viking baby

الجزء 15

رون : منكم صح بش تمنعوني نخرج ؟ تتصورو انكم تقدرو ؟
- سموك مش حابين نتعرضو ليك اقعد في بلاصتك
رون : صحيح مكنتش ولا مرة القائد بصح هذا ما يعنيش اني مكنتش ولا مرة في حرب
ودخل عليهم بالسيف تاعو و رجعت ساحة حرب تم يضرب في هذا ويصد في هذا و يعرقل في الثالث بالكرسي و الرابع ضربو لوجهو ، يحاول يصدهم كل على مرة مهارات تاعو في المبارزة ما عليها حتى غبار لكن قبل ما يقدر يخلص عليهم في 4 كان تصاوب و الزوج لي دخلو تاني قتلهم بصعوبة و في النهاية خلص عليهم في 6 و سكين مغروسة في وسط جنبو .. طاح في الارض في بركة تع دمو وهو يلهث
رون : هكذا هي نهايتك ؟ يا رون ؟ هكذا تموت ؟ ملك مغفل انقلب عليه مستشارو وقتلوه جنودو في وسط مجلسو ! .... اودين رايح يشفعلك ؟ رايح تقعد معاه في فالهالا؟
هو هكذاك و يزدم الحصان تاعو لداخل المجلس وهو يصهل و فالي معلقة في رقبتو وتصيح
فالي : نوووض ... نوض راهم ورايا
نقزت جات في الارض مكبوبة على وجها وناضت تجري ليه تنوض فيه حكمت يدو وتجبد فيها
فالي : نوض تحرك مالازمش تموت هنا هيا
عاونتو وقف
فالي : اطلع هيا
طلع فوق حصانو بصعوبة وهي تعلقت في لجامو وبصعوبة طلعت و انطلقت بيه خارجة من تم الكل يجري وراها و ايفان تاني لحقهم
ايفان : الحقوهم ... الساحرة خطفت الملك تعكم الحقوها
انطلق الحصان هذاك وفالي ما عندها حتى فكرة وين ولا كيفاه توجهو
فالي : رون لازم انت توجهو منعرفش وين نروحو
كانت الرؤية تاعو مضببة والوجيعة تع الجرح حاجة اخرى لكنو تقوى على نفسو وحكم اللجام
رون : احكمي مليح
كبشت في شعر الحصان وهو زاد من سرعتو و وجهو للطريق اللي رايح فيها
الليل سدل ستارو عليهم و نار الاحتفال شعلت ولي تقدر تشوفها من على بعد امتار ، كلهم كانو يطبلو ويعيطو ، سمعت الاولاد من وراها يجريو رايحين يتفرجو
- اجري راهم بداو
- ازرب نلحقو نشوفو التضحية
راحت تمشي بهدوء وتشوف في الكل أجتمع حول النار الكبيرة و القائد في الوسط يحكي بصوت عالي
- اعداءنا واعداء الايمان تاعنا بش يظنو انهم ساهل يغرسو في وسطنا جواسيس وخونة راهم غالطين
ناضو كل يصفقو ويعيطو
- بش نخليوهم عبرة للكل وبش يبقاو في ذاكرة كل واحد يحاول يعبث معانا
تطبيل وصياح مع كل كلمة منو يزيد
- اليوم جبناهم وباش نقدموهم تضحية للإلاه اودين بش يبارك لينا في حربنا ضدهم
جابو 3 من الرجال يديهم مربوطين وراهم وعينيهم مربوطين والكل يسب فيهم وليف واقفة ما فاهمة شي
