سأُحارب لأجلي

38

-أني روحي ميتة ماعندي شي اقدمة

-سأُحيها لكِ هذا وعد
وعدوني بس محد وفى بوعدة
-لنكون اصدقاء
مديت ايدي هو سالمني
-لنكون اصدقاء اذاً
تمشينا للبيت دخلت البنية مسوية عشا حايرة شطابخة تعشينا للتسعة بالليل طلعنة منهم ودعناهم ورجعنا البيتنا
هذا الاسبوع خلصتة بالقصر نبني ونرمم تيمور جاب عمال رجع شغلي
بتعزيل الملفات
رجعت اداوم معهد وخلص شهر سيردار يومية يجي للبارك بس امي وسجى
وبناتي وياي مو الوحدي مرات بابا هم يجي وهيج مشت حياتي
شهر التاسع دوام قدمت اوراقي غيرت اختصاصي ادارة واقتصاد نصحني
بي سيردار طلعت للسوك اجهز  ملابس للجامعة وام توفيق متفارقنا ابد
اتكول صرتو اهلي كامت تتمشى للبارك على مود البنات متفاركهن
تعلقت بيهن
نايمة بالليل تحلمت اياد يمدلي ايدة حتى الزمها واني رافضة بجى من شفتة هيج
انطيتة ايدي سحبني وياا بمكان عميق مالة نهاية فزيت خايفة وعطشانة
نزلت شربت مي شفت بابا كاعد
-شو كاعدة الساعة بثنتين
-نزلت اشرب مي
-يلة بابا صعدي نامي تصبحين على خير
-وانت من اهل الخير
صعدت حطيت راسي اريد اغفى ماكو اتكلب خرب دنامي شبيج سارة
للاربعة يلة غفيت كعدت بالستة على صوت البنات
-صباح الربيع والزهوة على احلى بنات فديتكم
هن يضحكن ويناغن غسلتلهن وبدلتلهن اخذتهن ونزلنا نتريك امي هسة كاعدة تسوي ريوك
-صباح الخير ماما
-صباح النور شو ماجاهزة مو اليوم دوامج
-هسة ابدل بعد وقت خلي اوكل البنات
وكلتهن وحضرت ممياتهن وصعدت بدلت نفنوف نيلي علية سترة كابو لون اوف وايت حذاء فلات  لان اليوم اخلصها فرير بالجامعة توربان نيلي مكياج خفيف اخذت جنطتي ونزلت  بست بناتي سلمت على اهلي
وطلعت  ركبت السيارة  وصلت النهاية الشارع شفت سيردار واكف
اشرلي اوكف وكفت
-صباح الخير
-صباح السعادة اتمنى ان يكون هذا اليوم بداية جيدة
-شكراً
لوحلي بيدة بايباي شغلت وطلعت كبل والله خطية هذا متأمل اقبل اتزوج بعد
وصلت الجامعة اللبس شنو لو مالابسات يمكن اهون المكياج اني اعتبر المحتشمة الوحيدة بيهن والشباب عبالك طالعين من عرض ازياء
لكيت قاعتي وكعدت عاقلة اجة الاستاذ يشرح الحمد لله نص الشرح مافتهمتة
طلعت بالوحدة لان الباقي تسخت ركنت السيارة لكيت تيمور بالباب
-هلو تيمور محتاج شي
-هلو سارة لا بس منتظر بيبي تطلع اخذها الدكتور كالت بس ابوس البنات
-ليش شبيها
رحت دخلت لكيتها حاضنتهن وتبجي
-يااا خالة شبيج ليش تبجين
-مابية شي بس اخاف اروح ويطلع بية شي واموات واني ممودعتهن
-اسم الله خالة عمرج طويل شنو هذا الحجي امشي اني اجي وياج للدكتور
-اي بنيتي تعالي وياي عفية
اخذتها من ايدها وطلعتها خطية مثل الطفل اليخاف من الابرة هذا حالها
