيد هنا وراح يجي
رون : راني جيت شكون يحوس عليا ؟
دورو في زوج ليه جاي فالي وساعو عينيها وكأنو مش مصدقة انها تشوف فيه قدامها بشعرو الاسود البوكلي وجهو اللي فيه تقاسيم الرجولة تنطق والجدية والصرامة و في نفس الوقت الطيبة
فالي : رون
همست بين شفافها وسيبت يد اختها ومشات بخطوات خايفة ومش واثقة
فالي : انت هو الملك رون ؟
بقا يشوف فيها من بعد ابتسم ابتسامة حنينة وحط يدو على راسها
رون : انا هو
تلاحت حضنتو فرحانة والسعادة قاتلتها وليف باقية غير تشوف ، مظهرو وابتسامتو ميخدعوهاش لانو المجزرة لي صرات مزالت بين عينيها حتى لو اختها تشوفو الخلاص تاعهم
فالي : ليف لقيناه ... هاهو
هز راسو شاف مع ليف وتبسم وقرب منها ومد يدو ليها يسلم
رون : ليف ، سمعت عليك بزاف
محبتش تمد يدها ليه ولا جبدها بتفهم
ليف : وش سمعت عليا ؟
رون : كل خير .. لكن خلينا ناكلو دوك أكيد تكونو جيعانين
طلب منهم يقعدو وقعد هو وطول السهرة وهو يحكي بلباقة وأدب ويسقسي فيهم وش يحتاجو اذا عجبتهم اذا مرتاحين ، الشي لي خلا فالي تتفكر اول ليلة عند لوكي لي خلاهم مرميين بثياب مبلولة وجيعانين وحاول يتعدى عليها تاني ... كانت كل مرة تهز راسها تشوف في رون ومقدرتش تنحي منظر المجازر لي عملها
رون : أكيد تكونو تاعبين من الطريق الطويلة مش راح نخليكم تسهرو اكتر ونتعبكم راح نطلب منهم يرافقوكم للدار لي خصصتها ليكم واذا ناقصة فيها حاجة اطلبوها مني شخصيا
فالي : لا منحبش نرقد نحب نحكي اكتر ليف نقدر نسهر يخي
ليف : خلينا نوضو هيا
فالي : لا حابة نسهر بصح معاه
ناضت من كرسيها وراحت تجري ليه حكمت يدو وليف بقات تخزر فيها
رون : فالي انتي عاقلة مش هكذا ؟
حركت راسها ايه وتتبسم فرحانة
رون : اسمعي لختك وش تقول و روحي معاها وغدوة نوعدك تقدري تبقاي معايا قدر ما حبيتي
نفخت ومشات عند ختها لي كبست على يدها بغش وهمست
ليف : بش نتفاهم معاك وحدنا
مشاو خرجو و رون يتبع فيهم بعينيه
ايفان : وش رايك ؟
رون : منعرف يبانو عاديين بصح كاين حاجة ، لهجتهم مبدلة وحاجة فيهم مش كيف اللي متعودين عليه ، واضح انهم اجانب على الارض هذي خليهم نظن غدوة بعد ما يرتاحو بش يخبروني علاه حوسو عليا وطلبوني
ليف وفالي كي وصلو للدار كانت واجدة من كلش حتى حطولهم فاكية و حطولهم حجر سخون تحت فراشهم يدفيهم ، باتو ليلتها في راحة عندهم ايام معرفوهاش لكن ليف مغمضتش عينيها وهي تخمم وش رايح يصرا رغم انو يظهر عكس خوه تماما بصح أكيد كاين شي وراه
الصباح :
كانو يمشيو مع رون في البلدة تم و ينعتلهم وش كاين وش لي يخدمو وش يبيعو ويعرف فيهم على المنطقة ويحكيلهم كيفاه جاو مع باباهم هنا كي كانو صغار باباهم كان فلاح بسيط وكيفاه البلدة هذي كانت صغيرة وكانو في الشتا يجوعو اهلها وهو لي نظم المحاربين وكانو في الشتا يخرجو في حملاتهم ويرجعو بالماكلة و الذهب و مختلف الاشياء كيفاه طورت التجارة والمبادلة عندهم و الناس بدات تتوافد وكيفاه باباهم رجع القائد والحاكم
كل هاذ الحكايات وفالي لاصقة فيه فرحتها مش سايعتها وهي تسمع في تاريخ بطلها وليف تلقا روحها دور دور وتخمم في لوكي
رون : غلبتو تحبو ترتاحو؟
فالي : لا مغلبتش زيد احكيلنا كتر
شاف في ليف لي ساكتة وتبسم
رون : ليف !
