الصفقة

السر

حسام تيضحك :وانا تنقول مال الشركة مضوية..لالة ياسمين منورانا
أنا وتنحاول نخلي حسام ما يشك فوالو:لا لالاك الضاوية هدي ههه
بقينا نضحكوا كاملين
حسام:على سلامة عمي هدي رجلي من عندوو..راه اليوم وجهو منور
فرحت بزااف حيت باقا مشفتش بابا:لقيتيني عاد انمشي دابا مزال مشفتووش
حسام:وي سولت عليك..مي متوقعتش نشوفك هنايا..وبقا يشوف فباباه لي تهرب من شوفاتو قاطعتهم:جيت نتشاور مع عمي فشي حاجة ناري شحال فضولي ديها فراسك ..حسام:هانا لالة ..ولكن بشرط الى بغيتي نديها فراسي ..يالله نتغداوا عاد سيري لكلينيك
أنا:واخا سيدي! نيت خرجت بلا فطور وجاب ليا الله نتغدا على ظهر شي حد..يالله سبقني انا هابطة..
خرج حسام وقرب عندي عمي:بنتي مزال قدامك فرصة نحبسوا هادشي ..نتي ماشي مجبرة..فكري مزيان
أنا:عمي راني فكرت وقررت وصافي عطيت كلمتي ..وراك عارفني عند الكلمة..عمي واعدني!! واعدني هادشي يبقى بيناتنا..حتى حد ميعرف بأن هدي صفقة..بغيت بابا يعرف انني غادي نتزوج عن رضا وعن قناعه..واعدني بابا ميعرف والوو!!
كمال:تنواعدك ابنتي كوني هانية..وياربي توفقك و تحميك..وباسني فجبهتي..
جيت خارجة..حبسني عمي:ياسمين ياريت متقولي لحسام والو راكي عارفاه شحال تيعزك مبغيتوش يتأتر..هزيت ليه راسي وخرجت..
كنت عارفة ان كلشي عارف حسام تيبغيني..لكنه تيبقى خويا وصديقي..قبل منخرج عند حسام اتصلت بهند وقلت ليها غادي ندوزوا من وراها للمستشفى تتغدا معانا..كان خاصني ندير شي حاجة تجمعهم خصوصا انهم بزوجهم يستاهلوو بعضهم..بزوجهم قلوبهم نقية وصافية..
هبطت عند حسام لقيتو مخرج راسو تعطلت عليه:وطلقينا سخفت بالجوع
أنا:امالك أصاحبي كرشك غاديا طيحك فبير..خليت طوموبيلتي وركبت معاه:يالله طير عند هند للسبيطار راه اتمشي تتغدى معانا
حسيت بيه بحال الى دزير..ولكن خاصو يفيق صافي يشوف حياتو..وخصوصا مع هند لب تتبغيه..حنا موالفين ديما تنخرجوا ب تلاتة هند شخصيتها القوية مكانتش تتخلي حسام يحس بمشاعرها ..جافة بطبعها..كان مسميها..الدكتور شانبوو وكنا ديما تنشدوا فيها..بوحدي لي عارفاها شحال تتبغيه وتتمناه..
وصلنا للمستشفى..شحال تنتسنوى عاد شرفات لالة هند..كانت غزالة ودايرة نظارتها الطبية لي كانوا تيعطيوها جدية وحضور كثر من سنها..
هند:اهلا ياسمين..بوراس صافا ياكما تعطلت عليكم
حسام:لا غير كنت غاندخليك نجرك من شعنانتك
هند:ايوا كون درتيها وتشوف العيالات شنو غادي يديروا ليك..بحكم انها طبيبة نساء وتوليد..بقات تشوف فيا:ياسمين صافا حبيبة الدكتور شهاب طمني على عمي راه حالتو استقرات
أنا :ايوا الحمد لله
هند حسات بيا شنو عندي وبغات تبدل الموضوع:عرفتوا تشهيت الحوت شحال مكليتوا..شنو رأيكم؟؟
حسام عجباتو الفكرة..وانا مكان فارق معايا والو حتى الشهية معنديش..
وصلنا لمطعم جنب البحر غير ديال السمك..حسام وهند ناضوا تيختاروا السمك راسهم ..انا غير شاردة وتنفكر فالمجهول..عييت منتخيل شنو مخبي ليا لكن كلشي كان مبهم وغامض!!..حاجة وحدة لي باينا لي هي صحة بابا وهناه!!
كليت غير شوية..واستأذنت منهم:خاصني نوض دابا كولوا فراحتكم عندي شي غرض قريب من هنا!!
حسام:بلاتي نوصلك!
أنا:لا خاصني نقضيه بوحدي يالله بصحتكم نتشاوفوا. غمزت هند فغفلة من حسام..وفهماتني شنو بغيت ندير..
خليتهم ومشيت...خديت طاكسي ونيشان للكلينيك...