لا چَـن كعدنه سوه
ولا چَـن حجينه وياك
عَليتني للسمه وهديتني من هناك .
بـ قلمي روايه المَـريانا
الكاتبه : فَاطِـمه
_____________________________
مَـريانا
_ كـالو امـج طعـنت بـ شـرفج .
غمض عيونه بـ اسىٰ
وتقرب عليه وحضني يمسح على راسي
خليت راسي على كتفه ونزلت دموعي
_ ردت ابـرد گلـبي بس احترگ گـلبـي .
رفعت ايدي ومسحت دموعي
ابتعدت عنه قبل لا يحجي واردفت
_ اريد ابقى وحدي .
هز راسه وطلع كمت قفلت الباب
ورجعت كعدت
جسمي يرجف من العصبية
عصرت ايدي اهدئ رجفتي
بس گلبي شيهدئه ؟ اخ من الوجع
كمت افتر بـ الغرفه التفكير اكلني
أبوي وين ؟ يعرف وساكت
ليش ما يدخل لو يجوز يعرف وقابل بهل شي ؟
كمت أشك بالكل
حتى أيهم ، ما ثقيت بـ واحد
وجان هل شي صحيح
ما اثق ولا لازم أثق لا هسه ولا بعدين
ما عندي وكت أحزن
لازم اشوفلي حل واكشف كل هل غموض
كلهم غريبين
والمعلومات المضمومه اغرب
حتى أنا غريبه
أو يمكن مو أنا ... حياتي غريبه !
بقيت كاعده للصبح ما اجاني نوم
رغم ألنعس بس ما اكدر انام
طلعت الحمام متجاهلته بعدين
بدلت وخليت مكياج
يخفي الاثار الخفيفه الي بـ وجهي
وطلعت للمطبخ شربت ماي
ورجعت أخذت جنطتي ولبست حذائي
_ طـالعه أنـا .
حجيتها بدون ما اباوعله
ولا انطيته مجال يحجي نزلت
وأجرت تكسي .. اي ما أخذت السويج
ولا كلت اله يوصلني
ممكن يكون شي جبير بـ راسي
سندت راسي على الجامه اجيت انام من النعاس
من وصلت ما بدلت
مجرد خليت اللابكوت فوك ملابسي
وره ساعه من الشغل
طلعت اكل انوب رجعت مطفيه
من النعاس
دخلت للمختبر اريد اشتغل
ورأساً دخل وراي شخص هم لابس لابكوت
يعني واضح يشتغل هنا بس ما اذكر شايفته قبل
_ السلام عليكم .
ردينه السلام وهو بقه يحاجيهم
استغربت بس درت وجهي أكمل
لحد ما سمعته يحجي
_ انتِ منو ؟
درت وجهي لكيته يباوعلي
عگدت حواجبي واشرت على نفسي
_ اي انتِ ما شفتج من اجيت .
_ محلله شنو يعني .
حجت وحده من البنات قريبه عليه
_ هذا المسؤول الجديد بدال دكتور علي .
رفعت حاجبي وهزيت راسي
_ من اجيت ما شفتني جنت بـ أجازه .
_ شنو اسمج ؟
_ مَريانا .
_ عاشت الأسامي ، حلو كملوا شغلكم .
رجعت أكمل شغلي
ومن صحتلي فرصه رحت يم لُجين
وهي مصدومه أيهم اخوي
_ شلون ثقيتي هيج بسرعه
ما توقعتي يجذب ؟
_ توقعت بس المواقف هاي
ما اسولفهن لاحد ابد حتى انتن ما تعرفن
وهو سولفلي المواقف لمن جنه صغار
فـ هيج صدكت وهم الهويه والتحليل .
أنت تقرأ
المَـريانا
Fantasyفَتاة تَمر بِها عواصف مِن الكُمد لَكن هل تزداد هذهِ العواصفُ ثم تَختفي بِـ ظهورهُ ..؟، هَل سَيكون العَوض ونِهايه الحُزن لَها ، وهل سوف تَصبح له شيء ما يَخفي كُل سيء في ذاكِرتهُ ... احدهُما يصبح العَوض لِلاخر .