ليف : و خوك لوكي ؟ وين كان من كل هذا
تبسم وليه ليه مسحها من وجهو
رون : لوكي ...
فرفش شعر فالي وتنهد
رون : لوكي كنت مسؤول عليه من كان في عمر 10 سنين تربى على يدي و شاءت الالهة انو نبعدو على بعض ...خلينا نرجعو دوك
ليف : علاه جبتنا هنا ؟
وقف وحط يديه وراه وشاف من ومن حولهم
رون : راح نحكيو في الوقت المناسب نظن البلاصة مش مناسبة تاني هيا خلينا نرجعو
رجعو معاه طريق كل ساكت و فالي تغششت من اختها وقاعدة تهمس ليها وراه
فالي : شوفي كيفاه سكت او تغشش كان لازم يعني تسقسي على حوايج متصبريش نتي
ليف : شكلو بطلتي مش حابة ترجعي لدار ؟ نرجع ونخليك ؟
كي وصلو وين دار لي يخليهم فيها خزرت فيه ليف
ليف : يعني حنا اسرى هنا دوك ؟ اسرى حرب ولا واش
تنهد وشاف فيها بابتسامة على وجهو
رون : حسب واش حبيتي تعتابري نفسك ، انا نعتبركم ضيوفي ونعرف انكم جيتو تحوسو عليا و خويا احتجزكم عندو ... كنت اسرى عندو وبما انكم هنا دوك فعندكم كل حرية فقط لازمني ناخذ حذري لاني منعرفش وش يمكن عمر في راسكم خويا و تاني مزال معرفتش السبب علاه جيتو تحوسو عليا
ليف : ومعندكش فضول تعرف ؟
رون : كي تكونو مرتاحين راح تحكيو ، نخليكم دوك
مشا وخلاهم دخلو لدار ، واجتمع مع يدو اليمين ايفان و محاربين من جيشو يتناقشو في امور الحرب
رون : كشما عرفتو على لوكي ؟
ايفان : القارب تاعهم رجع و كاين لي قالو انو انعزل على الكل وماش مبين
رون : طبعا هذا طبعو كي يفشل في حاجة يهز روحو يهرب ويخلي كلش وراه
ايفان : ظن انو رايح يزيد يوجد جيش آخر
رون : منين ؟ وزيد المجزرة لي صرات راح تسمع بيها كل القبائل وماش راح يقربو منو ويتحداونا
- ومع هذا يلزم نديرو احتياطات
نطق واحد من جنودو
رون : أكيد ، عندنا ... ايفان اشرحلهم خطتنا
ايفان : خطت الملك هي توحيد كل القبائل والملوك تاعها تحت راية وحدة تحت رايتنا ، وبالتعاون مع حليف قوي ... الانجليز
- لكن ...
رون : نعرف وش راح تقولو ... الحملات الصليبية لي امتدت لأراضينا و المجازر لي عملو في القرى الصغيرة ... خطتي انو يتوقف هذا كل وانو نسمحلهم ينشرو الدين في ارضنا لاكن بلا سفك دماء وبلا ما يسيفو على حد و بدورهم يوفرولنا قوة في السلاح والرجال وضد اي حد يرفض يكون تحت رايتنا ، راح نوحدو الفايكينغ تحت راية وحدة
الكل وافقو على خطتو و لكن الكل يعرف مدى تمسك الفايكينغ بدينهم وايمانهم وقداه يمقتو المسيحية
أنت تقرأ
viking baby
Adventureحين تنتقل فالي و أختها الى كتاب خيالي عن ال viking كيف ستكون رحلتهم قصة مليئة بالتشويق ، الحب ، المغامرة و عالم جديد يكتشفانه معا ( الكرونيك باللهجة الجزائرية كاملة )
