سأُحارب لأجلي

22

عندما تقع في الحب تعتقد انك تَملك الدنيا
لكنك في الحقيقة واقف على حافة المنحدر
او انك تقدم جميع أسلحًتُكَ للعدو قبل
مواجهة جيشهُ الجرار

—————————-
فتحت الرسائل والصدمة اول رسالة قريتها
-ليش ما اجيت انتظرتك عبالي تتعشة يمنة
والبعدها
-انت وين مشتاقتلك عفية لتتأخر
-جاي ادللي بس امر على عمتي اجيبه واجي
و
-شوكت تنزل الايام فاهية من دونك
-بعد يومين انزل وامر
وحدة تاريخها قبل شهر
-اذا استلمت السلفة لتكول السارة وتركض تشتريلها ذهب
-لا
و
-باقر اهديك 3شمعات شمعة حياتي وشمعة تضيء طريقك وشمعة تحرك البصفك
واليوم دازة
-باقر لتنسى على الموعد ترة ازعل
-لا يابة كُلشي ولا زعلج
ايدي ترجف اريد اكمل ما اكدر الدنيا افترت بية لا لا هاي غريبة اكيد ميأذيني هيج اذية وصخة اتنفس بصعوبة اريد اجر هوى غسلت وجهي نكعت نفسي
المي من الثلاجة رجعت على المبايل وللمكالمات الاوقات 30دقائق واكثر
هاي اني هيج مخدوعة خالتي ممأذيتها زين هو مو خطبها ليش موافقت هسة صار عزيز. شسوي لا اكيد اكو غلط رجعت على الرسائل كوووومة ما اعرف اركز نسيت الاحرف الابجدية ما اكدر اقرأة
عقلي دخل مرحلة عدم تصديق هي تتوسل بي باقر ميسويها
ولا احب نومة الظهر بس اليوم نغمى علية نعست بسرعة نمت كعدت المغرب
هو فوكاي يبوس بية
-اكثر شي بالحياة يفرحني من افتح عيني وانتِ نايمة بصفي
صفنت جنت اتحلم اي حلم بشع
- ليش ملابسج رطبات عيوني كومي بدلي لتتمرضين متوفين تبللين نفسج طفلة
انتِ
هو يحجي واحس روحي دخلت بزوبعة تفكير اخاف حتى بيني وبين نفسي اكول خاين دخلت عقلي بحالت سبات مؤقت
-بيج شي روحي
هزيت راسي نزلت لا
توضيت وصليت من ركعت نهاريت بالبجي خلصت صلاتي وركنت نفسي بزاوية 
كُل رسائل الحب والعشق ورومانسيتة بالغرفة تمثيل لو وهم اني وهمت نفسي شسوي
انتحر اي اني جبانة ما اكدر اواجه نفسي او الشماتة يعني بيبيتي هية تدري
وتاخذة هم البيتها شيسون يضحكون علية لويتشمتون اني مغلطانة بحق بيبيتي
ولا نور مأذيتها حتى اخجل من اسلم على زوجها
رحت للثلاجة مابيها علاج يااااا شكد قوية اني من كل شي مريت بي جلطة دماغية سكتة قلبية ماكو هسة مو سناء ماتت من صدمة
واني غركانة بتفكيري دخل باقر
-حياتي راح اروح الجماعتي واحتمال اتأخر لتتنتظريني نامي
-اخذني وياك الاهلي مخنوكة
-اتفقنا من التحق سارة مالي خلك هوسة اهلي
بدل على السريع وطلع خابرت ماما ادزلي بابا ياخذني
بدلت واخذت كم قطعة ملابس ولا فلس اخذت ولا الذهب هي كرامتي وانداست
لو سبائك ذهبية متبرد الكاعد اعيشة
نزلت عمتي سألتني
-وين انشاءالله
-البيت اهلي
-اي ليش لا بيتنا فندق صاير الج مو باقر صالة يومين من نازل ماتركدين لو تفرفر عندج اهم من الاغم
