سأُحارب لأجلي

30

لو سألتني هل تُحبينني؟
سأقول لكَ عندما أراك
تدخل الفرح الى قلبي
اشعر بأنني حُرة
رؤية عينك تبعث الامانَ الى روحي
احس بنشوة الحب عند سماع صوتك

——————
كاعدين نتعشة ودخلت ميساء يمة دخلتها تقبض الگلب عاقجة الوجه
-ها يمة مبروك على الخطوبة الله يهنيج بس باعي خليج بعيدة على باقر
عفية بيبي خالتج حامل و وراها شماتة اذا صار شي بينها وبين زوجها اذا اجاج للكلية
لتنطي عين حتى اذا دك عليج
-اني مراكضة ورى ولا اريد شوفتة التقبض الگلب لو اريدة جان ماطلكتة من البداية
امي كالتلها
-يمة هو فضالتها شتسوي بالفضالة سارة عزيزة نفس ماتاخذ المو الها ولا تحط عينها علية لتخافين كرامة سارة عالية وشموخة ميسمحلها
قصف رباعي بالكصة انطتها امي
بابا ضحك وكلها
-حجية احد جايبج لو اجيتي الوحدج
-الوحدي شنو قابل صغيرونة
-لا مو عبالي اخابر اجواد ياخذج
-الظاهر صارت طبتي ثكيلة
-لا حجية مو قصدي بس الدنيا ليل وماكو سيارات تعرفين واني سيارتي عطلانة
هي دكت على محمد اجى شايل خشمة اخذها وراح
حصلت فشلة واهانة وراحت خايفة على بتها من المشاكل عبالها اني ناقصة
مثلهن
للصبح داومت ويوم عادي رجعت البيت دكت علية غادة
-الووو زوجة اخي الف مبروك
-هلووو حبيبتي شكراً بس ليش ما اجيتي
-اااااا مو شسمة
-ههههههههه منو شسمة
-لا ولج مو بابا مريض وامي ماكدرت تجي واني بقيت اخاف تحتاج مساعدة
هسة عوفينا عازمتج على خطوبتي
-حبيبتي الف مبروك شوكت
-بعد يومين اوووووف واخلص وازوج
-ههههههه شكد مستعجلة اكيد علاقة حب
-ياااا لاولج يا حب هو مرتين شايفتة وبطفولتي هم
-شلون قبلتي
-شفت صورتة بمبايل سمر حلو  اياد يگول اخلاقة عالية  وابن خالي هم
-الله يتمملج على خير
-الله يسلمج مو متجين عفية راح تصير الحفلة بالقاعة
-ان شاء الله

هسة راح نحير بملابس كلت الامي على الخطبة
-شو ام اياد لا خابرت لا اجتي شافتج زين شلون نروح اذا اياد ماعزمج
-هم صحيح بس خلي نحظر الملابس وبعدين نشوف
ثاني يوم بالدوام لكيت اياد منتظر باب القاعة
-هلو
ابتسم
-هلو عمري امشي للكافتريا
-يلة
كعدنا نزل عصير برتقال واني ماقبلت انزل شي غير اغص اذا اشرب شي لو اكل كدامة
-حبي غادة كالتلي عزمتج على خطوبتها
-اي
-راح اجي اخذج باجر الصبح يخطبون ويعقد مهر سيد والعصر الحفلة
باجر الخميس
-اذا يعني بابا مقبل عادي اجي وية بيت ابو شاهين
-بس انطيني خبر
-انتِ شلونج
-بخير الحمد لله
-الاحد عندج شي
-لا
-اذاً يوم الاحد اخذج نعقد عقد محكمة واني العصر انطي خبر العمي
قصدي الابوج
-براحتك
-قدمنا السفر الثلاثاء راح نطير اغيب حسب استجابة ادم للعلاج
سكت شوية وكال
-راح اشتاقلج هواي
-ترجع بالسلامة ان شاءالله
هوضحك اخذ ايدي من جوة الطاولة ضغط عليها
-شلون اصبر نفسي على بعدج .يومية اشوفج واشتاقلج راح اروح محتاجة
شي
-لا شكراً الله وياك
راح واخذ كلبي ويااا
من افكر واقارن قبل وبعد
قبل مشاعري كانت تمثيلية اقنع نفسي احبة وعايشة دور العاشقة من جهلي وطفولتي ..ابد ابد غير موفق زواج المراهقة يدمر من اتذكر جنت امشي بكلام واحد همجي و عندة وعي منخفض مقارنة بهدوء اياد وكلامة وثقتة اني متأكدة
لو بعدني زوجة باقر اموت ومااشوف الكلية
