قصة ثانوية عامة (جاري التصحيح وتكبير السرد)

ليس بارت لكنها قصه حزينة

السلام عليكم
انهاردة كنت فى التظلمات فى الإسماعيلية عشان اشوف الورق ف العربى والانجليزي والرياضيات
المهم انا كنت بطلع من الامتحان براجع إجاباتى مع المدرسين وبحسب الدرجات وكنت حاسب انى هجيب بالظبط 395 أو394 يعنى 96% ويوم النتيجة لقيتها 66% وانا عارف ومتأكد ان فيه حاجة غلط ف روحت انهاردة التظلمات وشوفت الورق تمام اسمى ورقم جلوسى والبيانات بنفس خطى اجى اشوف المقالى ألاقي الخط غير الخط تماما يعنى لو حد ميعرفش يعنى ايه خط وكتابة هيقول مش نفس الخط
والبابل شيت أنا طول الامتحانات معملتش إكسات خالص ف أي ورقة غير إكس ف ورقة الكيمياء وإكس ف ورقة العربى
المهم روحت انهاردة انا واختى الكبيرة لقينا البابل شيت كله اكسات وأسئلة مش متعلم عليها أصلا والمقالي خط واحد ف أولى ابتدائي المهم قولتلهم عايز ارفع قضية عشان ده مش خطى ومش ورقى الاستاذ فضل يقولى عاللى هيحصل والنيابة والمحكمة وكلام كبير كدا وقالى فالاخر هيكون ورقك وهتدفع تعويض للناس اللى اتأذوا بسبب القضية قولت خلاص بلاش قضية  جيت احسب الدرجات اللى فالورقة لقيت العربى 40.5/80 زي الشهادة وأنا حاسب ومراجع كذا مرة من نموذج الاجابة انى هجيب 76/80 الرياضيات لقيت درجتها 61.5/120 وانا برضه حاسب هجيب 118/120 عشان كنت غلطان ف سؤال مقالى الاستاتيكا بس دى الغلطة الوحيدة اللى عندى فالرياضيات
الإنجليزى بقا لقيت نفسى جايب فالورقة اللى المفروض بتاعتى 15/50 ورافعنى لحد 25 بدرجات الرأفة اللى المفروض أنا أصلا مقفل انجليزي ومعنديش ولا غلطة فيه
المهم فالاخر معرفتش أثبت ان ده مش ورقى والأساتذة هناك أقنعونى ووهمونى ان ده ورقى وان انا فاشل وانى لو عدت السنة بكتيري اوى هجيب75% بيقولى انت مستواك وحش جدا فالرياضيات وانت ازاي داخل علمى رياضة وانت مستواك كدا مع انى والله العظيم متأكد إن ده مش ورقي ولا مستوايا
حسبي الله ونعم الوكيل فيهم وسواء بقا الورق اتبدل او اتعلم بنموذج تانى أو ايا كان اللى حصل انا مش مسامحهم ويوم القيامة كل واحد هياخد حقه
حسبي الله ونعم الوكيل
تعديل: بقول للأستاذ هناك انا جايب فالفيزياء والكيمياء والفرنساوى درجات كويسة قالى متضحكش على نفسك اللجان فالفيزياء والكيمياء كانت سايبة وكله غش والله والله والله انا مغشتش أي حاجه ف أي مادة والمدرسة كلها عندى كانت غش وسماعات ومكانش فيه مراقبة ف أي مادة وأقل واحد جايب فاللجنة بتاعتى 85% وميعرفش أصلا المواد بتتكلم عن ايه
ـــــــــــــــــــــ
مجبتش حاجه من عندي ودي قصه حقيقيه وولد هو اللي كان بيحكيها!
إحنا وصلنا للدرجه دي ؟ بتكرهوا الناس في ثانوي عام؟ طب ذنب الناس دول إيه ؟
اقل طالب في عام بيدفع طول السنه في حدود ال50000 ويمكن اكتر كمان وفي الآخر يحصل كل دا!
مش هقول غير حسبي الله ونعم الوكيل بجد انا اتوجعتلهم