صاحت على عمي
-عبد راح اموت طكت حوصلتي شسوي
-يمعودة ليصعد سُكرج مالج شغل بيهم عسمى نارهم تاكل حطبهم
ولا جاوبت سمعت مبايلي امي رمشتلي كتلهم مع السلامة وطلعت
ركبت بس كلولي شبيج بجيت بجي مال خمس سنين مقدماً ..بعد زواجي
عرفت اهلي يحبوني بس ماعرفو شلون يحتوني لو يسعدوني كل واحد ملتهي
بشغلة ماوصلو العقلي ليش ماشفت اهتمامهم هذا قبل لا اتزوج
شلون بية غركانة بظلام
دخلت للبيت
-ماما نور تخابر باقر ودزلة رسائل
حجيتها واني اشهك سكتتني
-نصي صوتج ليسمع ابوج والله عرفت هاي الصكط اختي وامي ماخافت الله بيج ماكالت حرام خالتها ونوب مزوجة ميغار
-شسوي روحي توجعني شسوي
-هذني يردن يطلكنج حتى ياخذنا شافتة طول وعرض والسان ومركز بالمستقبل
-ليش ما اخذنة ليش ماما ما اكدر اتنفس اني ضحية اي ضحية
ماما تبجي وأدعي على نور وباقر صخونتي فولت
دزيت رسالة الباقر اني بيت اهلي حتى ميتفاجئ اني مو بالغرفة وكتلة المفتاح بالشباك
دك قفلتة رجع دك على امي اسمع تكولة بعد مالك مرة يمنا هو احنة منريدك
سوايتك بس ابن حرام يسويها سدت المبايل
-شكال
-ليش سارة تجيكم من دون علمي بعد ما اريدها خليها تشبع بيكم
سمعتيني شكتلة وهو بس سمع هيج كال جايكم وسدة
دخلت نمت بالغرفة الجوة اقل النص ساعة جر البطانية من راسي
-ليش متردين تباعين علية رفعي راسج ولج انت بروحي شلون هيج تفكرين
والله خالتج كح.....مدري شتسويلي وتخليني اباوع عليها سامحيني
باعيلي ولج زعلج يحرك افادي
عندة اسلوب الاقناع لو شايفتة هم بحضنها هم يقنعني جذب
ماسألني شلون عرفتي ابد
-انتَ وعدتني متروح وتعرف بيها شتسوي كُل هذا الوقت يمها شايف مكالماتكم
من النص ساعة فما فوق شتحجون
-هيج والله لطلطة
-خالتي هاي تعرف شنو حتى حرام عليك تباوعلها بنظرة وانت سوالف وغزل خفيف
-وداعتج وداعت امي رجلها موجود واذا مو رجلها عمتي
-هيج مكطوع كلبك على شوفتها شنو الجابرك
-والله هية مدري شلون تباولي وتحجي تعوج حلكها تريدني انام وياها
اااااااخ كلبي لو محاجيها ورجعت غلفت عقلي بورق الوهم والغباء وصدكتة
-ام سارة سبحان الميغلط وغلطي لايغتفر اعرف بس اني رجال ونغريت
-ليش سارة قاصرة عقل وجمال ورزانة الف واحد يتمناها والله يا باقر اخذها
وازوجها رجال
-لا هاي مامقبولة لعد اني شنو
-ما اعرف والله سأل نفسك اليخلي عينة على خالت زوجتة شيسموها رجولة
لو ضعف شخصية
-مو بديتي تغلطين
-صحيح الحقيقة تضوج اصحاب الباطل
دخل بابا
-شكو خوما سارة بيها شي
-لا زعل بسيط هسة اصاحبها يلة حبيبتي خلي نرجع
هو وأمي طلعو بابا كال
-عرفت خالتج الشريفة شسوت بابا هذا بيتج اذا تردين لترحين اني غلطت من ماطلكتج بسبب خوالج لتكونين ضحية قوي روحج اعرف الخيانة تقتل الحياة
