انت عمرى

اخيرا

وقفنا المره اللى فاتت يوم كتب كتاب روفيده لتانى مره
خرجت روفيده بعد ما لبست النقاب
وقعدت فى الكرسى اللى جنب ياسين وجنب ياسين المأذون وجنبه ابوها ياسين حط ايده فى ايد ابوها
بدأ المأوذن يتكلم وابو روفيده يردد وراه وخلص
وبدأ المأذون يقول الكلام اللى ياسين هيقوله
وجه ياسين يردد الكلام وقف ومعرفش يقول اى حاجه
روفيده كانت مغمضه عينها وقلبها واجعها اوووى
وكل اللى واقفين كانو باصين على العريس ومستنيينه يردد ورا المأذون بس لقوه ماقلش حاجه
بصو مكان ما ياسين باصص وساكت بصو كلهم وتنحو
روفيده حست ان الجو هادى حواليها فتحت عيونها براحه لقت الكل متنح وباصص لمكان قدامها بصت مكان ما بيبصو لقت حاجه خلتها وقفت من مكانها اكن فى تعبان لدغها وبصت للباب مكان ما الكل بيبص بصدمه والدموع ملت عينها
جه صوت من عند الباب:هو مش حرام يا سيدنا الشيخ تجوز واحده متجوزه
قربت روفيده من الباب وبصت للناس
وبعد كدا بصت تانى للباب وقالت بصوت مخنوق بالدموع: معقوله انت هنا حقيقى
الشخص: وحشتينى
لسه هتنطق فقدت وعيها حاولو يفوقوها ما صحيتش
دخلوها اوضتها وحاولو معاها تانى بس مافاقتش
طلبو دكتوره جارتهم الدكتوره جت فوقتها صحيت لقت مامتها واقفه مع الدكتوره
روفيده: ماما انا حلمت ان سيف عمل حادثه ومات وبعد فتره ياسين اتقدملى وفى كتب كتابنا لقي.....
وقفت كلام لما لقت مامتها لابسه نفس لبس كتب الكتاب بصت لنفسها لقت نفس اللبس بتاع كتب الكتاب برضو
قامت من على السرير بسرعه داخت بس تجاهلتها مسكت مامتها من ايدها
روفيده: ماما هو كل ده حصل بجد
جه صوت من وراها: ايوه حصل بجد
فضلت فتره واقفه مش مصدقه ودانها وبعدين بصت بسرعه وجريت ناحية الشخص ده وحضنتو جامد
روفيده: بس ازاى ازاى حصل كدا ازاى قالولنا انك مت ازاااى
وعيطت سيف مسح على شعرها
سيف: اهدى يا قلبى متعيطيش عشان بدايق
روفيده: طب قولى ايه اللى حصل انا لغاية دلوقتى مش مصدقه انك واقف قدامى
سيف: طب اهدى طيب وهحكيلك كل حاجه
ادهم ومهند ومازن اعتزرو للناس والناس مشيت
روفيده لبست النقاب وخرجت مع سيف قعدو كلهم فى الصالون وباصين لسيف مستنيينه يوضحلهم ايه سر غيابه الفتره دى كلها
ادهم: اهو يا سيف الناس مشيت فهمنا بأه انت معملتش حادثه
سيف: لا عملت حادثه بس مش بعربيتى
مهند: امال
سيف: كنت بعدى الشارع وعربيه نقل خبطتنى
مازن: امال مين اللى عمل حادثه بعربيتك
سيف: عربيتى هو حد عمل حادثه بيها
روفيده بصوت مبحوح: تانى يوم انت مشيت فيه جالنا خبر انك عملت حادثه ومت
