ابناء الحسوم "شمسون"

Part 28

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

أنا خلفك دائماً فعندما تحزنك الحياة أستدير لحظني 🐆♥️..

━━━━━━  ━━━━━━

"كيان"
گلبي راح يوگف من الخوف نص ساعة مرت وجنات ما صحت من الاغماء وضعها شگدما اگول سيء اكون مقصرة، جسمها مزرق وملابسها متربة وكأن چانت بصحراء.. عجزت العلوية ما خلت شي ما جابته حتى تصحيها شممتها عطر وشمرت على وجهها مي، جابت القران تطبگه بوجهها تعبت واحنه تعبنا من الهلع الي جاي نعيشه..

العلوية وضعها تخربط من شافت جنات هيچ وگعت علينا ونقلناها بالاستقبال قسنا ضغطها معلگ المسكينة بقت كم وحدة من البنات وياهة تهتم بيها واني رجعت لغرفة جنات..

توتر ورهبة والحمدلله بعد اخر محاولة شمموها تربة مبللة ياله حست وفتحت عيونها الذبلانة بس شافت اختها ايات بچت.. بچت بقوة وخوف والي زاد خوفها دخول ابوها للغرفة خلانه نبتعد عنها..

-صاحب: وين چنتي؟

سألها بدون مقدمات ما گدرت تجاوبه بقت تبچي بالخنسة، تقرب منها اكثر وضرب خدها بأصبعه كم مرة حتى يصحيها وينتر بعصبية..

-صاحب: وييين چنتي شوو گعدي

-ايات: بابا بعدها ما صاحية على كيفك وياهة

-صاحب: لا تدخلين انتِ.. جناات شوو وياي جناات

يهز بيها بقوة نرفزني والمشكلة محد يحچي وياه الكل متكتر على صفحة وصافن ميگدرون لهذا النذل، تمنيت العلوية هنا وتجي تربي على وقاحته وقساوته ويه بنته..

دخلو اربعة من عمامهم وياهم شمسون وكم واحد من الولد وجابو فاهد هم مادري ليش.. بعض البنات طلعو بره الغرفة متكفي بس احنه الواگفات قريب من جنات بقينا وياهة..

-عماد: وينها بشررى.. بشررى تعالي عمو تعاالي

اجت بشرى وجهها يعاكس اسمها ينگط سم هي وحدة من الي اذت ماريا تصير بنت عمهم بس چبيرة بالعمر ومتزوجة ابن عمهم عماد..

-عماد: شصار؟؟ عيدي الشفتي؟؟

-بشرى: عمو گتلك شفت جنات ويه ليث بالحقل چنت موجودة لان العلوية گلتلي لملمي الي بره الحقل ويه المساعدة بقو فترة هناك وره شوية دخل شُهيب وياهم