viking baby

الجزء 5

رقدو ليلتها محضنين بعض ، وليف تسكت فيها .. تعرف انو اختها مدللة ولا مرة واحد في دار مد يدو عليها خاصة انو هي الصغيرة وانو كبرت يتيمة معرفتش امها ، باباهم جامي مد يدو عليها مهما دارت ، من جهة هوما السبب في دلالها الزايد ومن جهة صغيرة ومسخاوش فيها
الصباح ... حلت عينيها على صوت الحس برا كي العادة اول مشهد شافتو مقابلها هو برنس لوكي راقد اونفاس في سرير تاعو عينيه جاو في عينيها... حست بخوف رجعت غمضت عينيها بسرعة وقلبها بدا يضرب وهي تتخيل فيه مزال يتفرج معاها ولا قداه عندو وهو هكذاك فاطن يتفرج معاهم
رجعت حلت عينيها بشوية لقاتو مزال يشوف فيها ، عينيه زروقا غايصين يشوف ولكن عقلو واضح في جهة اخرى صدرو عريان و غطا الفرو فوقو مغطيه بقات تايهة فيه حتى شافتو تحرك غمضت عينيها بسرعة
اما هو فكان تايه يشوف معاهم ويتفكر في وقت بعيد وقت كان حتى هو وخوه بالقرب هذا من بعض وقت كان يحميه هكذا وقت كان يخبيه وقت كان حتى هو يرقد في حضنو مطمن... في وقت من الاوقات كان هو و خوه نفس الزوج هذو هكذا ، حلت عينيا شافت معاه وبخوف رجعت غمضتهم ، حاس انهم يكذبو عليه وحاس انو كاين وش مخبيين ومش يحكيو وراح يعرف بالملاحة ولا القباحة ، زادت حلت عينيها وقعدت تخزر فيه مدة عينيها في عينيه تغري فيه .. تبسم وتحرك زربت غمضت عينيها ، وساعت التبسيمة تاعو وناض من بلاصتو بهدوء ومشا لعندها
حست عليه قرب منهم تكمشت في روحها كي مس يدها وحلت عينيها مفجوعة
لوكي : نوضي
يحكي بهمس و يجبد فيها ينوض فيها جات تنطق حط صبعو على فمو يسكت فيها ويشورلها تنوض
لوكي : شششش
جبدها نوضها وهي تحاول تتملص منو وتنوض فالي ، سحبها من الفراش بالقوة
ليف : وش كاين ؟ وش دير
لوكي : نحي
بدا يحل في الخيوط في الفاست تاعها وهي بدات تبكي وتحكم في يديه تبعد فيهم ، يدو دارت على وسطها وجبدها ليه ضمها لصقها علخر
لوكي : شششش متنوضيهاش
ليف : سيبني
صدرو عريان لاصقها وهي تحاول دز فيه وكل ما لامستو زيد تخاف اكتر
لوكي: نحي
تملصت من يديه وبعدت منو وهو لاحقها حتى حصرها وين الطاولة وحط يديه من ومن
لوكي : راح تبقاي هك تصعبي فيها عليا ؟ زعما رون خير مني فاش ؟
ليف : ماش خير منك ... مكاين شي بيني وبينو
لوكي : راح يكون مالا بيني وبينك
قرب منها راح يبوس وفالي صاحت على طول صوتها
فالي : ااااااع
دورو في زوج يشوفو معاها وهي ناضت تجري هازة القربان لي شراوه
فالي : اليوم لازم نحرقو القربان وش ديرو انتم ؟ ليف لازم نصليو اليوم بش نديرو التعويذة تاني بعد عليها
دخلت في نصهم ودزتو عليها
فالي : بعد بعد
بقا غير يشوف ما فاهم والو وهي تنعتلو في القربان لي شراو يحرقوه خزر في ليف في عينيها وهي مسحت دموعها
ليف : ايه معندناش وقت
حكمت فالي يدها وجبدتها بعيد
فالي : هيا نصليو
ليف همست ليها
ليف : وش نقولو
فالي : خلطي برك خليه يروح علينا
بقا واقف يشوف معاهم بعدها مشا هز ثيابو لبسهم
لوكي : نحب كي نرجع نعرف وش هي الخطة
