انت مثل النور في عين الضرير

Part:7

خرجت تحتضنه وتشد عليه تتماسك وتمسك دموعها
لافي الي كان متضايق وحاس بقلة حيلته رغم ذلك بادلها وشد عليها اكثر / كيف حالك يانظر اخوك
تبادل معه وهّاج نظرات حارقة كان واضح الكره بينهم
تعداهم متجه لسيارته جلس داخلها تاركهم وحدهم
بها اللحظات اتصلت دره
رد ينشغل معها / هاه
دره متعجبه / وهّاج ! وش الي هاه ؟
وهّاج/ وش تبين اقولك ؟
بدلع / درته ... عيونه ... صعبه يعني
وهّاج الي تنرفز من شاف كل هالقرب بين نور ولافي وكيف ممسكه يده كان يحاول يبعد انظاره ولكن نفسه تمنعه / اي صعبه وانتِ عارفه اني مااقول هالكلام ومااحبه وتراك ازعجتيني كل شوي تدقين !
انصدمت / وهّاج وش فيك تكلمني كذه
زادت عصبيته / انتِ الي موشايفه نفسك لاتحسبين مالي شغله الا دره متى صحت وايش اكلت وايش سوت
تبدلت نبرتها للإنزعاج وبصوت باكي / معسلامه
نزل من السياره ناسي يقفل الخط اتجه لهم / ادخلي !
ناظرته بإنزعاج من نبرته وبخوف من نظرته خبت راسها في حضن لافي
لافي الي باس راسها وهمس / مابتطولين عنده والله مااخليك له ... ادخلي الحين ولاتعاندينه
نور بنفس همسه / ماابغاه
لافي الي تحدث بقهر / عشاني
باست خده وودعته متجهه للداخل
ابتسم بخفوت لين تأكد من دخولها / لاتزعلها
وهّاج بسخريه واحتقار / زعلتموها قبلي... صدقني لو اخبرها باللي صار مازعلت مني ابد !
لافي برجا /وهّاج ترا نور كفايه الي جاها لاتزيدها ... البنت بتدّمر
اشتدت قبضته / انت ماتحاسبني على املاكي
لافي تنرفز / ماهي سلعة حتى تملكها !
كانت تراقب من شباكها كيف النقاش يشتد وهاج معصب ولافي خرج زعلان وملامحه شابّه قهر
دخل ولقاها في وجهه نطق بدون نفس /خيررر ؟
عضت شفاتها بقلق / لافي زعلان
ارتفع ضغطه / عساه لارضى
انفعلت / لاتدعي عليه
ناظرها بإحتقار / انتِ احترمي نفسك اول بعدين ارد عليك
وسعت عيونها / انت فعلاً مريض
مسك فكها بحده / ايوه مريض تبين السلامه ابعدي عن شري ... تحسبيني ماسمعتك وانتِ تقولين ماابغاه ؟؟؟
نور الي دمعت عيونها متألمه منه دون تملك رد
تابع حديثه / ولاتحسبيني بتركك بدون حساب !.. لاتختبرين صبري يابنت حمود .. انا مااعرف ابوي وامي ولااشوف حد لاعصبت .. اخر مره اقولها لك اتّقي شري
دفعها محررها من يده
شهقت تلتقط انفاسها وفعلاً كانت مرعوبه
عض شفاته من طاحت انظاره على جواله الي لازال خطه شابك مع دره / في ايش زعلوها؟ وش سوا لافي؟؟؟!

