فلعشية ،،
كانت فلحصة ديال éco-général كالسة فطاولة لولة بوحدها كتكتب بتركيز مرة مرة كدوز خصلة من شعرها ورا ودنيها تا حنحن لبروف كان فمنتصف العمر شعرو شهب و داير نضاضر لكادر ديالهم غليض ، عينيه خارجين و تجاعيد مكمشين وجهو وهو عابس كيشوف فلوراق تا نطق بصوتو مدعدع :
*...تبارك الله تبارك الله.... زعما عندكم شي أجوبة (ضحك باستهزاء ) هه مبهرة ..(. قال بلغوات ) سطولة كي دايرين،
، بدا كيعطي فنقط غا خمساوات كيتشايرو اما مالين عشرة راه فرحانين ، لي جاب شي نقطة راه ملهي معاها الا ندى كن ماعيط ليها كاعما تهز راسها على لورقة ،
*... ندى الوكيلي،
شافت فيه وهزات يديها
ندى ... Présente monsieur،
شافيها و ابتاسم وقال
*.... هاهي الوكيلي تبارك الله dix-neuf et demi هاكي ابنتي ،
ردات ليه الابتسامة و مشات خدات لورقة تحت وشوشات تلاميذ القسم :
"هانتي ياختي كتجي من شهر لشهر و كتفرع طرح "
" انا بعدا ماعرفتش كي كايديرو يجمعو بين القرايا و الڨحوب انا لا قرايا قريتها لا ڨحوب ڨحبناه "
" وييييلي على تسعطاش تا كيدارت ليها وهي فحالا ضارباها ساكتة و النخوة على الخوة "
" فحال هادي كتلقاها مكتهزش لكاس فدارهم غا راحة وسياحة بسييف راه خاصها تجيب عشرين "
" اودي زهر لمن عطاه لله حنا كيظل يعاير لجدنا طواسل وهي قرب يدير ليها الله يبارك فعمر لالة ".
اقاويل ماشي جداد عليها كل واحد واخد عليها نظرة و كل واحد و كيفاش كيشوفها ولكن اغلب ناس كيشوفوها " عاجبها راسها متكبرة ، قح*بة ، برهوشة ، مامربياش ،..." هادي انطباعات واخدينها ناس من خلال تصرفاتها و معامن مرافقة، الحاجز لي مامخليش الأغراب يعرفو الجوهر ديالها،
صونات ساعة و خرجو خرجات فرحانة حيدات طابلية دارتها فشكارة و طلقات شعرها خرجات لقات ياسر كيتسناها ركبات موراه ودارت الكاسك مسافة طريق و كانو وصلو لحومة شعبية بامتياز،
عيالات كالسين مجمعين فلباب، دراري صغار كيجريو، بنات كيلعبو لحبل، فراس زنقة كاين عطار حداه كزار و لتحت كانت قهوة ،
نزلات من لموطور مدات لكاسك لياسر وسلمات عليه و مشات ،
تاوقف عليها وليد صغير تكون عندو سبع سنين تقريبا ضعيوف لابس توني كحل ولا بيض بلغبرة و تراب وجهو مقموش و مرة مرة كيمسح خنونة لي كتسيل ليه بطرف كمامو :
*... ندى ندى ..
وقفات وباستو فحنكو كضحك معاه ... حاتم ،، كيداير لاباس بيخير ،
حاتم ... لاباس غادة عند حميد ؟
ندى .. اه علاش ؟
شاف فيها بتوسل كيرغبها
حاتم ... نجيب ليك جاد تشديه عفاااك نلعب شوية خرجات ماما وخلاتني حاضيه.
أنت تقرأ
🦋 هي الندى 🦋 (في طور تنزيل 💫)
Humorبــــــســــم الــــلـــه الرحــــمـــن الرحــــيـــــم ، بسم خالق الكون و المجرات ، نافخ الروح و الحياة ، باسمه تعالى أبتدي ، روي حكايتي ، بحروف نسجت احداثها ، من مخيلتي ، بلمسة واقعية في كل شخصية من شخصيات روايتي ، اقدمها لكم صديقاتي ، مع خالص...