سيف: ده تلاقيه حرامى لانى كنت سايب العربيه وروحت اصلى
مهند: طب ولما خفيت من الحادثه ليه ما جتش
سيف بص لروفيده وبصلهم تانى: لانى كنت فاقد الذاكره وذاكرتى لسه رجعالى النهارده واول لما رجعت انا جيت على طول
روفيده كانت قاعده جنب سيف وكانت عماله تعيط
سيف بص لابو روفيده: عمى بعد اذنك انا هدخل بروفيده جوا عشان عايزها على انفراد
باباها وهو لسه مصدوم: اتفضل يا بنى
اخد سيف روفيده ودخلو اوضتها تانى
روفيده اول لما دخلو حضنته جامد وقعدت تعيط
سيف: طب انتى بتعيطى ليه دلوقتى
روفيده: خايفه
سيف: من ايه بس يا عمرى
روفيده: خايفه يكون ده حلم وهصحى منه على ان انت ما جتش
سيف بعدها عنه ومسك وشها بإيده ومسحلها دموعها
ومسك ايدها وقعدها على طرف السرير وقعد قصادها وكان لسه ماسك ايدها
سيف اخد نفس وغمض عينه وبصلها: روفيده عايز اقولك حاجه مهمه
روفيده بتوجس: ايه
سيف: انا متجوز واحده تانيه
روفيده شالت ايدها من ايده وقامت بعصبيه: اه هى الحكايه كدا بأه مش فقدان ذاكره زى ما بتقول حضرتك روحت تتجوز
سيف بصدمه: ايه اللى انتى بتقوليه ده يا روفيده
روفيده بعصبيه: قولت الحقيقه يا استاذ سيف روحت تتجوز وقعدت فتره وجاى تقولى انك كنت فاقد الذاكره فاكرنى هقولك ولا يهمك يا حبيبى المهم انك رجعتلى بالسلامه
سيف وبدأ يتعصب من اللى روفيده بتقوله: تفتكرى فعلا لو عملت كدا ما روحتش على امى ليه الاول ها ليه جتلك انتى الاول عشان اطمنك
روفيده لسه هتتكلم سيف: ما تقوليش حاجه يا روفيده انا ماشى يمكن اعمل حادثه المرادى واموت فيها دى عيشه تطهق
وخرج ورزع الباب وراه
دخل الصالون
سيف: انا ماشى يا جماعه لانى لسه ماطمنتش اهلى
ومن غير ما حد يرد خرج كان باين عليه العصبيه الشديده
نزل من الدور اللى فيه روفيده ووقف لما حس بحد مسك ايده هو عارف انها روفيده عشان كدا ما لفش
روفيده: سيف ممكن نطلع نتكلم شويه
سيف باقتضاب: لا
روفيده: سيف فاكر اخر مره شوفتنى فيها قولتلى ايه قولتلى بحبك ساعتها ما كنتش اعرف انى بحبك وساعتها ماعرفتش اوقفك لما غبت عليا حسيت ان روحى راحت معاك واكتشفت انى بحبك ارجوك ما تسبنيش زى المره اللى فاتت
روفيده حضنته من ضهره جامد نزل راجل كبير ومعاه مراته
الست: ايه قلة الحيا دى على السلم مفيش بيت يلمكم
الراجل: جيل ما يعلم بيه الا ربنا
وعدو من جنبهم وبصولهم بقرف ونزلو
روفيده اصلا اول لما سمعت صوت الراجل بعدت عن سيف بسرعه وحطت ايدها على وشها رغم ان النقاب على وشها
وسيف كان كاتم الضحكه
وبعد ما نزلو لف لقى روفيده على حالتها ضحك على منظرها
