أنا:شنو المعموول ؟؟!عافاك أي حاجة ديريها نصيفطوه لبرة!! أي بلاصة!! أنا مستعدة نفديه بحياتي!!..وغرقت فبكاء طويل
شهاب:بره معندوو ميدير ليه..سي البناني خاصو دابا غير يبعد على التوتر والحزن حاولوا تخليوه ينسى الازمة ديالوو..واخا راه صعيب مي حاولوا..وتنهد وخرج خلاني
خلاني غارقة فأحزاني وانا نفكر فبا الحبيب..كيفاش نعاونو تفكرت الصفقة!
واش هي الحل لي ترجع لبابا كلشي!؟وترجع معاها صحته وضحكته.!.ولكن غاديا ندفن راسي وحياتي ومستقبلي لمدة خمس سنين..غاديا نحكم على راسي بالسجن بدون أي ذنب او جريمة..!!
خرجت بره لقيت ماما مع بابا كان ناعس ومرتاح ..فرحت منين شفت وجهه بدات.. ترجع ليه الصحة والعافية..
طلبت مني ماما انا وهند نمشيوا للدار وهي اتبقى مع بابا..
مشيت حيت فعلا كنت محتاجة ندوش ونرتاح..وبغيت نيت نفضفض لهند..
وصلنا للفيلا دوشنا بدلنا وهبطنا نتعشاوا..كنت شاردة وتنفكر فبابا وحالو وتنتفكر الصفقة والغموض لي داير بيها.!
قفزاتني هند من أفكاري:ياسمين مالكي شاردة فين مشيتي؟؟
بقيت مترددة وفالاخير بقيت نفضفض ونعاود ليها ..حكيت ليها على الصفقة..وعلى المقابل لي مطلوب مني..حتى هند تصدمات:آش هاد الحماق..شكون هذا لي غادي يعطي هاد التروة كاملة باش يتزوجك 5 سنين..وشنو سبب الى يخلي واحد يدير بحال هاكدا ؟؟انا ختي ممرتاحش لهادشي..رفضي هاد الصفقة ..وعمي ليه رب كريم..
أنا:كيفاش نرفض اصاحبتي!؟نتي معارفاش بابا؟ واش بابا يقدر يعيش فالفقر والذل..واش بغيتيني نخسرو بمرة..انا راه نبيع حياتي كاملة على ودو اما هاد الصفقة راه غاديا نبيع غير 5 سنين من حياتي صافي
هند:واش حماقيتي؟!باغا تبيعي راسك ياك؟ايوا عمي الى ساق الخبارشنو اتقولي ليه؟مفكرتيش فهادشي؟فاش يعرفك بعتي راسك على ودوو؟راه هديك هي الضربة القاضية لي غاديا تجيب ليه النهاية ديالوو
ياسمين:بابا مغادي يعرف والوو..وحتى ماما وحتى انتي اهند مغادي تقولي والو!!
هند:صراحة انا مستغربة..واش نتي ياسمين؟؟واش مكتأمنيش بالقدر خيره وشره ..هادشي مكتاب على عمي ربي لي بوحدو قادر يفرج عليه..اما هادشي لي باغا ديري راه انتحار باغيا تبيعي رسك وللاسف بالغالي..كيفاش غادي يحترمك هادا لي باغي يشريك ؟؟ كيفاش غادي يقدرك؟؟عالم الله واش شارف أو مريض أو شي جايحة لي ضربو!!صدمتيني أياسمين والله فين طموحك.!!.فين الماستر لي قربتي تاخديه؟
ياسمين:مابقا هامني والو من غير بابا ..وانا صافي قررت قرار لا رجعة فيه..وياريت اهند بلا متسرعي وتقولي شي حاجة حيت مغادي تغير والوو!!
هند:انا عارفة راسك قاصح..ولكن عافاك أحبيبة فكري وبلا متسرعي..
خليت هند باش متزيدش تقنعني..حيت عارفاها كتعرف تقنع بالعقل..وخفت منها داكشي لاش هربت منها..
أنت تقرأ
الصفقة
Romanceسميتي ياسمين البناني وحيدة عند واليديا الاب ديالي غني بزاف ومعروف جيت نكمل قرايتي في فرنسا ماما ريفية وبابا فاسي هداكشي علاش انا زوينة بزاف هههههههه عينا خضرين وشعري صفر ولاطاي ديالي مقادة قصيرة شوية كانت اموري غادة مزيان حتى لواحد النهار اتص...