ركبتها بالسيارة وصعدت تيمور عقج وجه
-سارة اخذي راحتج اكيد تعبانة جاية من الدوام
-لا والله واعوف خالة الوحدها مستحيل يلة شغل السيارة مالك دخل
افتر باوعلي راد يفترسني
فديتني اشكد احب اخبث على المتكبرين امي طلعت شايلة البنات لوحتلنة باي باي احلف هسة كاعد اتسبني لان عفت البنات عدها
وصلنا للدكتور هي ماقبلت تيمور ينزلها نزلتها اني يمكن متعاركين
دخلناها للدكتور سألها شبيج وهي اتجاوب صعدها على السدية وطردنا
من الغرفة كعدنا بالانتظار
-شمسوية البيبي وهيج تحبج
-ممسوية شي بس يمكن لان مو مغرورة وما اتحاجة
باوعلي صغر عينة
-شقصدج
-ما اقصد شبيك
خزرني ودار وجه عبالة يخوفني بخزرتة والله بطران دخل للعيادة ثنين شباب
كعدو وصرت اني بنصهم باوع عليهم كام انطاني مكانة واخذ مكاني  غيرتة العراقية لو مو من الطفولة بأمريكا متتغير بالدم عشر دقائق وطلعت ام توفيق
رجع دخل تيمور يسأل الدكتور طلع مابيها شي بس انطانة تحاليل للاطمئنان
دخلنا للتحليلات شافت ابرة سحب الدم كامت تبجي من صدك ضحكت
-خالة اتكوميني برزالة وتكعديني برزالة والسانج علينا طلعتي تخافين من ابرة
نوب اريد اسكت ما اكدر
-كافي حقيرة تضحكين علية ضحكي على روحج راح تزوجين الثالث
هي حجت هيج زادت نوبات ضحكي
-تضحك علية الفاهية العوبة اسكتي
-سكتت يلة حبيبتي خليهم ياخذون دم خرب عندي دوام يم حفيدج واتأخر
-شحدة هذا الكلب يفتح حلكة
هو ساكت اتكول حايط حضنتني وانطت ايدها اخذو دمها كالو نص ساعة وتطلع النتيجة دخلنا بكوفي قريب على العيادة نزلنا كيك وقهوة خلصت النص ساعة راح تيمور يجيب التحايلات من رجع
شتغل عندي هرمون السخافة كتلة
-بشر طلعت حامل
هي ضربتني بظهري كطعت نفسي هو مدري شعجب ابتسم كال
-تحاليلها نظيفة مابيها شي حمد على السلامة بيبي
-الله يسلمك ولو بعدني زعلانة
رجع عبس وكام
-خلي نرجع تأخرت
رجعنا للبيت هي ماقبلت تروح البيتها توسل بيها كالتلة اضوج الوحدي راح
العب وية البنات هز راسة وراح اني بدلت ورحت للشغل
اليوم شغلي خلص بالستة رجعت لا اكلت ولا سبحت للفراش نمت من التعب
حتى محاضرتي ما راجعتها
كعدت بالاربعة الفجر شبعانة نوم سبحت براحتي حظرتلي ملابس نزلت سويت
ريوك الاهلي صعدت على صوت بناتي كاعدات بدلتلهن اجتي سجى شالت تولين اخذتها تلعب بيها تريكنا بدلت ورحت للجامعة ماعندي ولا صديقة
مكتفية بصداقت نفسي كعدت بالكافتريا اتذكرت ايام بغداد ضحكت متدري الدنيا شضامتلك
طلعت للبيت لكيت سيدار باب الجامعة
-هل نتمشى قليلاً
-السيارة
-نعود لها لاحقاً
-تمام
تمشينا المطعم قريب على الجامعة سحبلي كرسي وكعدني وهو كعد اكبالي
-ماذا تأكلين
-لا شيء شكراً
-هل فكرتي بعلاقتنا
نزلت راسي هسة هذا شكلة
-لا
-لا؟