روفيده شالت ايد واحده ضربته فى كتفه
روفيده: بس بأه انا ارفع عينى فى عينهم ازاى دلوقتى
سيف: انتى ترفعى عينك ليه اصلا العيون دى ما يشوفهاش غيرى
روفيده: طب يلا نطلع ولا هنستنى لما حد تانى ينزل
سيف ضحك: يلا
طلعو ودخلو تانى قعدت على السرير واول ما بصت على سيف قامت وقفت بخضه
روفيده: ايه الدم اللى على كتفك ده
سيف: هحكيلك من الاول انا لما فقدت الذاكره.............وحكالها من ساعة لما مشى وسابها فى خطوبة رنا ومازن لحد جوازه من ندا من غير ما يقولها السبب ولا اسم ندى حتى
روفيده: امال افتكرت ازاى
سيف: انتى كنتى لسه فى عمره صح
روفيده بدهشه: ايوه انت عرفت ازاى
سيف: فى بنت صاحبتك انتى حكتيلها حكايتنا كلها
روفيده: ندى وانت ايه علاقتك بندى
سيف: ندى تبقى مراتى ولما كنتى بتحكيلها كانت بتيجى تحكيلى وانا احلم باللى قالته معاكى انتى ولما اصحى استغرب مين البنت اللى انا بحلم بيها دى يمكن تكونى خرجتى من عقلى بس عمرك ما خرجتى ولا هتخرجى من قلبى
روفيده: يعنى ندى من اعز صحباتى هى ضرتى
سيف: هنبدأ غيره بأه
قرب منها وحضن وشها بإيده: انا مالمستهاش انا وندى اخوات مش اكتر
روفيده بارتباك: انت قليل الادب انا مش قصدى كدا
سيف ضحك على ارتباكها
روفيده: برضو ما قولتليش ايه الدم ده
سيف: كنت ماشى دلوقتى بالعربيه وعمال افكر بالاحلام اللى بشوفها مره واحده افتكرت كل حاجه
وفقدت السيطرهذعلى اعصابى ودخلت فى شجره على الطريق الازاز اتكسر وجت ازازه فى كتفى بس كدا
روفيده قامت تشيل التى شيرت عشان تشوف كتفه
سيف بعد عنها وحضن نفسه بإيده وقلد البنات: انتى بتعملى انتى عايزه تضيعى سمعتى وتوقفى سوق عرسانى اكمنى بنت عسل وقموره ولوحدينا تخلى الشيطان يضحك عليكى يا لهووووى
روفيده ضحكت: ايه كل ده بجد اصبر عشان اشوف كتفك
وراحت جابت شنطه الاسعافات الاوليه
وجت شافت جرح سيف ووقفت تطهر الجرح وسيف بيبصلها بصتله وابتسمت
روفيده: ايه
سيف: ايه
روفيده: ايه انت بتبصلى كدا ليه
سيف: وحشتينى اوووى
روفيده بخجل: وانت كمان وحشتنى اوووى
سيف: اسكتى بدل ما اعمل تصرف مش هيعجبك
روفيده غصب عنها ضربته فى الجرح
سيف اااه
روفيده: اسفه اسفه كان غصب عنى
نسيب الناس اللى تشل دى
ونخرج بره شويه
مازن: انا مش مصدق اللى حصل ده
مهند: ولا انا يعنى الحزن اللى حزناه السنين اللى فاتت دى طلع على الفاضى
مريم ضربته فى كتفه جامد: هو ده اللى همك انا مش عارفه ازاى اتجوزتك انا ناقصه جنان
شادى: مبدأيا كدا الواد ده يطلع بره
ادهم: هو فين ياسين
