الصفقة

المجهول

وصلت للعنوان لي قالي ..طالعا فالاسنسور وقلبي تيضرب..دخلت كان مكتب فخم وراقي..استقبلاتني سكريتيرة جميلة:مرحبا لالة شنو حب الخاطر
أنا:قولي لسي العلوي الانسة بناني هنا
السكريتيرة:تفضلي ألالة راه فانتظارك..!
دخلت عندوو كان راجل فالخمسينات ..شافني وقف
المحامي:مرحبا أنسة تفضلي!
أنا:شكرا بلا شك عارفني لاش جيت..انا هاد الصفقة مزال مفاهماهاش..
المحامي:سهلتي عليا الامر منين دخلتي ليا فالموضووع بدون مقدمات ..المهم غاديا نشرح ليك كلشي ..وديك الساعة عطيني قرارك النهائي
أنا:داكشي لي بغيت..
المحامي:الموكل ديالي سي يوسف..ابتسم ليا :عندو نفس أسمك العائلي ..سي يوسف بناني
انا:ماشي مهم مالو؟؟ مهتميتش حيت نص فاس كنيتهم بناني
المحامي:سي البناني اتصل بيا..وطلب مني نعرض عليك هاد الصفقة وها انا غادي نعرض عليك بالتفصيل شنو بغا سي بناني
سي بناني عاد جا من امريكا..مشاريعو كلها تما جا غادي يستقر هنا لمدة خمس سنين والسبب معرفتووش..المهم فاش عرف أزمة ديالكم..هو عرض يتزوجك وتخدمي عندوو مدة خمس سنين وفالمقابل ..قاطعته:ياك قلتي هو مشاريعو كلها فميريكان شنو غادي نخدم عندو؟؟!
المحامي:انا لي عارف هو لي غادي نقولها ليه اما شي حاجة خرى سي يوسف يشرحها ليك..معرفتس شنو غادي تخدمي؟؟نكمل ليك غادي تزوجيه وتمشي تسكني معاه ..فواحد الفيرمة ديالو شراها ..بعيدة كاينة فالريف..هو تيشرط عليك متخرجيش الا باذن ديالو.والى فكرتي تطلقي او شي حاجة غادي ياخد كلشي من باباك عاوتاني..هادشي غادي توقعي عليه..وغير تدوز المدة كل واحد يشد طريقوو وتحتافضي بكلشي المهم فكري مزيان وانا فانتظار ردك..
أنا:انا بغيت تشوف هاد السيد واش ممكن..
المحامي:للاسف..السيد يوسف ميمكنش تشوفيه..راه داير ليا وكالة..مكلف ليه انا بكلشي وحتى بعقد الزواج..الى وافقتي غادي نصاوب ليكم عقد الزواج..وفنفس الوقت نوقع ليك كاع الاوراق لي ترد لباباك فلوسو..وانا لي مكلف نوصلك حتى لعندوو..!!
أنا:أش هاد الغموض؟؟!هذا علاش تيدير هكدا ؟؟علاش تيدللني هكذا؟؟منين باغيني على الاقل يجي هو يتفاهم معايا..
المحامي:انا لي عندي قلتو أبنتي..منقدرش نزيد شي حاجة ..حيت هاد شي لي حكيت ليك هو لي خبرني بيه سي يوسف..اما علاش دار هكدا فسي يوسف بوحدو يقدر يجاوبك...المهم فكري مزيان وانا فانتظار جوابك..غير متعطليش !!
خرجت وانا مصدومة من هادشي لي سمعت..هدشي بحال شي فيلم تركي او هندي..شكون هدا لي مضحي بتروة باش يتزوج وحدة مكلف نفسو حتى يجي يشوفها.. دابا صافي مابقا لي فين نتراجع..هاد المغامرة صافي اختاريتها وغادي نخوضها..حيت التراجع معناه حياة وصحة بابا. .
رجعت بسرعة عند المحامي:انا موافقة بشرط هادشي يتم فأقرب وقت ..حي قريب بابا يخرج من المستشفى..وشرط اخر اني منمشي عندوو حتى ترجع الصحة لبابا..وأهم حاجة بابا ميعرف حتى حاجة بهاد الصفقة..
المحام:اوكي أنسة ياسمين نخبر سي يوسف ونرد عليك..
خرجت حسيت بشوية الراحة..حيدت عليا واحد الهم..باش ميبقى ليا فين نتراجع..
مشيت للكلينك . بابا نهار على نهار تيتحسن..لقيتو ضاحك مع ماما..دكتور شهاب خبرني انه بقات ليه غير شي يامات ويخرج ووصاني عليه باش يبعد على المشاكل والضغوط..خبرته انه كلشي تحل مابقات مشاكل ..مفهم والو لكن فرح لهدشي...
كان باقي عندي مشكل واحد هو كيغاش نخبرهم..كان خاصني نحبك شي قصة فراسي تخليهم ما يحسوا بوالوو..وتبان ليهم المسائل طبيعية...
رتاحيت على بابا ومشيت..هزيت طوموبيلتي وبقيت ندوور..تندور ندور حتى وصلت للبحر..كنت كنرتاح فيه بزاااف..كان وقت الغروب..وانا تنشوف لي كوبل مقابطين وتيشوفوا جاتني واحد الكآبة..ديما كنت تنتمنى نجي انا وشي حد نكون تنبغيه للبحر ونكونوا شادين بيدين بعضنا ونشوفوا الغروب..لكن شوف الدنيا فين غادي تلوحني..ففيرمة بعيدة..مع راجل كبير عليا ..ووللمجهوول..حملت نفسي..والى دارنا نيشان...!