-سارة مستعد انتظركِ طول العمر
-ارجوك توقف انتَ لاتعلم ما مررت به أُريد أن اتشافى نهائياً من صدماتي وعد اذا اردت الحب
ان يدق قلبي مرة ثانية ستكون انت لكن الان لا املك ما اقدمه لك غير روح مجروحة لا تثق بأحد
-اتفهم ذاك
سكت باوعلي سحب نفس وكال
-سأعود الى تركيا  أُريد وعد بأننا سنبقى على تواصل بيننا
-اتفقنا
سكت شوية بعدين كال
-ماذا فعلتِ بي
هو اني جاية يمك جاملتة وكتلة
-اسفة
هز راسة متلة
-تأخرت على اطفالي
ماحجة شي
رجعني الكراج الجامعة شغلت السيارة
-باي سيردار
-باي سارة
طلعت للبيت وكل عادة ام توفيق كاعدة بناتي بالباب
-هلوو خالة شلونج
-هلووو حبيبتي
-خالة الجو برد تغير اخاف عليهن يتمرضن
-مابيهن شي لعد باقيات بالبيت احسن خليهن يغيرن جو بعد كم يوم اتصير باردة اكثر  ينحصرن بالبيت
-خلي ادخلهن امي وين
-راحت وية صديقاتها من العشرة الصبح
والله يا ماما شلون تأمن بالمرة الجبيرة تعوفها الوحدها ويا البنات متخاف تتخربط المرة اوف
دخلت للمطبخ فتحت الجدر الحمد لله مسوية دولمة صبينا واكلنا ونمنا
كعدت على صوت امي
-شنو سارة اليوم ماعندج شغل
-شنو ماعندي بيش الساعة هسة
طفرت شفتها بتلاثة ونص عاااا راح اتأخر بسرعة بدلت وركض للشركة
لكيت الموظفين مكيفين خير شكو يا الله يومية الوجوه تطلاطم
دخلت المكتب
-هلو تيمور
-هلوو سارة اليوم الشغل هواي جهزي رسومات المهندسين وفايل الفلة
رقم 11بشارع......
جهزتهن وشتغلت شغل مال عشرة ايام للتسعة ايدي وجعتني وعيوني كامت تغوش من النعاس
-هاهية عاشت ايدج باجر ماكو دوام
-الحمد لله
-بس عدنة حفلة
-حفلة؟
-استلمنا موقع لبناء ناطحة سحاب اريد باجر الموظفين يرتاحون  بحفلة بسيطة حتى نبدي بيها اريدهم مركزين
-وين الحفلة
-بمطعم جونيور
-وين صاير هذا الطعم
-من اخذ بيبيتي تعالي ويانة
-الله كريم
تيمور اليوم ياخذ وينطي بالكلام مو مثل قبل مغنتب الله هادي
جهزت الكلي عليهن للسبعة كال طلعي بعد ما احتاجج اني ماكلت باطل
اخذت غراضي وعدل للبيت لكيت بابا بالباب سلمت عليه
ودخلت
-هلوماما
-هلووشو تأخرتي اليوم بناتج موتني صايرات وكحات
-لعد ام توفيق وينها
-راحت البيتها من السبعة كالت نعست
-اليوم شغل هواي وباجر عدنا حفلة استراحة لان جاي شغل قوي للشركة
-شراح تلبسين
-ما اعرف
-تذكرين فستانج اللبستي بعرس نور
-عاااا راح يصير اربع سنوات
-المهم حلو ومرتب عليج اطلعين توب وهنا ملابسهم مشلتحات طلعي حتى اذا يحتاج كوي غسل
-هسة بس اكل اطلعة واشوف
تعشينة واخذت بناتي نومتهن فتحت كنتوري طلعت الفستان لبستة على قياسي
ممتغير جسمي بس شوية ضعفانة كد اصبع بس يحتاجلة صدك كوي
والتوربان مالتة موجود حذاء عندي ذبيت نفسي على الجرباية ورحت بسابع نومة