- لكن اليوم مش انا لي راح نفذ طقوس التضحية المرة هذي باش نتوجو قائد جديد .. القائد لي باش يقود جيوشنا ضد الحملات الصليبية ضد الانجليز الخونة برنس لوكي وبالحضور تاع قادة من قبائل اخرى
قرب لوكي منو والكل يهتف ليه هز يدو يحي فيهم
- جهزوه
نحا تريكو تاعو وقرب منو زوج نسا يسبغو في بدنو و وجهو بالابيض و يزينو فيه بالجماجم وكأنو مهرج من الجحيم
ليف : وش هذا ؟ فايكينغ بطعم Pennywise
الطبول زادت علات و شافت بعدها آسا قربت منهم و وقفت هزت التاج المصنوع من العظام صاح لوكي
لوكي : القائدة بش تكون هي
هز صبعو يشور بيه والكل دور يشوف معاها وهي تاني دورت وراها تحوس شكون
لوكي : مكانش قد الساحرة اللي تقدر تبصر المستقبل تعنا بش تكون قائدة لمحاربينا
ليف : انا ؟
آسا : لوكي ؟ ... بابا
شاف فيه القائد وشاف في بنتو لي واقفة وفي يدها التاج
لوكي : مش بش تكون غيرها
آسا: لوكي ناس تتفرج فينا ، بابا ... احكي
- القائد هو لي يختار شريكتو .. ليف قربي
ليف : لاااا لا خلي برك معلاباليش وش هذا .. هذا كل مقريتوش
قربوها الجنود منهم ومن النار وهي ماعلابالهاش أصلا وش صاير كتابها مافيه والو على هذا الشئ ولا هذ الحادثة
آسا: معليش
رجعت حطت التاج والقائد طلب من فالي هي لي تلبس لوكي التاج
قربت ما فاهمة شي هزت التاج والكل يهفت ليهم وقربت منو وهو يخزر في عينيها بطريقة خلاتها تتوتر ، حطتو على راسو والكل رجع يعيط ويطبل والقائد صاح بأعلى صوتو
- الآن وقت التضحيات للآلهة اودين
جابو هذوك الثلاثة لي كانو مربوطين و وقفوهم تم وهوما يبكيو ولي يشكي ولي يقول انو هو مش جاسوس انو هو فقط دخل الدين الجديد هذا لكن واحد ما سامع بيهم كلهم يشجعو
لوكي : بإسم اودين ، نقدم الاضحيات هذو ليه باش يتقبلنا في فالهالا ويبارك حربنا ضد الأعداء
ليف ما فهمت والو حتى تشوف فيهم جبدو سيوفهم وقطعو ريسانهم في ثلاثة
ليف : اااااااااع
صاحت على طول صوتها ولوكي شاف فيها بخزرة ،وحكم يدها جبدها قريبة ترجف بكلها
ليف : ع... علاه...علاه قتلتوهم
شاف فيها مليح ونطق وهو يلز على كلامو
لوكي : اذا مش في دنيا هذي ليف مالا في فالهالا
ومسح على جبهتها بالدم تع التضحية ونطق القائد
- حيو القائد الجديد تاعنا
الكل يصيح بأسمو وهي غير تتفكر في كلام آسا ، قائدة الحرب و زوجتو في فالهالا ... خواطرها دارو عليها ودورت رجعت قلبها تم وهي تبكي
لوكي : ليف !
