الايام غاديا عادية ..وهادئة..هو مكاينش فالدار..مكاين لي ينغص عليا حياتي..تندور ونجري بحال ..الفراشة..النهار كامل مقسماه ما بين ماما فتيحة..وبين المسارية فأحضان الطبيعة..كنت ديما كنحاول نقرب من ماما فتيحة ...نسولها على يوسف حياته ماضييه..لكن كنت تنحس بيها مازال موصلتش لديك الدرجة باش تفضفض ليا..مسكينة كانت باينة هازة هم كبير..وسر خطير...
داك الصباح مشيت عند ماما فتيحة..هي كانت تترفض تخرج من بيتها..وكنت مقررة نخليها تخرج..
انا:ماما صباح الخير كيف صبحتي!؟
هي:صباح النور بنتي الحبيبة ..الحمد لله والشكر لله..وابتاسمات ليا ..و حسيت بحال حنان ماما..مكاين فرق..!!
انا:ماما الحبيبة..ياك انا عندك عزيزة؟مغادي ترفضي لي حتى طلب!
هي:لي بغيتيها ابنتي..انت راه فمعزت بنتي لي مولدتهاش!
انا:ماما بغيتك تخري تفطري معايا بره فالجردة..كاينة الشميسة غزالة..ونيت راني قنطت نفطر بوحدي..ودرت راسي مقلقة
هي:بنتي كان على عيني راكي عارفة صحتي عيانة..ومتنوضش..غير غادي نعذبكم معايا..
أنا:شكون قالك تتعذبينا..عذابك راه هو راحتي
انا..
بقات مسكينة تتبكي وعنقاتني:ديما كنت تندعي ولدي يتزوج شي بنت حنينة تحسن بيا..وربي جابك لييه..
استاطعت نقنعها..تعاونا وهبطناها لتحت للجردة..جلستها فكرسيها..تحت الظل..غطيت ليها رجليها..وجبت الفطور:الله يفرشك ويغطيك بالرضى ابنيتي..!!
انا:عطيتها تفطر..وانا معاها فساعة صفا وساعة بوح..وسولتها: ماما..فينوو بابات يوسف..؟؟
مسكينة تبدلوو ملامحها وعينيها غرغروو بالدمووع :مات ابنتي الله يرحمو ويوسع عليه فهاد النهار...مات منين كان عند يوسف 6 سنين..
بنتي قصتي انا وبات يوسف تتهضر البكم..وتتذوب الصخر..لي شافناه فحياتنا ..محال واش شافوا شي حد..
كنا صغار وتنبغيوا بعضياتنا..شوية سكتات ..شفتها تتشوف لجهة الباب دورت وجهي بان ليا الجلاد جاي:تفو بحرى غاديا تعاود ليا جا كيف النحس..جاي مبتاسم لابس كلاس كوستيم فالكحل وكرافط..كان تيحمق واعر سهيت فيه..شوية انتبهت واتفكرت شنو دار فيا؟! وخنزرت
هو مندهش ان ماماه خرجات من بيتها..فرح بزااف قرب عنقها ..وباسها فراسها..
يوسف:الوالدة شهاد المفاجأة..كيفاش طرا وجرا خرجتي من بيتك؟
هي:ولدي على السلامة..راه بنيتي ياسمين لي اصرات حتى هبطاتني..الله يرضي عليها..منين مشيتي مفارقاتنيش...هو استغرب حقاش اتا نفدت أوامروو واخا مكاينش..وواخا تكرفص عليا..
جاي لجيهتي..عنقني بحنان..وباسني على خدي:حبيبة توحشتك..
انا الارض دارت بيا بقيت صافنة ومصدومة كلي تنترعد..وهاد المرة ماشي من الخوف هاد من شي احساس معرفتوش...شافني مصدومة ومتنضحكش..قرب لودني قالي بكل قسمة:ضحكي واش نسيتي شنو قلت ليك..راه الوالدة تتشوف..
ابتاسمت بزز:على سلامتك يوسف..حتى انا توحشتك..
خالتي فتيحة تتشوف فداك التنائي لي كانت تيمثل الحب والغرام:الله يسعدكم ونشوف وليداتكم...قرب عندها وباس ليها يديها:ان شاء الله الميمة..
مشا يبدل عليه وخلاني مع ماما فتيحة..حسيت بيها عيات..مبغيتش نضغط عليها تعاود ليا..قلت نخليها لمرة اخرى..واخا كان الفضول تيقتلني..
ديتها لبيتها..بدلت ليها وغطيتها..بست ليها على جبهتها..وحيت خارجة لقيتووو حاضيني وتيتفرج فيا ..دزت من جنبوو ومشييت...شوية تبعني..جرني من يدي..ودخلني لواحد المكتب:زعما علاش تتصنعي هادشي..علاش باغا تبيني ليا انكي حنينة !!..علاش تتحاولي تخلي مي تبغيك..واش يحساب ليك هاكدا غادي نرحمك..راه عمركي تنتظري مني الرحمة..حيت حتى نتوما مرحمتوناش..!!!
انا:معندي لاش نتصنع..جيت انا هاكدا حنينة مع كلشي ..ومتنديرش هادشي خوف منك..تنديرو حيت هاكدا تربيت على الحنان والرحمة..ومك مسكينة مريضة ومحتاجاني..وهي عزيزة عليا فهمتي ..حيت بوحدها لي لقيت عندها الحنان فهاد الحبس..وانا معندي حتى ذنب..شنو درنا ليك حنا ؟؟فهمني..باش نعرف علاش تدير هكدا؟؟
بغيتي تعرفي شنو درتو ليا..بدا يحيد قاميجتوو انا تخلعت ..ودور ليا ضهروو..كان فيه آتار حروق بحال لي فماماه فرجليها..