ومشا خرج
اما بعيد على هذا كل وفي بلاصة اخرى خلاص وبالضبط في حصن الامير المتوج رون ، كان واقف يشوف مع البحار لي قدامو والكتاب لي في يدو
- الكتاب هذا قالو يخصك
رون : يخصني ؟
هاز الكتاب يشوف فيه ويقلب في صفحاتو البيضاء لي مافيها شي وهز حاجبو متعجب
رون : شكون قال الكتاب هذا تاعي قلت !؟
- ملكي .. لقينا على شط البحر زوج من بلاد غريبة كان واضح من ثيابهم و اشكالهم وقالو انك انت استعديتهم واحدة منهم سحارة كبيرة وقالت انو الكتاب هذا كتاب سحر يخصك
رون : الكتاب فارغ
- هذا لانو سحري
رون : وين هوما الزوج هذو ؟
هز البحار كتافو
- للأسف مقدرتش نقنع صحابي يجيبوهم هنا باعوهم في سوق الرقيق و....
رون : و ... واش
- سير اولاف شراهم وهوما دوك عند ...
رون : لوكي !
حرك راسو ايه وهبط عينيه في الارض ، رون سكت ويخمم من بعد خرج كيس دراهم ورماه ليدو فرح بيه وحلو يطل عليه
رون: انصرف
كي خرج هذاك مشا جهة العرش تاعو وقعد وقت قرب منو مستشارو
ايفان : واضح كاين حكاية من ورا هذا
رون : مش فاهم ... جاب كتاب فارغ ويقولي ساحرة و انا استدعيتهم
ايفان : يمكن يكون ملعوب آخر من خوك
رون : أكيد
ايفان : تحب نبعتو للجواسيس تاعنا ؟
رون: ايه خليهم يعرفولنا وش الحكاية هذي في اسرع وقت
ايفان : حاضر
عند البنات كانت ليف قاعدة ضامة روحها وتبكي و فالي معرفتش وش ديرلها ، تكره تشوف حزن اختها حتى لو انها ساعات تكرهها لكن كي تشوفها هكذا تبكي يوجعها قلبها كانت تحضن فيها وتحاول تسكتها
ليف: حابة نخرج من هنا حابة نرجع لدارنا
فالي: راح نخرجو نوعدك
ليف : كيفاه ؟ كيفاه راح نخرجو ولا حتى يصرا فيا واش راح يصرا والكلب هذا يحكمني وقت مكاين حد يسلكني منو
فالي : خلينا نقولولو الخطة لي تفاهمنا عليها
ليف : وين نعرفو كي نقولولو مش راح يقتلنا ويرمينا كي يخلص منا
فالي : موحال
تحل الباب عليهم ودخلت نفس المرا تاع البارح
- صباح الخير عليكم ، قالولي عندكم طقوس ديروها
وقفت فالي
فالي : ايه
- راح نرافقكم تفضلو معايا
ناضت ليف حتى هيا هزو شي لي شراو ومشاو معاها وفالي تخرط عليها يلزم بلاصة كذا وكذا حتى وصلو وين الخلا بعيد على العينين دنيا فارغة والجبال مقابلينهم
- نظن هنا احسن بلاصة
فالي : لا مزال كون نطلعو من و ...
ليف : لا هنا مليحة راني غلبت سايي طلعنا هذا كل
فالي : خلاص هنا مالا
- ايه ابداو
فالي : يلزمنا خصوصية لو سمحتي بعدي شوية
ليف : ايه بعدي اكتر لهين وين شجرة هذيك لهين خلاص
باقية تبعد وهوما يتهامسو
فالي : هك اي بعيدة
ليف : ايه بعيدة بصح وش راح نديرو دوك
فالي : منعرفش قولي كش خرابيط برك ، شحلول محلول فهلنج كارفور امازون هذو كل كلمات مايعرفوش معناهم
ليف : هيه هاتي نشعلو ناس نرحقو كلش فيها ونخرطو برك
حكمو يشعلو في النار بطرق بدائية جابو ساعة معاها و بداو بعدها يدورو عليها ويقولو كلام ما عندو حتى معنى ويرميو في الريش بالوحدة بعدها الحشواش لي شراو و رجلين جاج و....