مرات نكره الصدمة قوية بس هي تغير من حال الى حال حسب قوة الشخص وخلفيتة الاجتماعية طبعاً لو ما اهلي وسندهم احتمال اني كاعدة اندب حظي
الله يسهل امورنا
رجعت للمحاظرات خلصتهن وطلعت للبيت بسرعة نمت حتى ما اتغديت
لازم اشحن طاقة طلعة السوك يرادلهة قوة
العصر رحنا للمحلات العلى الشارع نفنوف اليسا نازل بأغنية بستناك هي الاغنية صارلها اربع مدري تلث سنين المهم سبعة من الامام الظهر طالع ومن الخصر كبس ناعم طويل لون ذهبي اخذنا للخياطة سوتة مال محجبات عدها قماش مثلة والله ماهرة بشغلها سوتة  رهيب
حجاب توربان اسود عندي من عرس نور
رجعت الغير محل امي لازم ستايلها توب ما اقتنعت رجعنا للسوك
الحمد لله عجبها سترة قصيرة وتنورة عدلة وحجاب وحذاء
وصلنا للبيت هلكانين هاي قصة الحفلات تاخذ حيل ثاني يوم ما داومت
بابا قبل اياد ياخذني لان بيت ابو شاهين رايحين من الصبح وسيارتة
بيها بنجر دزيتلة رسالة بيش الساعة ياخذني
رجع دز
(موعد لِقائنا في الساعة الثالثة)
بديت بالمكياج وبعدين بدلت نزلت لكيت امي تخبل طالعة عبالك اُختي
-الله سارة هذا الفستان يجنن عليج خاصة مبين خصرج
-انتِ هم طالعة حلوة
دك مبايلي اياد كال اني بالباب
طلعلة بابا سلم علية
ركبت بالمقعد الخلفي امي كرصتني
-اخ شكو
-شبيج سايق الخلفوج امشي كعدي بمقعد الامام
-استحي ما اكدر
احنى نتشاور اياد فتح بابا السيارة وكال
-زوجتي العزيزة اكو سبب متركب بالامام اذا اكو نتناقش بي عادي
-ها لا عبالي ماما تركب
هي كرصتني حيل بزري اخ خرب
نزلني وسد الباب ورجع فتح الباب الامامي ركبني وهم سدة
يبوي حسيت نفسي اميرة ويااا هو اهتمام صغير بس صعد هرمون السعادة عندي
وصلنا للقاعة الناس كاعدين بهدوء والكشخة بيت ميساء مشايفتها موسيقى هادئة القاعة ملكية اخذني اسلم على امه
-امي حبيبتي جبت سارة
هي بسرعة كامت سلمت وحضنتني
-عذريني خالة ما اجيت بالخطبة عدنا ظروف
-لا خالة عادي
رجعت باستني وسلمت على امي كعدتها على طاولتها اريد اكعد سحبني
اياد
-وين رايحين اياد
-نكعد بمكان ناخذ راحتنا شبيج من خطبتج بالقطارة اشوفج
لا هذا ناوي يموتني من لطافتة
سحب الكُرسي كعدت ورجعة اني هاي اللقطة مشايفتها بس بالافلام
شايفين الطير العندة اجناح ويطير بخفية هاي اني حالياً روحي اترفف
وعدها اجناحات يارب ادوم الفرحة ومتحرمني منها
دخلو العرسان دخولية روعة غادة شاكة الحلك مينسد مبينة عبالك عن حب
و العريس ابتسامة بسيطة على وجه لابس قاط كامل اصلاً كُل بالقاعة
ضاربين القوط
وكف من شاف مجموعة من اقاربة جاين علينا يسلمون اني هم وكفت
صاح واحد ورفع ايدة تسالمو بالادين
-سيادة القاضي شلونك وها الف مبروك على خطوبتك
رجع سحب ايدة وقدمها علية يسلم رجع اياد لزمها ورجع سالمة
هو بسرعة افتهم
-ها الظاهر غركان الاخ
وحدة سلمت علية كالت
-اذا زوجتة صغيرة  وحلوة طبعاً يغرك شكد فرق بينكم انتم
سكتت مجاوبت رد اياد
-اهم شي تقارب العقول والقلوب بس هم اجاوبج 12سنة فرق بيناتنة
-الله يحفظك يا بطل انتَ هم شبعت قهر ما اجتي عدلة وياك
كالتها البنية بعدين كالت
-اعرفج اني  نجمة  بنت خالتة الكبيرة امي متوفية وهذا عماد اخوية الاصغر
-الله يرحمها اتشرفت بيكم
-النا الشرف ومبروك مرة ثانية الله يجعلها من نصيبك وتكمل فرحتك ابوك بعدة قافل