جا يمسها ضربت يدو بعيد وهربت تجري من تم دموعها على خدها ، خزرت فيها آسا ولحقتها هي وزوج معاها
وقفت قدام برميل الما تغسل في وجها وتمسح في جبهتها من الدم وشعرها ومنظر اللي قتلوهم بين عينيها
آسا : هذي هي مالا القائدة ؟ لي من منظر الدم برك رجعت تبكي وترجف بكلها
- نظن الساحرة مش غير قاعدة تنجم في المستقبل يمكن عاملة سحور تاني لراجلك
آسا: صحيح الكلام هذا ؟
دورت ليف ليهم وتمسح في الما بكم يديها
ليف : شوفو انتم في 3 كلام المراهقات تع راجلك وسحور وكذا ميجيش معايا هزو بعضاكم وامشيو لانو مش انا اخترت هو خير
آسا: مسحور و معمي
- صحيح ولا كيفاه يخلي ملكة كيف آسا و يشوف فيك
ليف : يمكن لقا فيا واش ملقاش في الملكة تاعك آسا
قربت آسا منها وجبدت سكين ، خزرت فيها
آسا: خلي نشوفو مالا وش فيك ومكانش فيا
جات تهاجمها هربت منها لكن البنات حكموها
آسا: وين رايحة ؟ وين راح تهربي
ليف : تعرفي وش يصرا فيك كون تقتليني
آسا: شكون قال حا نقتلك ؟ قلت نزين وجهك بش تكونو كيف كيف انتي والقائد تاعك
قربت منها وليف تصيح على طول صوتها وهوما مكتفينها
اولاف : آسااا
صاح فيهم اولاف من ورا سيبوها البنات وبعدو واسا باقية شادة سكين وخزرت فيه
آسا : اولاف انت معندكش دخل .. هي دات مني لوكي و قدام الناس كل حشمتني
اولاف : لوكي اختار
آسا : كون مش ساحرتو علاه يبدلني بيها
ليف : منيش ساحرتو ومنيش ميتة بش نكون قائدة تاع اي حرب
قرب منهم ونحالها السكين من يدها وخزر في ليف
اولاف : صح زعما ؟ خاطر لي يشوف لوكي كيفاه يتصرف يظن صح انك ساحرتو
آسا: ايه موحال يكون هكذا معمي وعادي خليني نكمل وش كنت ندير
اولاف : استعملي يديك ..
ليف : كيفاه ؟ راح تخليها تضربني ؟
هز كتافو وآسا هجمت عليها ضربتها ديراكت للوجه طاحت
ليف : يا####
تلاحت عليها حتى هي وتضرب
آسا: بش نتف هذاك الشعر
ليف : تحسبي منعرفش نضارب ؟ راني تربيت مع فالي انا مش مع اي كان
ضربتها لكرشها وحكمتها من الشعر وتمرمد فيها في الارض والبنات جاو يدخلو يدافعو عليها مخلاهمش اولاف ...
آسا: ااااع خليني نحي يدك يا عاهرة
- واش كاين هنا !
سمعت صوت باباها زادت في البكا وطاحت في الارض تلعب فيها مغاشية و ليف سيبتها وبعدت وراها
اولاف : حاولت نفرقهم مقدرناش
ليف : محاولتش خليتها تضربني
آسا : بابااااا
لوكي : وش صرا هنا
ليف: حاولت تضربني تشوهني
آسا: تكذب سقسي البنات لي كانو معايا
- صحيح  ... ليف هي لي هاجمتنا
ليف : مش صح ..  اولاف شافهم احكي
اولاف : لحقت في وسط العركة مشفتش شكون بداها
خزرت فيه ليف و لوكي مشا حكمها من يدها وداها
ليف : يكذبو ، صدقني لوكي
لوكي : امشي
مشاو لدار كانت بعيدة على بقية الديار الموجودة دز الباب دخل ودخلها للداخل نطرت يدها منو وهو رجع الباب عليهم ونزل الخشبة لي تقفلو من الداخل... كان غسل الصبغة هذيك من على وجهو والدم بصح هي كانت خايفة منو ، بعدت عليه وبدات تحكي
ليف : يعني انت هكذا جيت قالولك ضربتها انا صدقت وجايبني تحاسب فيا هنا واش في بالك حا نخاف؟ معنديش علاه نخاف ولا نكذب أصلا و اولاف شاف وش صرا نفهمتش علاه يكذب ولا علاه راهو كونطري أصلا شاريها ليا
لوكي : يعني مش انتي ضربتيها ؟ انا شفتك انتي لي ماسحة بيها الارض
ليف : ماهي هي لي ضربتني وش ندير ؟ نخليها ؟ أصلا هذا كل منك انت ؟
لوكي : وكيفاه مني ؟
ليف : لانو انت اخترتني قائدة ومنعرفش واش علاه تختار فيا ؟ شكون قال نحب نكون قائدة هي كانت تم وفي يدها التاج علاه مخليتهاش تلبسلك هي
لوكي : مش حابها تكون هي
ليف : لكن انا ؟ رايي وين ؟ سألتني اذا موافقة ؟
لوكي : مكانش عندي وقت نلقا غيرها ، مش حاب تكون هي زوجتي في العالم الاخر ولا حتى العالم هذا 
ليف : يعني اي حاجة غيرها وخلاص
لوكي : صحيح
سكتت وتشوف معاه متعرفش اذا حست بالإهانة ولا غاضتها روحها لكن نطقت رغم لي حاولت تمنع روحها
ليف : يعني انا اي حاجة ؟ لي جات في طريقك برك
لوكي : صحيح
سكتت خلاص و بقات واقفة تشوف فيه بعدها دورت عينيها على الدار تتهرب من عينيه تخاف تفضح روحها انو غاضها الحال ، انتبهت وقتها للشموع في كل بلاصة على غير العادة و الشراب و فاكية و سرير مفرش بأحلى فرو توترت وبدات تمهمه
ليف : وش...وش هذا ... تع شكون دار هذي
لوكي ؛ راح نقعدو هنا ... انا ونتي
ليف : علاه وش خصها دار القائد علاه جبتني هنا
هز حاجبو وماشي و يقرب منها
ليف : لا تكون ناوي...