فالي : اندريكا داريكوووو ، شادي قطع سباطو
ليف : وش زاد عليه
فالي : هبال
ليف : وش في يدو
شافت فالي مع يدها
فالي : نعناع
ورماتو في النار وهوما يدورو
ليف : داميتو كاسيتا اه اه اه
فالي : داميتو كاسيتا اااي
وطرطقو بالضحك بعدها
فالي : اي تشوفنا
ليف : اششش كملي
فالي : اولاااا كمون تالي تالي فو
ليف : سو نايس تو ميت يااا
شافوها جاية شبحو روحهم زعما
ليف : ايتها الآلهة اكشفي لنا العدو
وطيشو تراب على النار ورجعو يزغرتو كي ليزانديا
فالي : دوك لازم نرسمو بالفحم على عينيك بش تشوفي الحقيقة
قعدت ليف وفالي هزت الفحم وترسملها
ليف : دوك لازم تبعدو خلوني نشوف
غمضت عينيها وتتفكر في الخطة لي حكاوها ، انو رون عندو تابعين من ايسلاندا ويجيو معاه في قوارب عبر النهر ويتوقو لوكي يستناهم في البحر وهوما يفاجؤوه ، في حين انو الحقيقة رون كان متفق مع الانجليز المسيح انو يعاونوه يدي الحكم ويسمح ليهم و لحملات الصليبية تاعهم تدخل ارضو وتنشر دينهم فيها ويمحو الوثنية
حلت عينيها لقاتهم يشوفو معاها
فالي: قدرتي تشوفي ؟
ليف : الآلهة سولكينغ خلاني نشوف الحقيقة كلها وراح نخبرو القائد برنس لوكي وش شفنا اليوم
- مليح معناه نقدرو نرجعو دوك
فالي: ايه راني دخت من الجوع
رجعو للبلدة وفالي تمشي وتخرنن من الجوع حتى لحقو راحت تجري وين النسا لي يطيبو ويغسلو في القش وليف جات لاحقتها حكمتها لي معاهم
- انتي راح تجي معايا
ليف : وين ؟
- هيا ...
ليف : وفال استناي نجيبها
جبدتها ومشاتها تكركر فيها
- خليها امشي
بقات ليف دور وتخزر ختها وين حتى وصلو وين الخيمة من ومن دايرين جنود ويشوفو معاها وهي خايفة بلعت ريقها كي وقفو قدام الخيمة
- قولهم رانا هنا
دخل جندي للداخل
ليف : عند شكون جينا ؟
مردتش عليها رجع الجندي خرج و طلب منها تدخل وحدها
- ادخلي
ليف : وانتي متجيش معايا ؟ علاه ؟
بقاو يخزرو فيها وهي دخلت خايفة و مرعوبة خاصة كي وحدها ضمت روحها بيديها
لوكي و المستشارين وجماعتو كانو قاعدين يشوف كل معاها
انتبه لوكي لسواد الفحم حول عينيها وضفاير لي دارتهم في شعرها ، هز حاجبو يدو على الكرسي حاطها تحت خدو يلامس في شفافو ومركز عينيه فيها تماما
اولاف : قربي متخافيش
كيفاه متخافش وهي في نص خيمة مليانة برجال متوحشين بدائيين همجيين كيفهم ، كأنو يطلب في المحال
لوكي : وصلنا الخبر انك قدرتي تشوفي وش الخطة لي حطها رون
حركت راسها ايه
لوكي : احكيلنا ، قادة الجيوش عندي كلهم متشوقين لسماعك
بقات تشوف من عين لعين والرعب تملكها
ليف : كاين مشكل قبل ما نقدر نحكي
لوكي : اللي هو ؟
ليف : نحتاج وعدك ... كلمتك اول شي انو كي تعرف وش تحتاج مش راح تقتلنا لا أنا لا اختي
كبس يدو على ذراع الكرسي ويخزر فيها
لوكي : ما نمد حتى وعد
ليف : مالا وش يضمن متقتلناش
