အာဏာရှင်၏ကိုယ်လုပ်တော်အဖြစ်

chapter 8

Chapter 8
June 13, 2024
💮Chapter 8

ဝမ်ချီက ထိုမေးခွန်းကြောင့် နားမလည်ဖြစ်သွားရ၏။

ငါ ဘယ်လိုလုပ်သိမှာလဲ …ငါက ရှစ်ယဲ့ကိုယ်ပေါ်မှာ ခြေရာခံစက်မှ တပ်မထားတာ … ပြီးတော့ ရှစ်ယဲ့က လူကြီးပဲလေ … သူသွားချင်တဲ့နေရာ သွားနိုင်တာပဲ …

သို့သော် အဆိုပါ ပုန်ကန်ထကြွသည့် မအပ်မစပ် အတွေးများက ဝမ်ချီ၏ စိတ်တွင်း၌သာ ဖြစ်ပေါ်နေခြင်းဖြစ်၏။ သူက အကြိမ်တစ်ရာခန့် သတ္တိရှိလျှင်ပင် ထိုစကားများကို မပြောဝံ့ချေ။ သူ ခေါင်းငုံ့ကာ ကြောက်ဆုတ်ဆုတ်ဖြင့် ပြောလိုက်သည်။

“ကျွန်တော်မျိုး မသိပါဘူး …”

“ပန်ကုန်း အဲဒီ့အရာရှိတွေဆီ သွားတွေ့ခဲ့တယ် ...”

ရှစ်ယဲ့က အလွန်စိတ်လှုပ်ရှားနေကာ ဝမ်ချီ ကြားချင်စိတ် ရှိမရှိကို ဂရုမစိုက်ချေ။ သူက အေးစက်စက်ရယ်ရင်း ပြော၏။

“အဲဒီအဖိုးကြီးတွေက ပန်းကုန်းကို ဖိနှိပ်ပြီး ရူးကြောင်ကြောင်စတုတ္ထအစ်ကိုကို ထောက်ပံ့ပေးချင်ကြတာလေ … မင်းပြောကြည့် … စတုတ္ထအစ်ကိုက ဘာများ ကောင်းလို့လဲ … ဒါမှမဟုတ် ကိုယ်လုပ်တော်တွေရဲ့ နောက်ခံ ကျန်းအိမ်တော်က အကျိုးအမြတ်တွေ ပေးထားလို့လား … ဒါ့ကြောင့် သူတို့က မင်းကြီးဆီ ပြေးသွားပြီးတော့ ကတုံးနဲ့မြည်းအိုကြီးကို ဝိုင်းကုန်းတိုက်ကြတာလား ….”

ဝမ်ချီ: “…”

ထိုသို့သော အရေးကြီးကိစ္စများ အိမ်ရှေ့စံ နှုတ်ဖျားမှ ထွက်လာလိမ့်မည်ဟု ဝမ်ချီ မျှော်လင့်မထားခဲ့ချေ။

အကယ်၍ လက်ရှိဘုရင်သာ သားဖြစ်သူထံမှ မြည်းခေါင်းပြောင်ကြီးဟု အခေါ်ခံလိုက်ရကြောင်း သိလျှင် သူ မည်သို့ တုံ့ပြန်မည်ကို ဝမ်ချီ သိချင်လာသည်။

ရှစ်ယဲ့၏ စတုတ္ထအစ်ကိုက ဝတ္ထု၏ အဓိကဇာတ်ဆောင် ဖြစ်လာမည့် ရှစ်ကျင်း ဖြစ်ပုံရ၏။

ထိုသို့တွေးပြီးနောက် ဝမ်ချီ သက်ပြင်းချလိုက်သည်။ အိမ်ရှေ့စံက ဝတ္ထု၏ဗီလိန်ဖြစ်ရန် သင့်တော်လှ၏။ ထိုသူက အဓိကဇာတ်ဆောင်၏ လုပ်ပိုင်ခွင့်ကို အမြဲလိုလို ထိပါးလေ့ရှိပြီး သေလမ်းကို မိုက်မဲစွာ ရှာဖွေလေ့ရှိသည်။