قص عليها وهو يحكي ويمرر في يدو على شعرها
لوكي : ناوي واش ؟ نزيد نمسك ؟ لا ... ليف انا مش بش نفرض روحي عليك ، صارحتك بمشاعري وانتي رفضتي خلصت ... قلتي متكونش همجي معايا ! متكونش متوحش غازلني ، قولي وش حاب فيا وانا درت هكذا ، صارحتك وش كاين هنا
حط يدو على قلبو
لوكي : ورفضتي ... خلي نقول هربتي لذلك معادش نحاول معاك اكتر
وجعها قلبها كي حكا هكذا ، وقد ما هي حابة انو يحاول اكتر قد ما عاجبها وقد ما خايفة تتعلق بيه و تمشي ترجع وتخليه
ليف : ما رفضتش .. صحيح هربت بصح مش .. منعرفش معلاباليش وزيد انت تحكي هكذا وبعدها تقولي انتي القائدة و لا مش في دنيا هذي في الدنيا الاخرى وش معنى
لوكي : لانو في دنيا هذي بش نخليك لكن اذا لقيتك في الجنة مش بش نخليك
قلبها رجع يضرب و دموع بداو يتجمعو في عينيها وكل كلمة يقولها زيد تصعب عليها انو تبقا بعيدة عليه وكل سبب تمد فيه لروحها ترجع تحللو
ليف : أصلا من الجنون انك تحبني ... كيفاه تحبني وانت صاراك ايام برك تعرفني
لوكي : منحتاجش ايام ولا اعوام بش نعرف ، لانو كي ينبض هذا هنا بين الضلوع خلاص ، نبض ليك يوم بعد يوم .. مزال كي نغمض عينيا اول صورة نشوفها هي صورتك واقفة تغني على الجنة بصوتك الملائكي ... والحلم اللي شفتو انا وانتي مع بعض في فالهالا
همست بين شفافها
ليف : الحلم ؟
لوكي : كان منزل ابيض كبير وسقفو احمر ، مشفتش كيفو قبل و في وسط حقل كبير .. حقل مليان بزهور الهندباء ، وانتي واقفة فيه و الريح فات وطير معاه اوراقها ... كنتي انتي هازة زهرة في يدك وتبكي بعدها نفختي عليها
بقات ساكتة تشوف معاه ودمعة وحدة هبطت من عينها وهمست بينها بين روحها
ليف : الدار...