لوكي : وش يضمن متروحوش لعندو حتى هو وتعطيه تفاصيل خطتنا ؟ نظن لازم نتعلمو نوثقو ببعض ؟
حركت راسها لا بتكرار
ليف : نعتذر منك بصح منقدرش نوثق فيك
صاح فيها ووقف وعينيه يقدحو نار
لوكي: بش تنطقي ولا مطولين ؟
صاحت فيه حتى هي
ليف : وكان تقتلني انا وختي
لوكي : وعلاه نقتلك وانا نقدر نجبد عينيك في دقيقة هذي من وسط وجهك ونديرهم شربة ونوكلهم لأختك ؟
رجفت في بلاصتها والكل يضحك ويتهامس بعدها نطق واحد منهم ، لابس الفورير على كتافو و سلاسل في رقبتو وخواتم بزاف
- راح يمدلك كلمتو احكي برك
ليف : وعد ؟
دور ليه لوكي وهو يزمجر من الغش
لوكي : شششش الكبار لي يحكيو هنا
سكت هذاك بلع فمو وهو رجع دور ليها وخرج السكين من جنبو
لوكي : بالاك منيش واضح هنا بزاف ! راني مش نهدد... راني نديرها صح
بعدت خطوتين وراها واثقة انو يحكي صح رمشت ورا بعض ونزلو دموعها وتحكي
ليف : الجيش تاعو جاي من جهة النهر
- عرفتها هاه قلتلكم
ليف : جايين سفن قليلة من البحر بش يشتت الانتباه تاعكم ولكن الجيش الحقيقي جاي من الخلف
لوكي : وش شفتي تاني
ليف : راح يهاجم البلدة ، النسا والاولاد وراح تكون مجزرة كبيرة ويموتو فيها بزاف من رجالك كان رحت من الجهة البحر
بقا يخزر فيها ودور ومشا قعد في كرسيه ساكت والكل يشوف معاه
لوكي : اخرجي
وساعو عينيها مصدقتش انو هك برك بالبساطة هذي صدقها مسحت دموعها بسرعة وخرجت تجري من تم راحت طول تحوس على اختها لي كانت قاعدة تاكل ولا على بالها
ليف : فالي
قعدت قدامها وبدات تحكيلها وش قالت كل
فالي : يعني راح نمنعو قريبا ؟ اففف
ليف : بلا الكتاب مش راح نقدرو نخرجو بصح
فالي : كي نروحو عند الملك حبيبي نحكيولو على الكتاب وهو راح يعاونا نحوسو عليه
ليف : علاه واثقة بزاف من الملك تاعك هذا
فالي : لأنو طيب وبطل القصة ديما هو المنقذ الحامي وانا وهو نتشاركو في بزاف حوايج خاصة انو عندنا إخوة مش ملاح
ضيقت ليف عينيها وخبطتها على راسها وشافت مع النسا لي في الواد متجمد وهوما يغسلو نورمال وتنهدت وهي تتفكر في الخوف والتوتر لي عاشتو قبل لحظات
ليف : مش مصدقة قداه يخافو منو ... قادة الجيوش هذوك كل
فالي : وش من قادة جيوش
ليف : في الخيمة ... كان كاين شي 9 منهم واولاف هذاك كلهم كي ينطق هو يسكتو
وقفت فالي مفجوعة وبزقت الماكلة من فمها
فالي : 9 ؟ منك صح ؟
ليف : 9 ايه ولا كتر وشبيك مخلوعة متخلعينيش اني نخاف كي ديري هكذا
فالي : غير ابداي تندبي خدودك كيما موالفين
وبدات تندب كيما دير ختها كي يكونو حاصلين وليف غير تشوف
ليف : انطقي احكي
فالي : في المعركة تع القادة تجي قبل معركة العرش في المعركة التانية يكون هو برك واولاف و واحد تاني ، قائد جيش Greenland لي سمعنا بيه وصل
ليف: والمعنى ؟