قفل الخط دون يرد عليها كان ندمان انه ماشاف الجهاز كيف ماقفله كيف انعمت عيونه؟؟
سحاب الي نزلت والنوم يثقل عيونها / وش فيكم كل ساعه كذه ...مابتريحين ولدي انتِ ؟
ناظرتها نور والدموع معلقة برمشها الاسود الطويل نطقت تشكيه / ضضضربنـ
بتر حروفها ممسك بيدها / ولاشي يمه .. بنت حمود ماانتبهت وطاحت على رجلها
كانت تحاول تحرر يدها منها ولكنه كان شاد
سحاب تراجعت لغرفتها/ تصبح على خير
نور تهمس له باستفزاز / خايف اعلمها ان ولدها قذر يمد يده على حرمه ؟
دخل غرفته يبدل ملابسه تاركها واقفه ومقفيه عنه / بكره تصحيني الصباح ...
تممدت على الكنبه مشمئزه منه غمضت عيونها لين غفت ونامت بدون تغطي نفسها رغم اشتداد البرد الا ان حزنها كان اكبر
انزعجت يوم صحت ولقت نفسها متغطيه بكامل اللحاف والصدمه الاكبر انها على سريره ... ضربته لين صحى من نومه مزعوج وبصوت ثقيل / خببله انتي؟
تابعت ضربها له / لاعاد تنام جمبي قوم .. مسوي نفسك تخاف علي وانت كل شوي تسمعني كلام وتضربني
وقف بيمشي ممسك اعصابه عنها
كانت ترمي عليه كل شي قدامها / لاعاد تشيلني ولاعاد تلمسني .. لو تشوفني جنازة ماتمسكني
انصاب راسه من التحفه الي رمتها عليه
انبهتت من شافت دم في جبهته تراجعت تشد اللحاف على وجهها من نظراته المليانه وعيد غمضت عيونها
تتخيل وش بيسوي فيها
ارتخت اعصابها من سمعت ضرب الباب وفهمت انه اعلان عن خروجه تنهدت براحه وقامت تدور شي تلبسه كل دبشها اختارته سهام وسهام تعشق كل شي علاقي وقصير
تأفففت وجلست على السرير واختارت انها ماتبدل واكيد انها مابتنزل تفطر وتسمع كلمه تسد نفسها
الجوع بالنسبه لها اهون خيار
غطى جرحه بلزق ونزل كانت امه ودروب ينتظرونه يفطر معهم جلس وبجلوسه بدو يسمون وياكلون
ناظر بالسفره ثم اخذ صحن ينقص من كل صنف وينادي / فاطممه ..
سحاب الي فهمته / فاطمه ارسلتها المزرعه
ناظر دروب/ قومي انتي طلعي لها الفطور
بدهشه / انا !! يومه تسمعينه ... يبي انا بنت الشيخ واخت الشيخ اطلع لبنت حمود !!!
سحاب الي مااعجبها كلامه / الي يبي ياكل الاكل موجود محد مطلع لحد
وهّاج بغضب / وانا قلت تقومين تطلعينه ... صرخ فيها / اخلصيييي
قامت دروب وغصتها منعتها ترد دخلت لعند نور الي عدلت جلستها
دروب بدون نفس / هذي الفضله اذا نقص عليك الصحون مليانه بعدنا
نور الي ارتفع ضغطها / خذي فضلتك ماني جيعانه
ابتسمت دروب وخرجت / احسن
نزلت لعند وهّاج / موعاجبها اكل امي ... تتشرط علينا ربانزل
وهّاج الي حس بإحراج من امه اخذ الصحن من يدها وصعد يدفع الباب حتى مااصطدم بالجدار شهقت مفزوعه من الضجة الي سببها ومن صوته العالي/ والله ماتاكلين غيره !
حست انه بيهينها ومستحيل تسمح له / ماابيه
نزله قدامها دون يعطيها فرصه تبرر
عضت شفاتها تمنع غصتها/ حتى لو انه على ورق احترمني !
مسك اللقمه وسكرت فمها تمتنع مستحيل تسمح له يهينها بها الشكل خصوصاً انها شافت دروب تتابعهم عند الباب
ضغط فكها بشكل قوي حد ماحست اسنانها بتتكسر بين يدينه ... فتح فمها باصابعه وحشر فيه اللقمة
تفلتها وشفاتها ترجف بعدم تحمل للي يسويه
تنرفز / وش فيه اكل امي حتى ماتاكلينه ؟؟؟
وقبل ترد عليه رن جواله بإتصال كان منتظره
ناظرها قبل تتكلم / تنزلين تعتذرين لامي !
فتح الخط متجاهلها / جايك
مافمهت ليه سوا كذه ولكنها كرهته اكثر ... قبل يدخل كانت تأنب ضميرها بسبب الجرح الي سببته لجبهته ولكنها تمنت لو ان الضربه جات بمكان غلط وموتته