دارهم البيضة الصغيرة مقارنة بغيرهم بسقفها من القرمود الاحمر و الحقل الكبير اللي مقابلهم واللي مليان زهور هندباء اللي طول عمرها تشكي من البذور تاعها لي يطيرها الريح للشباك تاع غرفتها وفي كل غرفة من الدار و وتضال تلم فيهم
قرب منها ورايح يبوسها غرغرو عينيها بدموع وقالت بصوت باكي
ليف: بعد عليا
لوكي : مش حابتني نبعد
دزتو بعيد عليها وسكينو في يدها سحبتها من وسطو
لوكي : نعرف انك حابتني انتي تاني ليف
حركت راسها لا وهزت السكين تاعو في رقبتو ... تبسم وباقي يخزر فيها
لوكي : بما انك سحبتيه وهزيتيه لرقتبي يا تقتليني دوك يا تبوسيني
يدها ترجف وقلبها ينبض و روحها فيه و صراع بين عقلها وقلبها يجلدو فيها ضرب يدها بعيد طير السكين منها طاح في الارض و يدو دارت على وسطها وسحبها لعندو باسها بعمق وهي تقاوم حتى بعدتو ورجعت تحكي وترجف
ليف : لالا... لااا منقدرش
لوكي : علاه ؟ وش كاين ؟ حاجة في الكتاب هي لي مانعتك ؟ لانو واضح منجذبة ليا حتى انتي واش مانعك ؟ راح نموت في الكتاب عندك
حركت راسها لا
لوكي : بسبب الحرب ؟ واش مذكور فيه الكتاب حتى راكي تصدي فيا هكذا ؟
ليف : منقدرش ... منقدرش وخلاص مكانش كيفاه نفهمك
لوكي : تفهميني واش
رجعت تبكي ومش قادرة تتخيل انها تحب في واحد مجرد حبر على ورق مجرد شخصية وهمية من اختراع كاتب
لوكي : يمكن مش لازم نفهم ولا انتي تحتاجي تفهميني...
شافت فيه و دموع مالية عينيها... وكانت في هذيك المرحلة لي كي يوصل ليها الواحد ويقول fuck it خليها تخلا ويصرا وش يصرا ويكون وش يكون حتى لو مجرد شخصية وهمية قربت منو ترمات في حضنو يديها على كتافو وضمتو بزوج يدين وغطست تبوس فيه بطريقة جامي دارتها من قبل ولا مع غيرو ، بلا قيود و واللي صرا في الكتاب بش يبقا في الكتاب ، يديه كبسو على وسطها يضم فيها اكثر وكأنو كاين مجال اكثر هزها دورت رجليها عليه ومشا نزلها على السرير وبلا اي مقدمات قلع من فوق وعرا صدرو ونزل يبوس فيها و يمشمش في رقبتها ويعض مرة و يبوس مرة بعد عليها يشوف معاها وهي تلهث حاول يحل الخيوط حول تريكو لي لابسة مقدرش قطعهم و بيديه كبش في رقبت التريكو وقطعو شقو على صدرها ونزل عليه يعض ويكبس مرة هذي مرة هذي وجعها ودمعة على طرف عينها وهي تحاول تهديه والو كيف اللي جامي شاف
ليف : ااااه
صوت وجيعتها زاد شجعو اكتر ولات تبعد فيه عليها وهو يزيد يتلاح
ليف : لوكي .. لوكي وجعتني ... لوكي شوف فيا
وعيو غايب و صوت نفسو سريع عينيه مليانين رغبة ... شاف فيها
ليف : مش هكذا
لوكي : وش مش هكذا ؟
ليف : مش بالهمجية هذي ... بشوية برك توجعني هكذا
لوكي: وش حابة ؟
دزتو على السرير ودارت رجعتو هو تحت وهي فوقو ، هزت شعرها لمتو فوق
ليف : دوك نعتلك كيفاه
طبست عليه باستو وبعدت رجعت تمرر في يديها على صدرو بهدوء و ببطء من تحت وطالعة حتى وصلت لكتافو ونزلت تبوس فيه من كرشو وطالعة في النص ، تطبع في بوسات خفاف يدغدغو المشاعر حتى وصلت لرقبتو غمض عينيه مستمع علخر بوش راهي دير ، يد ورا رقبتو صوابعها داعب في نهاية أطراف شعرو و و تبوس في رقبتو وتمرر في شفافها على تفاحة آدم ، يدها التانية على صدرو داعب فيه تعرف انو نقطة ضعفهم ... حتى هي تعرف حوايج من ومن
عضتو من لحيتو فيقتو من الدوخة حل عينيه جاو في عينيها
ليف : متقطعش ثياب المرا...
