فصلية دمشق

البارت (39)

#فصلية_دمشق
بقلم #احمد
البارت_39

ميرا : من سألتني تذكرت من گالتلي اذا ام انس جبرتو يتزوج غيرج اخطبيها لذلك من يمي گلتلها تزوجت بس شفتها مثل الي زعلت

ومن شفت ردة فعلها عرفت انها ناسية موضوع انس ويمكن جانت تريد تخطبها لمحمود بس للاسف ما لحگت عليها واني ما حجيت بعد بالموضوع

مرت الايام انس ما اتصل بي نهائيا بعد الخطوبة واني دائما احاول ما افكر بالزواج والعرس علمود لا يصير عندي توتر

بس اكو شي شاغل بالي وهو بعد التقارب بيني وبين انس بالفترة الي راحت هل راح يكون زواجنا طبيعي ولا حبر على ورق

والمشكلة ماكو فد طريقة اعرف منها بس اكثر شي يهمني هو انو بعد ما نتزوج استقر بحياتي بعد فترة الضياع الي عشتها من صرت فصلية

ومتأكدة وجودي ويا انس راح يكون نقطة قوة الي لان هو من زمان ما يحب الظلم ومو معقولة يخلي احد يظلمني واني على ذمتو

بعد ما نزل اجازة من دوامو بيوم جنت ويا نور وانتبهت لبيبي نورا اشرتلي من الحديقة ورحت عليها وگعدت يمها

نورا : بنيتي اتصل انس علمودج

ميرا : شيريد

- يگول اذا الوقت مناسب نسوي النيشان بعد يومين فشنو رايج انتي

- ماعرف اني انتي شنو رايج

- بصراحة اني اگول نسوي النيشان ماطول هو فتح الموضوع لان مو معلوم يا يوم امو تحاول تخرب بينكم

- لعد گوليلو الي يريدو اني موافقة عليه

- تمام بنيتي روحي انتي واني راح ارجعلو خبر

- تمام

رحت من يمها على نور ومن اول ما گلتلها سحبتني من ايدي مثل المخبلة على شوية واوگع على وجهي واخذتني للغرفة الي بيها ملابسنا

ميرا : شبيج يمعودة تخبلتي

نور : خلي نختار ملابس بسرعة بسرعة اني عندي فستان شوفيه بالاول

- دولي عني عبالي عندج شي مهم

- دنجبي لج راح يجي انوس قابل يشوفج بهالجهرة الخايسة

ميرا : والله ماكو خايسة غيرج

تجاهلتني وطلعت فستان احمر حتى النقشة حمرة والردن تول جان كلش حلو وراحت ركض للغرفة الثانية لبستو واجت تشوفني

نور : ها شرايج

ميرا : يخزي هو هذا هم ذوق

- بصدمة .. بس هذا جديد ولونو حلو ليش ما عجبج

- كوة كاتمة الضحكة .. ماعجبني

- بحيرة .. اوووووف هسا شلبس

مليكة : نور ويننننننن....... هاي ليش لابسة الفستان