فالي : المعنى انو الملك رون جاي صح من جيهة الواد وفي المعركة غدروهم هكذا و الجيوش تاعو كلها ماتت تقريبا و ال 9 لي شفتيهم مفروض ميتين دوك رانا قبل معركة النهر الكبرى وبعتناه دوك للنهر حنا وهاني نندب
ليف : نندب وجهي حتى انا يا فالي علاه ! دوك يديرونا شطيطحة لحم
فالي : وانا وين نعرف ااااع
ليف : ااااااع
وقفت المرافقة تاعهم عند راسهم
- وش كاين
سكتو في زوج وشافو فيها وسكتو ونطقو مع بعض
ليف : فالي شافت حشرة
فالي : ليف شافت فار
- فأر ولا حشرة ؟
فالي ، ليف : في زوج
بقات تخرز فيهم في عينيهم ومشات وخلاتهم
فالي : نكرها
ليف : وش تكون هذي ؟
هزت فالي كتافها متعرفش
بقاو في نص النساوين والواليد تعهم يعاونو ويحطو ويجيبو و ليف كل مرة تهز راسها تتفرج مع اللي رايح وجاي
من بعد مشات قربت من اختها
ليف : فالي .. شوفي معايا
دورت ليها وهي تحشي في بطاطا حلوة في فمها
ليف : اتولهي لهين مكانش لي واقف وتاني قليل لي قاعد يعدي
دورت فالي تشوف جهة المنازل الصغيرة تع الفلاحين وين مكانش بزاف حركة
فالي : ومن بعد ؟ واش
ليف : نقدرو نهربو
وساعو عينيها وشافت من ومن
فالي : هبلتي تحبي يذبحونا
ليف : شوفي الخطة ، انتي امشي تجري وتلعبي مع لولاد لهين و ابقاي تقربي من بعد كي تشوفي دعوة غافلة روحي واستنايني انا ندير سبة بلي رايحة نقضي حاجتي ونلحقك ونهبطو من تم طول على نفس الطريق لي نهار رحنا منها للسوق في البلدة
سكتت فالي تخمم شوية من بعد حركت راسها لا
فالي : يحكمونا ، وتخلا علينا مكان لاه
دزتها ليف وهي تلز على سنيها تحكي من بينهم بش متسمعش لي حولهم
ليف : احسن من انو نزيدو نرجعو لدار المخبوط هذاك شفتي كيفاه ضربك البارح وزيد بما انو ذكائك الرائع عطيتيهم خطة يربحو بيها راو مزال نطولو كي يموت ملك رون تاعك بسببك
فالي : زعما يقدر يقتلو ؟ لالا لحكاية ميموتش فيها
ليف : رانا نبدلو في الحكاية مش فايقة انتي ؟ من دخلنا راهي قاعدة تتبدل
بداو يجبذبو نظرات حولهم ولات ليف بعدت عليها ومشات تعاون ، شوية هك قربت منها فالي
فالي : راني خممت وعندك حق نهربو نروحو عند الملك رون ونحذروه
ليف : صحيتي هيا روحي دوك او يتفرجو فينا
رجعت تحك في الجلد هذاك تمشط فيه وفالي راحت تجري ورا الاولاد
فالي : هيا هيا كل نلعبو لعبة اسمها غميضة اجري
راحت ودات معاها سرعوفة ولاد يلعبو وليف بقات تحك وتمشط في الجلد وتخمم اذا صح يقدرو يهربو ، يا ريت بصح لازم تحاول ولا مش راح تعرف
دورت تشوف في اختها مكانش تنهدت و وقفت
ليف: راح نقضي حاجتي ونجي
رمات المشطة من يدها ومشات ، عينيهم يتبعو فيها بعدها رجعو لخدمتهم وهي تمشي وتعس من ومن شكون يشوف فيها اختفات بين الناس وهبطت تجري وين اختها تستنا فيها وتلاقاو ببعض
فالي : علاه طولتي حمارة خفت متجيش
ليف : منقدرش نوض في دقيقتها يفيقو بينا ... هيا امشي ازربي
هبطو مع بعض يزاربو في خطواتهم ومكاين حد وراهم
فالي : مشافوناش !!