ساره: انا ما شفتهوش من ساعة ما سيف ظهر
شادى بيوشوشها فى ودنها: حضرتك مركزه اووى مع ياسين
ساره ببرود: شئ مايخصكش مش يمكن بحبه
شادى: نعم ياختى
ساره: ايه هو حلال ليك وحرام عليا
شادى: ساره اتلمى عشان مامدش ايدى عليكى
مهند: انتم بتقولو ايه ها
شادى: انت مالك يا فضولى ما تركز مع مراتك وسيبنا فى حالنا
ادهم: ايووووه بأه الحقو عشيلكو يومين عشان اول ما تتجوز انسى الرومانسيه
رولا: بتقول حاجه يا حبيبى
ادهم: لا يا عمرى ده انا بحكيلهم اد ايه الجواز حلو
رولا: لينا بيت يلمنا
مازن: شكلك مسيطر اوووى يا ادهم
ادهم: انت مش شايف السيطره ولا ايه
مازن: كان لازم تدبحلها القطه من الاول
رنا: بتقول حاجه يا عنيا
مازن: ابدا يا حياتى بقوله شكلها دبحتلك القطه من اول يوم
رنا: اه بحسب
مهند: عيال سَكه انا من قبل الجواز وهى دبحالى القطه اصلاً
شادى: جاتكم نيله انا ابرقلها بس تكش فى نفسها
ساره: عارف ام لطفى اللى بتنور وتطفى هتلاقينى بكش هناك
شادى: اتلمى لألمك
ساره بصت للبنات والبنات بصولها بصه معناها ايوه
مازن: مبدأيا البصات دى مش عجبانى ابدددا
ساره بصت لشادى وقالت بابتسامه صفرا: ليه شايفنى متبعتره ياعمود من غير كهربا يا عربيه من غير بنزين يا تسريحه من غير مرايه يا سرير من غير ملايه يا ترول الباس من غير ترباس يا قيحه يا تلقيحه يا ازازة ريحه من غير ريحه يا شعر عيره يا لون خميره يا رد الرد يا مصطبه هد يا عصايه غاليه تحت الكوم مرميه يا احممممد يا عممممر
خلصت وكل الشباب بصنلها كدا :O
رولا كانت قريبه من ساره راحو خبطو ايدهم فى بعض
والبنات كانو مبتسمين ابتسامة نصر
مهند: ايه ده بوتوجاز هب فى وش الواد
مريم: تحب باجور يضرب فى وشك انت
مهند: يا ساتر يا رب
مازن: هم الستات كدا يقرفو
ومره واحده: ااااااااه
وبص لرنا: مالك يا مجنونه قرصتينى ليه
رنا: لا ابدا يا قلبى انا بس بخلص حق الستات اللى انت غلط فيهم
ادهم: انت لسه شوفت حاجه يا حبيبى استنى بس لما تتجوز وانت تشوف ست عايزه الحرق
رولا: قصدك تقول ايه يا سى ادهم يعنى انا عايزه الحرق
ادهم: لا انا مش قصدى كدا انا قصدى ستاتهم هما انتى مفيش زيك اكيد هما مختلفين عنك فعشان كدا عايزين الحرق
شادى: هما كدا قبل الجواز والارتباط حاجه وبعد الارتباط تشوف الاستعباط
بص لساره بجنب عنيه: انا واحده صحبتى قبل ما ارتبط بيها قولتلها ضحكتك حلوه احمرت واتكسفت
ساره لسه هتتكلم شادى حط ايده على بؤها
شادى: والله ماانتى قايله حاجه ما تتعبيش نفسك يا قلبى
ساره بصتله بصه معناها انت غبى؟؟!!!!
