سأُحارب لأجلي

5

رائحة الأم بلسم لِكُل جرح أحدثه الزمن
فماذا لو كان جراح الروح منها
كيف سأعيش بمشاعر متخبطة
بأنني لستُ بارة بمشاعري بها
أصارع حبي وحقدي لها بداخلي
لا أُحب عطرُها عندما يعبقُ منها
وأَكرهُ نفسي لِكُرهِ لها
سامحني يارب مشاعري ليس لي
عليها سلطان فأنت أعلم بحالي

—————————————-
صاح عمر لعد وين الزركة غلست وما طلعت هو يطلع الصبح للشغل أني انزل

اتريك واخلص شغلي ومن يجون الظهر ما اطلع من الغرفة من يشربون جاي على السريع اغسل ماعين واشرد بقيت على هذا الحال العطلة كُله ابد ابد ماخليتة يلمحني .
مرة رحت وية بابا واخواني نشتري هو يومية بالليل يطلعهم بس اني ما اروح
وياهم هلكد مامالين عقلي بحقد بأتجاهة هو حتى ميضربني ولا مثل ابو امي عصبي وحاكمهم حكم قاسي .اكو مثل عراقي على الجرح يكول
(لاتحجي بالكطع والجهال كعود)
طلعت وياهم وتونست حتى لعبنة مسابقات منو يفوز
بابا سارة اذا فزتي اشتريلج بطل ببسي وتوتو واذا اني فزت تغسلين بنطروني .
موافقة
ركضت ركض واني اضحك وهاي اول مرة احس بسعادة كوني فتاة تلعب مع ابوها اول مرة .هاي الليلة افضل ذكريات طفولتي هاي الذكرى النقية البطفولتي.
فزت واني فحطانة اكولة اني اختار المحل
صار ادللي بابا
ياسعاتي واني اشرب الببسي وعيوني ادمع من الغاز القوي. اني شاربة قبل مو محرومة بس بهاي الطلعة صار طعمة يختلف
صار ياخذني بالليل يشترينة ونفتر بالمنطقة  .

صارت حفلة عد اقاربنا وملابس ممشترية فطلبت من بت خال بابا ماقبلت تنطيني شكد نقهرت واني ما احب اذل نفسي ما اعرف شلون هيج كتلها كمت ابجي ماما كلتلي ولا يهمج التبجين اني اجيبلج خلي تولي سكتت وصدك شترتلي .