والامل بداخلج بس تتعديها انتِ سارة الاتباهة بشخصيتها وقوة ردودها
انطي النفسج فرصة بس لتذليها
طلع وطلعت ورى
-يا الله يابة اني اترخص يلة حبيبتي
اخذ ايدي ورحنا شكد برر وسولف عقلي متوقف
صح اهلي سانديني بس بطريقة غلط المفروض يبقوني اخذ فسحة من التفكير والوقت وافكر ارجع
لو انفصل وهاي الخطوة عدم عرفة منهم تاركيني بأيد باقر وهو يعرف شلون يلعب عليهم
نمت بسرعة ولا خليتة يحضني النص الليل فزيت فوكاي يا الله ولا يشبع
-وخر الخاطر ربك مو تشوفني نعسانة
-لج ما اكدر مو تدرين بية
نزل باقر سبح
-يلة حبيبتي الزعلانة روحي سبحي ولا عندج ثقة بية ابد
دوخني بزماني
نزلت للحمام دك الباب سيف منو بالحمام
يعني واحد يسبح الا تعرفون منو يا الله
-اني
هذا انكلب وحش يصيح ويعيط منو سمحلج ادخلين قبلي نزل باقر يصيح
-ولك متستحي واكف تصيح باب الحمام عليها حتى احترام ماكو
كامو يتضاربون طلعت عمتي من دون متعرف شكو كامت تغلط علية
اني بالحمام صافنة على متاهت حياتي حتى موس ماكو وانتحر والشباك صغير جان شردت غلط وصياح ومسبة وهي شكو لان سبحت قبل سيف واني اصلا
ما ادري بي كاعد يريد يسبح
يارب حولني صرصرة اشرد من المجاري واني اخاف من شوفتهن بس مستعدة اتقبل اعاشرهن ولا اعاشرهم
دك الباب سالم
-سارة بعدج عايشة
-اي
-طلعو بالكراج يتناطحون طلعي بسرعة
-اي هسة
على السريع بدلت وركض فوك
اجى باقر باسني من راسي
-اعرف تعبتي يمهم بس صبري علية وان شالله من ارجع نراجع دكتورة حتى
نشوف ليش ميصير عندج طفل
خلصت الاجازة ورحت الاهلي
جدي مريض ميعرف اي واحد مرات يتذكر بيبيتي
جدي شمعة نورت طفولتي حسسني بأن اني غالية ومهمة حتى من يعصب اضحك ولا اضوج وانقهر وهو يرجع يعتذر اذا ضوجني
ادهورت صحتة ونقلو للمستشفى يومين وطلعو منتهي كاعد يعالج شكد ناس اجتي تبجي علية معندة وجه مكروه الكل تحبة انتقل الى رحمة الله انسان عاش
على حب الله من دون حقد صدمتنا بموتة جبيرة كُلش بيتة جان مفتوح للكول
اجتي نور ومساء للفاتة سلمو
نور تمشي بغرور عبالك ملكة زمانها وبيبيتي اسوء صاحتني بت عمي
-سارة رجلج يريدج باب المطبخ واكف
رحت للمطبخ حضني حيل يعرف بية شكد احب جدي
-البقاء بحياتج حبيبتي
رفعت ايدي وحضنتة ابجي سمعت نور وراي
-شلونك باقر حمد الله على السلامة
هو رجف وتوتر وتخربطت احوالة
اني عفتهم ودخلت امي بسرعة دخلت للمطبخ بعد ما شفتة شوية ورجعت نور شاورت امها اخذتها وراحت بعد ما سلمن
امي كلتلي
-شبيج عفتيهم وشردتي
-ما ادري
لا جذب ادري اخاف من المواجه والصدمة مغلفة عقلي بورق الغباء
اخاف اواجه نفسي وتتغير حياتي ما اريد اعبر على الجانب الاخر ولا اريد ابقى واكفة بمكاني نزاع شرس  بداخلي بسبب طفولة ضائعة