ليف : ايه اجري اجري يلزم نبعدو قد ما نقدرو قبل ما يفيقو انو مكانش اجري
ديماراو يجريو قد ما يقدرو ورايحين برك مايعرفوش حتى اذا هذيك الطريق لي تخرج ، مبعدين و الفرحة ملاتهم مش مصدقين انو تخلصو منو ، كانو توغلو بزاف داخل الغابة وقت وقفو يرجعو في النفس
فالي : رجليا ماتو مش قادرة نزيد نمشي
ليف : لازم بصح ريحي شوية نكملو نخرجو من قبل الظلام
فالي : البرد والثلج رجليا جمدو
ليف : ايه بالضبط كون نقعدو هنا نموتو مجمدين هيا هيا نوضي ديجا حبسنا بزاف
وقفو ماشيين سمعو حس بين الاشجار وقفت ليف تتصنت و فالي لي مهبطة راسها يائسة ضربت فيها
فالي : اااي
ليف : اششش
دورت تشوف من ومن
فالي : كاين حس ...
ليف : ايه عليها حبست ، لا يكون كش دب ولا
كبشت فيها خايفة وقت سمعو الحس مرة أخرى خافو لكنهم شافو واحد خارج من بين الشجر
- بنوتات وحدهم هنا وش ديرو ؟
ليف : وش دخلك انت ؟
يلعب بسكين في يدو ويشوف فيهم بطريقة باشعة و خرج من وراه زوج صحابو خلاف
- جاونا ضياف بش نستقبلوهم
خبات اختها وراها وتشوف فيهم
ليف : رانا ماشيين من هنا ما نحوسو على حتى مشاكل ، كملو في طريقكم وحنا نكملو في طريقنا
- بصح هذي هي طريقنا يا روحي
- يمكن تحبو تجيو معانا انتم تاني
فالي : وعلاه نجيو معاكم حنا رايحين عند الملك رون أصلا
ليف : فال اسكتي
- اوووه الملك رون ؟ ههههه
جبدو كل سكاكن تعهم و يضحكو
- مالا خلينا نتهلاو فيكم كي عاد تابعينو
فالي : opss
خزرت فيها اختها وغمزتها وبسرعة طابست هزت حفنة ثلج رماتو على وجوهم وفالي هربت في طريق وهي في طريق وقبل ما تبعد حتى حكموها زوج لي كانو وراها وهي تتخبط وتعيط ، يكركرو فيها فوق الحجر والثلج هذاك و الثالث جا هاز اختها على كتافو وهي تسب وتضرب فيه
- تحسبو الهربة ساهلة ههههه
ليف : سيبونا علاه ديرو هكذا ؟ وش درنالكم
فالي : كلاب نتوما كلاب
وهوما في الهدرة هذي يسمعو في صوت احصنة يقرب
دورو من ومن يعرفو الصوت منين جاي ، وقت لمحو من بعيد الاحصنة تع الجنود لوكي و اولاف في نصهم
فالي : لقانا
بدات ليف تبكي وتتخبط بش يسيبوها
ليف : خلينا نروحو علاه او حكمنا .. دوك يرجع يدينا اااااع
محبش يسيبها وهو هكذاك يعافر معاها حاكمها بالقوة جا سهم في نص جبهتو دخل من خرج من الجهة الاخرى وطاح في الارض ميت
ليف : ااااااااا
ناضت تجري وتطايح هاربة كي شافتو ميت قدامها وفالي بقات مشوكية وغير تشوف مع الجثة قدامها