طعنه في خاصرة النسيان

الحلقه ٣٥

#طعنه فـي خاصره النسيان

ـ
ـ
دلهم

ـ بقيت كاعده تالي ما صبرت أريد اعرف شنـو يحجي شنـو قرر طلعت وراها صارت بوجهي بيدها صينيه العصير والكيك ابتسمت ودخلت الاستقبال خلت الباب مفتوح اشـويه بقيت اتسمع الهم

فاضل ـ يا هلا ابو يسار نور البيت والله اليوم ماڪو رجعه عشاك يمنه وڪلامي ما بي رجعه

غياث ـ مثل ما تريد يخوي بس من الصبح نطلـع  الجهال عدهم دوام والمديره طلبت يدامون اهواي تأخروا على مدارسهم

ـ ايي ليش لا وهم لازم هذول مدارسهم وضروري يداومون شنـو ذنبهـم وأعتقد ام يسار وياهم لو جاي بقرار ثاني احجي تراها خيتي وما ارضى احد يغثهـا ڪافي عاد ...

غياث ـ ايي أڪيد ترجع وياهم لعد شلون بس ابو إبراهيم انت غالي عليه وهذا الموضوع خاص بينا ما احب احد يتدخل لو تڪون امي حجيت بوكتها ساعه غضب وحقي. وتعرفنـي اني من يومي ما احب احد يتدخل بعائلتي ومشاڪلي اني احلهـا نتفاهم عود..

فاضل ـ هذا هو يخوي والله يهديكم ونعم منك تعجبني بهـاي ما تحب احد يتدخل بينـكم  وهٰـاي مـن الزينـات

ايي مطول باقي يمنا ام إبراهيم شتسولنا عشه نـريد عشه زين من ايدج انتـي وأم يسار واني اخوي اكو جم جلمه نحجيـها براحتنـا

وديعه ـ تدللووا من عيوني عـلـىٰ راحتكم يلا جهال تعالوا اهناك بالمطبخ نسوي العشه تعالوا امي

دلهم ـ طلعت والجهال وراها ضحكت ضربتني عـلـىٰ ڪتـفي لحكتها للمطبخ اخذت المواعين بديت اغسل بيهن

وديعه ـ شحجـي بعد خو سمعتي الكلام ما حاجه بس تدرين حيل يعجبني بالأخص من كال ساعه غضب ما يرضى احد يتدخل بينكم بلڪي الله يهدي عليج

دلهم ـ الله كريم انطينـي اساعدج بدينه نسوي عشه سوت بيتزا وبتيتـه تقلاه وسوت معلاك شوي وحمس اثنين ودزت على كباب شي ما يشبه شي المهم تنوع فدوه لقلبهَا ڪملت المقبلات وحضرت عصير ليمون كله عدها اجهزه ربي يهنيها اشوكت يصير عندي بيتي وحد وافرح واشتري واسوي الي أريده
خلص واجه هو وياها ينقـلون الاكل سويت روحي احضر مواعين وكلاصات الماي ماريد اروح ونتجمع سفره وحده خايفه من نظراته الي احس حسابه وياي ما خلـص دخلت وديعه بعد ما خلصوا نقل الاكل وباوعتلي 

وديعه ـ صدك تحجين ادري بيج تبقين بالمطبخ تتعشيـن لااا نزعل عليج انـي وابو ابراهيم شو تعالي وكسروا هالحاجز عليتوا قلوبنا ترا ڪافي مكابره

دلهم ـ ان شاء الله هساع اجي وياج جرتنـي من ايدي طلعنا جان كاعد عينه عالتلفزيون ويسار يمه
سلمت بس ڪوه السلام عليگم أبو يسار باوعلي

غياث ـ وعليگم السلام

دلهم ـ ڪعدت بصف وديعه صرت مقابيلـه والبنات اجوا يمي نور تزحف اخذتها بحضني