مررت يدها على طول فكو وجبدتو ينوض يقعد وبعدت هي وبدات تحل في الخيوط لي بقاو مقطعهمش
ليف : اتفرج عليها وهي تنحي قشها يكون أحسن
عض شفتو وعينيه يتبعو في كل حركة منها نزلت التريكو على كتافها ورماتو في الارض بقات بشوميز الخفيفة لي كانت لابستها من تحت ولي مشقوقة على صدرها ، بعدها نحات سروال بطريقة مغرية ، الشوميز كانت يا دوب مغطية نص مؤخرتها وقربت منو مرة أخرى يديه تلاحو طول تحت الشوميز وحكمها من ورا
ليف : ششش
بعدت يديه ودزتو ورا على السرير وبدات تحل في سروال تاعو و نزلتو وهو غير يشوف قربت منو طلعت حطت رجل من رجل من وقعدت على حجر تحس فيه يلمس فيها تكبس وكيفاه صحصح معاها ، يديها على صدرو وهي تتحرك بكل هدوء فوقو رايحة جاية تخرج في قلبو فجأة حكم يدها وجبدها لعندو قريبة
لوكي : ساهلة ، نعرف ندير هكذا
دورها على ظهرها ورجع هو فوق وحكم يديها من ومن ونزل يبوس في رقبتها... هابط بهدوء يبوس فيها وكمل شق الشمويز هذيك كل ونزلها من على كتافها و نزل يبوس ويداعب فيها حتى لكرشها ... بعد بين رجليها وهز راسو شاف معاها
ليف: كمل ...
خرجت ضحكة صغيرة من بين شفافو ونزل يبوس فيها ويداعب فيها وهي داخت خلاص يدها كبشت في شعرو و تقولو وش يدير وتملي عليه كيفاه و وين يمس و واش يمس وهو يتبع فيها حتى ذابت رجع خزر فيها ضحك على جنب
ليف : كمل متحبسش
قطب حواجبو و دورها فجأة على كرشها وقرب منها حكم شعرها بقبضة وحدة وجبدو ورا هزت راسها
ليف : اااي
قرب وهمس في وذنها من ورا
لوكي : دوك دالتي انا نعتلك كيفاه تكون
ليف : وش ت....
قبل ما تكمل تحكي حست عليه داخلها شهقت يدو  كبست على وسطها تحتم عليها انو تقوس ظهرها ويدو الاخرى مزال حاكم شعرها وشدو لعندو ... حركات سريعة ورا بعض وصوت الأنين لي طلع فيه زاد خلاه يهبل ، سيب شعرها ونزل يبوس في كتافها ويعض عليه .. يديها مكبشين في الفرو بطل قوتها... رجفت بين يديه و غاصت في عالم المتعة ... وحتى هو بعدها بثواني قليلة ، يديه كبشو على وسطها حتى حست صوابعو بش يختارقو جلدها وصوت نفسو الثقيل يرجع في النفس وحط راسو على راسها يتنهد .. وهمس بعدها
لوكي : هكذا ليف ... هكذا تكون
حلت عينيها الصباح ، بردانة ضمت روحها بيديها في زوج ورجع لبالها احداث ليلة البارح.. ضمت روحها اكتر وتجمعو دموع في عينيها وهي تشوف مع الكتاب اللي محطوط مقابلها مع بقية حوايجها أكيد هو جابهم هنا
الكتاب لي خافت تكمل تقرا نهايتو خايفة من انو يموت فيها لوكي ومرعوبة من الحرب الدامية اللي علقت في نصها هي واختها اللي لحد اليوم مزالت عند الملك رون مسحت دموعها وناضت مشات بهدوء هزت لبست قشها و هزت الكتاب ورجعت قعدت في بلاصتها وحلتو على الصفحة لي وقفت عندها ... الصفحة وين الملك الإنجليزي أمر بشنق لوكي في أعلى عامود سفينة و يبعتوه في البحر ويبقا هكذاك جثتو معلقة وروحو هايمة في البحار السبع بلا مرسى ويكون عبرة للي كان ورايح يكون
بيدين يرجفو قلبت الصفحة
((... كان اعتقاد الملك المتوج رون خاطىء إن الفوز بالمعركة لم يكن أبدا ندا للألم الذي يشعر به وهو يراقب الجلاد المأمور بتنفيذ إعدام أخيه يعد عقدة المشنقة ، وما الخير في فوز دنيء داس فيه على قومه ولوثت يداه بدماء شقيقه وهو يسلمه للموت .. نفس الدماء التي لوثت يداه وثيابه وهو يأخذه من يدي والدته المتوفاة يسلمه للحياة..))