—-
المستشفى~ لافي عند غرفة قماشة ~
يترقب اللحظه الي بتقوم فيها بيتجنن ماعاد يوزن الامور
ياتقوم يا يذبحها ويرتاح من هالامل الي شافه يوم شافها
فز من الصوت المتعجب خلفه / بعد لك وجه جاي !
لافي / وش تبي انت ؟
ارتفع حاجبه / انا شايف كل شي ... كل شي وصلني في احد مصورك !
عض لافي شفاته بحيره / وهّاج الحرمه هذي مجرمه كان ودي اذبحها والله ماادري كيف مسكت نفسي
وهّاج الي احتدت ملامحه واحتد معها صوته / والولد الي للحين في العناية الولد وش ذنبه .. وش ذنب امه وابوه الي ماينام الا على كراسي المستشفى !!
لافي / انا مارحت للولد اضربه افهم هو الي تدخل ومد يده
وهّاج بإنفعال / وانت قلت مابقصر وبردها عشر واذبحه
جلس على الكرسي تخذله حتى اقدامه له ثلاث ايام شايل هالهم يتردد بين غرفة الولد ويرجع لقماشة
وهّاج مسح وجهه ولازال يوبّخه/ ماتمر بسلام هوشتك دام تصورت ماعاد لي يد فيها ... انا بسوي اني ماشفت لكن تراك ممسوك
لافي / موقبل تحاسبون العجوز ... هذي مجرمه سوت سواتها عشان لااكشفها
جلس وهّاج جانبه / وش الشي الي سوته واستاهل انك كنت بتقتل ؟؟؟!
لافي يناظر قماشة بدون رد
سئله بنبره هاديه يحاول يضبط فيها اعصابه / خبرني جاي اسمعك .. انا موعليك وان كان لك حق باخذه
لافي سكت شوي يحاول يرتب افكاره وكلامه / خاطفه بنت بعمر نور .. الله اعلم كم المده الي خبتها فيها ولكن عرفت انا شفتها اكثر من عشرين مره يوم درت اني عرفت اليوم الثاني معد شفتها ....
وهّاج / يمكن مو حابستها
لافي الي انفعل / ماتقتلها لا ... مستحيللل تربيها وتقتلها
حك دقنه يفكر / غريب ... اول مره نسمع ان قماشه عندها بنت .. وليش دوبك تتكلم؟
لافي / عارف محد بيصدقني
وهّاج الي كان شاك / لو الي قلته كذب باخذك الشرطه بنفسي !
وقف يعدل ثوبه ولكنه قبل يوقف فزع من فزت لافي وركضه بشكل سريع لقماشة الي تحاول تفتح عيونها وتستوعب المكان الي فيه
شهقت بعد مارش عليها لافي مويه
طاحت انظارها عليه فزت تتذكر ضربه لها / انت قاتل !!
كان ماسك اعصابه عليها وأشر لوهاج لايدخل حتى ماتخاف وتمتنع عن الحكي / خبريني وين البنت عشان مااقتلك انتِ بعد
قماشه / من متى وانا هنه
لافي بقلة صبر / لك ثلاث ايام
وسعت عيونها مرعوبه تحاول توقف ولكنها عجزت بكت بيأس / كله منك رجولي مااقدر احركها وشلون بروح لها الحين ؟؟؟؟البنت صار لها ٥ ايام مو ماكله ....
اختلطت مشاعره بين نرفزه وتوتر/ وينها قولي وينها بسس؟؟؟، ... بتموت وانتِ خايفه لحد يدري عنها !!
اهتزت حروفها وصار الكلام شبه واضح / عند الحصن القديم في البيت المهجور...
لافي ينهرها / كيف وديتيها ذاك المكان .. كان بيضربها ولكنه مايملك وقت خرج مسرع وتبعه وهّاج الي تضاعف قلقه من سمع طنين الجهاز الصادر من غرفة الولد المضروب من لافي
كان يسوق بسرعه دون يحس ويشوف الي حوله
اتجه لعند الحصن وحاس باعصابه المشتده حاس بان الموقف عصيب ومايحتمل يكون وحده ما يبي يتخيل لحظه وحده انها ميته !
هي ضاعت اسبوع وضيع نفسه معها كيف لو بيفقدها كان يتمنى يكون لها اسم يناديها يدري انها ماراح تجاوبه ولكنها اشاره تطمنها انه موجود وانه يسمعها ويحس فيها بدون تتكلم ... تابع سيره للغرفة الوحيده الي لها باب في البيت دفعه بقلق ... واستوقف جامد مكانه
وهّاج خلفه / لقيتها ؟؟؟
اضطربت خطواته وسرعان ما تغبشت رؤيته وصار صعب يتوازن

تفاعلو ياحلوين❤️‍🔥❤️‍🔥