مازن: طيب يا شباب انا هقوم اشوف روفيده واجى البيت بيتكم طبعا
دخل مازن اوضة روفيده لقى سيف نايم على السرير وروفيده نايمه فى حضنه والاتنين نعسانين
وكانت الابتسامه ما زالت مرسومه على وشوشهم
ابتسم مازن وخرج وقفل الباب براحه عشان مش يصحو
وخرج وكمل الليله مع الشباب وطبعا كانو بيخانقو البنات بس البنات كانو بيفوزو بسبب لسانهم الطويل
واذن الفجر الشباب نزلو صلو فى الجامع والبنات صلو جماعه فى البيت ولما رجع الشباب اخدو البنات وروحو ومازن نزل يوصل رنا ورجع
وجه تانى يوم والكل نايم من السهر وتعب امبارح
صحيت روفيده قبل سيف لقت نفسها فى حضنه اتكسفت وقامت بسرعه
اخدت دش واتوضت وصلت ودخلت عملت فطار ليها ولسيف وحضرته على السفره
ودخلت تصحيه: سيف
سيف: اممممم
روفيده: قوم يلا
سيف: اه طيب ان شاء الله حاضر
روفيده: انت يا زفت يلا اتنيل اصحى
سيف فتح عين واحده نص فتحه يعنى مفتحهاش كامله وبصلها وقالها بصوت ناعس: ايه يا روفى قلبتى النسخه المصريه ليه
روفيده: طب قوم بدل ما اوريك النسخه المصريه اللى بجد
سيف لف وادالها ضهره وحط المخده على راسه
روفيده: طيييييب
وخرجت سيف استغرب انها خرجت بس قال كويس عشان يكمل نوم وغمض عينه ولسه هيروح فى النوم حس بتلج فى ضهره
قام مفزوع ووقف على السرير: ايه فى ايه
روفيده: انت اللى مش رضيت تقوم بالزوق فاستخدمت طريقتى انا
سيف: اقول ايه غير حسبى الله ونعم الوكيل
روفيده: يلا بأه يا سيفو عشان الاكل هيبرد
سيف بصلها باستغراب: ايه الحنيه دى انتى مش مطمنانى
روفيده: كدا مش عاجب وكدا مش عاجب ايه الراجل ده يا ربى وبعدين انت ناوى تفضل واقف على السرير كدا كتييير
سيف: انا هنزل بس اى حركة غدر ماتلوميش الا نفسك
روفيده: اوك يلا انزل بأه
نزل سيف وروفيده اخدته للسفره
سيف بص للسفره باستنكار: ايه ده مربى وتوست بس
روفيده: ما هو ده اللى اقدر عليه
سيف: الله يكون فى عونى
قعدو وروفيده حتطله مربى على التوست وادتهاله
سيف: وانتى مش هتاكلى
روفيده: لا انا فطرت
سيف: يعنى مش هتفطرى معايا
روفيده: تؤ
سيف قطم قطمه من الساندوتش
ولسه هيتكلم سيف مسك كوبايه المايه وشربها كلها مره واحده
روفيده: مالك يا حبي
سيف: ده ايه ده دى مش مربى دى شطه ناااار
روفيده: ايه ده شكلى جبت برطمان الشطه بدل برطمان المربى
سيف: وحياة امك ياختى وقلد صوتها: شكلى جبت برطمان الشطه بدل برطمان المربى ولا انا فطرت
وبعد كدا قال بصوته: وحياة خالتك لافرجك
جريت روفيده وسيف وراها واول ما مسكها قعد يزغزغ فيها لغاية ما عنيها دمعت ووشها احمر
روفيده: خلاااااص حرمت وبعدين استنى انا عيزاك فى حاجه
سيف: اؤمرى يا سمو الاميره
روفيده: احنا لازم نروح لمامتك
سيف: اوك البسى هعزمك على الفطار وبعدين نروح لماما
روفيده: اوك
قامت لبست روفيده ونزلو فطرو وراحو على بيت مامته
سيف رن الجرس والخدامه فتحت
الخدامه اول ما فتحت ولقت سيف قصادها
الخدامه صوتت: عفريت عفريييييييت
وفقدت الوعى
جه على صوتها ابو سيف ومامته