وخلصت العطلة ونقلت مدرستي متوسطة صارت عندي صديقة اسمها رشا
بس ابد ما احجيلها عن حياتي المشكلة فاقدة الثقة بالكل خلصت الاول بين الدراسة والدوام وشغل البيت ماما كامت تشتغل خياطة للمعمل بالبيت ام ريام تجيبلها القماش مفصل وهية بس تخيطة لان امها منعتها تخاف يسمع ابوها .ومرات اني اساعدها اعرف بالخياط
جانت عندي لعابة وأخيطلها بأبرة وخيط فساتين من الثالث أبتدائي وبسرعة اتعلم الشغلة تجمع تشتريلي ملابس والاخواني هم .العلاقة بين امي وبابا سطحية خالية من اي عاطفة وهذا الشي يحز بية هية همهة من تطلع متمكيجة وحلوة وتغير نبرت صوتها وتتميع من نروح للسوك صرت حافظتها بس ماعدها علاقات خارج الزواج حالياً
امقت تصرفاتها وكلامها ميقنعني شي بيها بعيني شي صغير يعني اني بتها ومراهقة تقريباً بالاول متوسط وابد ما اتموع لو ادلل بالكلام ومن احد يذبلها كلام يايابة ترجع طايرة من الفرح عبالك كاللها راح اخطبج واسجل كوكب الارض بأسمج وتبقى تعيد بالسالفة اشهر
عرفت بية انظرلها نظرة استسغار كامت ادللني وطلعني وتقنع بابا يطلعنة هو ميكول لا يطلعنة
مرة تمرضت بالمدرسة ودز عليها اجتي بكامل اناقتها ماصدكو هاي أمي المديرة كلتلها هاي القردة بنتج ممعقولة خرب بالحظ مطبوعة كلمة قردة على كصتي لان متعودة على هذا المسطلح بحقي ما تأثرت بكد ماشفتها نفخت ريشاتها وكيفت طارت حتى ماكلتلي شبيج شيوجعج رجعت للبيت كبل للفراش يومين مريضة دخلت عمتي فاطمة طبعا هية جانت مخطوبة من دزنة جدي
عليهم وهسة عدها 3ولد .
اسم الله عمة حبيبتي شبيج هاي مصخنة انطتوه دوة اكلت شربت
بيبيتي كالتلها متكدر ترفع راسها .اني وبيبيتي علاقة مو قوية لان اشوف ماما
شلون تعاملها واني وياها رغم ماعلاقتي العاطفية بأمي مو قوية بس دائماً الكفة تميل الامي واعرف هية الغلط بس ردت شخص اعلك علية اخطاء امي .
رجعت عمتي سوتلي اكل حتى شفتها تبجي احس بحنان الكل الا حنان امي احس بي مسطنع ورة يومين جان بلغت من شفت دشداشتي مطعة احمر الصبح صعدت ابجي الماما
ماما باعي شكاعد يصير بية
يلة مبروك هاي صرتي جبيرة بعد تعاي
جرتني من ايدي وخلت اربع اصابيع بالطحين وبالشكرحتى تجيني بس اربعة ايام وهذا اول اعتقاد من اعتقادات العائلة جذب لان كامت تجيني اسبوع .
جدي الحنين المحب جنت شريد ينطيني من جوة ويكلي لتكولين مرة كلت البابا
اريد يوميتي وصرخ بوجهي من يومها ابد بعد ما اخذت منة شي بس كل شهر ادز سحر اتجيبلي فلوس منعندا تكولة ويدزلي بيدها .خلصت الاول متوسط ونجحت بدور ثاني لان اصلا ما اقرأ بس بنهاية السنة .مخلصتها اقرأ جرايد وروايات تزوجت بت عمتي الاصغر بسنة من عمر اخذت فلوس من جدي ورحت وية عمتي اجرت
فستان فضي وبدلت وحفتلي ماما شواربي وكوتلي شعري هاي اول مرة اشوف تغير ملحوظ بخلقتي لان ابد ما اتفرج على نفسي بالمراية وخاصة بداية الاول متوسط وطلع حب بوجهي حرمت المراية على نفسي وتنمر اهل امي علية بالشقى عيع وعيع
جنت هستوني داخلة بعمر ال14 شخصيتي القوية جانت طاغية على سمار وجهي والشعر التارسة رغم ما ماما تنزل بقيمتي بيت اهلها بس بيت جدي ابد متنطي بية لان متحبهم وهمة ميحبوها بس يحبونة ويحترمونا واصلا قوية بيهم
اني حتى عمر من اجة علينة وصاح
وين الزركة
جدو كلة احترم نفسك سارة جبيرة مالك دخل بيهة
هو اني شسويت بس ردت اسلم عليها
لاتسلم عليك ولا تسلم عليه عوفها واذا توصل يمها ازعل منك
هاهية
بيبي شبيهة ليش متطلع تسلم
ختولي بيبي مالك دخل بيهة

