NEMESIS

13

Unicode

ရေကူးတာကို ဘာလို့ခုံမင်ရတာလဲလို့မေးရင် ရေထဲ ရှိနေရတာကို ကြိုက်လို့ပါ လို့ Hyunjin ဖြေရမှာပါပဲ။

ရေကူးနေတဲ့အချိန် ရေကို ကူးခတ်ဖို့ကလွဲ အခြားအတွေးတွေ သိပ်ဝင်မလာတာကို သဘောကျသည်။ ရေအောက်ထဲ ရှိနေချိန် ဦးနှောက် ဗလာဖြစ်နေသည်ကိုလည်း သဘောကျသည်။

သို့သော်လည်း မည်သို့ပင် သဘောကျတဲ့အခိုက်အတန့်လေး ဖြစ်နေပါစေ၊ Alarm မြည်လာချိန်မှာတော့ Hyunjin ကန်ဘောင်သို့ ပြန်တက်ခဲ့ရသည်။ ထားရှိတဲ့ Alarm က အခြားတော့ မဟုတ်ပါ၊ Kim ကျောင်းမဆင်းခင် ၂၀ မိနစ်အလို၊ ကျောင်းကိုသွားစောင့်ဖို့ မမေ့ရန် ပေးထားတဲ့ Alarm သာ ဖြစ်၏။

Alarm ပိတ်လိုက်ပြီးနောက် ရေပြန်ချိုး၊ အဝတ်အစားလဲပြီး Seungmin တို့ ကျောင်းဘက်သို့ ထွက်လာလိုက်သည်။

ဦးလေးကြီးကို ဖေဖေက သူ့အနားမှာပဲ ခေါ်ထားတော့တာကြောင့် ကလေးတွေအဖို့ ကားသစ်တစ်စီး စီစဥ်ပေးခဲ့သည်။ ဒရိုင်ဘာသစ် ခန့်ဖို့ လုပ်ခဲ့သေးပေမဲ့ Hyunjin ရဲ့ ငြင်းဆန်မှုကြောင့် မခန့်ဖြစ်ခဲ့။ အဲဒီအစား Hyunjin ကပဲ ကားကို မောင်းသည်။

ပြီးတော့ ဘယ်သူမှ မခိုင်းပါဘဲ သူ့သဘောသူ့ဆန္ဒနဲ့သူ Seungmin ရဲ့ ကျောင်းအကြိုအပို့ အချိန်ပိုင်းဒရိုင်ဘာလေး လုပ်သည်။ လစာ မရပေမဲ့ Hyunjin ကတော့ ဒီအလုပ်ကို သိပ်ကိုခုံမင်နေလေသည်။

Seungmin တို့ တက္ကသိုလ်ကို Hyunjin ရောက်သွားတော့ အတန်းပြီးချိန်နှင့်ကွက်တိပင်။ ထိုအခါ အသီးသီးထွက်လာကြတဲ့ ကျောင်းသားတွေကြားထဲ အနက်ရောင်ခေါင်းလုံးလုံးလေးကို Hyunjin မှာ လိုက်ရှာရသည်။

"Kim!"

လှမ်းခေါ်တော့ အနက်လုံးလေးဟာ လှမ်းကြည့်လာသည်။ Hyunjin မှန်း မြင်သွားတော့ မျက်နှာထားလေးဟာ ပေါ့ပါးနေရာမှ အလိုမကျဟန် ပြောင်းလို့သွားသည်။

"နင့်ဘဲကြီး လာကြိုနေပြီ။ သွားတော့"

သူငယ်ချင်းတွေရဲ့ စနောက်ခြင်းကြောင့် Hyunjin ကို လှမ်းကြည့်နေတဲ့ Seungmin ရဲ့ အကြည့်က ပိုမိုမာကျောသွားခဲ့သည်။ Hyunjin နဲ့ သူ့ကို ဝိုင်းစကြတာမျိုးကို Seungmin မကြိုက်ပါဘူး။ အဲဒီလို အစခံရလေလေ ၊ ဒီလိုတွေဖြစ်စေတဲ့ Hwang ကို မုန်းရလေလေပါပဲ။