مامته اول لما شافته الدموع اتجمعت فى عيونها ووقفت مصدومه كانت هتقع من طولها بس ابو سيف سندها
سيف: ايه يا امى انا موحشتكيش
امه: انا اكيد بحلم
سيف: تؤ انا هنا بجد
ابوه: ازاى
سيف وطى على الخدامه شالها وقالهم: طيب نفوق الغلبانه دى وبعد كدا نتكلم
روفيده: نعم حضرتك بتقول حاجه
هنا ابوه وامه لاحظو ان روفيده معاه
دخلو كلهم حط الخدامه على الكنبه وجه يفوقها
روفيده وهى بتبعده: عنك انت يا حياتى
وفوقت هى الخدامه
وقعد سيف يحكى لاهله اللى حصله مامته عيطت وباباه ما كنش مصدق
سيف: بابا انا اسف على كل اللى عملته قبل الحادثه ماكنتش اعرف الحياه صح بس اوعدك هكون راجل يعتمد عليه
أبوه حضنه: انا اللى اسف انى قسيت عليك يا ابنى
حضنتهم الام: ربنا يخليكم ليا يااااا رب
روفيده: وانا ماليش مكان فى الحضن ده
شدها سيف لحضنه
وبعد كدا قعدو
مامته: طب والبنت اللى انت اتجوزتها دى يا بنى مصيرها ايه
سيف بص لروفيده
روفيده: هيخليها على ذمته يا ماما هى ملهاش غير سيف بعد ربنا دلوقتىوهى ومامتها محتاجنله
سيف ضغط على ايدها وابتسملها وهى ابتسمت
وقضو معاهم الوقت لغاية ميعاد الغدا
واتغدو فى جو اسرى دافى ومليان ضحك
وبعد الغدا فون روفيده رن وكان مازن
روفيده: الو يا قلبى
سيف بصلها بصه معناها نعم ياختى
روفيده كتمت الضحكه وسمعت مازن: الو يا موزتى بقولك انتى فين انتى والواد جوزك
روفيده: عند ماما وعمى
مازن: طب احنا هنتجمع ناو فى النادى هنشوف وشكم ولا لا
روفيده: هفكر
مازن: أبو التناكه اللى انتى فيها دى جاكم القرف
روفيده: هشوف سيف وهبقى ارد عليك
وقفلت معاه
بصت لسيف
سيف بيقلد صوتها: الو يا قلبى
روفيده ضحكت جامد من قلبها
روفيده: ايه
سيف: ايه انتى انتى ماتعرفيش انى احتليت قلبك ومفيش مكان لحد تانى
روفيده: تؤ شأعرف
سيف: يسلااام
ابوه وامه كان بيبصلهم ومبتسمين
مامته: ربنا يسعدكم دايما يا ولاد عارف يا سيف روفيده قعدت فتره طويله مش بتنطق بعد ما افتكرت انك سيبتنا ولا لما روحتلها ونطقت قعدت تقولى سيف وحشنى انا عايزه اروحله وتقعد بالساعات كل يوم تكلمك عند المقابر
سيف: يا لهوى يا ناس بتموت فى دباديبى
روفيده: لا
سيف: يسلااااام
روفيده: احم مازن بيقولى انهم هيتجمعو فى النادى هتروح ولا ايه
سيف: اوك هاخد دش سريع واغير هدومى ونروح اوك
روفيده: اوك
طلع سيف اوضته
روفيده بصت لمامته: هو ممكن يا ماما بعد اذنك انتى وعمو انى اقوم احضر هدم سيف
مامته: اكيد يا حبيبتى البيت بيتك وده جوزك
قامت لاوضة سيف
فتحت الدولاب وطلعتله هدوم
جت تخرج سيف مسكها من ايدها: رايحه فين يا شابه
روفيده: سيبنى يا سيف الله يخليك
سيف: هاتى بوسه وانا اسيبك
روفيده وشها إحمر: سيف بس بأه سيبنى
سيف: طب بصيلى طيب
روفيده بصت لقت سيف لافف فوطه بس على جسمه
صوتت وشالت ايدها من ايده وطلعت تجرى وهى وشها هيفرقع من الكسوف
وسامعه صوت ضحكات سيف
نزلت تحت قعدت مع اهله وهى مش على بعضها
نزل سيف وهو بيصفر روفيده اول ما سمعته ارتبكت اكتر
واهله اخدو بالهم وضحكو وخلوها تتوتر اكتر