خزرها وهي سكتت بعدين راحت ما استفسرت ولا ادخلت لان اني اخاف من
خزرة ابو
دكت الاغاني حتى ركصهم يختلف بعدها دكت سلو وكل واحد اخذ زوجتة وكامو يركصون احس نفسي كاعدة بفليم اجنبي واني بأفكاري الاديسونية
اخذ ايدي اياد
-كومي خلي نركص
-ها ما اعرف اركص
سحبني علية
-اني اعلمج امشي
خلة ايدة على خصري واخذ ايدي خلاها على جتفة الايسر لا هنا وكافي عطرة
ملة رئتي
همس بأذني
-ليش رجفتي
-هاا هو التبريد بارد
-اي صحيح
حجاها بعدم تصديق
يجيبني منا ايوديني منا الانارة خفيفة يادوب تشوفين البصفج عايشة اللحظة
ادعي بكلبي تخلص الاغنية راح يغمى علية
-مرتاحة بحضني
-مو شوية صاير جريئ
-لا وداعتج هواي مو شوية اني متفاجئ من نفسي صدك الحب يصنع المعجزات لتنسين موعدنا
-لا شلون انسى
راد يحجي تقرب ادم من عدنا
-الله يساعد العرسان شلونكم اكيد تعبتو من الركص
نزلت ايد ي وسلمت
-هلوو ادم شلونك حمد الله على السلامة
-مو بعد وقت على السلام  ولج مفخخة لاسقة طكت علية يابذاتة
والله فشلني فشلة
-تليفون ماشلتي وتدرين بية حماج المستقبلي ما اجيتي للمستشفى للبيت
انبلع الساني يمة اكلني اكل هذا
-شلون قهر اكو واحد يحظر خطبت اختة وتعال شاهد شلون يركص وياها وشلون يلزم ايدها ولك هذا ابوك عقلة مكلوب على الابطانة
-كافي احترم سد حلكك
-عليمن خليها تتعرف على عمها المستقبلي ليش تتفاجئ
-كافي ادم زودتها
-لا وداعتك منقصها
-تعالي سارة نرجع للطاولة
رجعنا كعدنا كعد ويانة ادم
وجهة بي اثار عميقة مال حرك وايدة هم كون بالعلاج يخف خطية
اجتي وحدة تتميع
-هلوووووو شلونكم
-كمت سلمت عليها
ادم كلها
-بعد جريها للواو خرب بالحظ سارة تأمنين بالحسد
-هاا اي مرات
-ولج اني منفوس حتى مفخخة طكت علية الله يستر من المستقبل كون ذولاك الناس يحلون عني ويتزوجون
هي بكُل جُرئة كالت
-ما اتزوج و وراك وراك وين متروح وابد متتهنة بحياتك مادام اني اريدك
-لا بربج ولج انسحكت وانظربت طلقة وحادث سيارة ومفخخة لا اكيد اختمها
بالموت
-لا اسم الله لتكول هيج بس مو بيدي وانت مثل الثلج
-ولج اني شكد ساقط اخاف من تحجين وياي
اندار على اياد كال
-طبعاً انتَ ماعندك غيرة على اخوك ولك بصفك وتتغزل بية غير تكولها
اخوية شريف تعالي من الباب خطبي لتتغزلين بي يستحي
رجع باوع عليها
-ولج اخاف اني على روحي منج هسة تردين تزوجيني يايمة نوب انام يمج
لا لا ابول على روحي من الخوف
دفرة اياد وانكلب الكُرسي و وكع ادم
باوع مصدوم على اياد
-ليش تضربني يعني فوك متتغزل بية كدامك تضربني لا صاير مو خوش
قاضي تتهمني عينك عينك وهي
بعدة ممكمل اياد كلة
-اكرمنا بسكوتك ادم متضحك عيب صاير فد مرة
-سكتت وكمت هم شلون وجوه تجيب الفكر
طلع من القاعة وهاي البنية بجت
كال اياد وه يقدملها الكنيلس
-لتبجين مو تعرفين السانة وهم انت الله يسلمج تكوليها بوجه احبك
اكيد يشرد الرجال هو يحب يركض ورة المرأة مو العكس اتركي
مدة اذا اتفقدج يعني انتِ تعنيلة شي يجي يخطبج الملحة الزايدة تخلي
يشرد وتنزلين من عينة وهم مو كُلشي نتمناه يجي هاي الحياة مو عادلة
تنطيج فرصة لو فرصتين والشباب واحد اشكد صارلج تنتظرين
خمس سنين هذا عمر ليش هيج تضيعين راجعي نفسج