قعدت تقرا وتبكي بالشهقة لدرجة انو حست قلبها بش يوقف كيفاه قرات انو الانجليز وقبل اعوام هاجمو قراهم وذبحو وقتلو وفسدو فيما يسمى بحملاتهم الصليبية لنشر الدين وكيفاه امو ولدت خوه يومها في وسط الغابة متخبيين ومدتو ليه يهرب بيه وقعدت هي تم بش تشتت الجنود اللي كانو يتبعو في اثرهم رايح يحط يدو في يدهم بش يقتل خوه ؟ مكانش اسوء من كاتب الحكاية هذي والظلم اللي سببو للشخصية البطلة و لوكي على حد سواء .. مش راح تسمح لهذا الشي يصير واذا كانت هنا فهي عندها القدرة تغير الامور لانو الكاتب مش كاتب هنا عليها ، مسحت دموعها وناضت مشات حلت الباب وهي خارجة تشوف في الناس تجري لجهة معينة
- بسرعة اجري قالو دب هاجمهم
- لا قالو جرح سكين الدب ميهزش سكين اجري
ليف : وش صاير ؟
حكمت زوج رايحين هوما تاني تسقسي فيهم
- قالو الملك الخاين رون هنا متصاوب راهو في خيمة الإجتماعات
وساعو عينيها وخممت طول في ختها لا يكون كشما صرا فيها اذا رون هنا فالي وين راحت ، وراحت حتى هي تجري لوين الخيمة كانو بزاف واقفين برا ويطلو يحوسو يفهمو وهي دز فيهم من ومن
ليف : بعد ... خليني ندخل بعدلي انت
دزتهم وحصرت روحها بين الحشد ودخلت وقفوها الجنود رجعت تعيط
ليف : بعدولي خليني ندخل راني الساحرة
نطق واحد منهم
- بعدلها هذي قائدة الحرب
بعدولها دخلت لعندهم لقاتهم كل واقفين القائد لوكي اولاف القادة لي جاو البارح و حتى آسا واقفة معاهم ، خايفة قربت وهي ترجف
ليف : لوكي ؟
دور عينيه في عينيها جاو حست النفس تقطع فيها خايفة تسمع انو اختها كشما صرالها شافت ابتسامتو لي ترسمت ببطء وبعد بهدوء ظهرت فالي من وراه
فالي : ليف.... لييييف
نقزت من فوق رون لي راقد تم وطارت لعندها بين احضانها ، ضمتها ليها ودور بيها تم وتبكي وتمسح على راسها
ليف : فالي
نزلتها في الارض وحكمت راسها وتبوس فيها وتعاود وتبعد شوية تشوف مع وجها وزيد ترجع تحضنها
فالي : خفت عليك كشما يدير فيك المتوحش الهمجي المتخلف هذا
حطت ليف يدها على فمها وشافت في الباقي و لوكي قلب عينيه
ليف : فالي وش هذا
آسا: على شكون قالت متوحش همجي ؟
خزرت فيها فالي وقربت من ختها همست
فالي : شكون هذي ؟ صفرة كي الربعة تع صباح
غمتها ليف تسكت فيها وتخبط فيها وتدعي
ليف : يا ريت صرا فيك اسسس غمة تغمك
ناضت وهي تتبسم