الصفقة

الافلاس

  عمي كمال صاحب بابا وكثر من خوه بداو بزوج وكبروا بزووج..كان شريكو..وحتى فاش فضاوا الشراكة وكل واحد استقل براسوو..بقات علاقتهم ديما قوية يستاشروا مع بعضهم..ويساندوا بعضهم..كانوا كل مناسبة يتجمعوا العائلتين..بنتو سارة وولدو حسام كانوا بحال خوتي..وخا حسام كنت تنحس بيه اهتمامو وشعورو من ناحيتي تعدا الاخوة لكن ديما تنخلي بينا الحدود وتنعتبرو اخ لا أكتر ولا أقل.. واخا كان وسيم وفيه كاع الشروط لي تخليك تتغرمي بيه...وحتى سارة واخا مشات مع راجلها لامريكا بقا الاتصال دائما قائم بيناتنا...
كمال:معرفتش كيفاش باباك غامر هاد المغامرة..وانا عهدي بيه متبت وحكيم فقرارتو معرفتش علاش متشاورش معايا وحنا تنتشاوروا فالصغيرة والكبيرة..علاش علاش..كون غير بقينا شركا ميوقعش هادشي وبقا يبكي وتنهدن فيه ونبكي..
قرب عندي حسام عنقني وتيصبرني..وتيهدن باباه لي كان فيه السكر وخاف عليه..
أنا:عمي واش مكاينش شي حل قولي؟؟!!!
كمال:بنتي باباك ضيع فلوس كثيرة ثروة تقريبا وانا معنديش السيولة تكفي باش نسدد الديون وباش نخلص المستحقات لي عليه..
أنا:نبيعوا كلشي لي عندنا أعمي..
كمال:راه البنك أبنتي الى مسددتوش ليها غاديا تبيع كلشي ومحال حتى ترض فلوسها ونزل راسوا للأرض..
أنا :اذا مكاين حتى حل!!
مجاوبنيش..وفهمت بأن كلشي ضاع كلشي مشا سي البناني قريب يعلن الافلاس ديالو ..ونوليوا نتباعوا كاملين فالمزاد العلني...بقيت نبكي بحرقة وماما تهدني..
ماما:أهم حاجة ندعيوا مع باباك يولي لباس أما الفلوس حنا لي درناهم ماشي هوما لي دارونا..هدا هو كلامها من ديما حيت كانت مسكينة قانعه ..متيهموها لا فلوس لا أملاك..لكن بابا مسكين الى فاق شنو غادي تكون ردت الفعل ديالو!؟واش يقدر يعيش فالفقر وهو ولد الخير تزاد فيه وكبر فيه..!