سيف: يلا يا روفى
روفيده: احم يلا
وخرجو مع بعض وامه بتدعى من قلبها: ربنا يسعدهم دايما
§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§
ركب سيف العربيه وروفيده ساكته
سيف: مالك يا بنتى انتى شوفتى عفريت من ساعة ما شوفتينى وانتى ساكته
روفيده: سيف انا شوفتك بالفوطه متخيل الموقف
سيف ضحك: امال هتعملى ايه فى يوم الفرح
روفيده قعدت تضربه بإيدها جامد: انت قليل الادب ومش متربى وعايز تتربى من اول وجديد
سيف كان بيضحك ووقف ايدها: والله ما خايف غير على ايديكى
روفيده بصت ادامها وربعت ايدها
روفيده: رخم
سيف: عارف
روفيده: مجنون
سيف: مجنون بيكى
روفيده: اووووف مستفز
سيف مسك ايدها وباسها: مالك بس يا قلبى متعصبه كدا ليه
روفيده: سوق وانت ساكت
سيف قعد طول الطريق بيغنى
ووصلو النادى
اتصل سيف بأدهم
سيف: أبو الأداهيم انت فين
ادهم: ايوه يا برنس احنا كلنا فى الكفاتريا
سيف: اوك احنا جايين
وهما داخلين سيف شاف ياسين
مسك ايد روفيده اكنه بيثبت الملكيه
روفيده استغربت من حركته بصت مكان ما بيبص شافت ياسين جاى عليهم ومبتسم ابتسامه حزينه
ياسين: حمدلله على سلامتك يا سيف
سيف: الله يسلمك بعد اذنك لاننا متأخرين
ياسين: اه طبعا اتفضلو
اخد سيف روفيده ومشيو
وراحو الكفاتريا دخلو لقو حرب جوا
البنات بتتخانق مع الولاد
سيف: فى ايه يا جماعه
ماحدش رد عليه وفضلو يتخانقو
روفيده: اهدو يا جماعه انتم كبار ما ينفعش كدا
ماحدش رد
سيف بصوت عالى: بسسسسسسس
كلهم سكتو وبصولو
سيف: مالكم
رولا: انا عايزه اطلق من الراجل ده وينسانى وينسى البيبى اللى فى بطنى
رنا: وانا عايزه اطلق من الكائن الغريب ده
مريم: وانا عايزه اطلق من المجنون ده
ساره بشر: وانا عايزه اقتل الكائن ده
سيف: ليه كل ده
رولا: ينفع اتوحم على حاجه وهو ميجبهاش
ادهم: ما إنتى اللى مجنونه رسمى طالبه برتقان فى نص الصيف لا ومصحيانى بعد ما نمت يا دوب بساعه عشان اجيبهولك ادعى عليكى اقول ايه
روفيده: يسلاااام وليه ما تنزلش تدور على برتقان ادام هى بتتوحم
سيف: نعم وهو ينزل ليه اصلا وتصحيه من النوم ليه أساسا
روفيده: يسلااام يعنى انا لما ابقى حامل واتوحم مش هتجبلى اللى بتوحم عليه
سيف: لا
روفيده: طلقننى يا سيف
وراحت قعدت جنب البنات
وسيف قعد جنب الولاد
وبصو لبعض بتحدى
مهند: ستات فاضيه كل اللى عليهم يؤمرو وعايزين الرجاله الغلابه تنفذ
رولا: بس الستات هى اللى بتستحمل القرف كله
ادهم: يسلام فى ايه بأه وانتم كل طلباتكم مجابه
ساره بخبث: خلاص هنطلب من ناس تانيين
مهند: ازاى يعنى
مريم: انتم مش عايزين تنفذو طلباتنا براحتكم واحنا هنروح نطلب من ناس تانيه تقدرنا وتقدر طلباتنا
روفيده: فكره حلوه
سيف: نعم ياختى
روفيده: ايه ما سمعتش هنروح نطلب من رجاله غيركم طلباتنا
روفيده خلصت الجمله ومره واحده............
ΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔΔ
هنعرف الحلقه الجايه انا اسفه بجد على التأخير ده كله اتمنى البارت يعجبكم