واصلا يم بابا ميجيب اسمي

اني اعترف جنت قاسية وية بيبيتي وعلاقتي بيهة على الحافة بسبب الزن
البراسي بس الحلو بيهة ابد متحرك جدي علية حتى يضوج مني لو يكرهني
جنت من اغسل الكراج يكولي عوفي مو غسلتي الصبح اضحك ويا واكمل غسل هو اماني .
طلعت مرة وية بنات عماتي وشفت حداد يشتغل وية ابو بعمر عمر شو كلبي كام يدك بسرعة ياربي شكاعد يصير اريد يجي الليل حتى اتخايل صورتة
كل فترة بعيدة اشوفة من يجي البيت يلحم بابهم لو بطريق رجعتي واني بالسيارة خرب نظراتة تموت هذا اول حب بحياتي ابتسم بداخلي مابينت
ولا حجيت كتمت بداخلي مشاعر جديدة محتاجتهة حتى اطفي على خذلان مشاعر الطفولة حسيت روحي غركانة ونقذني شهيق مخفي ملئ رئتي بالهواء النقي اخ شلون شعور شكاكي بس خلصتها اباوع من بعيد بين كل فترة طويلة
اشوفة والحلو بالموضوع اسبح بالسبحة واستغفر واغمض عيني وانام على ضحكت عيونة هاي اول مرة جنت اشوف بيهة عيون تضحك

وداومت الثاني واني بعدني قرد حتى اذا باب الكراج مفتوح اعبر منعندة بس كون الشارع فارغ خلصت الثاني تسخت اباوع كارتون واطورت بالكتب كمت اقرأ روايات غرامية وأني اتخيل نفسي البطلة واليشوفني يكول هاي شكد ثكيلة وهادئة ورزنة ومنطوية وهو اني داخلي مسويتة ملهى .اكو مثل ياباني يكول
(في داخل كُل أنسان أنسان لا تعرفه) هذا ينطبق علية

اقفل باب غرفتي واكعد اركص ساعتين الى تلث ساعات وبعدين اقرة من رحت للثاني عزلت نفسي من غرفة اخواني بغرفة الوحدي وبيها قفل حتى من اروح
للمدرسة اقفلها .
واني نايمة حسيت لمسة من بداية راسي الرجلي سريعة فتحت عيني مرعوبة
محد ماكو والباب مقفول منها بدت معانات ثانية الكوابيس والخنكات جانت تبدي
من الساعة3 الفجركأنما احد يخنكني وما اكدر احرك جسمي هية ثواني بس اني احسها دهر المن اسولف واني ماما بيت اهلها مشية علية الجذابة شكد علاقتي قوية بخالتي نور بس ابد ما اتجرء واكوللها اعرف متصدكني احترم نفسي افضل شي وعماتي مااكدر اتنفس يمهن ماما واكفتلي على الكلمة
هذا الموضوع تعبني كمت قبل لا انام اقرأ
( سورة يس والواقعة وتبارك والرحمن)
بس ميفيد نهائيا هم ترجعلي الكوابيس الا واحد يبات بالغرفة عندي انام رغد

اني وسمر صرنة مالخ بس عرك البنية توحشت ما اعرف شبيهة واني كئابة
واذا شافت ماما جابتلي شي تبجي وتصيح بس سارة هية ماما اتجيبلها وتشتريلها . بس هاي صارت عنيفة محد يعرف شنو التعرضتلة حتى تحولت .
حتى جدي اليحبها كام يصيح الغوث منها
جدو سارة لزميلي هاي الوكحة الا بضربة يلة توب تلعب بغراضي
اي جدو تدلل
سارة الجلبة الزركة عوفيني
هههههههههه لج تتربين صايرة مجلوبة
ان شاءالله عمر يتزوجج ونخلص منج
الله ياخذج ياحقيرة سحلتها من شعرها ونزلتها النص الدرج بس ضربتني وشردت
سمر ما خلت واحد بالعائلة ما تتعارك وياا حتى صديقاتها البالشارع
ما جنت اعرف التعرضتلة سمر شي ابشع من التعرضتلة
وهذا كان ردت فعل منها على الشافتة .
صدمات الطفل حسب استيعاب عقلة ومتى يتأثر ويدخل مرحلة الاكتئاب
واظطرابات نفسية من يتعرض للتحرش يتغير سلوكة ولو عدنا ام تركز بسلوكنا جان فهمت التغير النفسي الصارنة .على الاقل اني اخذو علية نظرة من عمر الاربع خمس سنوات كئيبة ومنطوية وقليلة الكلام مجان يجي بالهم اني متعرضة للتحرش الجنسي. الا سمر فوفوشة وتضحك وتغني وفجأة تغيرت

................................
يُتبع