يوسف:ها شنو درتوا ليا ..ها الآتار ديال الجبروت ديالكم..ولكن والله الى بقات فيكم؟؟!!
بحرى جيت غادي نتكلم وهو يغوت علياااا:خرجييييي خرجت بسرعة قبل ما ينقض عليا...
مشيت تنجري لبيتي..وتخشيت وسط الوسايد ..وبقيت نبكي ونبكي كنت باغا نعرف غير السر لي خازن..باش نعرف علاش تيدير معايا هاكدا!؟؟
شوية جات عندي مي زهرة:بنتي راه سي يوسف..بغاك طيبي الغدا..وطلب تديري ليه بسيطلة بالدجاج..حيت عزيزة عليه ..
انا:تيتوحم ياكل السم ان شاء الله
مي زهرة:بنتي عافاك بعدي على المشاكل ..حاولي تديري ليه لي بغا..
هو كان متصور انني معارفاش نطيب البسطيلة..مكانش عارف انها الاكلة المفضلة عند بابا..وماما علماتها لي على حقها وطريقها..
مشيت للكوزينة
مي زهرة:سمحي لي ابنتي منقدرش نعاونك..راك عارفة..وحدرات راسها..
انا:ماشي مشكل امي زهرة..غير سيري..
خرجات..وبديت نقاد فالبسطيلة..شرملات الدجاج على حقو وطريقوو بالعطرية ديال البسطيلة ..قليت اللوز ووجدتو صابوت الدغميرة بالدجاج وعسلتها..وبديت نعمرها..خشيتها فالفران من بعد ما زوقتها بليفيلي ديال اللوز..
الروايح فالكوزينة عاطية...
طفيت عليها..طلعت دوشت بدلت عليا..لبست كسوة فالاحمر طويلة..وبالسميطات..ورسمات ليا فورمتي..لبستها..عن قصد معرفتش شنو لي خلاني ندير هاكدا قاديت راسي وهبطت..
مي زهرة خبراتني انه غادي نتغداو فجناح ماما فتيحة..فرحت بزااف..
خديت ليهم البسطيلة مع العواصر..ممم غير من الديكوور تتشهي..وريحتها واصلة منعرف فيين..
شافني وشاف البسيطلة..هو يتصدم مكانش متوقع انني عارفة هادشي كامل...
ماما فتيحة:تبارك الله ..تبارك الله..بنتي حادكة ومتولة وغزالة..وشافت فيوسف:ولدي انت محظوظ ..عطاك ربي مرة كاملة مكمولة..الزين والاخلاق والحداكة..
هو قرب عندي باس ليا يديا بكل حنان حتى جاتني القشعريرة:لهلا يخطيك عليا احبيبة..
ناري ممثل بارع الشوفة باش تيشوف فيا..عينييه تيبرقو بكل حنان..
انا:ماشي شي حاجة بصحتكم وابتسمت..
صراحة كنت فرحانة حيت واخا هو مذللني..تنحس براسي كل مرة تنتصر علييه..
ماما فتيحة:بنتي شكون علمك الطياب..واخا كيف ماقال لي ولدي نتي بنت الفشوش وباك ولد عائلة كبيرة
انا:ماما اخالتي هي لي علماتني..بابا من عائلة كبيرة اييه...لكن ماما من عائلة فقيرة..داكشي لاش علماتني كلشي باش منطلعش مفششة وانانية..علماتني نطيب ونجمع الدار..نعتمد على راسي ماشي على الخدمات..وعلماتني اهم حاجة هي نحس بالناس..نرحمهم..ومنقساش عليهم..وشفت فيوسف بكل آنفة وعزة نفس بحال الى تنقوليه ان داكشي باش بغيتي تعدبني رلني موالفة بيه عادي...
كلينا البسطيلة لي كانت بنينة..هو غير تيخشي بلا ميشعر..بحال شي موحمة ههه
كملنا جاو الخدمات هزو الاطباق..طبعا قدام موو مغاديش يخليني نجمع الطبلة..
ماما فتيحة ..ديناها لناموسيتها ترتاح..غطيتها ونعساات..هو كان من ورايا..حسيت بيه تياكلني بعينيه..تيتأمل كل بلاصة فجسمي..قرب عندي شدني من يدي هزهم باسهم بكل حنان :شكرا !!
انا مشلولة معارفة منعمل.شوية قرب لوجهي باسني..وهاد المرة بوسة غير كلها حنان..وشغف..هزاتني لعالم غير مادي ..بحال الى تنحلم او تنتخيل..ذبت بين يديه..ولقيت راسي بلا منشعر تنتجاوب معاه..حتى شوية دفعني بجهد وخرج...!!
أنت تقرأ
الصفقة
Romansaسميتي ياسمين البناني وحيدة عند واليديا الاب ديالي غني بزاف ومعروف جيت نكمل قرايتي في فرنسا ماما ريفية وبابا فاسي هداكشي علاش انا زوينة بزاف هههههههه عينا خضرين وشعري صفر ولاطاي ديالي مقادة قصيرة شوية كانت اموري غادة مزيان حتى لواحد النهار اتص...
